#البطل_المغمور2 "زهور القمر"
#جمان_فريد
#الجزء_الخامس_والأربعين "وشاء الله2"
قبل لتقروا الجزء اي حد فاتاته صلاة او جي بيقرا في وقت صلاة سيب كل شي وبرا صل وبعدين اقرا...
الصلاة اولا..
وصلوا ع الحبيب💖
💐💐💐💐💐💐💐💐💐💐💐💐💐💐💐💐💐
••يوم زفاف اسيد ومريم...
كان هاليوم صيفي بإمتياز..
والبنات تبهدلوا وهما يجهزوا في ارواحهم للحفله..
وبعد ماجهزوا انفسهم اتصلت سارة بفاتح يجي يرفعهم..
••في الطريق..
سارة :قوي المكيف شويه فاتح..
فاتح؛حاضر..وقوى المكيف..
جنان؛فاتح بالله عليك ميه..
ابتسم وخدي شيشه ومدها للخلف..
خدتها جنان وقالت؛شكرا..
ريحان؛نقص المكيف شويه صقع.
سارة؛باهي نقصه شويه معليشي..
ضحك وقال؛حاضر..
ريحان بضحكه؛هبلناك فتوح..
فاتح؛ع قلبي زي العسل مادوروا شي.
ابتسمت سارة وهي تشوفله بحب..
وخواتها ابتسموا وهما يقولوا بأصوات متقطعه؛صحيت..تسلم..
وكملوا طريقهم وهما مرة مرة يهدرزوا..
لين وصلوا في الفندق..خش بيهم لداخل...
ونزلهم ودخلهم للقاعه اللي فيها الحفله...
وغادي استقبلتهم نوال..
نوال:اهلا اهلا..
سارة سلمت عليها وهي تقول؛اهلين بيك عمتي مبارك ع اسيد..
نوال؛الله يبارك فيك الفال ليكم..
سارة بإبتسامه؛إن شاء الله..
بعدين شبحت نوال للتوأم وقالت؛الله يبارك طالعات تهبلوا..
الزوز مع بعض بإبتسامه؛من ذوقك.
هي ضحكت..بعدين سلمت عليهم..
وبعد السلام خدتهم ورفعتهم لطاولتهم...
نوال:شن العيله كلها..
سارة؛الحمد لله كلنا تمام..وين خويله ماجده..
نوال:تو نشوفهالك..ومشت نوال وهما يشبحولها..
ريحان؛تجنن طالعه..
جنان:قولي الله يبارك .
ريحان بضحكه؛الله يبارك..ماتقولش فاتح ولدها يبان خوها..
سارة بإبتسامه؛مالا كان تشوفوا العريس شن تقولوا..
جنان بضحكه؛مش قادرة نتخيل..
شويه شافوا ماجده جايه من بعيد..
ناضولها...
ماجده بضحكه:الله يبارك الله يبارك..
ناضوا وهما يضحكوا...وسلموا عليها..
وبعد ماسمعوا منها جميع كلمات الغزل..
قعمزت معاهم تسأل عن بوهم...
سارة؛مانشبحوش فيه بكل حتى لما يروح للحوش يخدم..
ماجده:ربي يعاونه ويعطيه الصحه..
هما قالوا مع بعض:آمين..
سارة:شن حال عمي الأشهب؟
ماجده؛لا الحمد لله والله راده بالي منع وحطاته في عيونه رايح الله يبارك شباب..
ابتسمت سارة بضيق وهي تفكر في بوها..
تنهدت ومررت نظرها ع خواتها وهما يهدرزوا ع خالتهم..
ومعاش عرفت على من تزعل ..
على حال بوها..
ولا على حال خواتها...!
🍁🍁🍁🍁
🌼وماهي الا لحظات وخشت مريم..
اللي طلت عليهم بفستان ابيض حلو مستور ومن غير طرحه..
ومزينة تسريحة شعرها الذهبي بهدبيس لونه ابيض..
طلة ناعمه وبسيطه بس كانت فيها في منتهى الجمال..
امها كانت هالمرة فرحانه بيها من قلبها تزوجت زواج العيله كلها راضيه عليه..ومن ناس في مستوى عالي من جميع النواحي..
والعريس كان مختلف عن اللي سبقوه في كل شي..بل خير منهم بمراحل..
وهدا عوض الله لمريم..
اللي ارتبكت ذنب كبير يوم من الايام..
ورجعت عنه وتابت..وصبرت ع توابعه صبر التائبين الأوابين..
وهادي كانت مكافآة نجاحها في كل امتحان خاضاته..
هي اليوم سعيده..ومرتاحه..
