اولا بس يا جماعة انا محدش اجبرني انشر يوميا. انا اللي قولت كدة علشان اعوضكم عن اسبوع الغياب. ووضحت امبارح انها هتنزل متاخر لاني هكتب وانشر علي طول. فاملوش لزوم بقي الكلام ده اللي بيتقال. والالتزام وووووو. انا بصراحة مش هرد تاني ولا هتكلم بقي تعبت بجد. وحقيقي انا مهما بعتولي وضغطووا عليا مش هنزل رواية الا لما اكون مخلصها كتابة مش لشئ. لا بس ده تعب ليا انا . بضغط نفسي بشكل ربنا وحده يعلمه خصوصا مع الظروف اللي انا فيها . بس زي مافيه ناس بتقدر وتتفهم . في ناس مش مقدرة ولا مستوعبة حاجة وبتحسسني اني مثلا بشتغل عندها وهي هتمنع نفسها عني. والله انا بقول ربنا يمتعكم بصحتكم. وماحدش يجرب ولا يشوف تعب زي اللي عندي ولا اللي مريت بيه ولا حتي حساسية عنيا الاخير . انا راضية بقضاء ربنا وبقول الحمد للله. انتم مصممين تخلوني كل مرة اوقول انا تعبانة انا بجد تعبت من كدة. انا مش مجبرة ابرر اكتر ولا اقول انا فيا ايه. خلصت كدة الحلقات هتنزل تتأخر او لا الله اعلم علي ما هخلصها واللي حابب يتابع علي راسي واللي زهق ربنا يوفقكم وتلاقوا حاجة احسن تتابعوها. ان شاء الله فيه حلقة بالليل بس ياريب تكمل وتنزل بس الاكيد هتتأخر.
(((سلسلة عشق الرجال الجزء الثاني من رحم للإيجار))
((مهمة حب))
((الحلقة الاربعون))
🌹بقلم ريحانة الجنه🌹
شهاب خرج من القصر وهو زي المجنون مش عارف يعمل ايه يستوعب اللي حصل ازاي !
وتمارا ! هيواجها ازاي !
هو كل تفكيره انها عملت كدة فعلا . بس حبته واللي حصل كان غلطة. لكن دلوقتي اتأكد انها ما عملتش اي حاجة وهو عمل فيها كل ده.
وبالرغم من اللي عمله ده الا ان حبها وضعفها غلبها وخلاها تضعف معاه وتسمحله يقرب منها.
شهاب واقف في المكان المعتاد بتاعه بيفكر هيرجع يقولها ايه! وهل يقول ولا يسكت ويقربها منه ويفضل ماشي علي نفس الطريق بهدوء لحد ما تنسي ويعترفلها انه حبها بجد وكل شئ يتنسي. فضل يفكر لحد ما جاله فون من مؤمن. شهاب بضيق اصلا فونه بيرن كتيير وهو مش عايز يرد ومؤمن اتصل كتيير كمان رد بتعب.
شهاب: ايوة يا مؤمن.
مؤمن : ازيك يا بوب وحشني والله . ايه اخبار الجواز معاك واخبار مراسي ايه الجو حلو وبحر جنان انا عارف .
شهاب اتنهد وابتسم بسخرية: اه يا خويا الجو جنان والبحر كمان. بالله عليك اتلهي وسبني في حالي وخاليك في العسل اللي انت غرقان فيه.
مؤمن عقد حاجبة : مالك يا بوب صوتك مش عاجبني في ايه؟!
شهاب : مؤمن لو بتتصل تطمن عليا انا كويس غير كدة الله يكرمك اقفل انا مش طايق اكلم حد.
مؤمن :امممممم. علشان كدة مش بترد علي فونك. والناس مش عارفة توصلك.
شهاب بإستغراب: ناس مين؟
