بعد اللي شوفته سبت البلكونه وجريت دخلت على اوضه نومي وهناك لقيت جوزي نائم على السرير كنت عايزه اصحيه واواجه وافضحه بكل اللي افتكرته، لكن خفت خفت يعرف ان انا اللي زقتها وقتلتها ويوديني في داهيه سكت وجريت على الدواء اللي بقى لي شهرين باخذه من ساعه الحادثه عشان انسى منظر نهى وهي غرقانة في دمها،حاولت انام واهدأ، جوزي حس بيا و صحي وسألني ما لك كنت بترعش قلت له تعبانه شويه خذني في حضنه وطبطب عليا كان حنين جدا الفتره اللي فاتت من ساعه الحادثه تقريبا لما شافني تعبانه وباخد في مهدئات عشان بس اعرف انام وانسى موت صاحبتي وطول الفتره دي ما كنتش عارفه أن انا اللي زقتها،رغم اني كنت شايله في قلبي كتير من جوزي ونفسي أخنقه لكن كنت محتاجه لحنانه وطبطبته دي، نمت نمت كثير ماحستش بالدنيا، ثاني يوم حسيت ان نهى حواليا في الشقه روحها موجوده وبتراقبني في كل مكان جوزي سألني مالك قلت له حاسه ان نهى بتراقبنى موجوده في الشقه، بصي وسكت سألته ايه مش مصدقني؟ قال لي اكيد اللى بتحسيه وتشوفيه ده من احساسك بالذنب.... احساسى بالذنب ليه هو انا كنت عملت ايه؟... بصلي باستغراب وقال لي انتي نسيتي؟ انت مش عارفه عملت ايه؟ نهى وقعت من البلكونه بسببك تنحت من الصدمة ومانطقتش ايه اللي بيقوله ده؟ لقيته بيكمل ويقول .. أنت كنت عايزه تنتحري ونهى كانت بتحاول تمنعك من بلكونتها وقعت وهي بتحاول تحوشك نهى ضحت بحياتها وهي بتنقذك ووقعت بدالك.... اللي بيقوله ده مش ممكن... مش ممكن انا كنت عايزه انتحر؟ ونهى وقعت وهي بتنقذني ؟ مستحيل.... بصي لي وقال لي هو ده اللي حصل انت لازم تروحي لدكتور نفساني احساسك بالذنب ممكن يخليك تنتحري ثاني او تعملي حاجه في نفسك .سيبته ودخلت اوضتي وقفت على نفسي حاولت افتكر اي حاجة من الكلام اللي قاله ، بس مافتكرتش حاجة قلت يظهر اني لازم اروح للدكتور نفسي زي ما جوزي قال ثاني يوم رحت انا وجوزي للدكتور كنت عايزه اعرف ايه اللي حصل لي وليه حاولت انتحر وحكيت له على اللي بشوفه قاعد معايا واتكلم وكتب على ادويه جديدة جوزي اشترالي العلاج وروحنا ونمت كنت بنام كتير واصحى برضه مش فاكرة حاجه في يوم جالي تليفون من ماما بتقول ان التعب زاد على بابا جدا كان مريض بقى له فتره وحالته حرجة و كنا متوقعين وفي اي لحظه انه هيفارقنا جريت رحت لبابا وقعدت كم يوم هناك و اتلهيت في حاله بابا ما كنتش باشوف نهى هناك، بابا للاسف كان بيحتضر والدكاتره قالو خلوه في البيت لان حالته ميئوس منها كنا قاعدين جنبه طول الوقت هو كان دائما يهذي ويقول كلام غريب فاجئني انه جاب سيره نهى واتكلم عنها وبيترحم عليها، بابا كان يعرف نهى اول ما كان يجي عندي البيت نهى تجري تخبط عليا وتقول لي عايز اسلم على عمو كانت بتحبه جدا وهو كمان كان بيحبها ويعزها كانت تيجي تقعد تشرب القهوه معاه وتجيب حلويات وتقول له ذوق من يدي يا عمو، وبابا كان بيقول لى ربنا عوضك عن اصدقائك القدام بجارتك نهى، بابا وهو بيخترف في تعبه كان بيجيب سيرتها ويقول الله يرحمك يا نهى، غريبه رغم انه مكنش داري ولا حاسس بحد فينا، انه فاكر نهى وبيترحم عليها بعد أيام، بابا اتوفى ورجعت بيتي وحسيت بوجود نهى حوليا من تاني افتكرت اني ما ماكنتش باخد الدواء طول الفترة اللي قضيتها في شقة بابا نفسيتي كانت وحشه بسبب موته وبسبب حادثه نهى والكلام اللي قالوه جوزي عن محاولة انتحاري اللي اتأكدت فعلا انه حصل من جوز نهى.
يتبع...
ولاء الجارحي
