سـعـد الـبـايـرات

|25|

💜سـعـد الـبـايـرات💜
بقلم #رباب نجمة وَ إكرام#
الحلقة الثامنة:
عنوان الحلقة: ديرها فالرجال وترجاها وديرها فالنسا ولا تنساها.
الجزء 25:

فاقت إكرام على صوت البكا والنواح.. هاد الصوت ماغريبش عليها.. حلات عين والعين الثانية مابغاتش تحل.. كتحرك يديها على السرير.. وتكلمات بصوت مضعضع بسبب النعاس..
إكرام: الله يا ربي فين هاد المسخوطة لي تنوض تشوف منين جاي هاد الصوت.. أو وقفات كيف البصير..

تسمع صوت شهقة قوية وتهز معها قلب إكرام وبدات ترعد بالخوف..
إكرام: بب بسم الله الرحمان الرحيم أنا معكم بالله وبالشرع..(دوات بهمس) ناري غادي نتشير فعز الليل.. رباب فينك أبنت الحرام هربتي وخليتيني.. واا ربا...
ماجات فين تكملها تا سمعات شهقة مجهدة عاود تاني...
لبسات فرجيلاتها البلغة وتمشات رامية الخطاوي جيهة الباب كتحرد فجلايلها...يلاه حلات الباب وهي تساطح مع شي حد..
غوتات بفزع وحتا الطرف الثاني غوت هربان منها..
إكراام: ويييو ماما وا ناري شكون تما..
ياقوت: هادي نتي ألالة..
إكرام(ضرباتها لجنبها): هادي نتي أ جبادة البلا خلعتيني....تي شكاديري فنص الليل..
ياقوت: مابغاش يجيني النعاس ألالة غير كنتقلب فبلاصتي بالخوف.. كنسمع شي حد كيبكي والبكيا ماشي ديال شي واحد من الإنس.. (حولات نبرتها لنبرة هامسة) باينة من الجن ألالة...
تخبات فيها إكرام مخلوعة..
إكرام: سكتي أ ياقوت ماتزيديش على مابيا راه حتى أنا سمعت البكا مجهد..
تسمع صوت الشهيق والنحيط..
إكرام(بخوف): هااا لي گلنا الله ياربي ماكانش فخباري بلي قصر الحاكم مسكون.. وحتى رباب غبرليها الأثر..
ياقوت: أويلي... فين مشات.. نارى وتوقعليها شي حاجة والله مانسامح لراسي..
إكرام: وا صافي هنينا وتعالي نقربوا نشوفوا شكون تما وديالاش هاد الصوت..
ياقوت(باعتراض): لالا أ لالة مانصيبش أنا نخاف نقرب ونلقا شي عجب كحل يقتلني أنا وياك..
إكرام: وااايلي بيمن محزمة غا بالخلا... وا تي ترجلي معايا شوية..
ياقوت: مالني بنتليك راجل ألالة..
إكرام: الموسطاش هاهو كاين، بقا خاصك غا الدار وتجي تخطبيني من دارنا هههههه..
ياقوت: ياك ألالة وليتي تعايريني فوجهي..
إكرام: وا غير كنتمازح معاك تي وسعي قشابتك أختي..
ياقوت: إوا حاولي عليها راه قريبة تقطع..
إكرام: يا الله زيدي قدامي نشوفوا شكاين تم..
ياقوت: وعلاش ماتزيديش نتي اللولة..
إكرام(خنزرات فيها): إوا داكشي لي بقا ولينا قد القب قد السطل... زيدي قدامي أ ياقوت براكة من كثرة الكلام..
ياقوت: وخا فيا الخلعة غادي نزيد..
قربوا البنات من جيهة الخصة لي كاينة فوسط القصر وبداو يطلوا على شكون تايبكي بجنبها حتى كتخرجليهم جنية لالا هادي عيشة قنديشة بنفسها وااا لا هادي غير رباب ضاربها الضو ومشتتليها الملامح... الشعر واقف شاد الرادار.. إوا والخناين دايزة بحال الشلال.. والدموع بوقوا ليها العينين بحال شي سكران.. أما حوايجها تمرمدوا فالتراب أو ولاو بحال الجفاف..
إكرام و ياقوت غوتوا فدقة وشدوا فيدين بعضياتهم..
إكرام: ويييو ذكرنا السمن والعسل أنا مزاوگة ليك فالميمة لا تآذيناش...حنا غير من قوة فضولنا قربنا لمكانك وزعجناك أ لالة..
رباب: إوا الله يعطيكم الطيار مالكم شفتوا جنية..
ياقوت: لا وُحاش ألالة واش الجنية توصل لحالتك...
إكرام(حابسة الضحكة): الجنية زينة عليك..
رباب: خليوني عليكم مافيا لي يسمع للضحك الباسل ديالكم..
إكرام(شدات فيديها): ياك لاباس أصحيبتي مالك على هاد التبهديل.. بغيت نقول علاش علاش كتبكي..
رباب: كنبكي على زهري لي هاجرني ما بغا يحن ولا يزوجني.. حاقد عليا وحساب قديم جامعلي..
إكرام: نعلي الشيطان ودوزي ترگدي.. واش بغيتي يخرجليك شي جن فهاد الليل..
رباب: مكاينش شي جن قد زهري.. وا عباد الله الجنون صدقوا رجولة على زهري بعدا هما قدروا يعاونوني ويجيبولي راجل أما زهري حرام واش بغا معايا يتواضع..
إكرام(قلبات وجها): حتى هداك لي جاك نقولوا عليه راجل..
رباب: ومالو كيف جاك بخيرو وخميرو غير أنا لي مابغيتش..
إكرام: ايه كملي قرايتك حسن ليك ههه..
ياقوت: ههه احم لالة نوضي عليك وخليني نسرحليك شعرك ونمسحليك حالتك ونلبسك حوايج خفاف ونظاف نعلي الشيطان وديري يقينك فالله راه عمروا يخيبك وخلي فبالك بلي كل تأخيرة فيها خيرة..
رباب: هئ هئ ولكن أنا بغيت ولد عمي وا جيبوليا ولد عمي.. بغيتو..
إكرام: وا تبغيك لفعة زحلة.. مكاينش غير هو فهاد الدنيا..
رباب: ولكن غير هو لي كاين فهاد القبيلة..
إكرام: من هاد الناحية ماكدبتيش المهم أجي دبا نعسوا وغدا نتكلموا..
ياقوت: تعالي معايا نمسحليك حالتك..
رباب: وخا..
إكرام: ومسحي معاك دوك الحناين راهم يعمروا جوج بوطات ويشيط الخير.. ماتعرفوش تبكيو بحال الناس خصكم ضروري ديروا الشوهة..
رباب(شيرات عليها ببلغتها): سيري الله يلگيها ليك..

#يتبع..
#سعد_البايرات..بقلم#رباب نجمة وَ إكرام#💜💎