#البطل_المغمور2 "زهور القمر"
#جمان_فريد
#الجزء_الثامن_والثلاثين "العوض"
رمضانكم مبارك
( الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ ) الرعد-28
💐💐💐💐💐💐💐💐💐💐💐💐💐💐💐💐
"من تكوني معليشي!؟"
:نعرفكم من بعيد من طرف حوش راجح خير الله...
سدينه وهي مستغربه قالت:باهي تفضلي...
خشت المراة..وسدينه سكرت الباب وهي تقوللها:تفضلي..
وهي تمشي وتقلب عيونها في الفيلا..
سدينه وهي تشوفلها اشرت للخدامه تجي معاهم...
وصلوا في الصالون..
سدينه؛تفضلي خشي..
خشت المراة وقعمزت...
وسدينه مقابلتها...والخدامه وقفت حداها.
سدينه؛شن تحبي نضيفوك..
:لاصحيتي مانبي شي..
سدينه شبحت للخدامه بطرف عينها..
مشت الخدامه طلعت من حداهم وسدينه شافت للمراة وقالت؛خشي في الموضوع اللي جايه ع خاطره وقبلها ياريت نعرف من تكوني بالزبط..
تنهدت ورفعت حاجبها وهي تقول:واضح انك ناستيني..
سدينه ضيقت عيونها وقالت؛مشبهه عليك..
ابتسمت ع جنب وقالت؛ماريناش بعض هلبه اساسا..اني عزوزة جيهان اللي كانت حماة بنتك..
عقدت سدينه حواجبها وقالت:انتي مرت عم قاتل ولدي معناها..
عيشه؛عليك نور...وياريت بنتك تشوف للوضع كيف ماانتي تشوفيله..
سدينه ؛من بنتي!؟
عيشه؛هادي اللي تقرا في الطب اللي حاطه عينها ع راجل متزوج وخلاته يطلق مرته ويقزن صغاره..
سدينه ابتسمت تهكما وهي مستغربه؛من هو هدا!؟
عيشه:ولدي جمعه اللي لفت عليه بنتك وخلاته من غير عقل.
سدينه برغم الغضب اللي انتابها بس حافظت ع ثباتها الإنفعالي وقالت:غالطه وخيتي ولدك هو اللي مخفف عقله وقاعد يجري ورا بنتي وحني عادينه مهبول ومابيناش نديروله شي لتوا لكن الباين انه متمادي لين خلاك تجي هني وانتي مصدقه روحك وتردحي..
عيشه:احترمي نفسك.
سدينه:انتي اللي احترمي نفسك وشدي ولدك وربيه وخليه راجل يعرف يحافظ ع حوشه ومعاش يجري ورا بنات الناس خير ماقسما يالله نخلوه يبات في الحبس سنين ونعرفوا كيف نديروهاله.
عيشه خافت من تهديد سدينه بس مابينتش..
ناضت وقفت وهي تقول:اني الغالطه اللي جيت هني اصلا.
سدينه:ايوه مزبوط...ونادت الخدامه وهي تقول....منجيه وصليها للباب...
مشت عيشه وهي معصبه والخدامه تبعتها بعد ماطلعت من الصالون...
طلعت عيشة من الحوش...
سدينه بعد ماسمعت الباب تسكر نادت ع الخدامه؛منجيه..تعالي هني..
شويه وخشت عليها الخدامه وهي تقول:نعم مدام..
سدينه بغضب:جيبيلي هاتفي.
:حاضر..
ومشت طلعت من حداها وخلتها تفكر بغضب في كلام عيشه عن بنتها...
🍁🍁🍁🍁
مقعمز ورا مكتبه وهو يفرك في جبهته ومغمض عيونه ويفكر في اللي صار...
بعدين نزل يده وفتح عيونه وناض..
حول البالطو متاعه ولبس جاكيته..بعدين خدي موبايله وشنطته ومشي طلع من المكتب...
ومنه من المستشفى..ومشي لموقف السيارات..
شافها غادي كيف ركبت سيارتها وطلعت من المستشفى..
هو تنهد...بعدين مشي لسيارته...
🍁🍁🍁🍁
وصلت دانيه للحوش..
ونزلت من سيارتها بسرعه وخشت للحوش..
ع جية رشيد...
بس قعد في سيارته ينهي في مكالمه....
••داخل..
دانيه؛من جدك يام تسألي فيا سؤال زي هدا!؟ مستحيل..
غير الثار اللي بينا هدا كان راجل حماتي اخت راجح الله يرحمه..وبعدين اني يام مانطيقش هالبني آدم بسببه جاني المرض يام بسببه هو..
سدينه غمضت عيونها وتنهدت بعدين فتحتهم وقالت:اني سألت بش نتأكد بس...المهم توا خلاص الراجل هدا معاش بنسكت عنه..
دانيه:ايه يام قولي لرشيد لازم يعرف بش يدير حل ويفكني منه هالمصيبه اللي كل اسبوعين دايرلي كشفه شكل..
ع خشة رشيد عليهم وهو عاقد حواجبه ويقول:من هو هدا؟!
الزوز التفتوا وقعدوا يشبحوله..
وهو يمرر في نظره بيناتهم ويراجي في الإجابه...
🍁🍁🍁🍁🍁
الساعه السابعه مساءا..
كان خليل مقعمز في داره وقدامه كتاب يعنى بتخصصه مفتوح قدامه بس مايقراش فيه..
كان يفكر في اللي صار اليوم من زياد وهو معصب ع الآخر..
ماتوقعهاش تجي من زياد بالذات بعد ماتصاحبوا...
وهو يعرف زياد واخلاقه ماتوقعش منه يدير حركة زي هادي ويكلم اخته من وراه...ولادارلهم اعتبار ولاقدرهم..
غ خشة نسيبه وهي تقول؛ماصدق كمل واجبه ونزل جري بش يلعب مع بدر..
ركزت عليه شافاته كيف سرحان..
قعمزت قدامه وقالت وهي تصفق بصوابعها قدام وجهه؛وينك..
هو شبحلها بدون مايتكلم..
نسيبه بقلق؛خيرك خليل انت من لما روحت وانت مش عاجبني..
شبحلها شويه بعدين قال؛نسألك سؤال ونبي اجابه صريحه..
هي بإستغراب وقلق:شن هو؟
خليل:زياد ولد خوك شن يبي من اختي!؟
رفعت حواجبها وقالت:ولد خوك واختي!؟
خليل:جاوبي يانسيبه..
رفعت حاجبها وقالت؛يبيها بالحلال زي كنت تبيني حتى انت بالحلال..
خليل:اني مشيت لخوك طول وكلمته مادرتش مادار هو لما تخطانا وكلمها هي..
نسيبه:حبيبي شكلك بديت تنسى تبيني نذكرك كم مرة جيتني وكلمتني وتخطيت خوي..
خليل مكابرة:الوضع كان يختلف..
