حياتي ( قيد التعديل)

الحلقة الرابعة عشر

السلام عليكم

بعتذر عن التأخير بس الكتابة أخدت وقت شوية .

ثانيا .. أنا اسف بس نهاية الرواية هتكون حزينة للأسف بس لازم تحصل .

نبدأ علي طول

السبت .. بداية الأسبوع الرابع من انقطاع حسام عن الاتصال ..

مروة قاعدة علي سريرها بتكلم نفسها ..

/ دلوقتي أنا محتاجة فلوس .. بابا بدأ ياخد باله من موضوع الفلوس وخلي البنطلونات والقمصان قريبين منه .. زي ما قلت قبل كدة مش هينفع آخد من مصطفي و خالد .. حسام مش موجود أطلب منه .. وبابا كدة بلوك .. دنيا وقمر رغايين ولو رحتلهم مش هيرضوا يدوني من غير لما أقلهم عايزاهم ليه .. كدة مفيش غير اتنين .. ماما .. وولاء

قعدت تفكر شوية وبعد كدة رجعت كملت كلامها ..

/ ماما معاها دهب بس .. لو أخدت غويشة مش هتاخد بالها .. وولاء معاها كومة فلوس من كتر بابا مبيديها .. أصل أنا كلبة عايشة معاهم في البيت باخد فتافيت .. مش هيجري حاجة لو أخدت منها حاجة مش هتاخد بالها ..

اتسحبت مروة لأوضة أبوها وأمها .. راحت علي المكان اللي فيه الدهب وأخدت غويشة من صندوقها ورجعته مكانه .. اتسحبت علي أوضة أختها وملقيتش حد فيها .. راحت علي شنطة وفتحتها ولقيت فيها فلوس كتيرة .. زعلت لأنها مش بتتعامل زي أخواتها .. أخدت شوية ويدوب هتاخد تاني النور اتفتح وشهقت ولاء : الله يخربيتك بتسرقيني ؟

مروة اتصدمت ووقفت بالراحة : ولاء بالراحة وبهدوء من غير زعيق هفهمك .

_ أفهم إيه يا زبالة يا قليلة الأدب يا .. يا حرامية .. يا بابا .. يا ماما .. يا مصطفي .. يا خلق ..

وطلعت تصوت برة وتصحي النايمين .. أبوها وأمها وأخوها خالد صحيوا مخضوضين وطلعوا يشوفوا في ايه وفتحوا النور .. وفجأة وقفت مروة وراها وحطت السكينة علي رقبة أختها وقالت بصوت مرعب وهيئة مرعبة أول مرة حد يشوفها كدة : والله لو قربتوا مني .. لأدبحها وأسيح دمها ..

كلهم وقفوا مش فاهمين اللي بيحصل ده حقيقة ولا كابوس .. فاقوا علي ولاء اللي بتصرخ برعب فتأكدوا انها حقيقة ..

خالد : بس بقي ارمي السكينة وبطلي هزار بايخ يا ..

مروة : مش بهزر يا خالد مش بهزر .. تحب تجرب .. وقربت السكينة زيادة علي رقبتها ..

مروة كانت بتتكلم بشر ودي أول مرة حد يشوفها كدة .

الأب : يبنتي اخزي الشيطان واستهدي بالله وارمي اللي في ايدك ده وسيبي أختك .

مروة اتضايقت للحظات .. أبوها كان بيكلمها باستعطاف .. واخر مرة قالها يبنتي دي كانت في ثانوية عامة .. كان نفسها تتقال بالطريقة دي في موقف تاني غير ده أو لو كان حنين من الأول .. بس بعد كدة افتكرت قسوتهم وجبروتهم عليها فشدت ايدها علي أختها اللي بتصوت ..