اللهم صلِّ على محمد وآل محمد وعجل فرجهم والعن اعدائهم
أحنا البشر مو كلنا لااكثريتنا مانشكر الله على النعم الي كاعد ينطيهن النا، كاعد نتجرأ على الله بالمعاصي والذنوب ونسوي اشياء الله محرمهن وبالأضافة نشوف الله ناعم علينه بهواي نعّم🥺....
هسه يجي واحد ويكول الله بشنو ناعم علينه شو كلشي ماشايفين منه فقراء وشحالنه ولابيت ومريضين وووو استغفر الله من هذا الكلام❌...
ولو نجي نفكر بالأشياء الي الله منطيهن ألنا للنصدمنا أبسط شيء أنت/ي شلون جاي تقرأ هاي الكلمات؟
ج/لأن عندي عيون
السؤال الي يطرح نفسة، ومنو خلق هاي العيون؟
ج/الله سبحانه وتعالى
ويعني هاي نعمه البصر مانسميها نعمه مانسميها رحمه، غمض عيونك للدقايق وكومي أمشي بالبيت يي كومي امشي وانت مغمضة وشوفي شلون راح تحسون بالنعمه….. قصه .( يكولون اكو شخص ماعاصي الله ابد ودائما يعبد الله سبحانه وتعالى فلما مات الله سئلة ياعبدي تريدني احاسبك بعدلي أم برحمتي فكلاله يالله بعدلك لأنك عادل وانا ماعصيتك أبد فحطوا حسناتها كلها بكفه الميزان وامرا الله سبحانه وتعالى من الملائكه يجيبون بس نعمه البصر فلما حطوا نعمه البصرة بالكفه الثانية طارن كل حسناته)من قصص الشيخ علي المياحي
بس أحنا البشر بطبيعتنا بالعين الي الله خلقها وسواها كاعد نعصي بي، وكاعد نشوف بيها المحرمات وللأسف🥺.....
🌿الله منيطنه عقل ليش؟ علمود نعرف ونبحث ونعرف من هو الله، شلون نتعامل ويا الناس، شلون ندرس، شلون نحفظ، شلون ناكل، شلون نتكلم.. ووووالخ ولو اعدد النعم الي بالعقل منا للباجر مااخلص...
الله خالق بعقولنا فطرة هاي الفطرة مثل النبي يوجهنه للتوجيه الصحيح، انزين لعد الله ليش خلق الأنبياء والرسل اذا احنا بداخل عقلنا نبي؟
أحنا من نذنب ونعصي وماشاء الله على معاصينا نعصي الله ومانستحي منه هو الي خالقنا وهو الي يشوفنا ، فبلمعاصي راح يصير حجاب على فطرتنا ونحتاج شخص من يبعد هذا الحجاب حتى نرجع للفطرتنا السليمه الفطرة الإلهية.....
🌿أكو شخص اجه سئل السيد المدرسي كلاله سيد انا مااصلي! كلاله ليش ماتصلي؟ كال والله سيد انا ازني وتركت الصلاة من أجل اني ازني!!
كلاله ليش ماتعكس الاية فتصلي من أجل ترك الزنا!
كلاله سيد ماكدر كلاله ماتكدر ميخالف، بس لاتترك الصلاة، لأن الشيطان يطيح ابن ادم بالمعاصي ويخلي يترك الصلاة حتى مايهتدي من معاصيه
🌿فالاشياء الروحانية من صلاة وصيام وقراءة القرءان والأدعية ماننعوفهن لان انا كاعدأعصي! مثلا انا الشيطان كاعد يوسوسلي واصله بيه الحال اكفر بلله (والعياذ بلله) وانا متأذاية من هاي الشغلة، فالشيطان يريدني اترك الاشياء الي تقربني من الله حتى كلش أطيح طيحه وحدى وأصير تحت الاقدام.... فأنا صحيح اليوم اعصي واخطأ واسوي شيء خطأ بس مو معناته اترك كلشي بحياتي مو اترك صلاته ......
بعض النصايح الي راح تخليكم تبتعدون عن الوسواس والمعاصي والذنوب؟
_اولاً: العزيمه والأصرار على ترك الذنوب والتوكل على الله♥
و اذا احنا عدنا ذنوب واشياء خطأ فنحاول بالتدريج نوخرهن يوم ورى يوم للحد مانروض انفسنه على تركهن وراح نتركهن بعد التوكل على الله سبحانه وتعالى… وافضل طريقه انكم تجيبون ورقه وقلم وتكتبون ذنوبكم كلهن لأن راح تشوفون الذنوب الي مكتوبة بصفيحه اعمالكم فالله انطانه الوقت حتى نتركهن حتى ينمسحن من صفيحه اعمالنه.... قصه (اكو بنت راسلتني وكلتلي انا واصل بيه الوسواس للنهايته اكفر بله بداخلي واكفر بائمتي وأنا ادري هذا ابليس كاعد يوسوس بصدري فشنو اسوي حتى ابعدا؟
كتلها اتجاهلي يي أتجاهلي الشيطان وهو من كيفه يروح، مثلا يجي يوسوسلج ويكفر بله رأستن شغلي نفسج بغير شيء صلِّ على محمد وآل محمد بصوت عالي كثري من لا إله إلا الله لأن تبعد وسوسه الشياطين فهذه البنية يوم عن يوم كدرت تروض نفسة وكسرت خشم ابليس وابتعدت عن الشيء الجان ماذيها وموديها للتهلكه💪🏻صلوا على محمد وآل محمد)
_ثانياً: حاولوا بقدر أمكانكم تشغلون نفسكم بهواي أمور، حفظوا قرءان او اقرئوا كتب كيف تطوير من الذات،كتب دينية، كتب روائية، تعلموا الرسم الخياطه الحياكه الطبخ وووووالخ من المواهب لانها سبب في تجاهل الشيطان وتخليج عايشه بالموهبه الي كاعد تسوينها... وحاولوا حاولوا ماترحون أتنامون وانتم مانعسانين لأن من نخلي راسنا ع المخدة يجينا ابليس من حيث لانعلم ويكعد يوسوسلنا...
_ثالثاً: دخلوا على اليوتيوب وعلى محاضرات شيوخ وسادة وكعدوا أستمعوا الهن مما يخليكم تبتعدون عن المعاصي وتزكي أنفسكم ❤....
_رابعاً: لاتوهمون نفسكم بانكم مو كادرين تركون المعاصي،هواي اشخاص اعرفهم بدوا مع نفسهم من الصفر وهسه الحمد الله … واصلاً الي يفكر ويكول انا مكدر اعوف للمعاصي هذا يأس من روح الله واليأس من صفات الكافرين (وَمَن يَقْنَطُ مِن رَّحْمَةِ رَبِّهِ إِلاَّ الضَّآلُّونَ)[الحجر: 56].
وقال:(إِنَّهُ لاَ يَيْأَسُ مِن رَّوْحِ اللّهِ إِلاَّ الْقَوْمُ الْكَافِرُونَ) [يوسف: 87].
في أمان الله ♥
