سكريبت❤بقلم سولييه نصار❤❤
- انا قررت اتجوز يا نورا
بصتله ببرود وقولت :
-هتتجوز صافي صح ؟!الف مبروك متنساش تعزمني
بصلي بصدمة وقال:
-انتي مش غيرانة
هزيت كتفي وقولت :
-واغير ليه ...ده حقك زي ما حقي اطلق منك
-بس انا مش هطلقك يا نورا
-خلاص يا عماد تتخلع يا حبيبي ومش عايزة من وشك حاجة .
-علي الاقل اسمعي أسبابي اللي هتخليني اتجوز عليكي بقلم سولييه نصار
حسيت ان خلاص فاض بيا وانفجرت فيه
-وايه هي أسبابك يا استاذ ...معاك بدل العيل اتنين بيتك مرتب ولما بترجع تلاقي لقمة حلوة تتطفحها عيالك مستواهم الدراسي عالي بترجع وبتلاقيني علي سنجة عشرة مستنية جنابك قولي هتتجوز تاني ليه لولا ان عينيك فارغة ودني ...بس والله يا عماد لو دخلت عليا ضرة لاخد عيالي واسيبلك البيت وادي دقني لو خليتهم تلمحهم .
حسيته بهت وخاف....هو عارفني كويس ...عارف اني اقدر انقذ تهديدي ويعرف كمان ان كرامتي فوق قلبي
-انتي عارفة مشاكل صافي
-ايوة عارفة مشاكل ست زفتة ما هو لو كان ابوها رباها مكانش هببت اللي هببته لكن نعمل ايه الاب ميربيش وانا اللي اشيل الطين
- يا نورا البنت مسكينة وهتتفضح
-مين دي اللي مسكينة يا عماد يا حبيبي دي من سلالة الشياطين بت في سنها تعمل اللي عملته ده
- ما هي طايشة
-ايوة وانا ذنبي ايه
-هكتب عليها وبعدين أطلقها
-مستحيل ...الماذون اللي هيكتب عليكم هو نفسه اللي يطلقنا
حسيته اتعصب.....انا مش قاسية بس كواحدة ست اعرف مكر الستات كويس وصافي دي مش سالكة ابدا مش مصدقة الحكاية اللي اخترعتها بس للاسف جوزي طيب وهو بيعتبرها اخته ومستحيل يسمح لحاجة تأذيها
-انتي ليه انانية كده...بجد مصدوم فيكي دي زي اختي عارفة يعني ايه وانا مستحيل ارضالها الفضيحة يا نورا ...
عيوني دمعت بس مسكت نفسي وقولت:
-يبقي تطلقني واتجوزها هي وتلاتة غيرها ميهمنيش ودي كلمتي الأخيرة ...
بعدين سيبته ومشيت وانا ماسكة دموعي مهما كان وعدت نفسي اني مبكيش قدام حد حتي لو كان الحد ده بحبه اكتر من حياتي كلها ....عماد اختار يضحي بيا عشان بنت عمه يبقي هو اللي اختار وانا مش هرضخ ....
كنت.بجهز هدومي وهدوم عيالي الاتنين لما دخل حمايا..
-ممكن ادخل يا نورا
-اتفضل يا عمي .
دخل عمي وبصلي بلوم وقال:
- انا زعلان منك يا نورا ...عماد قالك علي كل حاجة وانتي مصممة برضه تمشي
-معلش يا عمي انا قبل ما ارتبط بإبنك شرطت عليه اني عمري ما هقبل ضره ليه حق يتجوز طبعا بس بعد ما يطلقني ...
-بس ده مش جواز حقيقي ...فترة وهتعدي
-لا يا عمي انا عارفة ايه اللي هيحصل ...اللي هيحصل هيكون وجع قلب ليا عشان كده بقول اطلع من دلوقتي احسن وهو ربنا يوفقه
اتنهد وقال :
-شوفي صافي غلطت وضيعت شرف ابوها والواطي هرب يا بنتي احنا بنفك كربها دي من دمنا برضه ...انتي بنت أصول يا نورا واتوقعت انتي اول واحدة تقفي معاها
بصيتله بحزن وقولت:
-اسفة يا عمي مقدرش ...
-ممكن انا اتكلم معاها
قالتها صافي من ورا عمي ...بصتلها بغضب فهز عمي راسي وطلع ...
قفلت الباب وقربت مني ...بصتلي بحزن عرفت انه مزيف وقالت:
-عندك حق تمشي بصراحة انا ست وعارفة النار. اللي جواكي يا حبيبتي مفيش واحدة تقبل بضرة وانا لولا ظروفي مكنتش فكرت في ابيه عماد ابدا
ابتسمت وقولت:
-الحزن والكلام ده تخدعي بيه حد تاني مش انا يا شاطرة ...عيب يا صافي انا في المكر ابقي امك .
ابتسمت وقالت :
-كويس اننا فاهمين بعض يا نورا بس خسارة انتي هتطلعي دلوقتي برة وانا اللي هتجوز عماد ...انا خلاص يا حبيبتي اخدته منك .
وغمزتلي وكملت بوقاحة :
-ومتقلقيش هخليه ينساكي
ومن غير ما احس ضربتها قلم !!!!
يتبع
#سيدة_المكر
#سولييه_نصار
