#البطل_المغمور2 "زهور القمر"
#جمان_فريد
#الجزء_السابع_والثلاثين "ولو بعد حين"
رمضانكم مبارك
( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُم مِّدْرَارًا * وَيُمْدِدْكُم بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا * مَّا لَكُمْ لَا تَرْجُونَ لِلَّهِ وَقَارًا * وَقَدْ خَلَقَكُمْ أَطْوَارًا * أَلَمْ تَرَوْا كَيْفَ خَلَقَ اللَّهُ سَبْعَ سَمَاوَاتٍ طِبَاقًا ) نوح 10-15
💐💐💐💐💐💐💐💐💐💐💐💐💐💐💐💐
مقعمزة فوق طاوله في صالة حوش...
وتومي "تهز في جسمها للأمام وللخلف" أثار خدوش بالدم ع وجهها والدموع ينزلوا من عيونها اللي يشبحوا في الفراغ..
وهي تتفكر كيف علاقتها بسلفها تطورت مع الوقت ووصلت لأقصى مراحل الانحراف
سلفها اللي كانوا يقولولها عادي زي خوك تطلعي معاه مش مشكله
يرفعك لحوش اهلك ولمشاوريك مش مشكله
ديرله غداه وعشاه وارفعيهوله..
سلفك زي خوك خودي رقمه وهدرزي عليه غادي...
سلفها اللي كانت تطلع قدامه من غير حجاب بعد ماقالولها وين المشكله زي خوك...
ووصلت بيها توري في حنتها عادي ليه هو وخوته عادي
ماهو سلافها زي خوتها عادي...
راجلها نفسه كان يقوللها كلميه يرفعك ويجيبك وياخدك...
ماهو زي خوك عادي....
وكثرة الاختلاط...وازالة الحدود...والجرأة في الهدرزة...
كانت ابواب الشيطان يفتح فيها باب ورا باب ورا باب...
لين وقعوا في المحضور....
وصار اللي صار...في غياب الزوج...
وام الزوج اللي ديما تطلع هني وهني مخليه الحوش للكنه بروحها ...
واب زوج غالبا مش موجود....
الجو كان مهيأ تماما....وفعلا صار اللي كان متوقع من علاقات عائلية منحلة بدون ضوابط...
🍁تجي وحده تقول...
عشنا عمر مع سلافنا بنيه صافيه نضحكوا ونبصروا ونهدرزوا زي الخوت ولاعمره صار بينا حاجه غلط..
شن عرفك...وشن دراك بالنوايا لو نيتك انتي صافيه ممكن الطرف التاني يبدي عكس مايبطن...
ياكم من وحده راجلها قارنها بسلفتها شوفيها كيف تلبس
شوفيها كيف تتكلم شوفيها شن دير...
شوفيها...شوفي اللي هو شافه...اللي انتي مراة زيك زيها ماركزتيش عليه...
وياكم سمعنا بواحد تمنى مرت خوه برغم انه متزوج...
وياكم سمعنا بكوارث زي اللي صار مع دنيا ورضوان...
وكانت النتيجه وخيمة ومدمرة...
حترجع تقول وحده لاياودي حني وسلافنا زي الخوت وعايشين مع بعض بالنيه الصافيه وماعندناش في الخبث...
نيتك مش حتكون اصفى من نية الرسول والصحابه والصحابيات...
اللي لما قاللهم الرسول...
"الحمو الموت"
اللي هو اخ الزوج وزوج الاخت ومايتبعهم..
فيسع رسموا الحدود وحطوا الضوابط وامتنعوا عن بعضهم...
درءا للمفاسد...
تسكير الأبواب كلها في وجه الشيطان حتى الثغرات الصغيرة تتغطى بالشامنت بش مايلقاش من وين يخش..🍁
دنيا انتفضت بفزع لما سمعت باب الحوش يدق بقوة...
قعدت ترعش مع بعضها وهي تبكي وتقول؛حي عليك يادنيا حي عليك..حي عليك..
"افتحي الباب افتحي"
انصدمت لما سمعت الصوت ..ناضت ومشت تجري فتحت الباب...
