فرشة سنان دهب ومعجون سنان عيار ٢٤قراط!
سيدنا سلمان الفارسي رضي الله عنه وهو بيموت كان بيبكي بكاء شديد جدًا!
فكان بيزوره سيدنا سعد و سيدنا عبدالله بن مسعود، فلما شافوه بيبكي استغربوه وسألوه:"ما يُبكيك؟! ألست فارقت رسول اللهﷺ وهو عنك راضٍ"؟!
وفي رواية تانية، سيدنا سعد قاله:"ما يُبكيك يا أَخي؟"،أليس قد صَحِبْتَ رسول الله صلَّى الله عليه وسلم؟"
بتبكي ليه؟ خايف؟ طب لو ده بكاء خوف، فالسؤال اللي بيطرح نفسه بقوة دلوقتي"أنت خايف من إيه؟ خايف من الموت ولا على فراق الدنيا؟!!"
ده أنت صحابي من صحابة النبي الكرام، أمنت بيه وأتبعته، ودافعت عنه، مش كده وبس، لا، ده أنت كمان سيدنا النبي صلى الله عليه وسلم مات وهو راضي عنك..! فأنت مشهودلك بالجنة بإذن الله، فإيه بقى اللي يخوفك ويخليك تبكي بالشكل ده؟!!
فرد وقال :" ما أبكي واحِدةً مِن اثنتَين،ما أبكي ضنًا للدُّنيا، ولا كراهيةً للآخرةِ، والله ما بي جزع الموت، ولكن رسول الله ﷺ عهد إلينا عهداً:" ليكن متاع أحدكم من الدنيا كزاد الراكب، وهذه الأسودة حولي"
سيدنا النبي صلى الله عليه وسلم كان بيوصي أمته اللي هو احنا، إن يكون متاعنا في الدنيا قليل، زي متاع المسافر كده، بيكون يادوب شايل حاجات خفيفة تخليه يادوب يقدر يعيش ويكمل سفره!
فسيدنا سلمان وهو بيموت بص على المكان اللي كان عايش فيه والأثاث اللي كان بيستخدمه، وافتكر وصية النبي،
وإنه كان عايش في رفاهية شديدة فبالتالي ماحافظش على وصية رسول الله وخالف العهد معاه صلى الله عليه وسلم!
-عارف لما مات وجُم حسبوا التركة اللي كانت عنده واللي كان شايفها رفاهية طلعت بتساوي كام ؟!
=كام؟!
- ٢٠درهم!
=😧وبيبكي!..
-وبيبكي.💔
والله أعلم.
#سيرة_أصحاب_رسول_الله🌿🌻
#سيدنا_سلمان_الفارسي💚
علمنا الله واياكم 🌻
#هبة_شلبي
