أخيراً لقيت حد عارف معلومة ختمة القرآن والعزاء.
الحقيقة اللي كلنا عارفينها ومتأكدين منها إننا كلنا ربنا كتبلنا إننا نموت فى ميعاد محدد وغير معروف.
وعشان كده كتبت الكلام ده لأني محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفه .. ووقتها طبعًا مش هعرف أقولها لحد.
١) صلاة الجنازة أهم من العزا وهي اللي كل ما العدد زاد كل ما ثوابي ما كان أكتر .. فأرجوكم تصلوا عليا.
٢) مش شرط تيجي العزا وياريت لو اتعمل ف البيت أو مكان بسيط ممكن بفلوسه تطلعولي صدقة جارية.
٣) من فضلكم لم يثبت أو يتفق على عمل خاتمة قرآن للميت إنها هتوصله، بس مثبت إن الدعاء والصدقة أكيد بيوصلوا للميت، فرجاءًا دي بالذات بلاش وإدعولي في الوقت اللي هتقروا فيه جزء فضوا نفسكم واقعدوا إدعوا فيه.
٤) بلاش صدقة جارية تقليدية وسهلة ومش مستفاد بيها يعني المصاحف كتير في مصر أوي وكل بيت فيه كتيييير فممكن نحط الفلوس في جامع بيتبنى أو كرسي متحرك في مستشفى يستفادوا بيه المرضى أو دخلوا مية لبيت غلابة أو بناء سقف لبيت فقراء، حاجات ناس تستفيد بيها.
٥) دى نقطة مهمة أوي بالنسبة ليا.
محدش يقول لحد بتعيط عليه ليه؟ ومتعيطش عشان هو بيتعذب الكلام دة غلط سيبوهم يعيطوا لحد ما يطلعوا كل الشعور اللي عندهم ومفيش حاجة بتقول إن العياط معناه عدم رضا بقضاء ربنا "وأبيضت عيناه من الحزن فهو كظيم".
٦) أهم حاجة تاني هى الدعاء وبسس والصدقة.
٧) من فضلكم تكثفوا الدعاء وقت نزول القبر وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني تقعدوا معايا شوية ومتستعجلوش تمشوا عشان تونسوني في ليلة زي دي.
٨) الموت علينا كلنا حق وإحنا كلنا أمانات ربنا وهيردنا تاني. فالحزن على الفراق هونوه على نفسكم بالدعاء ليا عشان أبقى في سعادة لحد ما أقابلكم تاني.
٩) ادعولي كتير عشان لو مفيش حد يدعيلي.
١٠) ودي مهمة أوي أوي أوي كمان وهي إنكم تسألوا على حبايبي على طول وودوهم وخليكوا قريبين منهم وشيروا بوستات دينية كتير من صفحتي.
اللهم كثر موت الفجأة من حولي وكثر موت الشباب فـ يارب إن كنت أنا القادم فأحسن خاتمتي ويسّر طلوع روحي وهوّن عليّ سكراتي فإني أحب أن ارحل في هدوء وسكينة.
ولا تقبض روحي إلا وانت راضٍ عني لكي أكون عبداً مقبولاً لك وعِندك حتى أليق بلقائك العظيم وإن كان لي من العمر باقي فأغفر لي ذنوبي ومعاصي نفسي الأمّارة بالسوء و أعفو عني وأمحو لي كل ما يعرقل طريقي إليك و ردّني إليك ردّاً جميلاً ♥.