شافت رضوان واقف قدامها يشوفلها بنظرة تخوف والدموع ينزلوا منها...
دفها وخش شدها مع ذراعها وسكر الباب بقوة..
وقعد يجر فيها وهي تقول برعب؛رضوان خيرك يارضوان..
جبدها بقوه وحطها ع الحيط وشدها من رقبتها وهو:يافاسده علاش ماقلتيش ياحقيرة علاش..
دنيا كانت ترعش وتبكي..
جبدها من رقبتها وخبطها ع الحيط وهو يقول بصوت يخوف:تكلمي..
وهي صرخت بصوت عالي بعدين قالت؛شن بنقول شني..وانت بعد اللي درته هربت ومعاش وليت بكل...مذكر لما اتصلت بيك اخر مرة شن قتلي...قتلي انسي اللي صار وانسيني واني نادم ع اللي درته وقعدت تبكي..ومن بعدها حتى رقمك غيرته بش معاش نكلمك...وين عرفت..وين عرفت روحي حامل زبطت انه مش من ضرار...
خطبها ع الحيط وقال؛علاش خلتيه يافاجره علاش...
دنيا وهي تتوجع؛عرفت بعد وقت ماقدرتش نطيحه...
رضوان؛ياملعونه ياكذابه كنتي تبي ثبتي روحك وتقعدي قلتيهالي قبل ضرار مايحبكش ومرات يطلقك في اي وقت ولا...
دنيا؛ماديرش روحك بريء وخالي قضيه انت خنت خوك...انت اللي جريتني جر للخيانه انت اكبر خاين لضرار...
هي تتكلم وهو يتفكر في نظرة خوه ليه كيف كانت قبل ليموت بلحظات...
حقد ع نفسه وحقد عليها ..وشد راسها وقعد يخبط فيه ع الحيط وهو يقول:اسكتي يافاجرة..يافاجره...اسكتي..اسكتي..اسكتي..
ماكانش واعي لنفسه...مااستاقظش الا لما ارتخت وكانت حطيح..
فتح عيونه الأخر وهو يشوف في الدم اللي ع الحيط..
وشبحلها هي لقاها فاقده الوعي تماما طلقها طاحت ع الارض ودمها يسيح...
دب فيه الرعب....شاف ليده اللي كان شاد بيها راسها شاف ع روس صوابعه دم...
مسحه في فانيلته..
بعدين وخر كم خطوه وطلع يجري من الحوش...
وقعدت دنيا مرميه ع الأرض ودمها عبا الارض اللي تحتها....
🍁🍁🍁🍁🍁
مقعمز في الجنان المشترك بين حوشهم وحوش خالته..
ومش مهتم للصقع اللي يضرب فيه...
يمر قدام عيونه اللي صار في المستشفى...
فهم القصه من اللي سمعه وعرف اللي فيها...
اللي صار كان بالنسبه ليه صادم...مش لأنه اول مرة يسمع بيه..
بس اول مرة يشهد ع شي زي هدا...
وليس الخبر كالعيان...
فهالوقت..
خش ولد خالته للحوش...
شافه مقعمز برا قال..
اسماعيل؛شن يدير برا فهالصقع!؟
درس السيارة ونزل منها ومشاله...
قعمز حداه وقال؛نادر...
تنهد نادر وقعد ساكت..
عقد اسماعيل حواجبه وقال:صايرة حاجه!؟
شبحله نادر بعدين غير عيونه عنه وقعد ساكت..
واسماعيل يشوفله بإستغراب...
🍁🍁🍁🍁
"هو حكالك قبل"
سارة؛ايه خدي رأيي واني شورت عليه يقبل..
زياد؛تصدقي خف عليا الشعور بالذنب شويه..
سارة؛شعور بالذنب!؟
زياد؛ايه..بوي بسببي سيب الوزارة وبسببي اني جاه السكر..
سارة؛كم مرة يقولك هو معاش تحمل روحك ذنب شي كله قضاء الله وقدره وقالك انه كان ناوي يسيبها هكي ولاهكي وقتها..
تنهد زياد وقعد ساكت..