وهادي اهم حاجه..انها مرتاحه..وحاسه روحها خفيفه بوزن الريشه..مافيش خايفه منه..ولاسر مرعب قاعد ع قلبها زي جبل الهم وكاتم ع انفاسها..
خلاص توا جي دور الحياة الطيبه اللي تستحقها مريم...
🍁ممكن اكثر حد فرحان لمريم..
جهاد..اللي كان مروح في الطريق للحوش وهو يفكر في ايامه معاها..
تنهد وقال؛باهي اللي ربي بعتلها من يقدرها تستاهل كل خير..
وصل في الحوش وخشله بالسيارة..
بعدين نزل منها..
شبح جيهة دار عرفه لقي ضيها مفتوح توقعه يقرا..
بعدين مشي خش للحوش...
كان شبه هادي..
شبح جهة الكوجينه لقاها فاضيه وضيها مطفي..
كمل القدام وبدي يسمع في اصوات هدرزة..
تهاني:هي عازمتنا في حوشها صاحباتها وبس يام..
عفاف؛باهي واختها اكيد بتعزمها وهديكا ناقمه علينا حتى هي مرات تسمعك كلام ولاتصير مشكله..
تهاني:لااختها مسكينه لاهيه بهمها..
عفاف:علاش شن صارلها تاني..
تهاني؛طلعت مطلقه ليها شهر لتوا...
عفاف :لاحول ولاقوة الابالله...غير شن جاها بس مسكينه وهي من هم لهم..
تهاني:ريتي بالله توجع مسكينه رغم الفلوس والعز اللي عايشه فيهم حظها بالهون..
عفاف تنهدت وقالت؛ربي يكون معاها مسكينه ويقوي سعدها..
تهاني:آمين..
عفاف:اسمعي ردي بالك تجيبي سيرتها قدام خوك جهاد..
تهاني:وكان تكلمت عليها شن بيدير يعني!؟
عفاف:مانعرفش شن يخطر في باله يدير خوك وتعرفيه كان ضربت في راسه حاجه وخلاص..وهو يحبها ويبيها يابنتي..
تهاني:احلام اليقظه يام مستحيل..
عفاف:اني عارفه..لكن خوك مرات مايعرفش..ورفعت حواجبا ونزلتهم..
وهو بعد ماسمع كلامهم انسحب بهدوء..وركب طول لشقته...
🍁🍁🍁🍁🍁
ومازالت اجواء الفرح ماتمتش..
قدام الفندق كانت فرقة النوبه قالبه الدنيا..
وبما إنه الفرح مشترك..خوت مريم ماغيبوش جهد مع خو العريس اللي كان قالبها وكأنه عرسه هو..
والعريس مرة مرة يرقص..كان يحاول يرقص ليبي..
وخوه يعلق عليه وينكت والكل يضحكوا..
وفي نهاية المطاف حصل طريحه من العريس...
••في الطريق..
سارة بضحكه:تستاهل ماتهنيش في روحك..
فاتح بضحكه؛اهو مصوره بالله عليك تفرجي عليه الخواجه..ومدلها التليفون..
هي خداته وقعدت تتفرج ع الفيديو وتضحك..
فاتح؛هاه ريتي..
سارة؛شكله مايعرفش ليبيا بكل..وحطت التليفون في مكانه..
فاتح؛مش بالزبط يجي زيارات ويطول بس حياته اساسا برا..
سارة بإبتسامه؛يللا ان شاء الله ربي يهنيهم..
فاتح؛آمين والفال لينا يارب العالمين..
فنصت سارة والتفتت شافت خواتها..
فاتح بضحكه؛راقدات راقدات..
شبحتله وقالت؛ربي يهديك.
فاتح،ربي يهديك انتي ياقلبي ويحنن قلبك..
سكتت وهي مبتسمه ومعاش بت تتكلم..وهو مرة مرة يشوفلها بأبتسامه..
🍁🍁🍁🍁
نوال؛ماهو عيب نرجس هادي مرت خوك وتوا جوهم الزوز مع بعض مافيش احلى منه..
نرجس؛بعلامة ماقاعده تشحط فيه ع العرس..
نوال:شي يخصهم هدا.
نوارة:لا اسمحيلي ياست هانم ابنك عايز يعمل فرح النهارده قبل بكره ماعادش صغير خلاص عايز يفرح ويعمل بيت وولاد يربيهم وهو لسا شباب مش لغاية مايعدي الاربعين..
نوال؛مااعتقدش بوها يرضى بشي زي هدا..هو كله هالعام خلوه يفوت واكيد العرس يتحدد..