نسيبه:لا مايختلفش بكل..ع العموم انت عندك حق تغار ع اختك لكن ولد خوي ناوي معاها الجديات ونيته صادقه وشريفه ويراجي فيها تكمل بش يجي يخطب ..
وناضت طلعت من حداه وهي حامقه..
هو ضايق لأنه زعلها..بس مازال ماتبررش عنده تصرف زياد..
🍁اللي كان فهالوقت يحكي مع بوه في نفس الموضوع
هيثم:خلاص معاش مازال شي وتم السنه بإذن الله وقتها حنمشي نكلم خوتها..وبالمرة نفتح موضوع اختك..
زياد:موضوع شني؟!
تنهد وقال:فاتح طلب مني سارة..
زياد وهو متفاجئ:كيف!؟
هيثم:طلبها مني من قبل يسافر اخر مرة واني اجلت الكلام في الموضوع لين اختك تكمل..
زياد حط في باله ان فاتح ممكن يكون مجرب يكلمها يعرفه جريء ويديرها..طارتله بس مابينش قدام بوه..
هيثم ضيق عيونه وقال:خيرك معترض ع حاجه؟؟!
زياد حرك راسه بالنفي وقال:لا..تفاجئت لاأكثر..
هيثم :اسمع ماتلمحش لأختك حتى التلميح..
زياد غمض عيونه وفتحهم ايجابا لكلام بوه..
🍁وبعيدعن الصاله اللي مقعمزين فيها..
في دار سارة...
"شوفوا حط الخل في العجينه هادي مش بس بش تخلي العجينه خفيفه وطريه لا الخل يحافظ علي الحاجه اللي درتوها بيها من هجوم الفطريات عليها لو احتفظتوا بيها مدة طويله..مش بس المعجنات حتى الكيكه..في من يدير كيكه وتطول عنده فوق اليومين ويحساب كان دسها في الثلاجه مايصيرلها شي...وهي من بعد تاني يوم تبدا تطلع عليها الفطريات بس ماتنشافش بالعين المجرده وانتم تاكلوا وتمشي في بطونكم ...لهذا حطة الخل هادي مهمه جدا من ناحيتين تخلي الخليط او العجينه متاعك خفيفه وطريه وتحافظ علي الحاجه اللي بديرها منها من الفساد...تمام..
غمز بعينه وقال..خل نشوفوا شن صار في الكوشه"
وقعدت تتفرج عليه كيف يطلع في الفطاير اللي دارهم وهي متسهفه..
سارة وهي متشهيه:عطيه دعوة خير...ياربي قداش مبدع فضيع...كان نقدر ناخده وحده بس...
وبدت تقرا في التعليقات..
"رووعه عطيك الصحه"
"فضيعه تسفه"
"ماشاء الله عليك شيف"
"احدفلنا وحده ياشيف"
وفاتح يقرا ويعلق..وهي مرات تضحك ومرات تضايق من الكلام اللي تقرا فيه..
لعند ماقرت تعليق..
"شيف امتى بتروح لليبيا"
فاتح:قريبا ان شاء الله....
تعليق تاني..
"بتستقر خلاص"
فاتح:بإذن الله..
"بالله افتح فرع لمطعمك في عين زاره"
فاتح بضحكه:ان شاء الله ربي يقدرنا..
هي قعدت تسمع وتشوفله بإبتسامة ألم وقلبها واجعها...
🍁🍁🍁🍁
الساعه الحادية عشر ليلا..
قدام باب داره..
هيثم:واني طالع من المستشفى خديت الحاجات ومشيتلهم طول..
جنان:فرحوا بيهم؟
هيثم:مابيتش نشوفهم حطيت الحاجات وطيقت الباب ومشيت..
جنان:علاش بابا؟
هيثم:مانبيش نشوف في عيونهم الكسرة بنتي..المحتاج لما تعطيه حتى لو يفرح بالحاجه نفسه تنكسر قدام اللي يعطيه..هدا علاش صدقة الخفاء افضل من العلن.
ابتسمت جنان وقالت:صح..باهي وولدهم المريض..
هيثم:تكلمت مع قسم الاورام في المستشفى وكلفت دكتورة تمشيلهم غادي وتجيبهم للمستشفى وتقوللهم نفقة علاجه ع فاعل خير..
جنان:انت بابا؟
هيثم؛لا والله..واحد من رجال الاعمال تكفل بيه بعد كلمته عنه الراجل هدا يحب يدير الخير وكذا مرة عالج ناس ع حسابه .
جنان:ربي يجعله في ميزان حسناته..
هيثم:وفي ميزان حسناتك بابا..
جنان بإبتسامه:آمين..
قربها ليه وباس راسها وقال:ربي يحفظك بابا..
جنان؛ويطول في عمرك يارب..
ابتسم هيثم وقال:هيا الى النوم وراك مدرسة غدوة ان شاء الله..
جنان بضحكه:تصبح ع خير..
هيثم؛وانتي من اهله بابا..
مشت جنان لدارها...
وهيثم خش وسكر الباب ..
ع رنة تليفونه...مشاله طول خداه من فوق الطاوله..
لما شاف المتصل رد طول..
هيثم:السلام عليكم سيادة الرئيس.
"وعليكم السلام ونفضل تناديني دكتور"
هيثم ابتسم وقال:زي ماتحب..
"كيف حالك دكتور".
هيثم:الحمد لله..كيف حالك انت..
"الحمد لله...دكتور مذكر موعدنا غدوة بإذنه تعالى؟"
هيثم:أكيد...
"تمام....نتأسف عن الازعاج ...تصبح ع خير"
هيثم:لاابدا مافيش ازعاج..وانت من اهله"
"السلام عليكم"
هيثم:وعليكم السلام....
سكر وهو يشوف للهاتف رفع حواجبه ونزلهم وهو مبتسم بعدين رد تليفونه لمكانه ومشي للسرير...
قعمز عليه...وخدي نظاراته لبسهم...بعدين خدي المصحف اللي كان فوق الكامدينو..
فتحه وبدي يقرا....
بعد ماكمل ورده...سكر المصحف وقال:يارب قوة الظهر لاخفة الحمل...لاحول ولاقوة الابالله...
ورد المصحف لمكانه وحول نظاراته وحطهم جنبه...
وتمدد ع سريره وقعد يقرا في الاذكار وهو يفكر لين خداه النوم....
🍁🍁🍁🍁
تاني يوم....
في حوش طرازه حديث بس بسيط وبعيد عن البهرجه والفخامه...
كان يسكن صنع الله المقرحي ولد مدينة سبها مع زوجته وصغاره....ولدين وبنيه...
كان مقعمز في حجرة المكتب متاعه...
يقرا في بعض الملفات..
لين قطعت عليه زوجته "سلسبيل" وهي خاشة عليه ودكتور:هيا ياباشا نوض افطر نوض وساد تمنقيل فهالأوراق .
ضحك وقال:جيبيه باهي..
سلسبيل:هذا الحلم اللي مش حيتحققلك بكل..
قعد يضحك..بعدين ناض ..