سارة شبحتله شويه بعدين ابتسمت وقالت؛زيزو...
شبحلها..
سارة؛امتى بتفتح موضوع تهاني ..
زياد:شن قلت قبل اني نراجيها تتخرج..
سارة؛صح هو معاش مازال شي ع التخرج بس اني خايفه تهاني ماتقعدلكش لهداكا الوقت..
قلبه انقبض وقال؛شن قصدك؟
سارة تنهدت وقالت؛الحق في واحد يعرف خوها جهاد كان نسيبه خو مرته الاولى قعد يجري في جرتها هلبه وهي ترفض ع خاطر القرايه وخوتها قالوا بعد تتخرج ساهل...
زياد وهو عاقد حواجبه بغضب والغيره باينه في عيونه؛هي شني؟
سارة:الحق مش عارفه مافي شي واضح منها..بس هي قالت سكرت الموضوع لبعد نتخرج يعني مرات كان ماسبقتش غيرك يسبق...
هو قعد يشبح في الفراغ بغضب وهو ساكت..
واخته تشبحله بعدين قالت؛زياد..
هو طول ناض وطلع من دارها...
هي ناضت وسكرت الباب وقالت بضحكه وصوت منخفض:ماتتحركش الا هكي انت..
🍁🍁🍁🍁
"لاحول ولاقوة الابالله"
نادر:منظره لتوا مش قادر نحوله من عقلي ماتوا قدامي هلبه يااسماعيل..بس سبب الموت يفرق...كلهم ماتوا مرضى...
بس مافي حد مات بصدمه قدامي وصدمة خيانه!!
اسماعيل يسمع فيه وباديه ع وجهه ملامح الاستياء..
نادر والدموع في عيونه؛تفكرت اللي صار معاي كله يااسماعيل...كله...
🔺️قبل سنوات....
وصل بسيارته للمزين بش بيروح بعروسته...
اميره...قريبة جدته..البنت اللي كانت تزور فيها مع امها ديما..
ونادر شافها غادي...
ماكانش مهتم لامرها في البدايه..بس هي قعدت تحاول تلفت نظره ونجحت فهالشي..
نادر كان شخصيه صلبه وجافه..
وهي كانت كلها انوثه ومرح ودلع....
خلاته يميللها..بس مع ذلك ولا مرة كلمها او صار بينه وبينها اي شي...
وفي يوم قال لجداه انه يبيها..
وجداه فرحت هلبه ومش خطبتهاله بروحها..
وامه لما سمعت زعلت منه وانقهرت هلبه...ورفضت البنت رفض قاطع..
بس مع الوقت ومن حب امه ليه قدر يراضيها ويرفعها تخطبهاله ...
مديحه ماارتاحتش للبنت ولاحبتها وصارحت ولدها بهالشعور
وهو اعتبره مجرد شعور بالغيرة..
بس مع الأسف ماكانتش غيرة...
كان احساس قلب الأم اللي مايخيبش...
بعد.الخطبه كان قليل مايكلم فيها وهي اللي تكلم فيه طول الوقت ومغرقاته بإهتمامها...
ومرات يطلع هو وياها وكان يرفع معاه امه...
وكانت تلاحظ ع البنت في تصرفات ماتعجبش فيها..
ونادر كان مايشوف في شي غيرها...
ومع الوقت...اهتمامها بيه بدي يخف..ومعاش ولت تحب الطلوع معاه..
كانت مرات تزور فيه في المستشفى...بس بعد فترة هالزيارات انعدمت..
هو حس بشي مش مريح...لهدا قدم موعد العرس..
ولما خبرها بهالشي بانله انها مافرحتش..
ومع ذلك هو كان يحاول يتجاهل هدا كله والشعور اللي يحس بيه..
لين جي اسبوع العرس....
يوم عقد القران مشالها للحوش..
قابلاته بإبتسامه مجامله واضحه ومش باين في عيونها الفرح...
••نادر:خيرك اميره...شن صاير معاك في حاجه ناقصاتك تبي شي قولي ماتتحشميش راني راجلك توا..