نرجس؛ان شاء الله وماتعفسش فيها دلوعة بابا..
نوال بحده؛نرجس..
قلبت نرجس عيونها ومشت للدار..
نوارة؛معاها حق برضو..
حركت نوال راسها يمين ويسار ومشت لدارها..
نوارة بغيظ؛حماية خايبه ياهانم خايبه..
🍁🍁🍁🍁🍁
ويعدي هاليوم..
ويجي تاني يوم...
اليوم هدا كانت دانيه دايرة فيه عزومه بعد ماروحت لليبيا زياره..
ومن ضمن المعزومات...
سارة وخواتها..وتهاني....
ومشوا كلهم مع بعض في سيارة سارة..
تهاني؛المحضر مايتفوتش...
سارة؛لاعزومة صاحبتي هي اللي ماتتفوتش قداش استاحشتها..
تهاني بإبتسامه؛حتى اني..
ريحان؛ومااستاحشتيش زيزو..
ضحكوا البنات..
تهاني:فكيني من سيرته خوك عديم الاحساس هدا ماقال نتصل نسأل عليها..
سارة؛والله كل يوم يسأل فيا عليك..
تهاني وعيونها تعبوا دموع؛يزيده ع حاله سؤاله هدا..
سارة بضحكه:اييه ياما جايك راهو اصبري وصابري..
تهاني:واني ندعي لربي بغير الصبر..
البنات قعدوا يضحكوا..
وكملوا طريقهم فهالهدرزة..
لين وصلوا لحوش اهل نادر...
••داخل..
قدام المدخل..
كانت واقفه رتاج ورا دانيه تساويلها في حزام القفطان..
رتاج؛هكي كويس مش شاحط ع بطنك؟
دانيه وهي تساوي في شعرها؛ايه كويس..
دق باب الحوش..
دانيه شبحتله وقالت؛منو..
مارد حد..
حطت كابها ع راسها وقدمت وفتحت الباب..
وضحكت بمفاجأة..
سارة بضحكه ودموعها في عيونها:دنوني..
دانيه بضحكه؛سويره..
وضموا بعض بقوة..ونست دانيه انها حامل...
رتاج بضحكه؛بطنك يابنت..
بعدت سارة وقالت؛حي نسيت ترا وريني...ياوخيتي محلاها..
دانيه وهي تمسح في دموعها:الفال ليك..
رتاج؛المكياج خرب..بعدين شبحت لتهاني جو عيونهم في بعض..
تعكرت ضحكة رتاج ومشت لأختها وقعدت تمسحلها في دموعها...
دانيه؛تاهو..ومدت يدها ..
شدتها تهاني وقالت؛حمد لله ع السلامه دنو..
دانيه؛الله يسلمك..
بعدت رتاج..ودانيه ضمت تهاني بقوة وهي تقول:استاحشتكم..
تهاني:حني اكثر..
سارة:متغيرة هلبه مولية عسل بزياده...
دانيه؛حتى انتم حلويتوا هلبه..
والتوأم فهالوقت يسلموا ع رتاج..
رتاج؛ربي يحفظكم...انتي جنان وانتي ريحان..
سارة بضحكه؛بديتي تميزي فيهم!
رتاج؛ايه واضح الفرق مولي..حتى في اللبس..وحده ديما تحب تلبس قفاطين واسعه..والتانيه بلوزة طويله ع سروال..
ريحان؛حلوة الملاحظه هادي..
ضحكوا...
وكملوا باقي سلامهم..ورتاج وتهاني جاملوا بعض مجامله..
بعدين دخلوهم للصالون داخل..
هدرزوا عن اهم اخبارهم بشوق شديد..
وفي العز الهدرزة بدوا يخشوا باقي المعزومات..
وتعبى الصالون...
كانت اجواء اللمه حلوة ودانيه كانت مسيطره عليها بالهدرزة عن الحياة في كندا والقرايه غادي..
وسارة كنت تشارك فيها الحديث بإعتبار انها عاشت وهي صغيره غادي وتعرف بعض الامور...
وفي وسط هالاجواء..
كانت رتاج تسرق في النظر لتهاني اللي مركزة تركيز تام مع هدرزة البنات...
فجأة وحده منهم قالت...
:تهاني بنسألك..
تهاني:شني؟
:خوك صاحب ورشة ولاد خالد..
رتاج قعدت تشبح للبنت..
تهاني:ايه خوي جهاد..
:ماشاء الله عليه الحق يومها رفعت سيارتي غادي هو صلحها عليك معامله واسلوب وعيونه مارفعهمش فيا..
عيون رتاج تعبوا دموع وقلبها قعد يدق بقوة..
