[ Unicode ]
မိုးရေတို့ကို မညှာမတာ ရွာသွန်းဖြိုးနေစေတဲ့ ကောင်းကင်ပြင်ကို Haechan မကျေမနပ်ကြည့်နေမိတယ်။
ပါးပြင်ကို လာရောက်သက်စင်တဲ့ မိုးစက်မိုးပေါက်တို့ကို မသုတ်ပစ်မိသေးဘဲနဲ့ပေါ့။
" အစ်မ ဘာပြောလိုက်တာလဲ။နောက်နေတာလား "
" တို့ တကယ်တောင်းပန်ပါတယ် မောင် "
" စေ့စပ်ပြီးသားသူရှိပါလျက်နဲ့ ကျွန်တော်နဲ့တွဲခဲ့တယ်ပေါ့။ အစ်မ ကျွန်တော့်ကို ညာခဲ့တာပဲ "
" တို့ မောင်ကိုချစ်လွန်းလို့ မပြောပြခဲ့မိတာပါ။တို့ သူ့ကိုမချစ်ဘူး။မောင် တို့ကို လက်ထပ်ပါလားဟင် "
" ကျွန်တော် ပထမနှစ်ပဲရှိသေးတယ်လေ။ဘွဲ့တောင်မရသေးဘဲနဲ့ ကျွန်တော် အစ်မကိုဘယ်လိုလုပ်လက်ထပ်မှာလဲ။ နောက်ပြီးကျွန်တော့်ကို လိမ်ညာပြီးတွဲခဲ့တဲ့အမျိုးသမီးတစ်ယောက်ကို ကျွန်တော် ထပ်မယုံကြည်နိုင်ဘူး "
" တို့မပြောပြမိခဲ့တဲ့အတွက် တောင်းပန်ပါတယ်။ ကျေးဇူးပြုပြီး တို့နဲ့လမ်းမခွဲပါနဲ့ မောင်ရယ် "
" ကျွန်တော်တို့ ဇာတ်လမ်းကို အဆုံးသတ်ကြတာပေါ့ Kim Yujeong "
အသည်းကွဲနေတဲ့ အချိန်နဲ့ တိုက်တိုက်ဆိုင်ဆိုင်
မိုးဒေဝါဟာ သည်းကြီးမည်းကြီးရွာသွန်းဖြိုးနေလေရဲ့။
ဟုတ်တယ်။ လွန်ခဲ့တဲ့ မိနစ်ပိုင်းလောက်က ချစ်သူနဲ့ လမ်းခွဲခဲ့တဲ့Lee Haechan ဟာ အသည်းကွဲနေတယ်။
ဒါဟာ ရှက်ကြောက်စရာမဟုတ်တဲ့အတွက် ချစ်သူဟောင်းကို သတိရမိတဲ့သူ့ကိုယ်သူ အပြစ်မတင်မိပါဘူး။ ချစ်သူဟောင်းအပေါ် အတိုင်းအတာတစ်ခုအထိတော့ ချစ်ခဲ့ပါတယ်ဆိုတဲ့ သက်သေပဲလေ။
ခပ်သေးသေးစားသောက်ဆိုင်ရှေ့ ခဏဝင်ရပ်ပြီး မိုးခိုနေတာ မိနစ်ပိုင်းလောက်ကြာသွားပြီဖြစ်တော့ ဆိုင်ရှင်လင်မယားနှစ်ယောက်က မျက်စောင်းထိုးနေပြီ။
ဒါတွေကိုလည်း သိပ်ဂရုမပြုနိုင်သေးဘူး။
" အာ မိုးကမစဲနိုင်တော့ပါလား "