اميرة وهي تحاول تخفي عدم تقبلها ليه ابتسمت مجامله وقالت:معاش تتوهم مافي شي..وتوا بنخش يستنوا فيا داخل يش يحنوني..
نادر بإبتسامه؛كثري منهل الحنه نحبها هلبه راهو.
هي يدوب ابتسمت وقالت؛باهي...سلام..
ولفت ومشت بدون ماتسلم عليه...
والاحساس الغير مريح قاعد في داخله يكبر وهو يحاول يتجاهله...
لين جي يوم الزفه....
ومشي بيجيبها من المزين...
درس السيارة ونزل وخش للمزين..
وقف فم بابه الداخلي وقعد يدق عليه..
طلعتله صاحبة المزين ووحده من اللي يخدموا معاها..
••المزينه؛والله شن بنقولك ياخوي هي جت هني الساعه 12صح وحتى الفيلو وصل معاها لكن بعد نص ساعه جاها هاتف طلعت بسرعه من حدانا..
التانيه قالت:اني لحقتها نجري لقيتها ركبت سوناتا سودا والسيارة طلعت بيها تجري...
نادر بصدمه وغضب:شن تقطفي انتي وياها!! خشوا جيبوا المراة من داخل خشوا..
:اقسملك بالله ياوخيي ماهي هني..
نادر:شن درتوا فيها ياكلاب شنو درتوا فيها ...قسما بالمولى كا ن ماطلعت توا نتش فيكم النار...
:استهدى بالله ياخوي والله ماقلنالك كان الحق..
وقعد يعيط عليهم وفقد عقله بالمرة وجي بيخش يدور داخل..
لولا صحاب المحلات المحيطه بالمزين اللي حالوا بينه وبين مايبي يدير...
وانضرب حتى الضرب...
وهو يمسح في الدم من فمه قعد يهدد ويقول؛والله لما نحبسكم بالله وركب سيارته بيتوجه مركز الشرطه..
بس هو في الطريق حس بشعور غريب اشبه بإحساس الموت...
في عيونه الرؤيه معاش ولت واضحه..
لحظات وفقد الوعي...وهو يسوق..
صار معاه.حادث سير أليم...
وقعد من بعده في غيبوبه لمدة اسبوعين...
خلال هالوقت كان اسماعيل اللي انقهر ع ولد.خالته وخوه...
يدور ورا اميره اللي دارت العار مش بس لأهلها حتى لنادر اللي كانت ع ذمته...
وعرف في الاخير انها كانت على علاقه مع واحد مش ليبي وصارت بيناتهم مشكله سيبها...
وهي بش تقهره قررت تنخطب لغيره وكل اللي داراته مع نادر كان قصدها بيه قهر صاحبها..
اللي ماتحملش تكون لغيره...ورجعلها ورجعلته وقت كانت مخطوبه لنادر...
بس معاش عرفت تخلص منه بسبب ضغط اهلها عليها....
وفي نهايه اختارت تهرب مع صاحبها في هداكا اليوم...
🔺️الوقت الحاضر..
نادر ودموعه في عيونه؛حتى بعد مافقت ماصدقت حد فيكم كنت مصدقها هي بس...ولما استوعبت اللي صار...طلقتها..وطلقت معاه كل شي ليه علاقه بالحب والزواج...
اسماعيل:كلبة ماتسواش عفسة رجلك..
نادر؛ياريتني فهمت الشي هدا من زمان...ابتسم بتهكم وقال..وين يجوا يقولوا الراجل خوان ومالاش امان...
اسماعيل ضحكت تهكما وقعد ساكت..
نادر؛ومع هذا زي مافي الباهي فينا والكي..حتى هما فيهم الباهيه والكيه...
اسماعيل بإبتسامه:هي تشوف فيك كي توا..
نادر بضحكه:هدا اللي يبان منها بس.
اسماعيل:قصدك تأكدت انها تحبك..
غمض عينه اليمين وقال؛مش بالزبط...بعدين فتحها وقال...لكن في شي..
ابتسم ولد خالته وقاله؛قوللها تستعجل العمر يجري..
غمض عيونه وقال:معاش تفكرني...