تهاني:تسلمي..
:مش متزوج هو؟
تهاني:تزوج زمان وماتوفقش..
:خسارة والله واحد زيه يقعد هكي..
رتاج تلقائيا قالت؛تخطبي فيه شكلك!
دانيه اتفاجئت في اختها..
وتهاني قعدت تشبحلها...
:الحق الحق كان فيها كيف راهو درتها كانك ريتيه عذرتيني.
قعدوا يضحكوا البنات..
وكملوا باقي كلامهم وتعليقاتهم ع نفس الموضوع..
وخلو النار الوالعه في صدر رتاج تصهد في قلبها صهد..
🍁هديكا الليله..
بعد ماتمت اللمه وروحت رتاج...قعدت ليلها كله وهي تفكر في جهاد وايام زمان....وين تخطر اول ايام تعرفت فيه عليهم تقعد تضحك بروحها..
وبعدين تقعد تبكي لما تتفكر كيف انتهت هالمعرفه وشن اللي حكم عليها ...موت خوها...
يبوا معجزة بش يجتمعوا معجزة!
🍁وجهاد عنده ايمان بالله مخليه موقن تمام اليقين ان كل اللي صار وقاعد يصير يثبت ان ليه فيها نصيب
كيف مش عارف...هو مخليها على الله وبس..
وقاعد يعد في الايام...ويراجي امتى تم العدة متاعها..
🍀🍀🍀🍀🍀
ويعدوا الايام ورا يوم...
اسبوع ورا اسبوع...
شهر ويتبعه شهر....
مروا...وجنان وريحان كل وحده فيهم مشغوله في عالمها..
جنان خشت كورس لغة انجليزيه وبدت تستعد لاخر سنه في الاعدادي..
جنان نست كل شي ليه علاقه بمشاعرها اتجاه عرفه لما انشغلت بأهداف مهمه عندها...
عكسه هو اللي كان هدفه الاول هي وكان يراجي امتى تطلع النتيجه ويشوف لأما كليه بيخش بش يبدا يخطط لمستقبله معاها...
اما ريحان..
حياتها كلها كرة سلة وبس...وقاعده تستعد لبطوله ع مستوى طرابلس...
بس في شي مسببلها ازعاج...
هو صاحب النادي اللي قاعد يجي ديما يقعمز يتفرج عليها كيف تلعب ويروح..
وفي يوم...
••"رحبوا معاي يابنات بلاعب فريق الاهلي طرابلس اللي جاب 7بطولات ووصلنا لنصف نهائي في كأس الانديه العربيه لكرة السله...المثنى احسان"
صفقوا فريق ريحان وهي منهم بحرارة..
وهو مقعمز ع الكرسي مقابلهم يمرر في نظره عليهم وهو مبتسم ويقول؛شكرا..
وقفوا البنات تصفيق..
والمدربه قالت؛اول نشكروك انك جيت ولبيت الدعوة..
المثنى؛بالعكس والله فرحان اللي درتولي دعوة..
المدربه:مشكور...اليوم طبعا نبوك تعطي نصايح وتعليمات للبنات نبوهم يجيبوا البطوله..
ابتسم وقال؛ان شاء الله..
المدربه؛خش في العملي طول..
ضحك وقال؛وهو المطلوب..
ناض وشبحلهم..
حدفتله ريحان كرة السله..تلقاه وابتسملها..
بعدين قال؛نبيكم توا تركزوا معاي اللي بنشرح عنه توا لو لقطوه صح اعتبرو البطوله في الجيب..
ريحان؛هي ابدا حمستنا..
ضحكوا..
وهو بضحكه قال؛حاضر...
وبدي المثنى يشرحلهم..
وريحان مركزة معاه تركيز تام..
تشوف في مهاراته ولعبه وتتمنى لو تملك ربع ماعنده من امكانيات..في النهايه الراجل مش زي المراة...
وبعد ساعه ونص كامله من الشرح..
مشي قعمز ع كرسي وقال؛هي الحاجات المهمه اللي نبيكم تحطوها في روسكم وماتنسوهاش..
ناضت ريحان ومشتله بشيشة ميه ومدتها وهي تقول؛مش ساهله الفرق اللي بنلعبوا ضدها..
خدي الشيشه وقال بإبتسامه؛كويس انكم مقدرين قوة الخصم هادي اهم خطوة تاخدوها اتجاه الفوز..
ابتسمت ريحان وقعمزت..
وهو ابتسملها وقعد يشرب في الميه..
المدربه؛فعلا..مشكور جدا مرة تانيه لوجودك معانا اليوم وانك عطيتنا من وقتك..
