الفصل السادس
كان الجد رءوف يحمل صينية عليها كوبين من العصير متجهاً إلى حيث يجلس حفيده مع الطبيبة آيات حين لمح السيدة صفية تجلس وحدها تمنحه ظهرها، يهتز جسدها بضعف ليدرك بصدمة أنها تبكي، عقد حاجبيه للحظة قبل أن ينادي الممرض جابر يمنحه بعض المال ويطلب منه جلب كوبين من العصير للطبيبة آيات وضيفها، ثم يتجه إلى صفية يتوقف خلفها تماماً وهو يقول:
_مين بس اللي مزعل الست صفية ومخلي دموعها الغالية تنزل بالشكل ده؟
مسحت صفية دموعها بسرعة قائلة:
_مفيش حد مزعلني ياسي رءوف، أنا بس انطرفت عيني، واقف ليه؟ ماتيجي تقعد.
وضع الصينية على الطاولة أمامها وجلس بهدوء يطالعها بنظرة متفحصة لملامحها قائلا بلهجة بها شيء من العتاب:
_بتخبي علية ؟للدرجة دي حاسة اني غريب عنك..أنا بجد زعلان منك.
قالت بسرعة:
_لا والله ماتزعل مني.
ثم أردفت بمرارة:
_أنا بس مش عايزة أشيلك همي، أنت شلت منه كتير.
_هم إيه اللي شلت منه كتير ياست ياطيبة، وهو انتِ لما تفضفضيلي باللي في قلبك بتشيليني همك؟ بالعكس بقى.. انتِ زي ماتكوني بتخِفّي همك وتحطيه في بير عميق بيسيبه في قراره وبيتخلص منه بطريقته وبتفضل ميته رايقة عشان تشربي منه وتروي قلبك وتريحيه.
ابتسمت قائلة:
_كلامك حلو قوي ياسي رءوف، عامل زي البلسم بيطيب الجرح..العلام حلو مفيش كلام.
ابتسم بدوره يناولها كوب العصير قائلا:
_طب اشربي ده و يلا قوليلي بقي إيه اللي مزعل ست الكل ومنزل دمعتها؟
تناولت الكوب منه وقد عاد الحزن إلى ملامحها، تتنهد قائلة:
_سعاد.
عقد حاجبيه قائلا:
_مش كان ميعاد زيارتها ليكِ النهاردة، هي بقى اللي زعلتك بالشكل ده؟
_سعاد تزعلني؟ دي عاملة زيك بالظبط.. ملاك ماشي ع الأرض يطيب في القلوب المجروحة.. سعاد دي تبقي بنتي اللي مخلفتهاش.
_أومال فيه إيه بس؟
_كلمتني النهاردة تعتذر عشان مش قادرة تيجي لإنها آخدة دور برد.
_ودي فيها إيه دي؟
_فيها كتير.. سعاد لو أخدة دور برد كانت برضه هتيجي، سعاد صوتها فيه حزن وألم أنا اللي عارفاهم كويس، أكيد أشرف عامل فيها حاجة،يمكن ضاربها وهي مش عايزانى أشوفها عشان منقهرش عليها، ياريتني جنبها أواسيها، ياريتني أقدر احميها بس أعمل إيه ما باليد حيلة.
شعر الجد بألمها يضربه في قلبه، لقد مست هذه السيدة قلبه منذ اللحظة الأولى لها في هذا المكان، جذبه إليها هذا الحزن الرابض بسكناتها وطيبة قلبها التي غمرت بها الجميع، يإن قلبه لحزنها حتى يشعر بأنه يخصه كما يخصها ليقول بحزم:
_مبقاش فيه حل تاني لازم سعاد تطلب الطلاق.
أنت تقرأ
ذات الكتاب الأحمر
Romanceلم يكن سحر المكان وحده ما جذبه إلى هذا المطعم المشهور، بل كان أيضاً سحر هذه الفاتنة التي جعلت العازب الشهير يشعر بأنه وجد كمالاً لطالما نشده فيها هي وهي وحدها لا غير.. ذات الكتاب الأحمر.