هي قالت:وراي
حط ايديه ع كتافها وهو يضحك ويقول:كلا انتم النساوين حكومتكم مازيها حكومه
سلسبيل:صقع عليك..
ضحك وطلعوا هو وياها من المكتب ومشوا وين مافي المكان اللي بيفطروا فيه..
في دار...
مفرشين بخشة وحاطين عليها الفطور والصغار مقعمزين يراجو فيهم...
قعمزوا معاهم وهويقول؛هي سموا وابدوا....
الصغار سموا بالله وبدوا ياكلوا بعد ماحضر بوهم..
العاده اللي ربتهم عليها سلسبيل لو يكون الجوع متمكن منهم مايبدوش ياكلوا قبل حضروه...
واحد من الصغار في باله سؤال قال:بوي بنسألك..
صنع الله وهو ياكل؛نسمع فيك..
:بوي انت وليت رئيس ليبيا ولا؟
هو ابتسم وشبح لسلسبيل..
سلسبيل؛بابا رئيس الحكومه مش رئيس الدوله...
:باهي ليه سلطه ولا..
سلسبيل شبح لراجلها بعدين شبحت لولدها وقالت بإبتسامه؛ايه..
:معناها رئيس..
صنع الله:هذا الظاهر بس في الواقع اني خادم..
الثلاته وهما متفاجئين:خادم!!؟
ابتسمت سلسبيل..
صنع الله؛ايه خادم..تعرفوا رئيس الحكومه ولا الدوله ولا الملك ولا اي يمسك حكم في بلاد هو في الحقيقه خادم استعمله الله على خلقه...يوفر للناس حياة كريمه...يبني البلاد ويعمرها ويخليها قويه...ريتوا الحوازة متاع جدكم الشارف مش حاط عليها عمكم خميس الراجل الطيب هداكا شن وظيفته يزرع الارض ويرد باله منها وينظفها ويحميها ويحط جهده كله فيها لين تطرح مافيها من خير تفاح مشماش خوخ رمان عنب لوز...ناكلوا منه حني وناس اخرين..اشر ع نفسه وقال...اني توا كيف عمكم خميس بالزبط..فهمتوا عليا..
هما الثلاته هزو روسهم بإيجاب وكبيرهم قال؛توا بس فهمت..
ابتسم صنع الله وقال؛كملوا فطوركم وراكم مدرسه...
الصغار ولوا يفطروا ومرته تشوفله بإبتسامه حب..
وهو رجع يفطر ويفكر في الكلام اللي قاله....
ويتفكر في حياة طويله عاش فيها مختلف الظروف قبل ليوصل لهالمرحله...
🍁صنع الله ابن عيله اصيله بسيطه في سبها...
عيلته كانت كبيره وهو اصغرهم..
عاش في ظروف صعبه...لكن في جو عائلي حميم...
مستمدين الحب من كبير العيله اللي هو الأب فتح الله..
الراجل اللي يدوب يعرف يقرا ويكتب..بس كان عنده طموح كبير في ولاده...كان يخدم عليهم ويدعم فيهم...
كلهم فلحوا..بس فلاح صنع الله كان بزايد..
من صغره كان مهتم بقرايته ومن صغره كان معتمد ع نفسه خدم مع امه اللي كانت تبيع في الخمره والبخور..
بعدين خدم مع بوه كان يسوق في طانطا"بطاح" يرفع فيها ويجيب داخل وبرا البلاد...
وكل تجربه كانت تصقل في شخصيته وتعلم فيه وتقوي في عوده...
بعد تخرج من الثانوي..بوه بعته لطرابلس يكمل تعليمه غادي دون خوته لأنه كان متوسم فيه خير...
وعطاه ماكان داسله من فلوس ليوم زي هدا..
وصنع الله بحافز من طموحه اختار يتغرب ويسيب بلاده وناسه ويمشي لطرابلس وكانت هادي المرة الأولى اللي يمشيلها فيها...
كانت بالنسبه ليه عالم تاني...لكن ماابهرتاش..لسبب واحد
ماكانش متوقع ان عاصمه بلاد زي بلاده ياما قري عن عزها وثرواتها تكون بالمنظر المتخلف اللي شافها عليه..
وكان متوقع ان التهميش اللي عاشاته مدينته مقابله ازدهار وتقدم ف العاصمه...بس مع الأسف اكتشف ان الحال واحد.في ليبيا زي المهمش فيها زي المهم..
كان حاس بقهر وحرقه ع بلاده...وتمنى لو يقدر يديرلها شي
لو في يوم ربي يقدره ويعطيه فرصه يخدمها باللي يقدر عليه...
قري صنع الله في كلية القانون..وسط ولاد وبنات العاصمه المتمدنه...
اللي كانت غالبا نظرتهم لأبناء الدواخل نظره دونيه..
ماسلمش منها..كانوا يقيموا فيه بمظهره الخارجي وطريقة كلامه..
برغم انه لبسه مرتب واسلوبه في الكلام راقي ومحترم..
مااهتمش ولاتأثر بنظرتهم وقعد مشغول بحلمه وطموحه...
وشويه شويه برز نجمه في الكليه..وبدي يفرض في احترامه ع الجميع وولت عنده مكانه عند اعضاء هيئة التدريس.
واخباره كانت توصل لأهله وفرحة بوه بيه كبيره...
وماكملش مشواره في كليه القانون قبل ليدق قلبه للحب..
كان في اخر سنه لما تعرف ع سلسبيل اللي كانت تقرا سنه اولى..
لفتت انتباهه بجمال اخلاقها وشخصيتها القويه والمرحه الى جانب جمال شكلها..
وهو لفت انتباهها بشخصيته القويه وحضوره الطاغي وسمعته الطيبه بين الجميع....
تزوجوا بعد عامين من تخرجه...وهني بدت رحلتهم نحو احلامهم...
والزوز كانوا يدعموا في بعض بقوة...
لين هي ولت استاذة جامعيه...وهو ولى محامي ليه اسمه...
بس شغفه بالسياسه خلاه يلتحق بكلية الاقتصاد و العلوم السياسيه...وتخرج منها وبعدين طلع بعيلته برا كمل دراسته في هالمجال فالخارج...
وبعد ماكمل قرايته برغم الفرص اللي حصلها غادي سيبها كلها وروح للبلاد بش ينفعها...هي أولى من غيرها باللي عنده...
السيرة الذاتيه متاعه خلاته ينحط في مناصب ادرايه لمؤسسات حكوميه تابعه للدوله..وكان عنده ميول لأحد الأحزاب السياسيه الوطنيه خلاه ينضمله...
وولى نجمه يزيد يبرز ويعلى....وحزبه السياسي اللي فاز في الانتخابات البرلمانيه والرئاسيه من اكثر من عامين دفعوا بيه لرئاسة حكومه جديده وهما متوسمين فيه خير....
وهو قبل فورا....جاته اعظم فرصه بش يحقق امنيه رافقاته من سن المراهقه....مستحيل يفوتها..
