الفصل الثاني والعشرون
_مالك ياأشرف حزين كدة ليه؟
_بكرة عيد ميلاد تقي.
_تقي!
_بنتي اللي كلمتك عنها.
_أيوة ايوة افتكرتها، كل سنة وهي طيبة.
_وانت طيب.. كان نفسي اشوفها وآخدها في حضني وأقولها كل سنة وانتِ طيبة.
_لا حول ولا قوة الا بالله، قطعت قلبي .
أمسك أشرف يد مسعود فجأة قائلاً:
_متعرفش تخرجني من هنا يامسعود، ساعة زمن واحدة أعايد بنتي وأرجع علطول.
ظهر الخوف على ملامح مسعود قائلاً:
_ياريت بس....
_من غير بس، أنت أب وحاسس باللي انا فيه، خرجني من هنا ينوبك ثواب، ساعة واحدة وهرجع وهديك اللي انت عايزه.
_ مش مسألة فلوس....
قاطعه قائلاً:
_عارف ياسيدي عارف، اعتبر الفلوس دي مني عشان خاطر بنتك اللي زي بنتي، اعملها العملية وطمن قلبك عليها زي ماهتطمني على بنتي.
ظهر التفكير على وجه مسعود قبل أن يطالع أشرف مشيراً بسبابته قائلاً:
_انت قلت ساعة واحدة.
كاد أشرف أن يبتسم منتصرا ولكنه أخفي ابتسامته في اللحظة الأخيرة قائلاً:
_هي ساعة واحدة هقولها فيها كل سنة وانتِ طيبة واديلها هديتها وأرجع علطول.
_تمام.. بس مش النهاردة، طقم الحراسة جامد ومش هعرف اهربك منهم، بكرة الباب الوراني عليه واحد صاحبي هاخده أشرب معاه الشاي على ماتهرب انت.. اتفقنا؟
_اتفقنا طبعا، ربنا يبارك فيك.
هز الرجل رأسه ثم ناوله الدواء وغادر.. بينما قفز أشرف فرحاً وقد قرب وقت خلاصه من هذا العذاب.
___________________
_شايفة عمايل بنتك ياهانم؟ بقالها كام يوم مسافرة مع راجل غريب ومنعرفش عنها حاجة.
طالعته حورية قائلة ببرود:
_مين قالك بس اني معرفش عنها حاجة، آيات وطاهر بيكلموني كل يوم وبيقولولي على كل حاجة بيعملوها.
قال عصام بسخرية:
_مش كل حاجة طبعا.
_أخرس أنا مربية بنتي كويس وعارفة أخلاقها، ده غير اني واثقة في طاهر والا مكنتش وافقت تسافر معاه الرحلة دي.
_ياحورية افهمي، اذا كنتِ انتِ واثقة فيها فده مش هيمنع الناس تتكلم وتجيب في سيرتها لما يعرفوا انها سافرت معاه لوحدهم.
ظهر التفكير على ملامح حورية بينما غمز رأفت لعصام قبل أن يردف قائلاً:
_الناس مبترحمش ودي سمعة عيلة بحالها متخليش قلبك الطيب يعميكي عن الغلط اللي بيحصل ده، آيات لازم ترجع والنهارده قبل بكرة.
أنت تقرأ
ذات الكتاب الأحمر
Romanceلم يكن سحر المكان وحده ما جذبه إلى هذا المطعم المشهور، بل كان أيضاً سحر هذه الفاتنة التي جعلت العازب الشهير يشعر بأنه وجد كمالاً لطالما نشده فيها هي وهي وحدها لا غير.. ذات الكتاب الأحمر.
