بمكتب المحامي بدر
وقف بمكانه واهو للحين متفاجأ، هذي شيايبها هني
اهي لما حست فيه طوّل واهو يطالعها: شنوو
بدر هز راسه: تفضلي
دشت وقعدت ع الكرسي جدامه واهي تفرك ايدها بتوتر
بدر كان يطالعها واهو للحين يفكر شتبي منه
رفعت رأسها ووو: اسفه استاذ بدر، ادري اني ييت بدون موعد وانت مو متوقع هالشي، بس ابي اسالك عن شي
بدر طالعها: عن شنوو
نزلت راسها: عن شركتنا
بدر بتعجب: شركتكم! شفيها
بلعت ريجها عده مرات، واهي م تدري شهالجرأة اللي فيها اللي خلتها توصل له
بدر لما حسها متوترة: مازن اخوج كلمكم عن الشركة
هزت راسها: ايه
بدر سكت واهو مو عارف شيقول لها
رفعت راسها مره ثانية: انا ابي ادير هالشركة
رفع حاجب باستنكار: شنوو
ارتبكت وقعدت تهز ريلها بتوتر: مثل م سمعت
بدر: اخت غزلان، اللي اعرفه انج للحين بالمدرسه، شلون راح تديرين شركة كبيره واجنبية
غزلان: انا لي حق فيها، وبعدين ابوي تاركها لنا، واذا راح تساعدني اكيد راح أحقق اللي ابيه
بدر واهو يقرب ويهه منها: بتديرين شركة وانتي للحين م تخرجتي من الثانويه، وتبيني اساعدج
غزلان بحدة: وشنو يعني راح تعيد هالشي جم مرره، قلتلك الشركة لنا وانا راح اتعلم وادش
بدر بهدوء: انتي ليش مو ف المدرسة الحين
غزلان بعصبيه: وانت شكوو فيني، كل اللي ابيه انك تساعدني ادخل الشركة وبسس
بدر ببرود: وانا شكو فييج
عصبت حيل وقامت من مكانها: انت شلون تكلمني جذي
بدر قام معاها: انا اقول روحي مدرستج الحين، وكملي اخر سنة لج وتخرجي وبعدها يصير خير
غزلان: انا مابي اكمل دراستي، ومالك شغل انت
بدر ببرود: حلوو، جذي اثبتيلي انج م تحبين ابوج، وعينج بس ع الفلوس والشركة مووو
غزلان تجمعت الدموع بعيونها، كله والا احد يشكك حبها بابوها، اهي اللي تحبه اكثر من نفسها جذي يقول
بدر يكمل: والا شنو اتوقع من وحدة يايه لمكتب المحامي واهي المفروض تكون الحين بصفها
غزلان رفعت صبعها بويهه: انت شلون تسمح لنفسك تكلمني جذي، وبعدين انت م تدري باللي بيني وبين ابوي، وانا م اسمح لاي احد جذي يتكلم
تجتف بدر وعينه عليها: لا ادري، وادري واايد، ادري شلون انتي عنيده ودلوعة وتسوين اللي براسج، وبحياة ابوج كنتي دلوعه وكل طلباتج أوامر
نزلت دموعها واهي اول مره احد يكلمها جذي
بدر: شتبين الحين
صرخت غزلان بقهر: انت وااحد حقير
هز راسه بدر وراح لها جدامها: غزلان اذا صج تحبين ابوج، روحي الحين المدرسه وكملي دراستج
رفعت عيونها وطالعته: انا احب ابووي
بدر: ادري، بس لا تنسين انها وصيته، وإذا صج تبين تديرين الشركة، بالاول خلصي دراستج وبعدها انا متأكد راح تديرين هالشركة وتنجحين بعد
غزلان نزلت رأسها، تحس نفسيتها حيل تعبانه
بدر رجع مكانه، وطلع ورقة الوصية، ومدها لها: خليها عندج، عشان بكل مره تحسين نفسج م تبين تدرسين، تقرين وصية ابوج، وبعدها تختبرين حبج له
غزلان شالت الورقه بايدين ترتجف ودموعها تنزل ع خدها
بدر رحمها وبحنان: منو يايبج هني
غزلان بهدوء: تاكسي
بدر: زين تعالي معاي بوصلج المدرسة
غزلان: ماله داعي....
قاطعها: الا له داعي، م راح ترجعين بروحج مع تاكسي، يلا قومي معاي
غزلان هزت راسها وطاوعته، وطلعت معاه رايحة للمدرسه، واهي مستغربه من نفسها شلون طاوعته وردت للمدرسه اللي كرهتها وكرهت كل اللي فيها، بس اكيد راح تنفذ وصية ابوها، وبعدها راح تدير الشركة وتحقق حلمها
