عفوا ايها الشبح ( احببتك)

البارت الاول من عفوا ايها الشبح ( احببتك)

بيقولوا كل بني آدم له من اسمه نصيب بس انا نصيبي في اسمي كان زايد حبتين وكل اللي حصلي ووصلته كان بسبب نصيبي في اسمي الساعه دلوقت ١٢بالليل وانا مش لاقيه مكان اروحه ورجلي تعبت من كتر المشي وحالتي يرثي لها وجعانه جدا وهلكت من كتر المشي لكن للأسف مابقاش عندي اي مكان اقدر اروحه كل حاجه ضاعت مني في غمضه عين وعشان تعرفوا ايه اللي وصلني للي انا فيه دلوقت لازم احكيلكوا حكايتي من الاول واعرفكم بنفسي انا اسمي لين عمري ٢٣ سنه جميله لكن جمالي متواضع بس بيقولوا اني روحي حلوة بزيادة مطلقه وانسه في نفس الوقت توهتوا مني صح ماتقلقوش هتفهموا ازاي لكن قدام شويه المهم طول عمري البنت المطيعه الخدومه اللي بتيجي ع نفسها عشان ترضي اللي حواليها و اللي ماتعرفش في الدنيا غير كلمه حاضر ونعم وبس وطبعا دي كانت بدايه المأساة ابويا راجل متسلط وعنيد والرحمه بالنسباله هي القرص اللي بتتفرق ع روح الميتين في القرافه امي ست سلبيه طيبه لكن شخصيتها ضعيفه وعندها عقدة الرجاله لا مش العقدة اللي فهموتها عندها عقدة ان خلفه الرجاله سند وعزوه وان الراجل مابيغلطش مهما عمل والبنت لازم تتكسر رقبتها ومالهاش حقوق وطوع الراجل وكل الصلاحيات والحقوق للرجاله وكانت دايما بتتباهي بأن امها اللي هي جدتي كانت بتميز الصبيان عن البنات وكانت في الفطار تعملهم كوبايه اللبن الصافي والقراقيش الطازة اما البنات كانوا يفطروا بواقي اكل امبارح او حتي كوبايه شاي وقرقوشتين بالعدد من اللي باقي من الرجاله عندي اخين واحد أكبر مني ب٥ سنين وده أكرم وده كان خليط من السلبيه والتسلط ميكس من بابا وماما يعني بس ماكانش عندي مشاكل معاه لاني دايما بقول حاضر ونعم وليا كمان اخ أصغر مني ب٣ سنين وده رامي دلوعه قلب ماما وبابا وده كان أكبر مشاكلي للاسف ماعنديش اصحاب بأمر من ابويا واخواتي بحجه ان الصحاب بتبوظ اخلاق بعض وطبعا ده عند البنات بس لان اخواتي كان عندهم اصحاب ولاد وبنات عادي لأنهم رجاله المهم عيشت في سجن وكنت بتعرض للاذي النفسي كل يوم وبدون اسباب منطقيه شخط ونطر وضرب وماكنتش بقول غير حاضر ونعم وكنت متكيفه مع وضعي وراضيه رغم ان اهلي وبنات عيلتي كانوا دايما بيستغربوا من ضعفي وسلبيتي وكانوا دايما بيطلبوا مني اني اعترض او اهرب من السجن ده لكن انا ماكنتش اقدر اعمل كدة خوفا من اهلي وخوفا عليهم من الفضيحه اللي ممكن اسببهالهم لو هربت او حتي انتحرت وفضلت زي مانا والايام شبه بعضها الفرق الوحيد في الأيام ان الظلم والقهر كانوا بيزيدوا كل يوم عن اللي قبله نسيت اعرفكوا اكتر ع بابا بابا اسمه ممدوح وزي ماقولتلكوا في الأول هو شخص متسلط وعنيد وكان بيعشق ويقدر الرياضه وخصوصا المصارعه والكيك بوكسينج وفي يوم وانا بحضرله العشا هو ودلوعه العيله وقفني وقالي سيبي اللي في ايدك وطلب مني طلب غريب جدا عارفين طلب مني ايه لو حابين تعرفوا استنوا البارت التاني من عفوا ايها الشبح احببتك بقلم aya Elkhwaga ولو البدايه عجبتكم رجاء ادعوني فضلا 🙏🤍