ضحك اسماعيل..
🍁🍁🍁🍁
تاني يوم..
الساعه التاسعه صباحا..
طالعه دانيه من الحوش ماشيه للقراج..
ويقابلها بوها مقعمز ع كرسيه وهو يقول:بتطلعي توا وتروحي اخر النهار هاه!
دانيه؛ماشيه نقرا..
مجيد وهو يعجب عليها؛ماشيه نقرا...طالعه بهالمنظر تخالطي في التريس..
دانيه وهي تشوف للبسها قالت:خيره منظري!!؟
"ماخيره شي بنتي "
شبحت دانيه لأمها..ومجيد شبحلها بإزدراء..
سدينه؛جلباب واسع وشاربه كبيره وكلك مستورة والحمد لله تقري بإحترامك ومافي حد عاب فيك..توكلي بنتي توكلي..
دانيه شبحت لبوها شويه بعديت مشت..
وهو يتبع فيها بعيونه بنظرات ازدراء..
سدينه؛اسمع انت ...شد خربتك احسنلك راهو سكتت عليك بما فيه الكفايه..
مجيد تهكما؛والله وطلعلك صوت ووليتي مراة ياسدينه..
سدينه؛وليت مراة بعد ماسيبت وجهك وجه الشيطان هدا..
مجيد؛الله يرحم ايام كنت نفنص فيك تموتي في مكانك وعيونك ماترفعيهمش فيا..
سدينه ابتسمت تهكما وقالت؛تعرف لما درتش لروحك حد نخلي تقعد في الشارع ولايهمني رشيد ولاشن يدير رشيد.
قعد يشبحلها بشي من الخوف..
قدمت وقالتله؛خش لخربتك خش وماتطلعش منها...
هو شبحلها شويه بعدين لف بكرسيه وخش للملحق وسكر الباب بقوة...
مجيد بتسخط الفجار؛عليك وقت...
فجأه انفتح الباب..
سدينه؛تسكره مرة تانيه بقوة ماتقعدش فيه دقيقه زياده..وتوا بنطلع وبتسكره وراي بالشويه...
ولفت ومشت..
وهو غصب عنه مشي للباب وقعد يسكر فيه وهو يشبحلها كيف تشوفله بإبتسامة شماته...
سكر الباب بهدوء..بعدين خبط بقبضة يده يد الكرسي بقوة من القهر....
🍁🍁🍁🍁🍁
وفي بلاد بعيدة ...
في من فاق ع اخبار مفجعه وصادمه..
مريم وخوها...
وهو مقعمز في دارها بعيد عن مرته...
مريم بصدمه؛ياربي!
خوها:قال معاذ الدنيا مقلوبه من امس...فاجعه فضيحه...
هو مات ومرته ماتت والعيل بين الحياة والموت ورضوان مش باين...
مريم بصدمه:رضوان معقوله رضوان!! مش مصدقه.
؛ولا اني والله...مش قادر نصدق اقسم بالله..
مريم بخوف؛مانبيش نروح ..
:حتى اني حتى معاذ قال كان تقعدوا غادي خير ..
مريم؛خل نتصل بأمي ونزيد نفهم منها...واسمع رد بالك تقول لمرتك حاجه..
:كان بنقوللها علاش نجي نقولك.بيني وبينك ..
مريم هزت راسها وهي ساكته..
وخوها طلع من حداها..
بعد.ماطلع قعدت تفكر في اللي سمعاته...
ماتوقعتش انتقام الله من ضرار يكون قوي لهالدرجه..
بس هادي سنن الله في العقاب والانتقام شديد...
اتصلت طول بأمها بش تفهم منها..
"مرت عمك هبلت رسمي يابنتي المراة عقلها معاش عليها..وعمك خاش حالة صدمه"
مريم؛والوليد..
"والله ماني عارفه شن صار فيه توا بس وضعه صعب هلبه"
مريم بألم؛والله مايوجع غيره في اللي صار هدا كله..
"لابنتي كلنا نوجعوا...هادي فضيحه للعيله كلها يامريم بوك وعمامك صايرة فيهم حاله...ادعي ربي يحفظ وبيك"
مريم ودموعها ينزلوا:يارب احفظه بحفظك...