المثنى؛واني مرة تانيه نقولك اني فرحان اللي خديت من وقتكم حتى انتم..
وشويه وبدوا البنات يروحوا...
اما ريحان وقفت ع المثنى بش تكلمه في شي مهم..
المثنى وهو عاقد حواجبه بإبتسامه؛ان شاء الله خير!
ريحان؛شوف اني صدفه عرفت ان صاحب النادي يكون صاحبك تمام..لهدا نبيك تكلمه..
بدت تخفت ابتسامته وهو يقول:على شني!؟
ريحان؛مش عارفه كيف بنحكيهالك..هو لما يجي هني يقعد ديما مركز عليا..ومش عارفه شن في فراسه من ورا الحركات هادي..قوله قالتلك ريحان كان في فعقلك شي حوله الدوة هيا مانحبهاش بكل ومانحبش من يجيبلي الشبهه..
المثنى من داخل كان فرحان بطريقة تفكيرها بس اضايق وعصب هلبه من رشيد..ومع هذا ضبط نفسه قدامها وقال؛ماعندكش مشكله تو نتفاهم معاه رغم اني نعرفه راجل كويس ومش متاع لبز..وانتي خليك هكي ديما باهي..
ريحان؛من غير ماتوصي ياكوتش..
ضحك وقال؛كوتش!
ريحان بضحكه؛كوتش مؤقت اليوم...
فجأة رن تليفونها شافاته وقالت؛اختي جت..رفعت عيونها فيه وقالت؛سلام..ومشت تجري..
وهو يتبع فيها بعيونه بعدين قال:خل نشوفوا السي رشيد شن موضوعه...
🍁🍁🍁🍁
"حي ع الهبله حرشتي المثنى"
ريحان وهي تسرت في سوسته التوته؛خير مانحرش زياد وتكبر المشكله..
جنان؛مفروض طنشتيه ياريحان مرات المثنى يدير مشكله معاه..
ريحان وهي تقيم في حوايجها؛علاش يدير مشكله هما كلمتين يقولهم وبعدين هو صاحبه مايخسراش ع خاطري.
ومشت طلعت من الدار..
ضحكت جنان وقالت:ماك مش عارفه شن فيه المثنى..
••••••••••
رشيد بضحكه:صح مركز عليها..
المثنى وهو يشوفله بحده؛علاش!؟
حط رشيد.البيرو وشبك صوابعه في بعض وقال؛والله ماعارف بنحكيلك الموضوع محرج شويه..
رفع المثنى حاجبه وقال؛علاش شن هو الموضوع..
رشيد تنهد وقاال؛عندها وخية توأم اكيد تعرفها.
رفع المثنى حواجبه..
رشيد؛هي صغيره في السن صح..بس الله يبارك عليها من جميع النواحي تختلف هلبه عن اختها والحق عاجبتني هلبه ونيتي اتجاهها صافيه..غير مازال صغيره بس..
ضحك المثنى براحه وقال؛عليك جو يابرو...نفس القصه والله.
عقد رشيد حواجبه وقال؛كيف نفس القصه!؟
المثنى بضحكه؛قصدي اني عاجبتني التانيه غير جت صغيره شويه مكتوب عليا نراجي وخلاص..
ضحك رشيد وهز راسه وهو يشبح لإيديه وقال؛قصدك بنولوا عدايل!؟
المثنى :قول ان شاء الله مايطيحوش في غيرنا..
شبحله وقال؛مانخليهاش...غير توا خليهم يلهوا في قرايتهم وان شاء الله يصير خير القدام.
المثنى بإبتسامه؛إن شاء الله..
🍁🍁🍁🍁🍁
خشت وسكرت الباب وهي تتكلم بالتليفون..
تهاني:باهي اللي تفكرت انك متزوج وعندك مراة..
"وخيره مرتي ماتفكرت انها متزوجه وعندها راجل!"
تهاني؛والله والراجل هدا شن دايرلها قبل يسافر!..
"شن دار مادار شي مسكين متحمل كساحة راسها اللي يبي الكسر"
تهاني؛بدل ماتنشد عن حالي تقولي الكلام هدا!؟
"ناشد عن حالك وعارفه شن لزومه الاسئله اللي بلا معنى هادي"
تهاني بصدمه؛ياربي شن هالبني آدم..ماتعرفش تقول كلام حلو بكل!..
"وين اللي كانت تقول سادني كلامك اللي قلته يوم البيان"
تهاني:وانت ماصدقت حضرتك...
"فكيني توا من النقاشات العقيمه اسمعي غدوة مروح ان شاء الله وتو نتفاهموا"
وسكر عليها..
