#البطل_المغمور2 "زهور القمر"
#جمان_فريد
#الجزء_الثالث_والأربعين "ملك مقدس"
رمضانكم مبارك
قال النبي صلى الله عليه وسلم : ( مَنْ لَمْ يَدَعْ قَوْلَ الزُّورِ وَالْجَهْلَ وَالْعَمَلَ بِهِ فَلَيْسَ لِلَّهِ حَاجَةٌ فِي أَنْ يَدَعَ طَعَامَهُ وَشَرَابَهُ) رواه البخاري
💐💐💐💐💐💐💐💐💐💐💐💐💐💐💐💐
الساعه الحاديه عشر ليلا..
في دار التوأم..
كانت جنان مقعمزة ع سرير ريحان والزوز يهدرزوا بصوت منخفض..
جنان بغيظ؛تهدرز ع السفره متاعهم هي وبابا وتتكلم عليه هو بس..دار مادار قال كلي شرب بالتفصيل حرقتلي اعصابي..
ريحان تسمعلها وهي تهز في رجلها بعصبيه..
جنان:وأكثر شي حرقلي دمي سارة كيف تتعامل معاها مش عارفه هكي زي اللي عاجبتها دوتها..
ريحان:سارة موليه متغيره هلبه بدت تلمح لحاجات اكيد لاحظيتها..
جنان:ايه ملاحظتها ومش هي وبس حتى زياد...
ريحان بقلق:تتوقعي شن يصير..
جنان؛شن بيصير...اللي في بالهم ينسوه بابا مش حياخد بعد ماما لو شن يصير...شوفيها انتي من زمان كيف تحاول تتقربله شبحاتها وحركاتها وكلامها ماخفتش من نوال زي ماخفت منها هي...هادي مش ساهله..
ريحان؛وزياده صغيرة مقارنه بنوال..
جنان؛هي هادي لو خداته لاقدر الله حتنسيه فينا..
ريحان؛تاخد عينها..
جنان؛ايوه خليك هكي..بابا بعد ماما مش حياخد مراة..
ريحان هزت راسها وهي تشوف لعيون جنان اللي كانت نظراتها كلها تحريض..
🍁والراجل اللي حارقتهم الغيرة عليه..
ساهر في داره ع مجموعه ملفات ومقترحات وباله مش مشغول غير بالمسؤولية اللي حاملها ع كتافه...
🍁🍁🍁🍁
وفي بلاد بعيده..
اب تاني خاش لحوش وهو حامق...
وصل في داره وخشلها لقي مرته مقعمزة وفي يده جهاز "التاب " ولاهيه بيه..
عبدالحميد وهو حاط ايديه في نصه قال:فتحتي فيس اليوم.
شبحتله وقالت؛لا...علاش!؟
طلع تليفونه من جيبه وخش ع الفيس وحط ع منشور..وجاها ومدهولها...شوفي..
هي بإستغراب خدت التليفون وشاف المنشور المرفق بصور لخوها مع بنت راجلها..
عبدالحميد؛خوك شن يدير بالزبط!؟ يلعب!
شبحتله وقالت؛كلمت بنتك وفهمت منها..
عبدالحميد؛شن بنفهم منها قوليلي..يوم يقول مانبيهاش ويوم يطلع اشاعه انها ارتبطت بيه ويطلع ينفيها وتوا ماشيلها الجامعه وواقف يكلم فيها قدام الناس وهو عارف روحه من يكون وبنتي معروفه من تكون..وهادي النتيجه..لشن يبي يوصل بالزبط نبي نعرف..
وقفت وهي تقول؛حل نتصل بيه نفهم منه..
ومدت لراجلها التليفون ومشت بتطلع وقفها راجل لما قال..
عبد الحميد بحده؛قدامي..
رفعت حواجبها بتعجب..
عبدالحميد؛كلميه..
عقد حواجبها وهزت راسها بعدين اتصلت بخوها وفتحت المايك.
نادى مرتين بعدين رد...
