#البطل_المغمور2 "زهور القمر"
#جمان_فريد
#الجزء_الأخير "البطل المغمور"
قبل لتقروا الجزء اي حد فاتاته صلاة او جي بيقرا في وقت صلاة سيب كل شي وبرا صل وبعدين اقرا...
الصلاة اولا..
وصلوا ع الحبيب💖
💐💐💐💐💐💐💐💐💐💐💐💐💐💐💐💐💐
•••••بعد شهرين ونصف•••••••
"هيا ياتهاني سقدي روحك"
لبست البالطو متاعها وطلعت تجري ..
تهاني:الساكو متاعي في السيارة؟
نسيبه؛ايه ايه توا حطيته بسرعه اطلعي لخوك..
تهاني:هيا هي..ومشت تجري للسيارة..
واصوات الزغاريط تعلت في الشارع...
ركبت السيارة ..
وبدوا يغنولها...
"بري مربوحه يازينه...يلي عمرك ماوجعتينا"
وامها تغني معاهم ودموعها في عيونها وقلبها طاير من الفرح...
طلعت سيارة جهاد من الحوش..
في نفس الوقت اللي طلعت فيه سيارة ماجده وهي رافعه سارة للمزين..
والاصوات وراها تغني..
"بري مربوحه ياحنه...في مكانك بنجيبو كنه"
وخواتها مجرد ماطلعت السيارة قعدوا يبكوا واللي حواليهم قعدوا يهدوا فيهم...
🌼اما العرسان الزوز فكانوا في استراحة الحاج الاشهب مع صحابهم..
وعايشين اجواء حلوة مع بعض بين مقالب وهدرزة ومرات يقعدوا يغنوا في اغاني افراح ويهيجوا عليها...
في وسط زحمة هالفرح..
كان هيثم موجود في البرلمان مع باقي وزراء الحكومه لحضور جلسة مهمه حيتحدد فيها استمرار الحكومه او استقالتها وهدا كان بناءا ع طلب رئيس الحكومه صنع الله المقرحي اول ماتولى مهام رئاسة الحكومه...
•••قدام قاعة انعقاد الجلسات..
صنع الله؛اني عارف ان اشتغلنا هلبه وتعبنا خلال عام فات وكل المؤشرات تبشر بنتايج مرضيه بس في النهايه يقعد لصوت الشعب رأيه في شغلنا مرات يشوفوا ان حني مادرنا شي يذكر وفي غيرنا اجدر بالمهمه هادي..
نوال:برغم اني متأكد ان كل شي حيكون لصالحنا بس اي شي يصير مخالف للتوقعات مش حنعترضوا عليه سيادتك..
هيثم ابتسم وهو يشوفلها..
صنع الله بإبتسامه؛نتمنى نكون هدا رأي الجميع...
وزير الاقتصاد؛هذا شي اتفقنا عليه من البدايه سيادتك ..
وزير العدل؛بالنسبه ليا من اول مااستلمت المنصب واني نقول لنفسي اعتبر روحك في حكومة مؤقته مدتها عام تنقد مجموعه من المهام وتسيب...
صنع الله هز راسه وهو مبتسم بعدين شبح لهيثم وقال؛معالي الوزير بما أنك اكبر الموجودين ماعندك شي تبي تقوله!؟
نوال شبحتله..
رفع حواجبه وقال؛جديات قصدك اني اكبر واحد هني!؟
قعدوا يضحكوا...
صنع الله بضحكه؛بينك وبين وزير الداخليه عام بس..
حك جبهته وقال؛تفاجئت الحق!..
وهما يضحكوا..
ونوال تشوفله بإبتسامه..
هو تنهد بعدين قال؛ماعنديش كلام فوق الكلام اللي انقال..كل اللي يهمني اني خدمت بأمانه وضمير خلال السنه اللي فاتت كلها وحاولت نصلح قد مانقدر..وسوا قعدنا ولااستمرينا مش حنبخلوا باللي عندنا ع البلاد هادي اللي ياما عانت من الجحود والنكران...وين ماكنا حنخدموها بكل اللي نقدروا عليه...