وهاهو اليوم قاب قوسين او ادنى من تحقيقها وحيسعى جاهد يدير كل اللي يقدر عليه بش يشوف بلاده في مكانها المناسب..🍁
🍁🍁🍁🍁🍁
الساعه الحادية عشر صباحا..
في احد فنادق العاصمه طرابلس..
في قاعة اجتماعات خاصه...
وزارء الحكومه الجديده كانوا يحضروا واحد ورا الثاني.
من بينهم هيثم اللي كيف خاش لمكان الاستراحه قدام قاعة الاجتماعات..
لما خش القى السلام...
والكل ردوا عليه....
هو قعمز وقال؛جي دكتور صنع الله..
واحد منهم قال:ليه وقت...
هيثم هز راسه...وبعدين بدي يتجاذب في اطراف الحديث مع الموجودين..
لحظات وخشت نوال وهي تقول؛السلام عليكم..
هو رد السلام بدون مايشوفلها كان يمنع في نفسه بقوة..
وهي زيه تجاهد في نفسها جهاد ماتخليش عينها طيح عليه...
مشت قعمزت...
وبعد حضورها بثواني جي صنع الله وهو يقول بابتسامه:السلام عليكم...
كلهم ناضوا وهما يردوا عليه :وعليكم السلام...
هو اشرلهم ع قاعة الاجتماعات بيده وقال:تفضلوا...
وهما بدوا يخشوا من باب قاعة الاجتماعات الواسع....
بعد ماخشوا كلهم هو خش وراهم وسر الباب اللي كان يتكون من فردتين بنفسه..
وهما خدوا اماكنهم بس قعدوا واقفين..
هو شبحلهم وقال؛ارتاحوا..
قعمزوا كلهم..
صنع الله وهو ماشي للكرسي متاعه:خلونا نتفقوا اول شي ع انكم معاش توقفوا لمانجي..
ووقف ورا كرسيه وقال:متفقين..
كلهم بإبتسامه وافقوا ايماءا بالراس او شفهيا وهما يقولوا..
متفقين..
ابتسم وقعمز وهو يقول:كيف حالكم جميعا..
كلهم بأصوات متقطعه:الحمد لله...
صنع الله:الحمد لله..الحمد لله...مرر نظره عليهم وقال..اول شي نشكركم جميعا اللي حطيتوا فيا الثقه وقبلتوا تكونوا ضمن الفريق اللي حنحارب معاه بش نديروا تحول كبير في البلاد من جميع النواحي..كل واحد فيكم منحني فرصه لما وافق ع انضمامه للحكومه...فرصه بش ندير شي لهالبلاد المتعطشه لحب اهلها...اني الحكومه هادي مانبيهاش تكون مجرد حكومه عاديه روتينيه...نبيها تكون حكومه وطنيه حكومة النقله النوعيه....
اللي جو قبلنا جزاهم الله خير...عبدولنا الطريق..بنولنا الاساسات وكل واحد فينا حيشد مكان ويكمل بني لين يوصل الى مااراد الله يوصله...
التعليم الصحه.. الداخليه العدل...الاقتصاد السياحه..الشباب وحتى الرياضه...
المواصلات الاتصالات الاسكان الثقافه والاعلام...هادي كلها اعمده لأي دوله..ولو كانت هالاعمده قويه حنقدروا نبنوا عليها دوله قويه...
كانوا يسمعوا لحديثه بإعجاب اسلوبه نبرة صوته ثقته بنفسه خلوه يفرض احترامه من اول اجتماع..
كان يحرض ويحفز فيهم كبار اكبر منه في العمر وصغار في عمره بش يحمسهم وفي نفس الوقت يعرفهم مدى جديته..
صنع الله؛في حاجه مهمه لازم نعطيكم بيها علم قبل يوم جلسة منح الثقه..اني قدمت طلب لرئاسة البرلمان فيه ان خلال سنه لو ماحققت الحكومه اي شي حتستقيل بالكامل.. ومايعطوناش اي فرصه...
هما اتفاجئوا...
صنع الله؛مافيش وقت نضيعوه راح من عمر البلاد هادي سنين اللي يقعمز فيها ع كرسي ماينوضش الا وهو ماص دمها ومخليها منهكه مدمرة ويوخر بيها لتالي اكثر من قبل...
وفي وقتنا الحالي اللي جو قبلنا تعبوا وحني لازم نكملوا عنهم ولو كنا مش اهل للشي هدا نخلوا الفرصه لغيرنا المهم مايضيعش اكثر مماضاع من عمر هالبلاد الصابرة...
واحد منهم قال:عندك حق دكتور..موافقك الرأي..
وبأصوات متقطعه:كلنا موافقينك الراي دكتور....
ابتسم وقال:تمام...نبدوا الاجتماع ع بركة الله....
🍁🍁🍁🍁
في مدرسة مجد الثانويه للبنات...
وقت الاستراحه..
كان ماشي بإتجاه الساحه من القدام...
وهو ماشي قالتله ابله:يراجي فيك برا استاذ..
هو هز راسه ومشي طلع...
شاف قدامه بمسافه شاب انيق صاحب حضور قوي..
واقف وحاط ايديه ورا ظهره ويشبحله من ورا النظارات..
هو طول مشاله ووقف عليه وقال:السلام عليكم..
رشيد؛وعليكم السلام...انت استاذ جمعه..
جمعه؛وصلت...
هز راسه وقال؛ معاك رشيد المجذوب...
هو تفاجئ ع الآخر.
رشيد؛شوف اني جاي نقول كلمتين وماشي ومانبيش ناخد ونعطي معاك..مانبيش نتصرف معاك تصرف فوق من طاقة تحملك اني جاي نحذرك..لو ماسيبتش اختي في حالها وقتها مافيش لوم عليا في اللي بنديره معاك...
كيف جاي جمعه بيتكلم.
رفع يده وقال؛قتلك مش جاي ناخد ونعطي معاك...نزل يده وقال..اساسا اني مش عارف انت كيف تفكر لو شن يصير اختي ماتحلمش بيها..بغض النظر عن كون ولد عمك قاتل خوي...اني لايمكن نخلي اختي تبني عيله ع خراب عيلة تانيه.....
جمعه؛اني مطلق..
رشيد؛اللي وصلني ان اختي هي السبب وهدا اللي مستحيل نرضى بيه...هدى نبرة صوته وقال..خوي اسمعها مني نصيحه
قعمز ع كراسي عقلك وفكر في صغارك راهم بأمس الحاجه ليك حرام تشردهم في سبيل هوى نفسك ورغباتك صدقتي حتندم اشد الندم بعدين...انت مدام وليت اب مفروض ضحي ع خاطر صغارك بش يتربوا في ظلك وماتبهدلهمش الدنيا...
ارضى بنصيبك ورجع اهل بيتك ياخوي وضم صغارك تحت جناحك هدا احسن شي ديره في حياتك هادم بس راس مالك في الدنيا وهالكلام صدقني حتوليله بعدين وتقول الله يرحم والدين هداكا الراجل...