شبحت للتليفون وقالت وهي مصدومه؛اني كيف حبيته هدا بس!؟
فجأة سمعت صوت نقاش عالي..
لفت ومشت طلعت من دارها وتوجهت للصالون...
لقت امها وجهاد يتناقشوا في موضوع فاجئها..
جهاد؛اني نبيها يام وتو ناخدها..
عفاف؛كيف بتعيش وسطنا كيف..كيف بيديروا صغارك مع بدر بعدين فكرت في هدا كله ولا..
جهاد؛مانبي نفكر في شي اني توا نبي نخطبها يام..
عفاف:كان عطوك دقهالي خضرا هني...وحطت صبعها ع ذقنها..
جهاد؛بإذن الله يعطوني يام..غير انتي ادعيلي مش طالب منك غير انك تدعي..مش كنتي تقولي نبي نشوف صغارك ونشوفك مستقر ومرتاح اني مع المراة هادي نستقر ونرتاح يام...
قعدت تشبح لعيونه المليانات اصرار وشافت فيهم لمعة الدمعه..
تنهدت من قلبها وقالت؛كان فيها خيره ليك ربي يجيبهالك ياوليدي..
ابتسم وقربلها وباس ع راسها..
وتهاني تشبحله بحزن..ومن داخلها متأكده انه مش حيوصل لشي..
🍁🍁🍁🍁
واقف في جنان حوشه..
يسقي في الشجر وهو يسبح بحمد الله...
فجأة رن جرس الحوش..
هيثم؛ان شاء الله خير..ماصدقت خديت عطله نص يوم..
حط الطوبو تحت وحده من الشجرات..
ومشي للباب وفتحه...
جهاد؛فاضي دكتور ناخد من وقتك شويه..
ابتسم هيثم وهز راسه بإيجاب...
••••••••
ع طاولة الجنان مقعمزين ع الكراسي وهما يتكلموا في نفس الموضوع..
هيثم؛من رأيي تكلم صاحبة الشأن هي الاولى لازم تمشي وانت مالي يدك..
جهاد:باهي انت شن تتوقع..
هيثم؛صراحة مانقدر نتوقع شي..اللي حكيته خلاني مانتوقع شي..توكل ع الله وزي ماقلت خليها عليه واللي فيها الخيرة يجيبها..
جهاد هز راسه وقال؛ان شاء الله...
ناض وهو يقول؛بارك الله فيك دكتور..
ناض معاه هيثم وقال؛بإذن الله لما يصير اللي تبيه نبيك ترفعني معاك نخطبلك..
ضحك جهاد وقال؛ليا الشرف..
ابتسم هيثم وقال؛ربي يعطيك مافي بالك..
جهاد بإبتسامه؛يارب..
هيثم؛نصيحه اخيره...حوقل هلبه...
مع الحوقله المستحيل يولي ممكن راهو..
رسم جهاد ع وجهه ابتسامة تحفيز وقال:ان شاء الله...تصبح ع خير دكتور..
هيثم؛قدامك كل خير..
ومشي سقده ...بعد ماطلع جهاد..
تنهد هيثم وقال؛ربي يريح باله مسكين..
ومشي خش داخل...ونسي طوبو الميه مفتوح....
بعد نص ساعه طلعت سارة دير دورة ع الحوش كله كعادتها قبل لترقد تفاجئت لما شافت طوبو الميه مازال مفتوح سكرت المية طول وقالت؛غريبه بابا كيف نساها..
مررت نظرها ع الجنان..
بعدين مشت خشت للحوش وسكرت الباب...
🍁🍁🍁🍁
تاني يوم..
الساعه الثانيه عشر قبل الظهر...
مستشفى الرازي...
زياد:خوديها خيرلك..
تهاني:مانبيش ..
زياد؛نعطيها لسميه راهو..
خدت تهاني كيسة الهديه وهي زعلانه..
زياد وهو عاقد حواجبه بإبتسامه:الدلع المالغ..
شبحتله وقالت؛تو هدا كله ع خاطر قلت نبي العرس بعد عام...
زياد رفع حاجبه وقعد ساكت..
تهاني وهي تفكر وتشوفله ع جنب؛باهي اخر العام..
فتح عيونه ع وسعهم وقال؛اخر العام!..معناها مازال شهرين ونص..ابتسم بكبر وقال...كسرته راسك.
تهاني ماتستفزنيش نغير رايي راهو..
زياد؛تغيري عينك...خلاص تم...
حركت راسها يمين ويسار وهي مبتسمه بعدين شبحت للهديه وقالت؛شن فيها..