"السلام عليكم"
رتاج؛وعليكم السلام كيف حالك وكيف حال امي وكنعان..
"كلنا بخير الحمد لله..خيره صوتك هكي!؟'
رتاج؛شن قصة الصور اللي طلعوا ع الفيس يارشيد..
تنهد وقال..
"دوة فاضيه مادوريهاش"
رتاج:كيف دوة فاضيه فهمني رشيد.
"مشيتلها بش نحطلها حد"
رفع عبد الحميد حواجبه..
رتاج شبحتله وقالت؛علاش شن دارت؟
"الاشاعه اللي طلعت منها هي يارتاج تبي تحطني في الامر الواقع وتحرجني مع بوها"
رتاج:متأكد!؟
"زي مانكلم فيك..اني لولاك انتي ولولا معزة بوها راهو تصرفت معاها من وقت"
اشر عبدالحميد لمرته تسكر..
رتاج؛تمام رشيد تمام فهمت...مانبيش نعطل عليك..سلام..
"تمام..وعليك السلام"...
سكرت رتاج وشبحت لراجلها..
عبدالحميد؛بنحجز توا وغدوة مروحين ...
واتصل بإحدى شركات الطيران ورتاج تشبحله وهي حاسه بشعور ضايقها ...حاسه ان في شي كبير حيصير...
🍁🍁🍁🍁🍁
تاني يوم..
الساعه التاسعه صباحا..
ع طاولة الفطور في حوش هيثم..
كانوا زياد وسارة يشبحوا بإستغراب وتعجب لحال خواتهم اللي تغير بالمرة اليوم..
جنان:تفضل بابا عصير برتقال من ايديا..
خدي هيثم الطاسه وقال؛يسلموا بابا..
ريحان:خودي هادي الخبزة هادي خيرلك من البيضا اللي كلها نشويات..
هيثم خدي خبزة وقال؛صحيتي بابا صحيتي..
شبحوا سارة وزياد لبعض وهما مش فاهمين شي من اللي قاعد يصير...
ومش هكي وبس..
سقدوه لفم الباب وحده شاده شنطته والتانيه تلبس فيه فكندرته..
ريحان وهي شاده الشنطه؛حني كتبنا نص المسرحيه بابا..
هيثم بإبتسامه؛بتنافسوا سارة شكلكم..
جنان وهي تربط في خيط الكندرة؛طبعا لا بابا يعني مانقدروش حاجه بسيطه..
سارة؛لا مش حاجه بسيطه نص حلو عطوني نراجعه وعجبني..
هيثم ناض وقف وخدي الشنطه من ريحان وقال:لاخلاص انتم خديتوا اهم شهاده...ابتسم وقال..مش متغدي هني بابا ماتحسبونيش..
جنان؛بابا امتى تفضالنا استاحشنا نطلعوا معاك زردة..
هيثم:حاضر بابا..حنخصص يوم ونقوللكم عليه ونطلعوا زردة وتوا خلوني نطلع وراي يوم طويل..
سارة؛في أمان الله بابا...
جنان ريحان:مع السلامه بابا..
مرر نظره عليهم وهو مبتسم بعدين مشي طلع....
سكرت سارة الباب وقالت؛خيركم!؟
شبحولها وقالوا؛شي..
رفعت حاجبها وقالت؛اكيد..
ع جية زياد وهو رافع شنطته قال:طلع بوي.
سارة؛توا بس..
زياد؛ماعنديش مستشفى اليوم؟
سارة؛دوام مسائي..
زياد؛اها..ومشي للباب فتحه وطلع وهو يقول؛سلام..
هما بأصوات متقطعه:سلام...
مجرد ماطلع زياد التوأم مشوا بسرعه لدارهم هربا من سارة واسئتلها...
سارة؛في وراهم حاجه وتو نعرفها...
🍁🍁🍁🍁🍁
الساعه الخامسه مساءا..
في باحة مستشفى الرازي..
مقعمزين قراب ع بعض ويهدرزوا..