جمعه كان محرج ع اخر من رشيد ع صغر سنه عطاه درس عمره قاله ماتعلمش زيه..
رشيد تنهد وقال: وان شاء الله مايكونش في بينا لقاء تاني ف مكان يسرش...عن اذنك ومشي وخلاه واقف يشوفله لين ركب للسيارة وتحركت بيه برا المدرسه...
كلامه قاعد يتردد ع مسامعه وكأن واقف قدامه يعاود يقول فيه..
وكل ماله يغرق في شعور الإحراج اكثر واكثر...
🍁فهالوقت..
كانت دانيه واقفه مع سارة وتهاني ومعاهم زوز بنات..
وواقفه عليهم الدكتورة هاله تهدرز..
هاله؛والله ندير فيه خليقة بان كيك متاع سينابون ماصار اللي ياكله يدوخ فيه تبوا نجيبلكم منه..
دانيه؛ياريت.
سارة؛خير بلاك انتي هبلتي!..اسمعي ماتعدليش عليها جبيلنا حني..
دانيه؛والله! وتقعدوا تاكلوا قدامي واني نتفرج!
تهاني ؛ناكلوا بعد ماتروحي..وضحكت والبنات ضحكوا معاه..
دانيه؛عناد فيكم لما نشريه وناكله..
سارة؛تعاندي في صحتك يامهبوله!
ع جية ممرضه قالت؛دكتورة دانيه يبيك دكتور الشايبي..
شبحولها سارة وتهاني وهما مبتسمات بخبث..
وهي صارت فيها حاله ووجهها ولى احمر؛باهي...شبحت لهاله وقالت..تو نزيدوا نتفاهموا بعدين.
هاله بضحكه؛باهي..
مشت دانيه....
وسارة قالت؛ردي بالك تعدلي عليها..
هاله بضحكه؛حتى اني نساير فيها..
🌼ودانيه وصلت لمكتب الشايبي دقاته بعدين فتحت الباب وخشت..
فتحت عيونها ع وسعهم لما لقاته طايح ع المكتب..
خبطت وجهها بإيديها وقالت؛حي عليا!..
جاته وقعدت تنوض فيه؛دكتور...دكتور...دكتور تسمع فيا..دكتور الشايبي..حي عليا يانهاري...!
ياربي ماصارله شي ياربي..
ومشت بتطلع فجأه سمعاته يقول..
"جيبي معاك كريب وانتي جايه"
التفتت وشبحتله..
لقاته قايم راسه وهوحاطه ع الطاوله وهو مغمض عين وفاتح الأخرى..
دانيه عصبت وقالت؛اني ماشيه نجيبه الكريب بش تاكله كله..
رفع راسه وقعد يضحك عليها وهي تشوفله بغضب..
عيونها تعبوا دموع وقالت؛شكلك خدبت عليا الحاجه اللي تتسلى بيها وقت فراغك..
ومشت طلعت..
هو وقف ضحك وناض بسرعه ومشي طلع من المكتب وهو يمشي وراها.
الشايبي؛دانيه..دانيه..اوقفي دانيه نكلم فيك..
ودانيه تمشي وهي معصبه ودموعها ينزلوا..
وهو يمشي وراها وناسي نفسه..
لعند ماتلاقوا بهاله نفسها..
الزوز وقفوا في مكانهم..
هاله حست ان في شي غريب قال؛خير صايرة حاجه؟!
دانيه بش تدارك الموقف التفتتله وقالت؛الحاله مازال القدام دكتور..
هو هز راسه ..
مشت دانيه وهي تقول:عن اذنك دكتورة...
وهومشي وراها بدون مايقول شي..
قعدوا ماشيين جنب بعض وهما ساكتين..
شويه والتفتوا الزوز مع بعض لقوا هاله مازال واقفه تشبحلهم..
شبحوا القدام الزوز..
الشايبي؛هادي اكبر قصقاصه في المستشفى ..
دانيه؛وتحب تدوي هلبه..ربي يستر وخلاص..
الشايبي؛دانيه اني قتلك نبيك بالحلال اني عمري مش عمر لعب يادانيه خيرك ماتبيش تفهمي...
دانيه قعدت ساكته..
الشايبي؛في من نكلم اني!؟
وصلوا لأخر الممر..
هي مشت وخلاته..
وهو قعد واقف يشبحلها وهي ماشيه تنهد وقال؛تعبتيني معاك هلبه يابنت الناس...
🍁من جهة تانيه في نفس المستشفى..
كان زياد ماشي في واحد من الممرات تلاقى هو وخليل اللي كان جاي من الجهه التانيه..
وقف زياد وقال بإبتسامه؛اووو دكتور..
خليل بدون مايشوفله؛مستعجل معليشي..
ومشي وخلاه واقف وزياد يتبع فيه بعيونه وهو مستغرب؛خيره هدا!؟
فجأة رن تليفونه..
قامه شاف المتصل فاتح قال؛مش راد عليك ع الجو اللي دير فيه..
وخلا تليفونه صامت وحطه في جيب البالطو ومشي وهو معصب..
🍀🍀🍀🍀🍀
وتعدي الأيام..
والحال كما هو عليه...
خليل واخد موقف من زياد وزياد واخد موقف من فاتح..
ونسيبه واخده موقف من خليل برغم انه حاول يصالحها...
ومن جهة تانيه..
كان هيثم لاهي بإجتماعات الحكومه..زي مانوال كانت مشغوله بيها..
وهما الزوز يتعاملوا مع بعض كأنهم مايعرفوش بعض بس القلوب تخفي عكس مايظهر من اصحابها..
زي اللي صاير مع دانيه اللي كانت خايفه من الشايبي ومن فكرة الارتباط بيه..خايف تجازف وتندم..لأن الراجل لما عنده ماضي يقعد سنين ماينساشي مايكونش مضمون...
وهي طبعا ماتعرفش تفاصيل القصه ومعذورة في تفكيرها..
اما تهاني...
••في يوم وهي طالعه من دارها وخاشه للكوجينه بعد العصر..
لقت نسيبه واقفه دير في قهوة وموتيه سفرة فيها زوز فناجين..
تهاني:في حد جي؟!.
التفتت نسيبه وقالت بإبتسامه؛عمك هيثم..
هي وجهها ولى احمر وقالت؛خيره ولا هكي وخلاص!؟
نسيبه وهي مبتسمه؛لامش هكي وخلاص..
بلعت ريقها وقالت؛شن في!؟
نسيبه؛تو بعدين تعرفي..
هي ابتسمت بخجل وقلبها يدق بقوة..ونست علاش جايه للكوجينه وطلعت...
ونسيبه تضحك عليها...
🍁في المربوعه..
هيثم؛هاه شن قلت خليل..
