الكاتبة يقين
قصه بعنوان “ضاع شبابي "
البارت الرابع عشر والأخير
نور-اول مره احس روحي مخيره بكيفي اختار او ارفض تعلمت من طفولتي كلشي غصبا عني غصبا عني ربيت اخواني غصبا عني جنت طفله واوگف اطبخ غصب عني ابويه اعتدى عليه وغصب عني زوجني وغصب عني صرت ام وغصب عني مدرست وغصب عني مات طفلي كلشي غصب عني يمكن انتو الي تقرون قصتي مليتو مني ومن نكدي بس محد يحس بيه لان محد عاش عيشتي 😭 المهم گعدت وفكرت واختاريت راحتي اختاريت اقبل بزواج رضا وخلص كافي لازم ارجع اعيش مثل البنات وسألت امي وامير واثنينهم گالو مراح تلگين احسن منه الصراحه صح يمكن مراح الگه احسن منه وبعدين الفرصه تجي مره وحده بالعمر والولد معايزه شي دزيت خبر بيد رائد انو احنه موافقين .
امير -اجاني اتصال بلغوني انو اروح استلم جثت ابويه لان منفذين حكم الإعدام رفضت اروح بس امي اصرت گالت مهما يكون هذا ابوك ورحت استلمت الجثه وهو جان كاتب وصيه وگايل من انعدم تنطوها العائلتي اخذت الجثه دفنتها ويايه رائد ومن رجعت اجتمعنا فتحنا الوصيا وطلع كاتب بيها (اني الاب الضالم ابو نور اتمنى من نور وأم نور يسامحوني لان اني قصرت بحقكم وعيشتهم بعذاب الدنيا اعرف مراح تسامحوني ولا تبرولي الذمه على الي سويته والي سويته غصب عني لاني جنت اسكر باستمرار واتعاطا ماده الكرستال واطلب اعتذار خاص النور وامها لان اكثر اثنين دمر حياتهم وحبيت أبلغكم اني عندي بيت ملك بالبصره ومجنت حاجي الاحد عليه لان خفت من العشيره لتأخذه وتتصرف بي لان فلوس الفصل دفعوها همه وخفت ليأخذوا مني وجنت انتضر امير يكبر واسويله وكاله حتى يبيع البيت وأتصرف بفلوسه لان اني مجنت اگدر ادخل البصره بعد ما تبرت مني العشيره وأتمنى هسى تبيعون البيت وتشترون بمكانه بيت الكم وتعيشون حياتكم الي اني حرمتكم منها وتخلون جزء من الفلوس علمود عمليه ام نور وأتمنى ترجع تمشي وتربي امير وخواته احسن عيشه الي اني مگدرت اعيشهم اياها اتمنى تقبلو مني ويكون رد على جزء صغير من العذاب الي شفتو بسببي اتمنى بس تدعولي بالرحمه صح اني مرحمتكم بس بالكي الله يرحمني )
رضا -خابرني رائد وطلب مني نطلع باليل طلعنه وگلي ياعيني ياعيني راح تصير عديلي 😍 كلش فرحت لان البنيه طيوبه واني الي اختاريتها وحسيت اختياري صح
رضا -جبت اهلي وره يومين حتى يشوفون البنيه ويحددون موعد ويتفقون مثل متعرفون كل اتفاقات الزواج تم عن طريق النسوان راحت امي وأخذنت اختي وخالاتي وامي كلش حبت البنيه والحمد لله اتفقو و ام نور مطالبه شي گالت بكيفكم شتخلون حاضر شتخلون غائب بكيفكم اني عندي اهم شي راحت بنتي
نور -وبهاي الفترى جانت امتحاناتي مال سادس ابتدائي جنه نمتحن اني ونورس نورس رائد يقريها واني قراني اموري راد رضا يحدد وقت الخطوبة امير گايله هس نور عدها امتحانات من تخلص ان شالله يصير خير
رضا -شيخلص الامتحانات وشلون راح اتحمل هل فترى ما اشوفها اني اريد اگطع مهر بسرعه حتى اعرفها على جود ومن خلصت الامتحانات دزيت امي حتى تحددموعد نگطع مهر ونروح نگطع مهر بالحضره مو احتفال بالبيت وحددنا موعد يوم جمعه اخذتها هيه وامها واخوها واني وامي رحنه الكربلاء گطعنه مهر واخيرا صارت اليه