فاتح بضحكه؛حرريهم شويه ماتحاصريهمش بش مايخافوش منك ويدرقوا عليك..
سارة؛مخليتهم ع راحتهم ولامحاصرتهم ولاشي..
فاتح قعد يشبح في عيونها وهو رافع حاجبه..
سارة؛مش محاصرة حرص .
فاتح؛الحرص الزايد يولي محاصرة..
سارة تنهدت وقالت؛مش عارفه بس يعني لازم نكون شديد معاهم لأن بابا راخي هلبه..
فاتح؛شدي وارخي قلبي بس يقعدوا قراب عليك مايبعدوش عنك..
وسارة تسمع فيه وهي تشوفله وتفكر في كلامه..
🌼بينما داخل...
وقت نهاية دوام زياد وتهاني..
هيا بسرعه تحركي..
تهاني وهي تلبس في شنطتها قالت بإنزعاج:تي باهي بالشويه ياهمي علاش تعيط عليا!؟
زياد بعصبيه مكتومه:لاماعندي علاش نعيط وانتي ماديري كان اللي تحرق دمي..
تهاني بضحكه:راهو الراجل نديد جدي مافيها شي كان قتله كلام طيب خاطره وابتسمت في وجهه...
زياد:اني كم مرة منبهك ع الضحك البايخ مع المرضى الرجاله مليون مرة..لكن لالا انتي شكلك بتخليني نحطك في المدرسه الخاصه اللي حدانا..
تهاني:لا والله قريت هالسنين هادي كلها بش نولي ابله!!؟
زياد:وخيرها الأبله!!؟مافيش اسمى من مهنه التدريس يكون في علمك..
تهاني:ماقلنا شي..بس اني دكتورة دكتوورة افهم..
زياد:باهي يادكتورة اسمعي الكلام وماطلعنيش عن طوري..
تهاني ضيقت عيونها وقالت:اني شن خلاني انضربت ع راسي وخديتك قولي!!.
زياد رفع حاجبه وقال:شن هيا!!تي كان ماخديتكش بكيفك ناخدك غصب عنك..
تهاني رفعت حواجبها وقالت:عينك..تي لولا عمي هيثم ماحلمت بيا..
ابتسم بتهكم وقال:ترا احلفي..
قلبت وجهها عنه وهي شاده ضحكتها وعاقده حواجبها..
هو رفع حاجبه وجبدها من يدها وقال:تحركي عطلتينا..
قعدت تمشي وراه وهو يجر فيها وهي تقول بضحكه:شن هالحصله اللي حصلت فيها.
شد ع يدها بقوة..
وهي ضحكت بدون صوت...
ومشوا طلعوا مع بعضهم من المستشفى..
وعيون سارة معاهم وهما طالعين..
فاتح بإبتسامه؛عندك علم خوك مش حيطول قبل يتم العام العرس بيديره.
سارة بإبتسامه:حتى اني نقول هكي..
شبحلها وقال؛وحني!؟
شبحتله وقالت؛فاتح اني في راسي موال نبي نديره قبل..
فاتح:اللي هو؟
سارة؛نبي نزوج بابا..
فاتح بتعجب:انتي!؟
سارة بضحكه؛علاش قلتها هكي..!؟
فاتح؛قبل زياد يحكي عليك الموضوع هدا رافضتيه بكل..
سارة؛قبل مش توا...تنهدت وقالت..لما اني نتزوج وزياد يتزوج الحوش بيفضى هو يبي من يهتم بيه وبجنان وريحات حتى هما مازال صغار وفي سن حرجه مايقدرش عليهم بروحه..
فاتح؛عندك حق..وهو حقه يتزوج هدا الصح..
سارة:هدا علاش نبي نطمن عليهم قبل فاهم عليا فاتح
ابتسم وقال:فاهم ياروح فاتح..
ابتسمت بخجل.
هو تنهد بإبتسامه بعدين قال؛تعرفي شن خطر عليا توا؟
سارة؛شني؟
فاتح؛اول مرة جيتك هني ..