صنع الله بإبتسامة اعجاب؛وتقول ماعندكش كلام فوق اللي انقال..
ضحك هيثم وقال؛يطلع بروحه..
ضحكوا معاه ونوال كانت تشوفله بنظرات المشاعر اللي فيها ماتغيرتش بكل..
"سيادة الرئيس معالي الوزارء الجلسه بتبدا"..
بعد ماسمعوا كلام احد عضوات البرلمان ..
خشوا طول لقاعة انعقاد الجلسه...
وبدت الجلسه وكانت جلسة استجواب..
يطرحوا فيها الرئيس ومجموعه من الاعضاء اسئله ع رئيس الحكومه والوزراء..
بحضور رئيس هيئة نزاهه والشفافيه اللي يتكلم عن الميزانيه في شن مشت وشن دارت فيها الحكومه..
انطرحت اكثر الاسئله ع نوال..وهيثم..ووزير التعليم..
وباقي الوزراء كان من نصيبهم سؤال سؤال لكل واحد منهم..
كانت جلسه جدا هاديه وراقيه وبعيده عن النقاشات الفاضيه والمقاطعات اللي بدون معنى والتشويش...
كل حد خدي حقه في الكلام وحصل ع اللي يبيه من اجابه شافيه وكلهم تعاونوا مع بعض كأعضاء برلمان وحكومه لنجاح هالجلسه..
طبعا كانت منقوله ع الهواء مباشرة ع عيون الشعب اللي كان يتابع فيها بآهتمام بالغ..وتفاؤل كبير...
••بعد ساعتين ونصف...
رئيس البرلمان:نتائج التصويت ع استمرارية الحكومه او اقالتها كانت من كل الاعضاء دون الامتناع...وكل الاعضاء صوتوا لصالح استمرارية الحكومه...
الوزراء كلهم صفقوا من الفرحه اللي منحهم الثقه مرة تانيه..
وعيونهم ع رئيسهم الشاب اللي كانت ابتسامة الفرح باديه ع وجهه وهو يحرك في شفايفه همسا وهو يقول...
"الحمد لله.."
وهالنتيجه اسعدت شعب كامل..اول مرة تمر عليه حكومه عدلت من وضعه المعيشي وخلت نظرته للمستقبل كلها تفائل...
وكبار السن منهم اللي كانوا يتفرجوا ع الجلسه رددوا من قلوبهم...
"الحمد لله اللي عشنا وشفنا هالأيام"
🍁🍁🍁🍁
في باحة البرلمان..
صنع الله؛سامحونا اليوم خديناكم من مناسبه مهمه..
نوال بضحكه؛بالنسبه ليا ماعندي ع شن نخمم عندي على من عابيه..
هيثم بإبتسامه؛واني يعني ماوراي شي بالعكس هكي احسن خير مانشوف بنتي وهي طالعه من الحوش لحوش تاني تكمل فيه حياتها بعيد عني..لولا انها سنة الحياة بس خليتها جنبي عمري كله..
ابتسمت نوال وهي تشوفله..
صنع الله؛فاهم عليك..عندي بنت وحده ورغم انها مازال صغيره بس احيانا نفكر في الحاجه ونقول كيف بنتحملها..
خطر ع نوال بوها اللي باعها وهي في سن صغير وبسببه ضاعوا احلى سنين عمرها...شدت دموعها بقوة وقعدت تسمع لحديث وهي راسمه ع وجهها ابتسامه تصارع في ملامح الحزن...
تنهد هيثم وقال؛في النهايه مانقولوا غير ربي يهنيهم ويسعدهم..هدا كل همنا...
هما الزوز هزوا روسهم موافقه ع كلامه بدون مايتكلموا...
ع جية واحد من حرس صنع الله؛سيادتك فضي المكان من الصحافه..
صنع الله؛كويس...شبحلهم وقال..نستأذنكم..السلام عليكم..
الزوز مع بعض ردوا عليه؛وعليكم السلام..
مشي صنع الله ومعاه المرافق...
هيثم؛نوال..
قلبها دق بقوة وشبحتله طول...