نور -گطعنه مهر وضل رضا كل يومين يجي يجيب جود يخلي يمي ويروح للمجمع اشويه شويه الحد ما حبيته وتعلقت بي وحددنه موعد الزواج بعد اربع اشهر يعني اخذت وقت حتى اخلي جود يحبني وهاا نسيت اگلكم استلمنه النتائج وناجحين يعني گدرت احقق اول حلم بحياتي
رضا - اخذت وقت بالخطوبة حتى أتعرف عليها اكثر واعرفها على جود وكلش حبيتها وحسيتها بنيه فقيره يعني راح اگدر اعلمها على ايدي والحلو بيها مترفضلي طلب رحت النور واتفقت وياها ماكو زفه وأخذها گبل شهر عسل بأيران نروح اني وياها وجود وهيه كلش فرحت لان ممسافره بحياتها رحنه كملنه عقد الزواج بالمحكمة وسويتلها جواز ورحت اشتريتلها بشت حلو ماروني واخذتلها سيت جنط مال سفر والجوازات ورحتلها من شافت الجواز كلش فرحت وهذني الجنط حتى نلم أغراضنا وباجر بالسته الصبح نطلع اني راح اجيبلج اغراضي وأغراض جود حتى نطلع منا
نور-فرحت من شفت الجواز وبنفس اليوم اجو رائد ونورس ضلو يمنه وضلينه نسولف ونشاقه ورائد كل شويه يگول شوفي شلون اني طلع مني فايده وخليتج تفرحين وتضحكين وانوب راح تسافرين مغرور بس يحمد بروحه گتلهم لتعيفون امي وحدها وگال رائد اصلا راح نجي نعيش بغرفتج فوك ونشمر كل اغراضج 😂صارت الساعه ١٢باليل اجه رضا جايب اغراضه وجايب جود يگلبي جابه نايم اخذته نومته بغرفتي وضلينه گاعدين نسولف ونتشاقه للصبح الحد ما صارت الساعه بالخمسه ونص بدلت وبدلت الجودي وطلعنه واجه رائد وامير وصلونه للمطار سافرنه الطهران وحجزنه فندق اهناك واهناك عشت احلا أيامي ويه رضا وجودي لان رضا حسسني بالحب وعشت وياه براحتي ماكو شي اخاف منه وجودي كلش تعلق بيه وگام يصيحلي ماما واهناك تعرفنه على عراقي عايش اهناك يشتغل مترجم وعنده سياره اخذنه اهناك فرنه المكانات السياحية ومره جان يسولف على انو هو يطلع ويه العوائل الي يجون يحتاجون أطباء وخطر على بالي اسأله على مشكلت امي وگال بسيطه اهنا يسولها عمليه وترجع تمشي وفرحت يعني واخيرا راح ترجع امي تمشي رضا گال ان شالله نجيبها ونسويلها العمليه وترجع تمشي بأذن الله وضلينه ١٥ يوم بطهران بعدها اخذنه المترجم القم اخذنه رقمه اخاف نحتاجه ضلينه اهناك يومين وبعدها أخذنا قطار فدك ورحنه المشهد كلش فرحانه اتمنيت امي واخواني ويايه ويشوفون اني واخيرا الله جبر بخاطري وعشت مثل الناس واكدر اتونس واضحك وشتري الي أريده والبس اليعجبني وركبت طياره رغم جنت اشوفها بس بالسماء مجنت أتوقع يجي يوم وأركب طياره وقطار 😍😍وصلنه المشهد واخذنه فندق اهناك وطبعا كل منطلع نتمشى او نروح مكان رضا يلزم ايدي ويمشي حسسني اني شي مهم بحياته ويخاف عليه ويشتريلي كل شي عيني تروح عليه ورحنه زرنه الإمام الرضا عليه السلام ورحنه افترينه الأماكن السياحية والأسواق واني جنت اشتري شغلات الجودي لان كلش حبيته وخاصتا من يصيح ماما اموت من الفرح واني واهناك گالتلي نورس اني حامل كلش فرحتلها واشتريتلها كومه شغلات منا واشتريت هدايه الامي والأمير والمروه ونورس واكيد منسيت سبب قوتي رائد وبعد ١٥ يوم لاخ قررنه نرجع للعراق حجزنه ورجعنه ولگينه رائد وامير ينتضرونه بالمطار اول ما وصلنه گال نروح البيتنه گتله لاع حباب اول اروح الامي گال بعيوني اكيد ورحت وشفت امي وخطيه نورس معايفتها بس لگيتهم مفرغين البيت سألت على السبب رائد گال خلص راح امير وباع بيت البصره واشترينا بيت ١٠٠متر