🍁🍁🍁🍁
في مستشفى الرازي...
كان هيثم يقضي في اخر ايامه في ادارة المشفى..
قاعد يرتب في الوضع للي بيستلم بعده..
وفي عز انشغاله..
دق باب مكتبه..
هيثم؛تفضل..
انفتح وخشت تهاني تبكي..
هو لما شافها تفاجئ وقال..
هيثم؛لاباس بنتي!
تهاني بدموع؛دكتور ارجوك ماتسيبش قبل لدير حل مع الدكتور زياد..
هيثم رفع حاجبه وقال؛شن دار؟
تهاني؛يدخل فيا هلبه معاش توقفي مع هدا مع تكلمي المريض هدا معاش تضحكي ويسمع فيا في كلام جارح..
هيثم يسمع فيها وهو يدور ع حاجه في تليفونه بعدين مده لتهاني وهي تتكلم وقفت كلام وخدت التليفون وقعدت تشوف فيه..
ركزت في الصورة كويس..
رسمه فيها عيون...والعيون هادم عيونها..
هيثم:اللوحه هادي راسمها زياد قبل سبعه سنين..
قامت تهاني عيونها وشبحت لهيثم...
ع خشة زياد لما شافها عنده انصدم..
شبحله بوه وقال:بنتي كان خطبتك لزياد توافقي!.
هي قعدت تشبحله ببلاهه ..
وزياد يفنص في بوه..
هيثم:شني بنتي !.
زياد؛دكتور!
هيثم؛اسكت انت...
التفتت شبحتله ..
وهو شبحلها ..
كان خايف يشوف في عيونها الرفض..
وع يونها كانوا يقولوله ايه في كل لحظه...
لكن الخجل سيطر عليها لفت وطلعت بدون ماترد بكلمه..
هيثم شبح لزياد وقال:هكي تبي انت..
وزياد يشوف لبوه وهو مصدوم..
ع خشة تهاني مرة تانيه وهي تقول بإحراج؛اسفه دكتور نسيته..
حطت التليفون ع الطاوله وطلعت..
وزياد طلع وراها..
حرك هيثم راسه يمين ويسار بعدين خدي هاتفه حطه قدامه ورجع يخدم...
🍁برا..
زياد يمشي ورا تهاني ومتردد يوقفها..
وهي تمشي وحاسه بيه يمشي وراها...
فهالوقت..
خليل كان قاصد مكتب هيثم بيتفاهم معاه ع بعض الامور اللي شغله في المستشفى..
وين قرب يخش للممر اللي يرفع لمكتب هيثم...
زياد:تهاني...
هي وقفت طول...اول مرة يناديها زياد بإسمها..
حست بشعور حلو بالمرة..بس قعدت محافظه ع ملامح الحده والجديه...
هو وقف قدامها وقال..
زياد؛مش حتردي؟
تهاني:على شني!؟
زياد؛ع سؤال الدكتور هيثم.
تهاني:شن هو..
زياد قعد يشبحلها وهو ساكت..
وهي تشوفله ببرود مصطنع...
وخليل يسمع فيهم وهو مصدوم ودمه يغلي..
زياد تشجع وقال؛كان خطبتك شن ردك...
تهاني شبحتله شويه بعدين قالت؛الكلام في الامور هادي مايجيش معاي اني..عندي خوت تفاهموا معاهم هما قبل..
زياد؛اكيد..لكن مانبيش نمشي لخوتك قبل نعرف رايك..
تهاني؛ورايي تعرفه من خوتي...
ومشت وخلاته وقلبها يدق بقوة...
توتر..حب..وفرح....
اما هو تبعها بعيونه لين اختفت..
بعدين تنهد ومشي من الجهة التانيه..
وخليل واقف في مكانه وهو مضايق ومعصب من زياد..
خدي نفس بعدين مشي لمكتب هيثم...
🍁🍁🍁🍁🍁
خشوا للزنقه الزوز وهما مروحات من المدرسة..