سارة:عليك ذكرى حلوة!
ضحك وقال؛نبي نعرف شن قصدك بيها علاش لوحتي الكب كيك ورديتي الباكو..حسيت اللقطه هادي ليها علاقه بلقطة المية كان تذكريلها..
ابتسمت وقالت؛ايه..كنت نبي نوصلك فكرة..انك يعني..مهما جيتني مليان مشاعر حلوة مش حتحصل منك شي بالعكس بناخدها منك ونخليك مجروح وفاضي من ناحيتي..
فاتح بضحكه؛تفكير كاتبات..
ضحكت سارة .
فاتح؛باهي وبروش العقرب يالئيمه..
سارة بضحكه؛العقرب مايتعاشرش وانثى العقرب تقتل زوجها واني كنت نبيك تفهم اني حنكون زيها..
فاتح بضحكه؛يالطيف!...تصدقي والله ماخطرلي الكلام هدا بكل ع قد مافكرت..
سارة بضحكه؛احسن..مرات لو فهمت وقتها كنت سيبتني طول..
فاتح؛مستحيل صدقيني..وقتلك علاش من قبل..اني شايفك من داخل عكس الناس كلها..
ابتسمت بخجل وحب وهي تشوفله..
هو خدي يدها وشدها بإيديه الزوز وقال:اسيد خطب خلاص..العرس ان شاء الله اول الصيف..
سارة بإبتسامه:ربي يكمل ع خير..
فاتح؛آمين..والفال لينا....
نزلت سارة عيونها وهي مبتسمه بخجل..
وهو يشوفلها يإبتسامه ونظرات كلها حب...
🍁ومن الحب وحالة السكون متاعه...
لعاصفه ع وشك الحدوث في حوش سدينه..
تحديدا المربوعه..
رشيد؛اعتقد انت تعرفني بما فيه الكفايه التصرفات هادي مش ليا ومانديرهاش..اختي كلمتني ع بنتك واني رفضت الموضوع..علاش ندير حركات زي هادي توا شن بنستفيد!
عبدالحميد؛وليت في كلامك ومش عارف كيف تفتح الموضوع بعد سكرته...
رشيد؛لو وليت في كلامي نمشيلك طول ونقولك غير رايي ونبي بنتك ماعنديش مشكله..بس اني مانبيهاش لاقبل ولابعدين..
عبدالحميد؛رد بالك من اسلوبك وانت تتكلم..
رشيد:نكلم فيك بأحسن اسلوب لعيون اختي ياعبدالحميد..
رتاج اللي كانت تتفرج وتسمع وهي خايفه قالت؛صلوا ع النبي..انت اسأل بنتك ياعبد الحميد وافهم منها..
عبدالحميد؛مش محتاج نسأل بنتي لأني نعرفها كويس..
رشيد ابتسم بتهكم وقال؛واضح..
عبدالحميد؛شن قصدك!؟
رشيد؛اني مابيتش نقول الحاجه هادي لكن انت جبرتني...عندك علم يارتاج في عرس دانيه بنته خشت داري دارت فيها سحر مرشوش. عبدالحميد ناض وقف وهو يقول؛لا لهني وياسر..
رتاج؛شن تقول يارشيد..
رشيد:اللي سمعتيه..
عبدالحميد؛اني الغالط اللي جيتك بكل..هيا نوضي..
رتاج قعدت تشبح لعبدالحميد وهس مصدومه من اللي سمعاته عن بنته..
عبدالحميد؛نوضي قتلك.
رشيد:تكلم معاها كويس..
عبدالحميد؛بيني وبين مرتي ماتدخلش..
ناضت رتاج وقالت؛برا اسأل بنتك ياعبدالحميد وبعدين تعالى روح بيا..
عبدالحميد؛شن تقولي انتي!؟ نقولك حاجه اقعدي بكل..
ومشي طلع وهو حامق ..
وهو طالع شافاته سدينه..لين طلع من الحوش بكل ومشت طول لصغارها..
