سـعـد الـبـايـرات

|27|

💜سـعـد الـبـايـرات💜
بقلم #رباب نجمة وَ إكرام#
الحلقة الثامنة:
عنوان الحلقة: ديرها فالرجال وترجاها وديرها فالنسا ولا تنساها.
الجزء 27:

عرات رباب وإكرام على وجوههم وبان التاج لي فوق ريوسهم وناصر خرج عينيه مامتيقش..
ناصر: بنت الحاكم وبنت شيخ القبيلة ياك لاباس ألالياتي أشنو دار هاد العبد تاتجيو ليه برجليكم..
رباب: ماتخاف ماتدهش حنا جينا عندك باش تعاونا..
إكرام: اه تماما بغيناك تعاونا وبحلاوتك..
ناصر(باستغراب): نعاونكم ! أنا ؟
إكرام: أييه نت وشكون من غيرك بيناتنا!
رباب: سمع أ ناصر نت معروف عليك قاري وواعي وطلبنا منك بسيط وساهل..
ناصر: أما هو نتوما آمروا وأنا نفذ..

إكرام خرجات التليفون من جلايلها ووراتو ليه..
إكرام: هاك شد..
ناصر: ديالاش هذا ألالة..
إكرام: تليفون مالو خافي عليك ؟
رباب: ناصر بغيتك تسيفط ميساجات لواحد السيدة تما وتقوليها مابقيتيش عاجباني وغادي نخطب بنت عمي بالإنجليزية.. ياك نت عندك مع الإنجليزية ؟
ناصر: اه..
رباب: اوا صافي يعني ماصعيباش عليك أولد قبيلتي..

ناصر فتح التلفون ودخل كيقلب فيه..
ناصر: أشنو قلتي سميت هاد السيدة؟
رباب: ماعرفتش ولكن راها نصرانية..
إكرام: وهو باش غايعرف أ الضبعة..
ناصر: صافي صافي راني لقيتها ولايني زييينة..
رباب(خطفاتليه التليفون): آري نشوف..
إكرام (كطل): ماعرفتش منين جاها الزين صفرة تقول داخلاها الموت...
رباب: وهانتي تشوفي أختي هاد الرجال ماعرفت أش عاجبهم فيها..
إكرام: إوا الله يعطيهم العما.. ويعطينا زهر الخايبات..
رباب: آمين آمييين..
ناصر: دبا شنو المطلوب..
رباب: شد هاك سيفطليها هادشي لي غانقوليك..
ناصر: وخا..
رباب: سلام عليكم أنا عدنان ولد عم رباب بنت الحاكم زينة البنات..
طلع ناصر فيها حاجبوا..
ناصر: وراه هي عارفاه عدنان مكاين لاش هادشي كامل..
إكرام: ونت شغلك كتب وسكت..
كملي أختي..
رباب: من نهار شفتك ماشفت الرباح..تاجيت لبلادي ودواري تما وشفت أجمل بنت فالدنيا..
إكرام: كح كح واتي رخفي على السيدة وربطي السلوگية..
رباب: زدت فيه ياك احم وخا.. عاود من اللول عفا خويا..
ناصر(مع نفسو): وابقينا هنا..
رباب: سلام أنا مابقيتش حاملك وطلعتيلي فراسي مابقات لا خطبة لا والو أنا وليت حاط العين على وحدة اخرى الله يعاونك..
إكرام: صافي عبرتي عليها..
ناصر: صافي راه وصلها..
إكرام: يرضي عليك.. مايمكنش تمسح اش كتبتي..
ناصر: ممكن.. صافي هاكي راه كلشي هو هداك..
إكرام: هاك رزقك..
(مداتلو رزمة دالفلوس)
ناصر: الله يخلف عليكم..
رباب: الله يعاون..

رجعات إكرام ورباب للقصر وفيديهم التليفون.. ردوه لبلاصتوا ورجعوا لغرفتهم..
حتى كتجي ياقوت بالزربة موصلاليهم خبار رجوع عدنان.. خرجوا بسرعة فإتجاه الغرفة ديالو وحطوا ودنيهم على الباب كيتصنتوا..
عدنان: It wasn't me who sent that message (ماشي أنا لي سيفطليك داك المساج)....
عدنان: I swear to you(كنقسمليك)....
عدنان: you lie.... You love me.. You will not be able to end our relationship (نتي كتكذبي.. نتي كتبغيني.. ماتقدريش تسالي علاقتنا)...
عدنان: It is just a misunderstanding, let me explain...please Lora...)راه غير سوء تفاهم خليني نشرحليك... عفاك أ لورا...)
Allo Allo... Lora...
ألو ألو... لورا..

إكرام: تي شكايقول هذا... مافهمت والو..
رباب: تا أنا ولكن باينة كيدابزوا..

عدنان: تفو على زهر...

إكرام: إوا هادي خدمة نقية..
رباب: يااح هههه..
إكرام: هههه...

#يتبع..
#سعد_البايرات..💜💎
بقلم# رباب نجمة وَ إكرام#