زياد بضحكه؛قادومه..
هي غمضت عيونها بنفاد صبر..
وهو يضحك عليها...
🍁🍁🍁🍁
في مكتب بوتيك كبير..
تمتلكه رتاج وسط المول الكبير اللي يملكه خوها رشيد..
كانت مقعمزة تشوف في الموديلات الجديده اللي ناويه تحجز فيها عن طريق النت..
ع خشة وحده تخدم عندها...
:مدام رتاج..
رتاج وهي لاهيه بالآيباد؛اممم..
؛في واحد برا يبي يشوفك..
شبحتلها وقالت؛واحد!
:ايه وماباش يقول اسمه قال لما نخش عليها تعرفني
رتاج بإستغراب شديد؛خليه يخش ترا..
:حاضر..
ومشت طلعت..
ورتاج تراجي فالزائر المجهول يخش عليها...
ولما جت لحظه دخوله...
قعدت ترجف بكل مافيها لما شافاته..
جهاد وهو عاقد حواجبه؛السلام عليكم..
رتاج بلعت ريقها وقالت؛اطلعي..
طلعت العامله اللي تخدم عندها..
وهي قعدت تشبحله ودموعها عبوا عيونها..
جهاد؛نقدم ولانطلع....
رتاج ناضت وهي تقول:شن جابك اصلا..
جهاد؛عارفه شن جابني كويس..
رتاج؛لامانعرفش ومانبيش نعرف..
جهاد،لاتبي تعرفي وحتعرفي يارتاج..
رتاج نزلوا دموعها وهي تقول:ماتقولش اسمي..
جهاد؛سنين واني نقول بيني وبين نفسها مرات ومرات..ولما قلته حسيت حاجه داخلي ارتاحت هلبه يارتاج..
رتاج؛قتلك معاش تقول اسمي..معاش تقوله مايشرفنيش واحد زيك ينطق اسمي..ناسي روحك من تكون ناسي روحك شن درت..ناسي خوك شن دار..
وبكل وقاحه وصحة وجه جايني هني..
شن تأملت من جية ولدي ليك يومها!؟ هو كان يبي يشكرك واصر واني جبته وبس ..الباين في عقلك رسمت هلبه اوهام..
جهاد؛حتى لو كنت نتوهم في بعض الحاجات..الحاجه الوحيده اللي متأكد منها اني نحبك ومن وسط قلبي..اللي صار زمان حفرك داخل حفر..خلاني مش قادر نشوف لغيرك ولانحس بمراة بعدك..كيف صار هكي وامتى صار ماتسألنيش..
لكن اسأليني ع اللي ريته وع اللي عشته التلاته سنين الاخيره....بتقولي كيف قدرت تتأمل فيا بعد اللي داره خوك نقولك اني ماليش ذنب في اللي داره خوي..وفي النهايه الزوز توا في دار الحق..يعني غليكم انشفي من زمان..
رتاج وهي تبكي؛شن تقول انت ! شن تقول...تحسابه ساهل..
جهاد؛عارفه مش ساهل بكل...بس وربي اللي اني عايشه توا مازال اصعب...رتاج اني غيرك انتي مانيش واخد خلاص..
ولو طلعت من عندك خايب رجا ومكسور خاطر..حنقعد طول عمري وحداني لين نموت يارتاج.....
حطت ايديها ع وجهها وقعدت تبكي..
وهو يشوفلها بألم ومش قادر يدير شي بس قاعد يتكلم؛عارفك يابنت الناس تبيني ماتكابريش ع روحك..اني وياك توا مش صغيرين زي زمان يارتاج كبار وبعقلنا ونعرفوا شن نبوا كويس...مرجوعك ليا ومرجوعي ليك يابنت الناس ولو ننوا والله مايقدر واحد يوقف في وجهي ولافي وجهك...
نزلت ايديها من ع عيونها وقعدت تشبحله بخوف وعجز وحزن..
وهو بنظرات كل حن قال:طاوعيني واللي حطك في قلبي نسيك كل شي نخليك تعيشي عيشة تقولي ماكنتش عايشة قبلها..
رتاج ببكي:جهاد..
جهاد وقلبه يفر فران وسط ضلوعه:والله ماعارف شن نرد عليك بالله..بس قولي...
رتاج؛صعب هلبه..
جهاد؛مش مستحيل..
رتاج؛لهالدرجة متأمل انت!؟
جهاد بإبتسامه:متأمل في ربي قبل لنتأمل فيك...
قعدت تشبحله وهي ساكته..
وهو يشوفلها بنظرات كلها حب ورجاء ولمعة الدموع باينه فيهم..