خشت عليهم وهي نقول:شن اللي سمعته هدا يارشيد!
تنهد رشيد ومسح بيده ع وجهه..
سدينه؛نسأل فيك!
رشيد:زي ماسمعتي يام..
سدينه؛نهار احرش..هو راس هالولد ويبوا يرزوني فيه!..
رتاج مشت طلعت من حداهم ودموعها ينزلوا..
رشيد بأسف؛ماكنتش نبي يصير هكي ع خاطرها...هو استفزني..
سدينه:غلط كبير منك درق حاجه زي هادي...دارتها مرة تعاود مرة تانيه وحني ندخلوا فيها لحوشنا.
رشيد؛خوف يجي نهار زي هدا يام...
🍀🍀🍀🍀
وخدي عبد الحميد موقف قوي من رتاج اللي مابتش تكلمه بكل..لدرجة انه سافر بدون مايخبرها..
وهي خوفها ع رشيد خلاها معاش تفكر في شي تاني غيره هو...
وسدينه بدت تخمم في حالهم وخايفه من اللي بيصير القدام..
🌼من جهة تانيه..
كانوا سارة وتهاني يستعدوا لحفلة التخرج اللي حديرها الكليه بعد عيد الأضحى مباشرة...
وفي وقت انشغال سارة كانوا التوأم وين يحصلوا فرصه مع بوهم يحاصروا بإهتمامهم ويشاركوا فيه في كل شي يديروه..
ومنها المسرحيه متاعهم في المدرسه...
••ريحان:نمشوا نورهاله..
جنان:باهي..
ومشوا طلعوا الزوز من دارهم متوجهين للصاله وين ماهو مقعمز...
لما خشولها عيطت ريحان بصوت عالي:لاااااااااااا..
هو انفجع واختها انفجعت..
هيثم بخلعه:خيرك!!
جاته ريحان وهي رافعه حاجبها مدت يدها وقالت:ترا هاتها اللي فيدك هادي هاتها!
هو شبحلها برفعة حواجب..
جنان:خيرك ياغبيه هادي شكلاطه سودا مافيهاش سكر.
هيثم هز راسه وقال:اها...
ريحان شبحتلها وقالت:انت الغبيه والدرويشه..شبحت لبوها وقالت:حطها في يدي لو سمحت..
هو شبح لجنان..
جنان:ريحان بلا هبل زايد..
ريحان:بابا هاتها..
هو شبح ليد ريحان..بعدين حك حاجبه وحط الشكلاطه في يدها..
خدتها ريحان وحولتها من الغلاف وعطتها لجنان وقالت:كولي يا فطينه انتي..
جنان وهي متعجبه كلت الشكلاطه..وهي تمضغ فنصت وشبحت لبوها..
هيثم :يعني حاجه بسيطه شن بدير قولولي!!
جنان بصدمه وهي تمضغ:من امتى..ادير هكي بابا..
ريحان:يومها بالصدفه والحمد لله ربي جابني ولقيته ياخد في الشكلاطه العاديه ويحط فيها غلاف الشكلاطه السودا بلعاني يحتال علينا السيد بابا..
هيثم:بنت !!
جنان بلعت وقالت بإنفعال:علاش يابابا هكي علاش..هدا غير دكتور ياهمي دكتوووور..
هيثم بإنفعال:تي ماهو مش عيشه حتى هادي هيا لا هديكا لا تخلوا الحاجه في خاطري لين نقعد نحلم بيها واني راقد..
جنان بحزن:ياروووحي..
ريحان:لاياسيد بابا حركات التصخيف هادي ماتمشيش عليا ايوه..ياتمشي ع القوانين ياإما..عند الحكومه..وابتسمت ابتسامه ماكرة..
فجأة انفتح باب الحوش وخشت الحكومه اللي هددت بيها ريحان..
هو ابتسم بربكه وقال: تمام اتفقنا..وغمز بعينه بعدين عقد حواجبه وقال..ايه علاش جيتوني تبوا حاجه!!؟
شدوا ضحكتهم..
