چنت بمتوسطة الطليعة ، چنت باوكح صف بالمتوسطة ، اطيكم نبذة عن صفي ، اسقط شعبة بتاريخ التدريس العراقي صف الثالث متوسط ، و يا أستاذ يجينا يكره نفسة وبليوم الي دخل بي بمدرستنا ...... المهم اجانة أستاذ جديد إسمه أستاذ حاكم ابو الفيزياء طبلنه أول درس أتعرف علينة جنه كلش خلوقين وطيبين وتحطنة عالجرح يطيب، ولهناك چان يجفص ويانا ويگولنا راح اسويلكم امتحان بعد عشر دقايق وجان ينزل الجينكو .... توسلنا ردنا بسنا الگاع وهو ولا چنه.... شويه وبدء التحشيش أستاذ بيه اسهال ؟ واستاذ شنو الامتحان .. چنت افقر واحد بالشعبة وگاعد عاقل و مايطلع مني اي صوت فگلت لصديقي(تحسين الاثول) لان بسرعة يندفع و مطيع ، گوم گول للأستاذ شنو الامتحان؟ الأستاذ گله فيزياء! وراها بدقيقة گتلة اسأله مرة ثانية أستاذ شنو الامتحان چان أستاذ حاكم يصيح عليه كلة فيزياااااااااا!! انجر بوش تحسين و گعد ، وعم الهدوء بالصف ، وراها شاورت تحسين بعد ما دار الاستاذ وجه ، گتلة روحله گلة أستاذ شنو الامتحان ، تحسين اندفع وراحله .... گله أستاذ شنو الامتحان؟؟؟؟؟ چان أستاذ حاكم يصلخه براشدي فراه فررر و خلاه يصاب بغيبوبه و وگع على الگاع ، احنا كلنا انجر بوشنا و تحسين اممدد ولاحس ولا نفس ، وراها گال أستاذ حاكم راح اروح للمغاسل واجي الگاكم جاهزين للامتحان فاني أتفقت ويا الصف على أساس تحسين مات وگتله لتحسين إذا گمت أو تحركت نصمط أبو أبوك لان اذا بقيت هالشكل راح الامتحان يتأجل وإذا تحركت راح نمتحن وگبل لايجي استاذ حاكم چان انشيلة ونفتر بالمدرسة ،،، ونصيح لا اله الا الله ونبجي وحتى طلاب المدرسة .. چان كل المدرسة عم بيها الهرج و المرج و الصفوف طلعت صارت هوسة والكل تصيح تحسين مات تحسين مات ... الله يكسر إيدك أستاذ حاكم .... ولا اله الا الله وچان يطلع المدير يبچي ويصيح يابويه الله يطيح حظي من وافقت على نقلك النا حاكم .. .. وبما أنو اني چبير الصف گلي تعال للادارة عود اني الچبير ميدري أني الي مؤلف الفلم كله ، گلي خلي يجيبون تحسين الميت يمي بلإدارة وچان نحطه عالقنفه مال المدير والمدير يهفي ويسوي تنفس اصطناعي لتحسين .. ،.. أني گلت راح ننكشف بس تحسين لاحس ولا نفس ولا حركة ميت رسمي ، بحيث أني عبرت عليه و عبالي صدك مات گمت اعرگ .. وبس ابچي وبعد عدة محاولات من التنفس الصناعي ماكو نتيجة و المدير أيس بعدها المدير إجتمع بلصف وگللنة سدو السالفة وگولو لأهله صارت حالة الوفاة بصورة مفاجئة وگلي بلحرف الواحد سد السالفة وسويها حالة عرضيه وكلكم اطبون بكلوريا أني راسا گتله لا أستاذ أني ما ابيع ضمير و صديقي علمود بكلوريا ، المهم نزل الدرجات مال تمهيدي گدامي صدگته چان نطلع بره المدرسة ونصيح لا اله الا الله و المدرسه كلها طلعت و اطشرت الصفوف والملطلطين الي چانو يلحكونا واحنا شايلين تحسين و نبچي... اخر شيء استراحينا يم محل بعيد شوية عن المدرسة وشربنا عصير و گام تحسين وكيفنا وفرحنا واني أشرب العصير وافكر شراح اگول للمدير و شلون عاش تحسين چان اشوف واحد يركض من بعيد وشايل اريل مال سلبرتي بيده وإذا هو المدير وكلنا اطشرنا وضل يفشر ويصرخ خوب اني صرت غزال من الصياح عبالك كاتل امه بعدين گام يصيح لحد يجيب ولي أمره ولا تجون أصلا ً للمدرسة كلكم مفصولين ومن صدگ انفصلنا ، أكثر من 32 طالب مجتهد چان فاد البلد ؟؟؟ المهم عاش تحسين ، و استشهد بحرب داعش هو ٥ من جماعته وداعيكم بعده عدل لان الموت ذواق و اني مو من ذوقه . #عيشتيش #امتحانيش
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