رتاج بلعت ريقها وقالت؛هالمرة بتجي تاخدني من حوش اهلي بس قدامهم مهما ردوك..
ابتسم من قلبه وقال؛عمري كله نقعد نطق عليه بابكم لين ماليك يقبلوني..
ابتسمت من بين دموعها وكل ملامح وجهها ترتعش...
جهاد؛بري قعمزي تو نقوللهم يجيبولك ميه..
هي هزت راسها وقعدت تمسح في دموعها بعدين قعمزت ع مكتبها وحطت راسها بين ايديها اللي يرعشوا وقلبها يدق بقوة..
ومش قادره تصدق اللي صار..وكيف استلسمت وسلمت بسهوله رغم كل شي..
هني بس تأكدت انها تحب جهاد حب حقيقي...
وهو طلع برا وكلم العاملات يجيبولها ميه..
ومشي طلع من البوتيك وهو في قمة السعاده...
لما وصل في سيارته رفع راسه وهو مغمض عيونه قال..
"الحمد لله"
🍁🍁🍁🍁
"اهو زياد حدد موعد العرس اخر السنه علاش حني مانديروش زيه"
سارة بضيق؛بصراحه فاتح اني في بالي حاجه
"اللي هي"
سارة؛شن رايك نأجلوا كلام عن العرس لبعد ماريحان وجنان يكملوا الشهاده الاعداديه..
"لا سارة لاهلبه هكي"
سارة تنهدت بضيق وقالت؛عارفه انه هلبه لكن يافاتح مش حنرتاح عارفه روحي بنقعد نخمم فيهم..
"نقولك حاجه...اني زي ماتشوفي فيا اغلب وقتي مشغول يعني وقت فضوتك تمشي لحوش بوك تقعدي غادي لين نجيك نروح بيك..ومستعد ع خاطرك نبيع الحوش هدا وناخد حوش في نفس الشارع.. غير خلي عرسنا مع عرس زياد...شن رايك.."
ابتسمت من قلبها وقالت؛كان هكي باهي..
"جديات!!"
سارة بضحكه؛لانبصر..
"تبصري عينك خلاص تم ياعيوني معاش فيها...هيي زهير اللي ينزل للزباين كله اليوم بلاش....ايه ايه بلاش......."
وسارة تسمع فيه وتضحك من قلبها...
▪▪▪▪▪▪
◇وحددنا موعد الفرح..وصار وكان عرس زياد وسارة مع بعض..بصدق فرحت وارتحت هلبه لما شفتهم بيستقروا خلاص..
بس زياد غير رأيه وقرر يسكن معانا وياخد دار عمته...اني ماعجبنيش الموضوع بس واقفت ع مضض ع خاطره هو..
تنهد وقال..ايييه ياهيثم مسرع الوقت زياد وسارة كبروا وبيتزوجوا وبيديروا اسرة وبيولوا اب وام ويعيشوا اللي عشناه ويفهموا علينا كويس اني وامهم رحمة الله بعدين..
▪▪▪▪▪
🍁🍁🍁🍁
بس مازال بال عفاف ماارتاحش..
تبي تتهنى على جهاد...وموضوع جهاد يكاد يكون مستحيل..
لكن هي ع خاطره بتحاول...
••سدينه؛عطيوه ولدي ساد لعب خلاص نوض..
كنعان؛حاضر حناي...سيب الآيباد وناض وطلع من الصالون..
رتاج بإبتسامه؛كلامك اوامر عسكريه ينفد طول..
سدينه ضحكت..
رتاج؛بالله قوليلي معاش حكالك رشيد شي عن مغامرات بوي ومرته الجديده..
سدينه بضحكه؛مورياته النجوم في عز الظهر وبوك نقراز ويدور في الحس..
رتاج بضحكه؛فخار يدقدق بعضه..
سدينه؛قولي استغفر الله يقعد بوك..
رتاج مسحت ع وجهها وقالت:استغفر الله
فجأة..
رن جرس الحوش..
رتاج قلبها فز...
سدينه؛زعمه مني!؟
رتاج قعدت تشبح لأمها ومش قادرة تتكلم..
قلبها قعد يدق بقوة من الخوف..
ناضت سدينه وقفت فم الصالون وهي تشوف للخدامه كيف تفتح في الباب..
:السلام عليكم الحاجه سدينه قاعده..
سدينه دققت بالنظر اكثر في الضيفه المفاجئه...
الخدامه؛ايه موجوده تفضلي بس من نقوللها...
خشت الضيفه وقالت....
"عفاف"
#وشاء_الله
#البطل_المغمور2
....يتبع....
