اسكريبتات

اسكريبت ( عامي بالكامل )

اسكريبت

ضحكت بشدة علي المجنون اللي واقف قدامها وهو ماسك فرشة الشعر كأنها مايك وبيغني فيه بفرحة : بطتي موزتي قلبت دنيتي علي ايدي دي متأسسة

_ بيئة اوي يا حبيبي

نطقت بمزاح ليردد الأخر بسخرية مازحة : لا والله مش علي اساس انك مبتسمعيش غير شعبي يعني

_ انا يا ابني شكرًا علي ثقتك الغالية

ضحك التاني وهو بيقولها : يلا بقي غني معايا

ضحكت وبدأوا هما الاتنين يرقصوا ويغنوا وهما بيضحكوا وفرحانين
__________________________________________________________
_ قولي بقي يا صغنن ايه اللي انت عايزه وانا هجيبهولك فورًا

قالت كلماتها وهي بتحاول تهدي الولد الصغير اللي بيعيط علشان في لعبة هو عايزها وفي حد غيره خدها رد الولد : انا عايز اللعبة دي هاتيهالي

_ يا حبيبي في الف لعبة غيرها وزيها والله مش لازم دي يعني

_ لا هو قالي اني فاشل ومش هقدر اخد الحاجة اللي انا عايزها انا عايز اللعبة دي

اتنهدت روح وقامت راحت ناحية الولد اللي في ايده اللعبة وقعدت قدامه علي الارض بتاعة الحضانة وهي بتبتسم : إياد حبيبي عامل ايه

أبتسم إياد بسرعة وهو بيرد عليها بفرحة غريبة : كويس جدًا يا ميس اخبار حضرتك ايه

استغربت روح بسبب فرحته لكنها تجاهلت الموضوع وردت بحزن مزيف : لا انا مش كويسة خالص وزعلانة منك يا إياد

_ ليه يا ميس انا عملت ايه

_ ليه بتتنمر علي ياسين يا إياد مش كده غلط ، التنمر حاجة وحشة اوي ليه تضايقه بالمنظر ده ، انت ترضي ان حد يعمل معاك كده

اتنهد إياد ونزل رأسه بضيق طفولي ورد بصوت خافت : لا مرضاش ان حد يعاملني كده

_ طيب كويس انك عارف ودلوقتي بقي هتعمل ايه

قام إياد ببطئ وخد اللعبة وراح ناحية ياسين اللي لسه بيعيط واداله اللعبة وقال : انا اسف يا ياسين متزعلش خد اللعبة اهي

وقف ياسين عياط اخيرًا اول لما شاف اللعبة ، وخدها من إياد وهو بيقول بأبتسامة : مش زعلان منك تيجي تلعب معايا ؟

أبتسم إياد بفرحة وقعد يلعب معاه وهو مبسوط ان في حد اتقبله وطلب منه يلعب معاه ، راقبتهم روح بابتسامة بس ابتسامتها دي بدأت تختفي لما شافت اللي داخلة الحضانة وفي ايديها بنت صغيرة وهي بتمشي بمنتهي الغرور ، اخذت روح نفس عميق بتحاول تصبر بيه نفسها وقامت راحت ناحيتها وهي بتقولها بهدوء : اتأخرتي النهاردة يا مدام دلال حضرتك عارفة ان الحضانة هنا ليها مواعيد معينة بس عامة ادخلي يا ملك يا حبيبتي عادي مفيش مشكلة