سارة:السلام عليكم..
كلهم ردوا عليها السلام..
سارة؛خيركم!؟.
هيثم؛شي بابا بري لدارك بدلي حوايجك واطلعي تغدي الغدي جي من فاتح اليوم..
سارة ؛بنرقد قبل..
هيثم؛لا مش باهي النوم في الوقت هدا صحصحي واشغلي نفسك بأي شي واصبري لبعد آذان العشي صل وارقدي.
سارة حكت حاجبها وقالت؛هكي تقول..
كيف جي بيرد عليها رن تليفونه قامه وشاف المتصل..
فتح الخط وقال؛السلام عليكم لجين..
جنان وريحان شبحوا لبعض بعدين شبحوله بحده...
وسارة مركزة معاه وهو يتكلم...
هيثم؛تمام ربع ساعه ونكون غادي.......وعليك السلام..
وسكر وناض وهو يقول:جتني سفرة مستعجله بابا بنقعد اسبوع..
سارة؛تمشي وتجي سالم يارب..
ريحان وجنان بأصوات متقطعه بنبرة زعل:تمشي وتجي سالم...
هيثم بإستعجال؛تسلموا بابا..ومشي لداره..
وسارة مشت بعده لدارها..
وهما الزوز يشبحولهم بعدين شبحوا لبعض وع وجوههم باديه ملامح العصبيه..
🍀وقعد هيثم مسافر اسبوع ولجين معاه في هالسفره كالعاده ومعاها خوها وموظفين من الوزارة...
ومرافقتها لهيثم مخليتها تزيد تنشد ليه اكثر من زمان..
واحساسها يقوللها انها ماقعدتش هالسنين هادي كلها بروحها بعقلها وقلبها معاه ورجعت تلاقت بيه من فراغ...
اكيد في القدر شي مدسوسلها معاه..
لكن...صدفت سفرتهم هادي تكون مع سفرة لنوال لنفس البلاد..
وكانت حاجزة في نفس الفندق اللي قاعد فيه هيثم..
واجتمعوا في لقاء مع بعض في مطعم الفندق..
بس نوال ماكانتش بروحها الى جانب موظفه تخدم عندها كان معاها السفير الليبي في هديكا الدوله...
وعيون هيثم وهو مقعمز ع طاولته كانوا يراقبوا فيها...
اما هي كانت تعرف بوجوده...بس كعادته تتعمد تجاهله...
وهدا كله كان ع عيون لجين المركزة مع هيثم باللقطه...
••ناضت من كرسيها وهي تقول..
نوال:مشكور جدا دكتور وحيده ..
:العفو معاليك هدا واجبنا..تفضلي...
ابتسمت نوال وهزت راسها بعدين مشت معاه هي والموظفه متاعها..
وهيثم بعيونه معاهم لين اختفوا..
لجين وهي مبتسمه بالغصب؛معاليك تغدا..
شبحلها وهز راسه بعدين شبح لصونيته وقعد ياكل بشي من العصبيه وباقي الموظفين لاحظوا بدون مايعرفوا السبب...
🍀🍀🍀🍀🍀🍀🍀🍀
وتمر الأيام..
ورتاج قاعده في حوش امها وعيدت عندهم..
وعبدالحميد يتصل بيها وماتبيش ترد ع اتصالاته بعد اللي داره معاها...
ورشيد كل مايشوف حال اخته يحس بالذنب ويشوف انه سبب اللي صاير فيها...
•••رتاج؛لاوخيي ماتفكرش هكي..اصلا اني طارتلي منك اللي ماحكيتش من الاول وقلت ع اللي داراته هادي مادام وصلت بيها للسحر دير كل شي وحني عاطيينها الامان..
رشيد:خفت من اللي صار فيك توا مانبيش علاقتك بزوجك تخرب..نادم اشد الندم اللي تكلمت..
رتاج؛قتلك معاش تقول هكي خلاص..توا اللي صار صار...
