فـ بيت متواضع وبسيط حيل
كانت قاعدة وعيالها ملتمين حولها
تبجي بصوت يعور القلب: اااه معقوله مرت عليك سنة يا جاسم (بو مازن) للحين مو مصدقه
مازن: خلاص يالغاليه لا تبجين يمما
ام مازن (هدى): للحين احسه عايش، للحين اشوفه بكل مكان بالبيت، مو مصدقه مو مصدقه انه راح وخلاني
شيماء ببجي: يما حبيبتي خلاص، اهو محتاج دعائنا الحين
ام مازن: اااه ي جاسم (بو مازن) الله يرحمك ويغفر لك
الكل تمتم بهدوء: آمين يارب
مازن طالع مي: قومي مي جهزي الفطور
هزت راسها واهي تمسح دموعها: إن شاء الله
قامت معاها شيماء: برووح اساعدها
ام مازن طالعت بناتها، واهي تدعي من كل قلبها الله يخليهم لها ويسعدهم يارب
طالعت حوالينها، وبعدها طالعت مازن: يما وين اختك
تنهد واهو داري من تقصد: الحين بشوفها يمما
قام من مكانه واهو يبي يشوفها وين، حس بأحد يمسك ذراعه، لف وابتسم بحنان: هاا هموس
أشرت له والدموع بعيونها،
فهم قصدها: لا تخافين ماني قايل لها شي، بس بكلمها م يصير جذي م تقعد مع امها
هزت راسها براحة، واشرت له انها بتروح مع خواتها
هز راسه بايه، واهو يشوفها تروح، كمل طريجه واهو يدور على اخته الصغيرة، ويين راحت
طلع برا بالحوش الصغير، وشافها قاعده بروحها
تنهد واهو يقرب منها، قعد يمها بهدوء
بلعت ريجها ومسحت دموعها واهي ساكته
مازن: ليش قاعده هني
ردت بهدوء: ابي اقعد برووحي
مازن بحدة: ومو حاسه كلش باللي داخل
ردت بصوت عالي: واذا كنت حاسه بيغير شي، وبعدين حرام اقعد بروحي بذا البيت
عصب ومسك ذراعها بقوه: غزلان قصري حسج
امتلت عيونها بالدموع هذي اول مره يصرخ عليها جذي
اهو تنهد وسحب ايده من ذراعها وقال بهدوء: غزلان م يصير تسوين بنفسج وفيهم جذي، الكل حزين وقلبه يعوره، وأمي اكثر وحدة شنو انتي تبين تزيدينها
غزلان بتهور: كله منهااا
مازن صج عصب هالمره وكلمها من بين أسنانه: هذي اخر مره اسمعج تتكلمين عنها جذي، سامعة
غزلان بجت: ابي ابوووي مابي احد، ابي ابووي
تنهد واهو يمسح ع شعره، م يهون عليه يشوف اخته الصغيره جذي، يعتبرها بنته ودايم اهو حنون معاها، بس مقهور منها ومن اللي قاعده تسويه، قاعده تلوم امها بوفاة ابوها
استغفر بهمس وطالعها: قومي نروح داخل
قامت هالمره معاه واهي خلاص ما فيها حيل تعاند
دشو مع بعض، واهو امرها بعيونه تقعد يم خواتها
راحت وقعدت غصب عنها واهي م تبي
قعدوا يفطرون والهدوء يعم المكان، الكل ماله نفس ياكل واليوم ابوهم طاف على وفاته سنة،، اللي للحين مو مستوعبين يروح منهم واهو اللي كان محتويهم،
مازن رفع راسه بهدوء واهو يركز بعيونه على كل وحدة فيهم، امه اللي مبين على ويهها الهم، كانت تنبض بالحياة بوجود ابوه، صج كبروا بالعمر بس حبهم كان الكل يتحجى عنه
م يلومها الحين واهو يشوفها كبرت ١٠ سنين جدام
تنهد واهو يطالع خواته، يحس نفسه شايل حمل ثججيل حيل ومسؤولية، بس اكيد اهو مو عاجز عنها
تكلم بهدوء: ابي اقولكم شي وابي الكل يسمعني
الكل رفع عينه واهم يترقبون شيبي يقول لهم
مازن: ابوي الله يرحمه توفى وترك وراه أم تتمنى الخير لعيالها، وترك وراه عياله اللي راح يرفعون اسمه
ابي كلنا نكون يد وحدة، مابي احد يكون بعيد، مابي هالعايلة تتشتت بعد عينه، ابي مثل م كان يجمعنا ويقعدنا مع بعض، مابي شي يتغير
وكمل واهو يركز على كل وحدة فيهن: من هالسنة ابي الكل يرجع لدراسته وشغله، بالفصل اللي مر عذرتكم لاننا كلنا حزينين ع وفاة المرحوم، بس الحين خلاص
بعد اسبوع بتبدأ الدوامات وابي الكل يرجع حق حياته وشغله
رفعت عينها تبي تعترض بسس
اهو سكتها بعيونه واهو فاهمها عدل: لا تقولين اي شي ي غزلان، انتي بالذات بتروحين المدرسة
قالت بعناد: وانا قلت م راح اكمل دراستي
حاول يضغط ع اعصابه: غزلااان
قامت من مكانها ودموعها تنزل بانهيار: انتوا م راح تحسون فيني ابد، ابووي حبيبي راح وخلاني، شتبون اسوي يعني، ما اقدر ما اقدر اروح المدرسة، انا بكل مكان قاعده اشوفه
انام اشوفه بحلمي، اقووم اشوفه قاعد جدامي
كان اهو ياخذني للمدرسة ويردني، بس انا مابي اي شي من بعده مابي شي ماااابي
وراحت تركض لغرفتهم المشتركة اهي وخواتها
تنهد مازن وقلبه يعوره حيل على اخته، خواته الكل نزلت دموعه من كلام اختهم الصغيرة،
ام مازن تنهدت: مازن يما خلهااا تهدأ الحين
مازن: يما شلون تهدأ اهي راح تضيع مستقبلها جذي
ام مازن تنهدت ونزلت رأسها
بعدها عم الهدوء بينهم، وكل واحد راح بتفكيره بعيد
