To Yohann (BxB) - Edited

Chapter 34: Finally

Chapter 34: Finally

Sari-saring reaksyon ang pinakita ng mga bisita sa party sa nasaksihan nila. Narinig nila lahat ng mga pinag-usapan nina Zacheous at Yohann. Karamihan sa kanila ay hindi inasahan ang confession na nangyari sa pagitan ng dalawa. Ang iba naman ay naninibago dahil unang beses nilang makakita ng lalaki na nagtapat ng pag-ibig sa kapwa lalaki. Sa kabila ng pagkagulat ay ang paghanga nila sa tapang ni Zacheous na hindi inisip ang kung ano mang mga negatibong reaksyon ng iba. Lahat sila ay inabangan ang huling mangyayari at kinakabahan sa maaaring desisyon ni Yohann.

Maski si Markus ay hindi inasahan ang mga sinabi ni Zacheous. Napahinga siya sa binata dahil tinupad nito ang usapan nila na hindi sasabihin kay Yohann ang pinag-usapan nila hangga't hindi nito sinasabi kay Yohanne ang lahat. Nagulat din siya sa sinabi ni Zacheous na may napagkasunduan pala sila ni Yohanne, kaya pala iba ang mga nangyayari sa mga nagdaang araw. Pero sa nasaksihan niya ng gabing 'yun, nakita niya kung gaano kaseryoso si Zacheous kay Yohann at hinihiling niyang maging maganda ang kalalabasan.

Nanatili namang tahimik na nakatingin si Xian kina Zacheous at Yohann. Pinaghalong selos at inggit ang nararamdaman niya. Aminado naman siyang may nararamdaman pa rin siya kay Yohann at alam din niya na hindi na 'yun masusuklian kailanman. Nainggit din siya kay Zacheous dahil sa tapang nito na iparinig sa mga bisita sa party ang nararamdaman niya kay Yohann. Hindi kagaya niya na matapang lang kapag sila lang dalawa ni Yohann pero hindi man lang niya kinuwento sa ibang mga tao ang relasyon nilang dalawa at siya pa ang unang tumalikod sa pangako. Naging duwag pa siya lalo na nang malaman ng mama niya. Hindi kagaya ng nasaksihan niyang ginawa ni Zacheous na sa harap ng ama ni Yohann at mga taong hindi pa niya kilala, nagtapat siya kay Yohann. Mahal niya si Yohann at tanggap niyang hanggang magkaibigan nalang silang dalawa. May closure na silang dalawa at hiling niyang maging masaya ito.

Lahat ng mga bisita ay nagulat sa ginawang pagbitaw ni Yohann sa kamay ni Zacheous. Inasahan nilang tatanggapin nito ang sorry ni Zacheous at manatiling hahawakan ang kamay nito. Nagkatinginan naman sina Yohanne at ang mga kaibigan niya. Gano'n din sina Brix at Liam. Sinubukan nilang kunin ang atensyon ni Xian pero nakatingin pa rin ito kina Yohann at Zacheous. Maski ang eksenang 'yun ay nasaksihan ni Ryle kahit pa medyo malayo siya sa pwesto ng dalawa.

"Y-Yohann..." Alangang banggit ni Zacheous sa pangalan ni Zacheous. Napakuyom siya sa kamay niya nang bitawan ni Yohann ang kamay niya.

Ibig bang sabihin, wala na talaga? Hindi niya ako pinapatawad? Tanong ni Zacheous sa sarili niya. Iniisip niya na hindi sapat ang ginawa niya at sobrang galit talaga si Yohann sa kaniya. Pilit niyang nginitian si Yohann saka binaba ang kamay niya.

"Tanggap ko na Yohann, sorry sa lahat ng mga ginawa ko - - -."

"Annoying." Agad na ngumisi si Yohann at hinawakan ang dalawang pisngi ni Zacheous. Pinikit niya ang mga mata niya at hinalikan si Zacheous sa harap ng lahat ng nandu'n. Kumakabog naman ang puso ni Zacheous at nanatiling nanlaki ang mga mata niya nang halikan siya ni Yohann. Nang maramdaman niyang gumalaw ang mga labi ni Yohann, sumilay ang ngiti sa labi niya sa pagitan ng halik nilang dalawa at pumikit siya. Pinulupot niya ang mga braso niya sa beywang ni Yohann at hinalikan ito pabalik. Napangiti rin si Yohann at pinulupot ang mga braso niya sa leeg ni Zacheous mula sa mga pisngi nito at sinusundan ang mga halik ni Zacheous.

Saka lang sila tumigil at natauhan nang marinig nilang nagpalakpan ang mga tao sa paligid nila. Minulat nila ang mga mata nila at bumalik sa pagiging maliwanag ang venue. Nakita nilang nakangiti ang mga bisita habang nakatingin sa kanilang dalawa. Napatingin si Yohann sa papa niya at nakitang nakangiti ito sa kaniya. Sunod niyang tiningnan si Yohanne. Sinubukan niyang basahin ang reaksyon nito pero nanatili lang itong nakangiti at tinanguan siya. Namalayan din ni Yohann na nakatingin na siya kay Xian pero ngiti lang din ang binigay ni Xian sa kaniya kaya nginitian din niya ito pabalik.