بارت السادس
رواية عنفوان مهاجر
بقلمي سميرة ابو رمضان
اللهجة العراقية بقلم المبدعة نورا ناصر
💜💜💜💜💜💜💜💜💜💜💜💜💜💜💜💜💜
جان حسن واكف يباوع كدامه بحيرة ودهشة جان واكف بين الاشجار والورد مكان كولش حلو نكدر نكول عليه جنة على الارض لشدة جماله
تقدم حسن بخطواته وهو بعده يباوع بانبهار وبعدها زاد انبهاره لمن شاف كدامه قبور ، اقترب حسن من القبر الي جان هو قريب عليه وشاف عليه صورة جندي
باوع على القبور بحيرة لان كل المقابر الي شافها من قبل بيها هواي تتجاوز اعدادها المئات الا هاي المقبرة لايتجاوز عددها ٢٠٠ قبر
كمل حسن مشيته باتجاه المدرسة وبراسه تدور الافكار والتساؤلات عن هاي القبور دخل حسن للمدرسة ومضى اليوم الدراسي بي وبعدها طلع حتى يرجع للبيت لكن موضوع القبور بقى عالق بمخيلته وقرر يسأل واحد جبير عن الموضوع
شاف حسن واحد من الرياجيل الكبار كاعد كدام الكهوة مالته فتوجه اله حسن
حسن : السلام عليكم
الرجال : وعليكم السلام
حسن : عندي سؤال اكدر اسألك يا عمو ؟
الرجال : اي تفضل ابني
حسن : من رحت صوب الطريق الجبلي باتجاه المدرسة شفت كم قبر هناك حوالي ٢٠٠ قبر ليش هذول القبور وحدهم وليش كل هاي الورود والاشجار داير مدايرهم عبالك حديقة مو مقبرة ؟؟
الرجال : اي صحيح ابني هذول قبور جنود تابعين للجيش العراقي
حسن : شنو يعني الجيش العراقي ؟
الرجال : اكو بلد عربي اسمه الجمهورية العراقية
حسن : وين صايرة هاي
الرجال : بعيدة من هنا
حسن : لعد شلون وصلت جثثهم لهنا وهم من العراق ؟؟
الرجال : اسمع ابني بسنة ١٩٤٨ من دخلوا اليهود واحتلوا فلسطين .. الدول العربية اجتمعت وأسسوا جيش سموه جيش الانقاذ كل فئة من الجيوش تقدمت لمناطق معينة .. وبهاي اللحظة الي كانت الجيوش بيها تتقدم وتواجه العدو اجه امر بايقاف اطلاق النار
لكن الجيش العراقي رفض وقف اطلاق النار الا بخروج اليهود من الارض وبقى يقاتل ويحارب وطرد كل اليهود من الاراضي الي استولوا عليها ووصلوا لحدود منطقة اسمها طول كرم وبهذيج المنطقة الدول العربية جبرت الجيش العراقي وأمرته بان يتوقف لهنا وخلال هاي المعركة الي صارت بين الجيش العراقي واليهود استشهدوا هواي ابطال دفاعا عن فلسطين ومن ضمنهم هاي المجموعة الي شفت قبورهم .. واحنه كأهل فلسطين وبعد مخلصت الحرب اخذنا شهداء الجيش العراقي ودفناهم وزرعنا الورود والاشجار حولهم تكريما الهم بمنطقة مخيم عسكر القديم ...