تنهد بضيق وقال؛إن شاء الله خير...
رتاج غيرت الموضوع وقالت:كان دانيه قاعده رانا نحضروا في حفل تخرجها توا..
رشيد بإبتسامه؛ليها وحشة مخليه مكانها..
ابتسمت رتاج وعيونها تعبوا دموع وهي تقول:هلبه..
🍁🍁🍁🍁
"استاحشتك استاحشتك هلبه الله ع المكان اللي خلتيه يادانيه"
هادي سارة تكلم في دانيه مكالمة فيديو وتهاني واقفه جنبها..
"والله اني اكثر وديما تخطروا عليا لولا ظروف الحمل راني حداكم توا"
سارة؛حبيبتي..اني دايرة بث مباشر تفرجي باهي..
"اكيد اكيد من غير ماتوصي"
سارة:تمام سلام توا..
تهاني:سلام..
اشرتلهم دانيه بيدها وقالت؛سلام...
سكرت سارة وهي تقول؛خسارة...وقعدت تمسح في دموعها..
تعنقت تهاني ذراعها وقالت:هي تعالي نخشوا..
ابتسمت سارة ومشوا مع بعض خشوا...
وفي حفل التخريج...
كانت عفاف حاضرة ومعاها عرفه بس...
ومن عيلة سارة...خوتها وبوها وراجلها وامه ...
••جنان:وينه بابا لتوا..
ريحان التفتت شافت لباب المسرح وتجيها صدمه..
وين تشوف بوها نازل من الدروج ومعاه لجين...
سارة لما شافاته حياته بحركة اليد..
هني نوال التفتت وشافاته وشافت لجين معاه استغربت..تعرفها موظفه في وزارة الصحه بس مش عارفه بأي صفة جاية تحضر في حفل تخرج سارة...!
رفعت لجين يدها وحييت سارة..وسارة ع مضض ومجاملة ردتلها التحية...اساسا هي اللي عازمتها..
جنان:تعالي معاي..
ناضت واختها معاها ومشوا لبوهم وتلقوه..
جنان؛تعالى بابا حدانا مكانك..
هيثم بإبتسامه؛حاضر بابا..بس سلموا قبل..واشرلهم ع لجين..
لجين بإبتسامه؛شن جو ياحلوات..
هما الزوز مع بعض من فوق نفسهم:تمام..
ريحان:هيا بابا تعالى..
هيثم وهو مستغرب تصرفاتهم قال؛هي..التفت للجين وقال:تعالي..
ونزلوا كلهم مع بعض ومشوا للصفة اللي تخصهم.
ونوال معاهم بعيونها...
مش بس نوال ...حتى زياد وسارة اللي كانوا يراقبوا في لجين ..
وعرفه اللي يراقب في جنان ولاحظ عليها التوتر والعصبيه...
وصلوا صفة الكراسي..
جنان:تفضلي انتي غادي هونا خامس كرسي .
رفع هيثم حواجبه تعجبا علاش قالت ع خامس كرسي والرابع فاضي ..
ولجين سايرت وقالت:باهي..
ومشت طول لخامس كرسي وقعمزت..
بعدها ريحان خشت قعمزت في ثالث كرسي..
جنان؛قعمز في الوسطاني بابا..
هيثم بأبتسامه؛حاضر...
وقعمز وين ماقالتله...وهي قعمزت جنبه...
فجأة بدت الانظار تتوجه ناحيته من الحضور والصحافه الحاضرة بدوا ياخدوله في الصور..
هيثم؛نسيتهم بكل هادم..
ريحان:حني حواليك بابا مايقربك حد بإذن الله...
ضحك هيثم..
لجين:استعد دكتور بعد تم الحفله..
ميل راسه وشبحلها وهو يقول؛راحو عن بالي بكل..
ضحكت لجين..
ريحان شبحتلها من فوق لتحت وقال بنبرة غريبه:قلنالك حني حواليك مانخلوا حد يقرب منك..