خليل بشي من الحده؛قلت اختي مانبيش نعطي توا نبيها تقرا سنوات التخصص بعدين تفكر في الزواج!؟
رفع هيثم حواجبه وهو متعجب وقال:تحكي جد!؟
خليل هز راسه وقال:اكيد..
هيثم وهو مستغرب قال؛انت متأكد من كلامك هدة اختك بتتخصص جراحه بعني 3سنين زياده مش هلبه هكي..
خليل؛لامش هلبه...
هيثم حس ان خليل رافض الموضوع قاله؛تمام..كل شي واضح ع العموم الدنيا نصيبات وكان ولدي مايشرفكش يكون نسيبك ان شاء الله يلقى ناس تتشرف بيه ويتشرف بيها..
خليل؛دكتور ارجوك ماتقولاش الكلام هادي اني مناسبكم وليا كل الشرف.. بس اللي داره ولدك هو اللي مش قادر نعديه..
هيثم عقد حواجبه وقال؛شن دار!؟
•••••••••
"وعلاش رده"
نسيبه وهي مضايقه ومعصبه؛ماهو ولد خوي مايصلحش بيك كان مدمن..
عفاف؛شن الكلام اللي تقولي فيه هدا ..هدا غير راجلك وتعرفيه اكثر مني..
نسيبه؛باهي فسريلي ياعمتي علاش يرد في ولد خوي!؟
عفاف بعدم معرفه؛والله مانعرف بس اكيد في سبب..
نسيبه:اللي قلت عليه...
وتهاني تسمع فيهم يتكلموا هي مضايقه ومستغربه في خوها كيف يرد هيثم..
"نسيبه"
نسيبه؛مانيش ماشيه..
قرصتها عفاف وقالت؛بري لراجلك..
نسيبه وهي تتحسس في مكان القرصه؛لا..
هو بصوت عالي..
"نسيبه"
عفاف؛تي بريله خير مايجينا..
هي قالت؛اففف..ومشت وهي معصبه..
عفاف شبحت لبنتها وقالت؛تهاني ..
شبحتلها..
عفاف؛تنحل ان شاء الله..
تنهدت تهاني بضيق ومشت طلعت من حدا امها للدار..
🍁ومرت خوها تتناقش هي وخوها في دار الدروج.
خليل؛تفاهمت اني وهيثم انتي اطلعي منها..
نسيبه وهي رافعه حاجبها؛علاش مناديتي مالا!؟.
خليل؛نبيك تحددي الحوايج.
هي شبحتله بغيظ بعدين قالت؛ باهي تو نحددهم ..
ومشت ركبت...
هو حس بنبرة التهديد في كلامها ركب وراها يجري..
وبألف ياويلاه بش ماخلاهاش تحرقله الحوايج...
ومشي مشي وفي الاخير رضاها....
🍁🍁🍁🍁🍁
تاني يوم..
في مستشفى الرازي...
وقف زياد تهاني في واحد من الممرات بش يسألها عن سبب رفض خوها اللي بوه ماباش يفصح عنه...
زياد؛وخيره شن مشكلته علاش مايبيش
تهاني وهي منزله عيونها استحياءا وع وجهها ملامح الضيق:مش عارفه خيره..ماتوقعتش يرد عمي هيثم بكل..
زياد شبح يمينه القدام وهو مضيق عيونه وساكت..
هي رفعت عيونها وشبحتله..
هو هز راسه وشبحلها...نزلت عيونها طول..
ابتسم على جنب وقال:تنحل ان شاء الله وهو تو يرضى...المهم انتي...
شدت ابتسامتها بقوة..
زياد كمل يقول:المهم انتي خليك قويه..ماتشديهاش بكي وتاكلي روحك..ولاتفكري تنتحري..
هي فنصت عيونها وقامتهم فيه...
هو غير عيونه وابتسم بغرور وقال:ماتخافيش تو ناخدك...
ومشي وخلاها واقفه في مكانها مصدومه..
شبحتلها وهو يمشي بنفس النظرات وقالت متسائله في ذهول:شن حبيت فيه هدا بس!..
•••••••••••
سارة بضحكه: اسمعي كان تحبيه بتتحملي هدا خوي وهدا طبعه..
تهاني:ربي يعيني وخلاص..
ابتسمت دانيه وقالت؛ايه حقه بنات غدوة في ندوة بيديروها في المسرح متاعنا بتحضروا..
تهاني:ايه فيها دكاترة كبار...
سارة؛طبعا من غير سؤال...
دانيه هزت راسها وهي مبتسمه ابتسامه تخفي بيها من ضيقها اللي مرافقها من امس....
🍁🍁🍁🍁
"كل اللي درته اني وقفتها وسألتها ناخد رايها اقسم بالله اقسم بالله كانت هادي المرة الاولى اللي ندوي فيها معاها في الموضوع..."
خليل؛دوتك معاي مش معاها..لو ترضاه انت لأختك اللي درته اني نرضاه لأختي..
زياد؛المهم ان نيتي معاه صافيه وربي عالم وانت تعرفني كويس ياخليل..
خليل؛ولاني نعرفك كويس ماتوقعتش دير هكي..
زياد؛باهي حقك عليا ياسيدي اني اسف..وقربله وكب ع راسه وقال..وهدا راسك وكبينا عليه..
تنهد خليل وقال؛نحلفك بالله معاش تكلمها لين يصير شي رسمي.
زياد؛والله معاد صايرة ياغالي انت غير ارضى علينا بس..
ابتسم خليل وقال:مانلقاش خير منك لأختي..
زياد ابتسم من قلبه وقال:صدقني حنكون عند حسن ظنك..
••••••••••••••
"هاه شن رايك؟!"
تهاني بخجل:كان انت تشوف كويس ماعندي مانقول..
جهاد:شن هو يشوف فيه كويس انتي اللي بتعيشي معاه راهو
عفاف:ماتحرجش اختك عاد افهمها بروحك..
تهاني مشت من حداهم من حياءا من ان يبان عليها شي قدام خوتها..
عفاف:عاجبك هكي!
ضحك جهاد..
وخليل قال بإبتسامه:خلاص ربي يكمل ع خير..
ونسيبه واقفه في الفم تسمع فيهم وهي فرحانه...
🍁🍁🍁🍁🍁
راقده في داره من غير نوم..
عقلها مابطلش تفكير وقلبها في الحيرة..
وتبي حد يشور عليها ويقوللها راي يطلعها من هالحيرة...
ناضت من نومها وطلعت من دارها للحمام توضت وولت لدارها وصلت استخارة...
وبعد الاستخارة قعدت تستغفر وبس..
لين رن تليفونها فجأة..
ناضت ومشت خداته من فوق السرير وردت..
دانيه؛ياهلا..
"اهلين...شن جو"
دانيه:تمام الحمد لله..شن جوك انتي وشن حال عبدالحميد
"الحمد لله كويسين..شن حال كنعوني وامي ورشيد"
دانيه:الكل في خيار الخير اللهم لك الحمد..
"الحمد لله..شن دايرين مع بوك"
دانيه:متحميلنه وخلاص شن بنديروا..
