سـعـد الـبـايـرات

|4|

💜سـعـد الـبـايـرات💜
بقلم #رباب نجمة وَ إكرام#
الحلقة الثانية:
عنوان الحلقة: الفانوس السحري🧞‍♂️🧞‍♂️
الجزء 4:
صبح الصباح والشميسة بنورها ضوات... حلات رباب عويناتها وجلسات على السرير كتحاول تستعقل راسها وشنو جرالها.. قبحات سيفتها وعبسات فاش تفكرات ليلة البارح وشنو صرالها.. سمعات الدقان فالباب.. ومن بعد دخلات إكرام لابسة قفطان خضر مرصع بالأحجار.. أو واضعة ثاج من الفضة فوق راسها دال على مكانتها.. وبلي راها جاية بخبار باها ماشي هربانة وسالتة..
غير سدات الباب وتغيرات ملامحها من الجدية للمرح والتفلية.. دغيا تفرگعات بالضحك وشادة فثاجها لايطيح بسبب تحركاتها..
عبسات رباب مطلعة حاجبها الشمال فيها ومربعة يديها..
رباب: ياك لاباس أختي أش جابك عندي على الصباح (قلبات وجها لجيهة السرجم لي بجنبها ماعاجبها حال) ولا قولي جاية تشفاي فيا..
قربات منها إكرام وهي حابسة الضحكة غير بزز..
إكرام: غير سقت الخبار ماصبرتش وجيت كنطير نشوف كيف صبحات لالة العروسة هههه..
رباب: حامضة.. بعدي عليا لهيه من  نهار شفت وجهك ماشفت نهار زين..
إكرام: إيه نوضي نيت غسلي ديك الكمارة مافيها مايتشاف.. الحمد لله منين ماشي نتي لي جا يخطب أما كون السيد تسطا وهرب..
رباب: لهلا يحييه ولا يمنيه ولا يوصل يديه لرجليه يحسن ليه الشرف يديني غزالة وكنحمق وبنت الحاكم لي كيتضربلو ألف حساب.. هادي ماتكون غير عوينة وشدات فيا ومن حسد بنات القبيلة صابتني.. وهانا وهانتي إلا ماديتش راجل تحسدني عليه المخيرة فالبنات ماتكونش سميتي رباب..
إكرام: امم مشيكينة.. وخا تباتي تحلمي فيها..
رباب: اوا هاحنا غانشوفو.. 
إكرام: ماعلينا أش بالك نديرو نزهة بجنب الواد..
رباب: قالتليك نزهة هي لي خاصاني هاد الساعة..
إكرام: واخلاص أصاحبتي نبدلو غير الجو شوية..
رباب: وخا سايني نتقاد ونتزيز.. ياااقوت وااااياقوت.. فينك العديمة..
جات ياقوت كتجري وتمسح يديها فجلايل قفطانها..
ياقوت: هاني ألالة..
رباب: القبيلة كاملة سمعاتني وااتي فين كنتي..
ياقوت(بدات كدمع): ياك نتي لي جريتي عليا وقلتيلي مانعاودش نشوف وجهك..
رباب: أنا 🙄!! صافي سكتينا وجمعي عليا خناينك.. وجديلي فطوري وجيبيهلي لبيتي..
ياقوت: هي اللولة..
إكرام: مالك أختي مع البنت لي كيبداهليها باك كتكمليهليها نتي..
رباب: ديها غير فراسك..
تجهزات رباب وشدات فصاحبتها إكرام قاصدين الغابة...
وصلوا ويخيموا بجنب الواد.. بعدات رباب شوية حتى جات عينيها على شي حاجة لامعة وكضوي مخبية فالتراب قربات ليها كثر ومدات يديها حتا جبدات فانوس مذهب (المصباح السحري) لمعوا عينيها وبسمات ناطقة بخفوت..
رباب: ااح عليك أزهري كنت عارفاك ماتفوتنيش..
خبات الفانوس فالسلة لي هازة فيديها مخبياها على صاحبتها..
وقربات منها كتغددها بعينيها وترميلها الكلام..
رباب: قالك يا لالة "العَاتْق إلا بارت على سعدها دارت"..
إكرام: وشنو سباب هاد الكلام ..
رباب: قد ما تعطلت فالزواج قدما غاناخد سيد الرجال وأنا متأكدة بلي قريب يتعلن زواجي فجميع القبايل..
إكرام: ههه وافيقي أصاحبتي براكة من الأحلام من نهار عقلت عليك ونتي كتعاوديلي نفس الكلام.. غادي نجي انا ونسبقك للزواج..
رباب(طلعاتها وهبطاتها): ماباليش أختي.. البنت الخفيفة ماصالحاش للزواج وحتا راجل مايبغي ياخد برهوشة بحالك ليه عروسة..وكيف قالوا ناس زمان
"الخفيفة ما تكون منها لا عروسة ولا نفيسة"..
إكرام: واقيلة نسيتي بلي الا ما تزوجت بخدودي غادي نتزوج بجدودي..
رباب(قلبات عينيها): كون كان هاد الكلام بصح كون أنا اللولة تطبق عليا..
إكرام: ههه حيت نتي منحوسة..
#يتبع..