لجين عقدت حواجبها بإستغراب وشبحت القدام..
غيرت ريحان عيونها وشبحت لبوها شدت ذراعه وحطت راسها ع كتفه وقالت...بابتي
هو غمض عيونه وضحك نص ضحكه وفتحهم لأن شبه فهم بناته خيرهم...
وحتى جنان تعنقت ذراعه وهي تشوفله بحب..
ولجين تشبحلهم بطرف عينها..
ونوال تشوفلهم بإبتسامه...
ولحظات....
وبدي حفل التخريج..
كان بنفس روتين حفلات التخرج المعتاده...
لعند ماجي وقت توزيع الجوائز ع الخريجين...
وبدوا يسموا بالتخصص لين وصلوا في الطب البشري...
"تهاني خالد جمعه"...
ناضت تهاني ومشت بإتجاه المسرح والعيون اللي تحبها تلحق فيها...
امها وزوجها...
وصلت للمسرح واستلمت الشهاده متاعها...وعرفه يصفر احتفالا بيها...
وهي طول الوقت كانت مبتسمه لين نزلت من ع المسرح ومشت لكرسيها شافت لأمها حيتها بيدها وامها ردتهالها وهي تضحك بفرح ودموعها في عيونها..بعدين شبحت لراجلها ابتسمتله..وهو غمض عيونه وفتحهم مع ابتسامه حلوة ...
ولت قعمزت جنب سارة...
وبعد ماكملوا تسمية الخريجين..جي دور تسمية العشرة الأوائل..اللي كانت سارة منهم..
وفاتح عيونه عليها طول الوقت ويراجي امتى يسموا اسمها...
سموا كل التراتيب لين وصلوا في الثاني..
"سارة هيثم عبدالحكيم الكاتب"
ابتسم هيثم بفخر وهو يشوفلها كيف مشت بإتجاه المسرح....
وياه ع العيون العاشقه كيف تشوف للحبيب..تشوف فيه بروحه...مافي حد زيه ولايشبهله حد في الدنيا..
وهادي كانت عيون فاتح وهما يشوفوا لسارة..اللي كانت متزينه باللون الاسود اللي يزيد في طلتها جمال وجاذبية...
وصلت للمسرح واستلمت شهادتها وسط التصفيق الحار من الحضور...
بعدين...طلبت من العميد تقول كلمه وهو وافق على طلبها وعطاها المساحه...
وقفت ورا الطاوله...
خدت نفس ومررت نظرها ع كل اللي تعرفهم ..
بعدين ثبتت عيونها ع بوها وقالت:الحمد لله...اللي وصلني ليوم زي هدا..الحمد لله...اني لما خشيت الطب خشيته عن حب...
ابتسم هيثم..
سارة وهي تشوفله كملت تقول؛الرجل اللي كان في حياتي ولازال كل شي خلاني نحب الطب ونعرفه كويس نعرفه بشكل تاني..خلاني نعرف ان الطبيب زيه زي الجندي في الجيش بالزبط..لازم يقدم كل ماعنده ويضحي ع خاطر المرضى بوقته وجهده..ويكون ليهم هو نص العلاج...تعلمت اني مهما قريت وتعلمت ووصلت برا لمراتب كبيرة تقعد بلادي اولى بيا من غيرها مهما كان حالها ومهما كانت ظروفها وهدا اللي داره والدي هيثم الكاتب..
القاعه صدحت فيها اصوات التصفيق...
والعيون ع هيثم الكاتب اللي كان يشوف لبنته وابتسامة حب مرسومه ع وجهه والعيون مليانة دموع..
هدي صوت التصفيق ووقف وهي كملت تقول..
سارة؛مانبيش نتكلم عنه هلبه لأن هو مايحبش من يحكي عنه..بس في عندي كلمات كتبتهم يعبروا عن شي بسيط في داخلي لهذا الرجل...
شبك هيثم ايديهم في بعض وحطهم ع ذقنه وهو يسمع فيها..
وسارة بدت تلقي في ابياتها...