جنان؛اني قبل قتلك راجعي لكن انتي لاهيه بالكورة ومش عارفه شني.
ريحان؛قوليه الكلام هدا قدام بابا وسارة باهي..
جنان؛كان سألوني مش حنكذب..
ريحان:بيوع من يومك..
وجنان قعدت تشوفلها بطرف عينها وهي ساكته..
فجأة فات من جنبهم عرفه...
جنان قعدت بعيونها معاه...
وريحان مش مهتمه تفكر في درجة امتحانها وهي تلعب بقلم في يدها...
هو لما وصل في باب الحوش شبح جيهتهم..
فهاللحظه طبست ريحان بتجيب قلمها بعد طاح منها..
شافاته كيف تبع ريحان بعيونه...
ضايقت وغيرت عيونها عنه..
ريحان:استغفر الله وخلاص...
شبحتلها جنان وهي مضايقه..
وصلوا الزوز للحوش فتحت جنان الحوش وخشوا مع بعض وسكروا الباب.
وعرفه بعد خشوا..
خش للحوش وسكر الباب وهو مبتسم..
"ياعيني"
هو استاقظ وشبح لعفاف اللي جاته وهي تقول؛شكلك اشبح من شفت قبل لتخش للحوش..
هو ابتسم بإحراج وقال؛يام..
عفاف بضحكه؛راني زابطاتك..
عرفه وهو مبتسم برفعة حاجب؛شن زابطه ترا؟
عفاف ضحكت بعدين قالت؛مازال صغيرين وين تكبروا فكر في الحاجات هادي..
عرفه؛هي مش بتفكير يام حاجه غصب عنك..واني عارفه صغير وهي صغيره وتوا ان شاء الله نكبروا مع بعض ونبعتك تخطبيهالي..
عفاف بإبتسامه؛ربي يحضرني هداكا اليوم يارب..
عرفه؛آمين..لكن يام تتوقعي بوها يعطيني..
عفاف؛وعلاش مايعطيكش راجل ومتربي وعندك مستقبل..
عرفه بحسرة؛وبوي وامي..
عفاف تنهدت وقالت؛والله وضعك فيه الهون ياوليدي قدام وضع بدر...
بانت ع وجه عرفه ملامح الوجع وقعد ساكت..
عفاف مسحت دموعها وقالت؛خش سلم ولدي خش بدل باش نحطلك ماتاكل...
عرفه؛باهي بنطلب منك حاجه..
عفاف بضحكه؛نحطلك من بريوشها اللي.بعتاته الصبح..
هو ضحك بإحراج ومشي خش داخل..
وهي ضحكت عليه ومشت خشت وراه....
🍁🍁🍁🍁🍁
"ممم ياربي يهبل يهبل"
هادي دانيه وهي تاكل في كريب بالشكولاته في باحة المستشفى بالدرقه..
فجأة..
"شن ديري انتي"..
هي قامت بوكس الكريب ومشت واللي كلمها قعد ماشي وراها وهو يقول..
جمعه؛هبلتي انتي تبي تموتي..
ودانيه تمشي ومش معبراته..
جمعه؛دانيه بالله عليك عطيني فرصه ارجوك خليني نشرحلك نفسي..دانيه وضعي توا اختلف هلبه يادانيه.
ودانيه سرعت خطواتها بش توصل للمبنى وتخش..
فجأة يجي قدامها حد قريب انضربت بيه..
الشايبي وهو يشوف للكريب بصدمه؛شن هدا!!؟
جمعه؛دانيه...تعالي شويه لو سمحتي..
قام الشايبي عيونه في جمعه وقال؛من هدا!؟
دانيه بلعت ريقها والتفتت شبحت لجمعه..
جمعه؛دانيه صدقيني هادي اخر نجيك فيها انتي بس اسمعيني..
الشايبي عقد حواجبه وقال؛من هدا قتلك؟!
عقد حواجبه وقال؛معليشي انت من تكون بش تكلمها هكي..
قدم الشايبي وخلا دانيه وراه وهو يقول؛اخر مرة نسأل من هدا!؟
جمعه؛دانيه..
