البارت الخامس
رواية عنفوان مهاجر
بقلمي سميرة ابو رمضان
اللهجة العراقية بقلم المبدعة نورا ناصر
💜💜💜💜💜💜💜💜💜💜💜💜💜💜💜💜💜
توجه لداخل بيتهم بسرعة وشاف امه لازمة بطنها وتتألم
باوع حسن لمنال وكلمهه : لازم ناخذها للمستشفى
منال : شلون ناخذها وامي ماتكدر تمشي لان موجوعة هواي
سكت حسن وهو محتار ويفكر يلكى حل
حسن : ناخذها بعربانة الخضرة الي كدام بيتنه
باوعتله منال ثواني وهزت راسها بهدوء ماكو اي خيار كدامهم غير انو يروحون للمستشفى لان امهم جانت تصرخ من الوجع
توجه حسن للعربانة ورفع الفرش وخلاه على الكاع وخله فوكه الخضرة ولزم العربانة وصار يدفعها باتجاه الباب
وبهاي اللحظة جانت منال لازمة امها وساندتها وتمشيها لباب البيت
باوعت فاطمة كدامها بألم وشافت العربانة وكالت : شراح تسوون
حسن : مراح نسوي شي يله اصعدي
صعدت فاطمة بالعربانة بألم وحسن باوع لمنال وكاللها انت كوديهه من كدام واني ادفعها من ورى
منال : خوش
بدا حسن يدفع ومشت العربانة ووصلوا للشارع الثاني ووكفوا وهم محتارين
وجان اكو كدامهم منحدر قوي ونزول شديد وهمه ..يدفعون العربانة واكيد العربانة راح توكع ليجوة بسرعة بس المشكلة انو امهم بالعربانة
حسن : منال انتي سوي الي جنتي جاي تسوينه ولزميها من كدام بس وجهيها واني راح اتكفل بالباقي
منال رادت تعترض بس سكتت لان وضع امها مايسمح وهيه واثقة من اعماقها انو اخوها ذكي ، هزت راسها بهدوء وسوت الي طلبه منها
وحسن عكس وكفته انطاهه ظهره للعربانة واخذ ثقل العربانة بجسمه ونزع حذائه ولزمه بأيده
حسن : يله امشي
تحركوا هو ومنال وخلوا العربانة تمشي وباول خطوة صارت العربانة تنزل بسرعة خلت فاطمة تصرخ بألم ورعب
لكن حسن جان عنده رأي ثاني وبسرعة خله حذائه بين العربانة والتاير وشد عليه بكل قوته هالشي سوى اعاقة لحركة العربانة وخله سرعتها تبطئ بشكل يكدرون يمشون
