كرونيك: و_شاءت_الاقدار

20

🎶 الحلقة 20 🎶
جمعتين و هي حتى صباح الخير ما تقولهالوش. .. ديما تتجنب فيه ... حتى كي يخرجو الشله ... إذا هو موجود هي لا و إذا هي موجودة هو لا ... هي هكا حاكمة عليهم ... ممنوع يتواجدو الزوز في نفس البلاصة ... وين تتلاقى عينيهم ... يرا فيهم كره ... كره موش عارف السبب متاعو شنوا ... كل ما تراه .. دموعها تهبط لا اراديا .... موجوعة منو لأقصى الدرجات ... عمرها ما تخيلت انو يجي نهار و تسمع كلمة كيما هكا و في شكون .. في جواد ... جواد .. دنيتها الكل ... بوها و امها خوها .. و أختها. . راجلها صاحبها ... كان بالنسبة ليها كل شي ... اما الله غالب ربي حرمها منو
جمعتين و هو يحاول يتواصل معاها ... يسمع صوتها. .. توحشها. . و توحش كلامهم و تفدليكهم ... توحش كل لحظة مع بعضهم ... رغم أصحاب كهو .... يحب يحكي معاها ... يطلب السماح منها ... يفهم منها الحكاية و يفهمها الي هو موش قاصد يجرحها .. متمني يقلها الي لحظتها عماتو الغيرة .. غار عليها من خطيبها !! أما ماينجمش ... هي كانت تعتبرو زميل ... صديق لا أكثر لا اقل ... و تو ... تكرهو ... قالتهالو ... قتلو نكرهك! ... تمنى يموت قبل ما يسمعها منها ... بالحق في كل مرة يتقابلو فيها ... تسمعو كلمة نكرهك و تتعدا ... لدرجة انو كره روحو ... و ندم انو ما سيطرش على روحو ... كي يرا دموعها و هو السبب يزيد يكره روحو ...
اليوم لازمو يحكي معاها ... لازمو ينهي هالمشكلة و يفهم كل شي ... بكيفها ولا بالسيف عليها ... تحمل نظراتها و حقدها عليه جمعتين ... و تو فاض الكيل .... ماعادش ينجم يقاوم أكثر. ...
بعد ما كملو الcours كالعادة كل واحد روح على روحو .. و هي و وئام مشاو للباركينغ باش يروحو. ..
هي حلت باب الكرهبة و ركبت .. و ماتفيق كان بيه دز وئام و ركب هو
-اااي. .. فاش تعمل يا سيد ... اهبط من كرهبتي. ..(احلام)
- لا يا للا موش على كيفك ... موش متحرك منا إلا ما نحكي معاك ... يزي عاد أحلام جمعتين راو
-صار هكا الحكاية ولات ... تتهدد عليا .... باهي ملا استنا عليا ... (هزت ساكها و هبطت ) خليها عندك الكرهبة كان عجبتك .... وئام هيا ... تو نكلم معاذ يجي يروح بينا ...
-و الله من هنا ماكش متحركة اليوم ... (هبط يجري شدها من يدها و رجعها )
-تي سيب حيوان .. نحي كسرتك يا هم
-زيد عيب راو ... والله لا يجي هكا ... (وئام ) (تحكي و تنحيلو في يدو )
-وئام عيش اختي اقعد بعيدة .. (دزها) معاها للصباح اليوم ... موش متحركين. . و اعمل الي تحب ...موش مسيبك. ...
-هانا قاعدين مالا ... معاد للصباح حتى انا (احلام)
-زيد قاعد تغلط أكثر راك ... أحلام انا نعرفها (وئام)
-و انا نعرف روحي ....
ربع ساعة واقفين يتفرجو في بعضهم ... حاصرها بيديه مع الكرهبة و وئام واقفة بعيدة شويا ... يغزرلها ما هبطش عينيه جملا و هي مرة تغزرلو مرة تبدل وجهتها ... مكتفة يديها تستنى في رحمة ربي .... و تاليفونها نوقز ... هي جات باش تشوف شكون و هو فكهولها... ... تفارع فيه باش تاخذو و هو شي
-هات التاليفون ... تي سيب السخطة هاذا
-اام استنا ساعا نشوف (غزر لشكون يطلب ) هاو الحيوان يكلم فيك ... شكون هاذا ...
وجها لخلخ و غزرت لوئام تلقاها كيفها ...
-زيد هات عيشك ... باش تعملي مشكلة راك
-أي زيد أعطيها عيشك ... حيوان بالحق راو و ينجم يضرها (وئام ) و تو تعمل الي تحب عليه ...
-وئام ... تترجا فيه ياخي .... سيب الهم هنا خيرلك و الله ندمك راو
-موش خوف منك. .. اما عليك (عطاها التاليفون و غمزها )
وقتها طلبها 3 ولا 4 مرات ... هزت و هي كلها ترعش
-ا...الو
-......
-كنت.... مع اصحابي ... سامحني ماسمعتوش ....
-......
-باهي ... قلو يستنا قدام الدار ... و يرد بالو عليها ... ساعة و نكون غادي
-......
-باي ....
علقت و غزرت لوئام تطمن فيها بعينيها ...
-اي نرجعو لموضوعنا .. (عاود فكلها التاليفون و شدها من يدها ) تو باش تفهمني ... علاش جمعتين و انت تتصرف معايا هكا ... و شكون الي عطيتني كف على خاترو ....
-سبق و قتلك نقتلك و نشرب من دمك على خاطرو ... كف شويا عليك .... شويا ياسر زادا ..الكلمة الي قلتها كبيرة ياسر ... و اكبر غلطة في حياتك انك تجرأت و خرجتها من فمك .... باش نذوقك الويل عليها. ... و ندمك عالنهار الي ريتني فيه (تحكي بغش و عينيها تشعل نار )
-و انا سبق و قتلك زادا الي انا موش مسيبك و معاك للصباح
-زيد خلي مرة أخرى عيش خويا (وئام )
-لا تو يعني تو ....
-ما تفهمش ياخي ... مانحبش نغزر لمنظرك. .. وين نراك نتفكر كلامك ... و نزيد نكرهك .... نكرهك ... تفهم ولا (انهارت و ماعادش منجمة تتظاهر بالقوة قدامو استفزها بكلامو و هي طايقتو بالسيف )
-فهمني الحكاية تو نسيبك
-تحب تفهم الحكاية مالا ... باهي هاني باش نفهمك (تصيح و تبكي ) .... انت غلطت في حق أغلى انسان في حياتي ... و كيما قتلك قبل ... أرجل منك و من ألف كيفك .... جواد ... أسمو. .. خويا .... جواد خويا ... و ريماس بنت خويا .... موش بنت خطيبي ... باهي هكا ..