الشايبي بحده؛كلمني اني...
دانيه بخوف؛دكتور بالله خش ماديرش مشاكل..
الشايبي؛من هدا!؟
دانيه بخوف؛مش مهم بالله خش دكتور
جمعه بخبث مخفي لما حس ان في شي من الدكتور لدانيه قال؛تو اني طلعت مش مهم يادنونه..
دانيه انصدمت..
والشايبي التفت وشبح لدانيه بنظرة تمنت روحها ماتت ولاشافلها بيها...
دانيه؛شن تقول انت مصح وجهك!.
الشايبي قعد يشبح لدانيه هلبه...بعدين مشي من جنبها..
دانيه ودموعها في عيونها:انت وصلتها حدها خلاص تو تشوف شن نديرلك..
جمعه بنظرة غضب؛شن يكون الدكتور هدا!؟
••والشايبي لما خش داخل..
مشي كم خطوة القدام..
بعدين وقف وغمض عيونه..
شويه وفتحهم ولف وولى طلع برا...
وبدون مقدمات جي لجمعه وعطاه ضربة بالراس ع راسه..
دانيه :لالاالا دكتور لا..
الشايبي: ادردح
جمعه وهو حاط يده ع جبهته هز راسه..
بعدين قدمله بسرعه وضربه بقبضة يده ع وجهه وهو يقول؛دانيه مايخش حد بيني وبينها..
الشايبي ماتحملش نطقها لأسمها ..
حول يده من ع وجهه وقدمله وطاح فيه ضرب..
وهما الزوز قعدوا يضاربوا...
ودانيه قعدت واقفه تشوفلهم بخوف ع الشايبي..
وشويه وجو جماعه وقعدوا يحزوا وشدوهم عن بعض..
ع جية جماعة الأمن.
الشايبي؛طلعوه برا...مازال نلقى نموذج هدا خاش للمستشفى مصيركم اسود..
شد جماعه الامن جمعه اللي قعد يقول؛نعرف وين نشوفها مرة تانيه...
الشايبي قعد يشبحله بحده...
وهو قعد يشوفله بإبتسامه مستفزة ويهز في راسه..
بعد مابعدوه..
الشايبي؛حولوا لو سمحتوا..
بعدوا عنه اللي كانوا شادينه..
وهو لف ومشي بيخش..
وين قرب من دانيه..حس بدوخه..
وقف في مكانه وغمض عيونه بعدين فتحهم..
دانيه؛دكتور...
جاه واحد من موظفين المستشفى؛دكتور الشايبي..
وهو كأنه مايسمع في حد..
دانيه هي تشوفله؛بالله عليك قعمزه غادي..
:حاضر دكتورة..
وخدي الشايبي وقعمزه ع سياج اسمنتي منخفص..
دانيه جتهم وحطت الكريب..
بعدين طلعت من شنطتها جهاز قياس وقاستله السكر..
وهو يشوفلها بشويه وهي..
دانيه:نازل..
شبحت للكريب...بعدين حطت الجهاز..
وخدت بوكس الكريت وخدت شويه بكاشيك ومدتهوله..
دانيه؛هيا كول..
هو كلي منه وعيونه في عيونها.
كان باين فيهم الخوف عليه
هو يبي يصدق انها تحبه متمني تطلع تحبه حق...
الصدمه الاولى خلاته يفقد الثقه بنفسه ويحس ان مافي فهالدنيا هادي حيحبه لشخصه هو بدون مقابل ولاغايه..
حطت البوكس وقعدت تشبحله..
وهو شويه شويه رجع لوعيه بعدين ناض ومشي خش داخل بدون مايشبحلها..
هي شبحت للموظف..
وهو قال:بارك الله فيك..
هي هزت راسها وخدت حاجاتها مع الكريب وخشت داخل..
🍁بينما فهالوقت قدام باب الفيلا الدخلاني
كانت واقفه ضيفة غير متوقعه ترن ع الجرس..
فتحت سدينه الباب ولما شافتها شبهت عليها وقالت:من تكوني معليشي!؟
#ولو_بعد_حين
#البطل_المغمور2
.....يتبع