قريب علينه حتى تبقى عيني عليهم وهم بيت نضيف احسن من هذا تعبان وهم طابقين حتى الطابق الفوگ الأمير يجيب جنه بعد وبالمناسبه اني ورضا بيتنا قريب على رائد يعني صرنه كلنه بشارع واحد وسولفتلهم على الطبيب وگالو ان شالله من نفرغ من الشيله نأخذها تتعالج واهنا جان خطيه امير بهاي السنه خطيه يدرس ويشتغل حتى يگدر يصرف على البيت وخلص سنه اوله من كليه العسكريه واخذني رضا ورحنه البيتنه هو بيته بيت اهله يعني من جان مزوج قبل باني بالحديقه مال اهله وصلت للبيت لگيناهم مرتبي ومنضفي بيت حلو ومرتب وهو بيت جاهز كامل يعني اغراضه نفسهن بس مغير غرفه النوم اني مجان عندي اعتراض على الاغراض دخلنه البيت ارتاحينه وجودي جان نايم بحضني رحت خليته بجربايته وبعدها اجو امه وأبو وخواته باركولي وابوه لبسني گلاده وگال يابه منا وجاي اني ابوج واذا رضا يضوجج بس صيحيلي واعلملج اياه 😅والأم باستني وگالت يمه ديري بالج على جود ترى ما شاف امه بس هسه انتي امه وانطتني تراجي والبنات مو كبار وحدة تدرس سادس إعدادي وحده ثاني متوسط وعنده بعد اخ هم مامزوج الي يشتغل وياه بالمحل يعني هو جبير اخوته وگال شوفي هل سنه من تقدمين على ثالث متوسط إدرسي ويه اختي فرحت لان ما گال لتمتحنين بعد بالعكس وگف ويايه ودعمني ضلو الناس يجون ويباركون واجو اهلي هم نورس جانت جايبتلي هديه گلاده قران مشتريلي اياها رائد وامي جابتلي محبس مشتريلي اياه حبيبي اموري وره اربع اشهر اتفقو رائد ورضا يأخذون امي الايران تسوي عمليه وتكاليف العمليه خاليها من فلوس بيت البصره ورحت اني وياهم ومكدرنه ناخذ نورس لان حامل ودخلت شهر الخامس وخليته يمها مروه لان مروه گامت أداوم مدرسه وامير هم بالكلية مرحله ثانيه رحنه بالطياره وصلنه الطهران اتصل رضا بالمترجم الي تعرفنه عليه واجه واخذنه أطباء اهناك وفحوصات وسوينالها عمليه وتأخرنه اهناك شهر رائد اضطر يرجع علمود نورس وضلينا اني ورضا ورجعت امي تمشي واخيرا امي تمشي وگال الطبيب بعد تگدرين تسافرون وأخذنا امي ورجعنا واهنا حققت الحلم الثاني وبعد كم شهر جابت نورس جابت بنوته تخبل وسمتها نهاد واهنا رجع التم شمل عائلتنا من جديد صَار عدنه نهاد الصغيره واني عندي جود اعتبرته مثل حمودي ابني وبعد فترى قريب الامتحانات راح رضا وقدملي الي والنورس خارجي للثالث متوسط وضليت أقرى ويه اخت رضا لان هيه هم ثالث وشاطره وجانت تفهمني وامتحنت ونجحت 😍وعشت احلا حياه واهنا انتهت قصتي انتهت قصت نور صح ضاع شبابي وضاعت طفولتي بس رب العالمين جان ضاملي الحياه الحلوه بالنهايه الله عوضني على زوج وابن يسون عندي الدنيا كلها امي رجعت تمشي مروه رجعت للدراسه امير طالب مرحله ثالثه وان شالله يتخرج ويصير احلا ضابط واني ونورس رجعنا ندرس وعوضنا الراح وبعدني راح اكمل سادس هم مراح أتوقف بالدراسة ‘’
ملاحضة// هاي قصة حقيقية 90 %السبب ليش 90%لن غيرت السامي علمود لاتنعرف شخصيت البنية "
"""العبره من اختياري الكم هيج قصه هو انو لازم اكو نهايه كل حياه مئساويه او فرج بس احنه منتحمل ومنصبر ونريد كلشي بساع وهم لازم منستسلم ونكون ضعفاء لان الضعيف ماله مكان بهذا العالم ولازم كل بنيه تحاول تكون قويه وتصنع قدرها بأيدها "
هاي جانت نهايه قصتي اتمنا تكون نالت إعجابكم
