مريم♡..

الأنمي

ياالله
نبلّش وية الأنمي..شدّوا الأحزمة👀

الأنمي هو فن الرسوم المتحرّكة اليابانية وهو إختصار لكلمة (أنيميشن: Animation).

يُعرض بشكل مسلسلات تتكون من حلقات يتراوح عددها من عشرات إلى مئات الحلقات في بعض الأنميات+ تباع على شكل قصص مصوّرة تسمى (مانجا: Manga).

زين ..هل هي موجهة للأطفال فقط؟ والجواب مو بس للأطفال إنما تحتوي على عدة أصناف أكو بيها تعليمية موجهة للأطفال واكو للإناث فقط واكو موجهة للشباب والمراهقين..والنوع الأخير هو اللي يهمنا نسولف بي.

شنو هدف اليابان من هذي الرسوم؟

اولا/ حتى تمحو الصورة اللي متكونة عن اليابان بالعالم انو هي دولة دموية الها سوابق دموية عنيفة ولاأخلاقية بالحرب العالمية وغيرها، فحتى تمسح هاي الصورة وتنشر ثقافتها وجانبها المشرق وتطورها سوّت هاي الرسوم حتى تعكس صورة عنها انو هي "كيوت" ومسالمة ومثقفة..

ثانيا /هدف إقتصادي، اليابان تنتج أكثر من200 مسلسل أنمي جديد كل سنة تربح منها مبالغ طااااائلة، تبيعها للقنوات والشركات والمواقع المختلفة اللي منتشرة بكل أرجاااء العالم! يعني تتعامل وية الإنسان كمستهلك تحصل منه فلوس ومتهتم بأفكاره وشخصيته!

من كنا أطفال هواي تابعنا أفلام أنمي مثل (سالي، كابتن ماجد، عهد الأصدقاء، المحقق كونان...إلخ).
والحقيقة انو هاي أنميات موجّهة، تاخذها سبيستون وترتبها بحيث تحذف المقاطع البذيئة ومشاهد العنف وتلوّن الأجزاء المكشوفة من أجسام الفتيات وتغيّر الأغاني بما يناسب الطفل العربي المسلم (وهذا مو ترويج لسبيستون إنما توضيح وذكر للحقيقة لاأكثر🙂)

بس، هل الشباب بقوا يتابعون سبيستون وبرامجها المهذبة؟ أكيد لا.

والدليل لمّا تگول لشاب يتابع أنمي انو انت دتباوع كارتون يعصّب ويگلّك هذا أنمي للكبار مو أفلام كارتون!
حاليًا يتابعون الأنمي على يوتيوب، سينمانا، والتطبيقات الخاصة بالأنمي، وبهاي المواقع ينعرض الأنمي كما هو بدون حذف ولارقابة من أي نوع. وطبعا ماكو رقابة أبوية على موبايلات أبناءهم لأنهم شباب😕💔

تشير الإحصائيات حول العالم انو أغلب المتابعين والمتعلّقين بالأنمي هم من فئة الإنطوائيين والمعزولين إجتماعيًا، اللي يكتفون بالأنمي والرسوم والقصص عن العالم الحقيقي، وكثير بنات حول العالم سووا عمليات تجميل حتى يشبهون شخصيات الأنمي، وبعضهم يكتفون بالمكياج اللي يخليهم يشبهون الأنمي

أما الأدهى هو دخول بعض الفتيات بعمق قصص وشخصيات الأنمي إلى درجة عزوفهم عن الزواج وينتظرون يتزوجون أنمي😂🤦‍♀.
ويكتبون أسماء حساباتهم باللغة اليابانية.

أكو مصطلح يطلقه متابعو الأنمي على نفسهم ويفتخرون بي وهو (oh_Tah_ku) (أوتاكو) وتعني باللغة اليابانية (المُلازم لمنزله) وتطلق على المهووسين بالأنمي بالياباني لانهم ينعزلون عن كل شي ويغرقون بالأنمي، وبالفترة الأخيرة تحول إلى مصطلح سلبي ينفر منه الشباب الياباني وميقبلون بي. وبقوا بس العرب مچلبين بي🙄.

هل الأنمي مجرد مسلسل لو بي أضرار؟

ج/١_أغلب القصص تكون معقدة، ومليئة بأبطال يقاتلون حتى الموت، مليئة بمشاهد العنف والدماء والقتال وهذا يعزز الروح العدوانية عند الاطفال والمراهقين من حيث لايشعرون، فإذا شفت طفلك أو أخوك صار عدواني وعنيف وية أصدقاءه فجأة روح شوف الأنمي اللي يتابعه!

٢_نشر الأفكار الإلحادية، اليابان دولة ملحدة، تروج لثقافتها عبر الأنمي، كثير من الأنميات تحتوي على شخصيات تمثل الآلهة (إله الشمس، إله النار...إلخ)، أو أبطال خارقين يتحكمون بقوى الطبيعة ومتسخرتلهم قوة الماء، النار، الهواء، وكذلك الترويج للسحر والشعوذة ...إلخ. وطبعا الطفل أو المراهق يقلد ويجرب، تگول احدى الأمهات انو لحگت على طفلها باللحظة الأخيرة، يريد يجرب الطيران مثل أنمي أڤاتار لذلك صعد ع السطح وقبل ميشمر روحه لحگت عليه بلطف الله..

٣_ضياع الوقت والإدمان على الأنمي، نشوف كثير من شباب الجامعات ينتظر العطلة بلهفة أو قد يسخّت بدراسته بس حتى متفوته مسلسل الأنمي، بدل من إستغلال شبابه بتعلم شيء مفيد

_لايخلو أي أنمي من مشاهد لاأخلاقية، وبعضها لقطات إباحية صريحة خصوصا الأنميات ذات القصص المدرسية في المدارس المختلطة، وأكو نوع خاص من الأنمي الإباحي موجه للشباب (منذكر إسمه حتى ميصير ترويج) وكذلك نوع يروج للمثلية، وكذلك المانجا بعد أسوء.

وصار إستغلال وتوظيف من الشركات بالفترة الأخيرة انو ياخذون شخصيات محبوبة مثل ران او كونان وأبطال ناروتو ويخلوها بقصص اباحية حتى يجذبون المراهقين

الحكم الشرعي يحرّم مشاهدة المحرّمات، وبما إنو الأنمي أكيد يحتوي على هيج مواد بالتالي تحرم مشاهدته.

الآباء، الأمهات، الأخوات والإخوة الكبار فعلوا الرقابة، ...الله الله بشبابنا وأطفالنا🌱

#منقول