"الله غالب...خلينا من سيرته وقوليلي شن جديدك"
تنهدت وقالت:اتصلتي في وقت المناسب يارتاج..
"علاش شن في!؟"
🍁🍁🍁🍁🍁
"اوووو خشي"
هدا اسماعيل فرحان اللي سجل هدف في مرمى ولد خالته في لعبة البلاستيشن...
كان نادر مش مهتم هلبه اساسا واضح انه يلعب وعقله مش معاه..
اسماعيل لاحظه وقف لعب وقال:احكي قول خيرك شن اللي مخليك هكي اليوم مهبي ومش ع طبيعتك..
تنهد نادر وقال:مش عارف كيف بندير معاها ياإسماعيل نقول نفوتها ونخليها في حالها كل شي بالسيف الا حبني يابنادم نلقى روحي ندور فيها وين ماهي ونطلب منها في الفرصه...
المشكله اني مش مراهق بش يصير فيا هكي ولاندير هكي..
لكن مش بيدي...البنت واخده عقلي وقلبي مولي مش قادر نفكر الا فيها في كل وقت..
اسماعيل:مش عارف شن بنقولك بس الباين زيها زي اختها ننصحك معاش تعب روحك معاها..
نادر:زيها زي اختها ممكن لكن اني مش زيك ياإسماعيل حبيتها من قلبي..
اسماعيل:تحسابني بالساهل نسيتها رتاج حتى بعد تزوجت تعبت في السنه الاولى اني والمراة لكن هي عرفت كيف تكسبني وخلتني ننساها...وحتى انت تو تلقى من تنسيك فيها هلبه يتمنوك يانادر ماتقوليش مافيش من ترضى بيا..
نادر:عارف لكن اني مانبي حد غيرها ولانبي ننساها..
اسماعيل مط شواربه بملل وقال:معناها العب العب مش ناقص وجع راس..
نادر حط اليد متاع البلاستيشن وقال :العب بروحك...
وناض ومشي وخلاه..
تنهد اسماعيل وقال:ربي يريح بالك...
🍁وفي مكان تاني من الحوش نفسه..
مديحه؛وشن تبيني ندير اكثر مادرت..
الساكته:مانبيك ديري شي وخليني اني ندير..
مديحه؛شن بديري يانهاري راك تخربيها ع الولد مرة وحده!
الساكته:اطلع منها انتي يابومه..ومشت طلعت من حداها وهي تخبط بعكوزها ع الارض..
مديحه بقلق:مش حترتاح لين تجيب اجلنا ياني ياهو بعيد السو...
🍁🍁🍁🍁🍁
الساعه الثامنه مساءا..
طلع هيثم من داره ووقف قدامها ونادى:سارة..
"دقيقه بابا"
تنهد وهو واقف يراجي فيها..
لين جاته وهي تقول:نعم بابا؟
هيثم:خشي بنتي نبيك في موضوع..
سارة انتابها شعور بالقلق هزت راسها وخشت وهو خش وراها وسكر الباب..
🍁🍁🍁🍁
جرس الحوش يرن..
جت للباب وفتحاته ابتسمت من قلبها وقالت:توحه..
فاتح بضحكه:تي كيف صار معالي الوزيرة بروحها تفتحلي الباب..
ضحكت وضماته وهي تقول:حمد لله ع السلامه امي..
هو قال:الله يسلمك حبيبتي..
بعدوا عن وخش بشناطيه..
وهي تشوفله بفرح وقالت؛شكلها رجعه نهائيه.
فاتح:خلاص مافيش غربة تاني..
ابتسمت وهي فرحانه..
ع جية نوارة وهي تقول:توحه حبيبي..
فاتح ضحك وقال نوارتي..
جاته قرب باس راسها وهي تقول:حمد لله ع السلامه ياحبيبي..
فاتح؛الله يسلمك..
شافت الشناطي وقالت؛باينك خلاص طلقت السفر..
فاتح:بالثلاثه..
قعدت تزغرد نوارة..
وفاتح ونوال يضحكوا عليها..
🍁🍁🍁🍁
انفتح الباب وطلعت منه وهي معصبه..
وهو طلع وراها وقال بغضب؛قاعد نحكي معاك اني كيف تطلعي وتخليني هكي شن تصرف قليلات التربيه هدا!؟
التوأم وزياد سمعوا صوت بوهم عالي طلعوا من ديارهم..
سارة وقفت والتفتت وهي تقول ودموعها في عيونها:مش قليلة تربيه يابابا..بس موضوع هدا ماناقشش فيه حتى النقاش لو شن يصير لايمكن نرضى بيه..
هيثم قدملها وقال:علاش ان شاء الله..انتي في شن احسن منه!؟ يخي هو احسن منك بألف مرة..
البنات مصدومات في بوهم وزياد يشوف لسارة بضيق..
سارة:هداكا احسن مني اني في شني!؟
هيثم؛انسان ناجح ومشهور ومتواضع ماشافش نفسه ع حد..
لكن انتي ع خاطر قريتي طب وطلعتي كم قصه تحسابي روحك وصلتي!؟
سارة:توا اني طلعت ولاحاجه بابا..
هيثم:بتكبرك هدا ايه ولاحاجه...ونقولك شي انسيه الموضوع واحد زي فاتح يستاهل خير منك..
ولف ومشي وخش داره وسكر الباب وراه بقوة..
هي بصدمه شبحت لزياد..
هو حرك راسه يمين ويسار وولى لداره..
غيرت عيونها عنه وشبحت لخواتها لما شافت نظراتهم..
غيرت عيونها طول ومشت لدارها...
وهما شبحوا لبعض بحزن..بعدين مشوا خشوا لدارهم..
🍁سارة لما خشت لدارها بدت تبكي..
مشت قعمزت ع سريرها وهي تفكر في كلام بوها القاسي اللي كان في ظلم ليها بدون ماهو يعرف..
فتحت درج الكامدينو متاعها وطلعت قطعة حرير فتحتها وقعدت تشوف لزهرة الغاردينيا اللي ليها ثلاته سنين عندها..
وجي بين عيونها هو..
كلامه...حركاته...ضحكته....
ابتسمت من بين دموعها...
بس سرعان ماجي في بالها مشهد موت راجلها الأول..
غمضت عيونها بشده وضمت ليها الوردة وقعدت تبكي من قلبها....
تبكي من الخوف...الخوف الشديد من الفقد..
الخوف من فكرة ان اي شي حلو في حياتها مربوط بيها هي لازم يموت..
بيقول قائل كيف بنت متدينه حافظه كتاب الله يكون هدا تفكيرها...
الجواب ان حافظ كتاب الله والمتدين ليس برسول او نبي اوملك منزه..
هو بشر عادي..تصيبه الامراض النفسيه ويتعب لكن ماينهارش وحيجيه يوم وينقذه ماعنده من دين من اللي هو فيه..
