♤🔥 خطيئة وردية ♧🔥

#الحلقة 30

#الحلقة 30 :
• حسناء : هاد الإيام راني مشغولة كي نكمل شغلي نقولك باش نتلاقو
وانا ف الحقيقة ما عندي ني شغل ني نصه برك حبيت نزيد نستفزه و نخليه يستنى الرجال كاملين كلاب بالنسبة ليا لازم يعانوا نجبدهم ليا ونعاود نسمح فيهم ، كنت ف فترة طويلة ما حكيتش مع حياة قلت نتاصل بيها اتصلت 3 مرات ما ردتش ، قررت نضيع الزوج ملايين و نشري حوايج جدد وانا ف طريقي للمول عيطتلي حياة
• حياة : ألو .. نونوستييي كيراكي توحشتك في شحال ما سمعتش صوتك
• حسناء : مام انا توحشتك وشبيك هذا مابان حس ولا خبر عليك
• حياة : واش هاد الحس وين راكي !!
• حسناء : راني برا حبيت حوايج جدد ، اذا تقدري رواحي ....
• حياة : الو ...حسناء ..الوو
انا نحكي معاها ما حسيتش كيفاش واحدا من ورايا خطفلي التيليفون ، جمدت ف بلاصتي كيف ما كانت يدي عند وذني قعدت هاكدا ، والناس شافوه كي سرقهلي
• ؟؟؟ : سراااااق سرااااااق
حتى شفت وحد الولد يجري وراه باين عليه سبورتيف شحال و هو يجري شفته غير من ورا ، حكمه و اتصل ب لابوليس ، وانا واقفة داهشة ما فهمتش لي راه صاري لأنو كلشي صرا بسرعة وحد المرأة كبيرة بقات تسقسي فيا اذا ما دارلي والو
• مراة كبيرة : يا بنتي ما صرالك والو !
• حسناء : لا برك خلعني ...
جا لعندي يجري ويلهث هاداك الولد منحني و شاد ركابيه
• ؟؟؟ : راكي مليحة ...ما صرالك والو ختي !! ... تفضلي تيليفونك ... و مادابيك ما تعسي روحك مين تكوني تحكي فالتيليفون الناس ماراهيش ترحم 
• حسناء : مرسي ربي يحفظك خويا
• ؟؟؟ : بلا جميل الأخت هاد الحوايج يصرو ممكن حتى انا يجي نهار نحتاجك فيه هههه
هاداك الولد ابتسامته غير على شفايفه الله يبارك يعجب و زل ، رحت مع لابوليس انا وياه باش نحط الشكوى تاعي و هاداك لي سرقلي التيليفون حكموه تما ، انا خارجة من عندهم و نخمم ف هاداك الولد وهو يمشي قدامي حتى تلفت ليا
• ؟؟؟ : اسمك حسناء مالا ، اسم على مسمى الله يبارك و تبسم معايا
• حسناء : مرسي واسمك ...!
• ؟؟؟ : اسمي مازن متشرفين
• حسناء : ما ننسالكش لي درته علاجالي ، معليش تعطيني حاجة نقدر نتواصل معاك بيها ! كيما قلت ممكن نرجعلك لي درته معايا
• مازن : ما تقوليليش برك عجبتك بنظرة جدية
• حسناء : ...
• مازن : نضحك برك هههههه كتبي رقمي عندك