ولأن سارة من اهل الله وخاصته وهو الأعلم باللي صاير فيها علم ان دواها عند رجل حيكون ليها نعم الرفيق والحبيب والعوض الجميل...بعته ليها في الوقت المناسب...
🍁🍁🍁🍁🍁
"هدي ياسارة هدي"
"مش قادرة يادانيه حاسه روحي بنموت كلام بابا وجعني هلبه"
دانيه:شوفي سارة ومن غير زعل عنده الحق..
"حتى انتي يادانيه!"
دانيه:اسمعيني ياسارة ياحبيبتي انتي قاعده تقيمي في الراجل بماضيه وهدا اكبر غلط..انتي جربي لو جاتك تهاني وقالتلك نفس الكلام عن زياد شن تحسي..
"فرق كبير"
دانيه:لا مافيش فرق..وفاتح انسان كويس ويحبك من قلبه وصادق معاك وجاك من الباب صدقيني ياسارة ماحتلقي حد يحبك زيه..
انهارت بالبكي..
دانيه؛سارة خيرك!
ردت عليها وهي تبكي.
"بنسكر"...
وسكرت عليها...
دانيه حولت السماعات وهي تشوف للتليفون بحزن بعدين قالت:ربي يريح بالي وبالك ياصاحبتي.. وقعدت سارة طول الليل سهرانه وهي تفكر وتقلب فيها فراسها لين طلع عليها الفجر...
بعد ماصلت..
رجعت لتفكيرها من جديد لين خداها النوم...
🍁🍁🍁🍁
الساعه الثانيه ظهرا...
جنان:طقي باهي..
ريحان؛خايفه تهب فيا..
جنان؛توا طلعتي تخافي..
ريحان؛اسكتي احسنلك مش ناقصاتك..
جنان:تو نطق اني شن بديرلي يعني بتاكلني..
وقدمت ودقت الباب بهدوء..
"خشوا"
ريحان فنصت وقالت؛كيف عرفت!؟
وجنان فتحت الباب وهي متوترة..
خشوا الزوز ووقفوا وهما يشبحولها..
كانت مقعمزة ورا اللاب توب متاعها حولت نظاراتها وقالت؛شن في؟
ريحان؛اليوم المباراة متاعي تذكري فيها ولا..
ضيقت عيونها بعدين رختهم وقالت:تمام ربع ساعه ونكون واتيه..
ابتسموا الزوز بفرح..
سارة؛بابا ماجاش؟
ريحان؛ايه..
هزت راسها وقالت؛اطلعوا..
هما الزوز قالوا:حاضر..
ومشوا طلعوا من الدار بعدين تنفسوا براحه..
ومشوا يجروا لدارهم...
🍁🍁🍁🍁🍁
في مسرح كلية الطب...
مقعمزين في المسرح جنب بعض..
هو لاهي بتليفونه وهي تتكلم بالتليفون..
دانيه بهمس:لالامازال ماجي حد مازال الوقت
"خيرك تتكلمي هكي باهي"
حركت عيونها ليه وقالت؛امتى بتجي
"اني ماصارليش بتجي تهاني بس"
وهو في جنبها يسمع فيها شن تقول..
دانيه:علاش؟!
"ماشيه مع ريحان بنحضر مباراة عندها اليوم"
دانيه:اها بالتوفيق يارب...باهي قوليلي شن جوك اليوم
"احسن من امس فكرت في الموضوع زين زين ووصلت لحاجه وبنديرها"
دانيه؛وشن هي بتوافقي صح..
"خلاص عاد ياسرك اسئله تو تعرفي كل شي في وقته"
دانيه بضحكه:تي غير هدي ياوحش..اسمعي النكته هادي اسمعي..
شبحلها..
دانيه:قالك مرة مصنع قهوة تفجر قال "بن"
هي بضحكه ردت عليها..
"تافهه ياتافهه"
ودانيه نست روحها وضحكت بصوت عالي بعدين استقاظت وشبحتله..
لقاته يشوفلها بطرف عينه..
تنحنحت وقلبت وجهها عنه
وهو شد ضحكته...
"خلاص توا بنخشوا سكري..سلام"
سكرت دانيه وقالت بإبتسامه؛ قالت بنخشوا..
بعدين شبحت جنبها..
لقاته يشوفلها بطرف عينه..
شبحت حواليها بعدين رجعت شبحتله وقالت..
دانيه:ممكن لو سمحت معاش تشبحلي..
الشايبي:الذنب ذنب عيوني مش ذنبي ماليش عليهم سلطان..
دانيه:تعرف لو استفزيتني وطلعتني عن طوري شن ندير..
الشايبي طلع البيرو متاعه من جاكيته وقال وهو رافع حاجبه ومبتسما تهكما:شن بديري..
هي شبحت للبيرو بخوف مابتش تبينه .
بعدين قلبت وجهه عنه..
وهو شد ضحكته..
ع جيت دكتورة مكانها جنب دانيه..
الشايبي:اهي جت الدكتورة هاله...ايه ع سيرة هاله...
قالك مرة في وحده سماها هاله دارولها فاونديشن اختفت..
الدكتورة وصلت فيهم وقالت:مساء الخير..
هو قال:مساء النور..
ودانيه وهي شاده ضحكتها بقوة قالت:مساء النور..
بعدين غيرت وجهه ليه هو وغمضت عيونها وقعدت تضحك بكتمان..
وهو يشبح للمسرح ويضحك وهو عاض ع شاربه...
وهاله تشبحلهم بطرف عينهم...
وبدت الندوة...
وانسجموا فيها....
وقعدوا يسمعوا للموضوع المطروح وفي حاجات دانيه تكتب فيها..
والشايبي مركز عليها..
وهو مكانه شارك في النقاش ودانيه تشوفله بإعجاب وهو شاد المايك ويتكلم بثقه ويقول ماعنده من معلومات..
ومن جهة تانيه..
كانوا تهاني وزياد يتبادلوا في النظرات اللي ماطولش هلبه..
وكل حد فيهم كان خايف من خليل يكبسهم..
بينما خليل كان منسجم مع موضوع الندوة ويسمع بتركيز ويستفيد من كل شي قاعد يشوفه ويسمع فيه...
🍁🍁🍁🍁🍁
وفي مكان تاني...
في مستشفى الرازي...
"الحمد لله ع سلامتهم العمليه نجحت اختي"
حنان مرت ياسر خو مريم:الحمد لله ياربي...
وشويه وطلعوا قدامها ع الباريلات...
راجلها...وفي جنبه ولد دنيا...
فاتوا من قدامها وهي تبكي...
شويه ورن تليفونها..
فتحت الخط وردت:ايوه عمتي...الحمد لله نجحت العمليه...
"حالهم باهي الزوز"
حنان؛ايه الحمد لله طمني عليهم الدكتور..
"ربي يجبر بخاطركم يارب كيف جبرتوا بخاطر هالوليد اللي ماليه ذنب في شي"
وحنان تقول:آمين يارب العالمين....
#العوض
#البطل_المغمور2
....يتبع.....