هيثم بدون مايشوفلها؛في عيونك بنتي يانوال نبيك تعامليها كأم نبيك تتحمليها زي ماالأم تتحمل بيها وخليها تجي تحكيلك اي شي يصير معاها ماتقدرش تحكيهولي..لو غلط ولدك فيها انتي رديه..حلي اي مشكله تصير منك ليك..
نوال قعدت تشبحله وهي تسمع فيه وعيونها دمعوا..
هيثم؛في حالة لو وصلت ببنتي جت وشكتلي من شي صدقيني لو ولدك يطلع الروح قدامي مش حيكسب ظفرها مرة تانيه..
تنهدت وابتسمت بجديه وهي تقول؛اطمن ولدي ممكن يحب بنتك زي ماانت تحبها ومش حنقول اكثر بش ماتقولش اني نبالغ..يعامل فيها زي بوها يساير فيها ويداري فيها وحاطها في عيونه ومش متحمل فيها شي..المهم توا انك توصيها عليه هو..
هيثم بإبتسامه ثقه؛بنتي زي امها حتحط ولدك تاج فوق راسها وتريحه ع الآخر وتفكري كلامي..
انوجع قلب نوال لما جت سيرة اسيمه..بلعت ريقها وابتسمت مجامله وقالت:ان شاء الله...
هيثم؛مبارك عليهم الزوز وربي يهنيهم..
نوال:آمين..ومبارك ع زياد حتى هو وربي يهنيه..
هيثم:آمين...لبس نظاراته وقال...السلام عليكم..
ومشي من قدامها..
وهي قعدت معاها بعيونها وقلبها اللي مازال ينبض بحبه المكتوم معدوم منه الأمل...
🍁🍁🍁🍁
الساعه الخامسه والنصف عصرا...
في حوش خالد...
كانت عفاف توتي في روحها بش تمشي للصاله..
لبست بالطوها وطلعت من دارها وفي يدها هاتفها..
اللي جاها منه اتصال..
وقفت وشافت المتصل..
فتحت الخط وردت...
عفاف:ايوه يما..
"يما انقرت الفاتحه"
عفاف بإبتسامة حزن؛مبارك عليك ولدي وربي يهنيكم ويسعدكم يارب..بتروح بيها طول..
"لابعد الحفله الليله"
عفاف:باهي باهي..ان شاء الله بهناكم..
"وبطول عمرك يام ربي يحفظك"
عفاف؛ويحفظك وليدي...
وسكرت..بعدين تنهدت ومشت بإتجاه الباب..
قابلتها نسيبه..
نسيبه؛هيا عمتي خليل في الطريق..
عفاف؛كلمني جهاد وقال انقرت الفاتحه..
نسيبه بإبتسامه اسف؛ايه قالي خليل توا...ربي يهنيهم..
تنهدت عفاف وقالت؛يارب..
ومشت مع كنتها وطلعوا من الحوش ...
لحظات ووصل خليل وركبوا معاه...
خليل:خالد وبدر خليتهم مع عرفه..
نسيبه؛تو يهبلوه..
خليل؛مش لابسه كعب ولا..
نسيبه؛مالا هبلت نلبس كعب واني في حالي هدا..
ضحك خليل...وكمل سواقه وهو يهدرز مع مرته..
لكن امه مش معاهم بكل...
عقلها يفكر في ولدها الصغير وكيف بيكون شكل حياته بعدين بالذات وين تذكر في اليوم مشت تخطبله فيه..
🔺️قبل شهرين ونصف...
"شن ديري جايه انتي كيف خشيتي هني اصلا"
عفاف وهي تحاول الحفاظ ع هدوئها وثباتها؛وحدي الله ياسدينه وصلي ع الرسول..
وصلت فيها سدينه وشدتها من ذراعها وهي تقول بغضب ودموعها ينزلوا؛اطلعي اطلعي ..اطلعي خير ماننبلي فيك..
عفاف وهي تشد في روحها؛مش طالعه قبل لتسمعيني..
طلقتها سدينه وهي تقول بغضب شديد ودموعها سيل؛شن بنسمع منك شن بنسمع...تبي تحكيلي كيف ولدك خدي روح ولدي وحرمني منه...قولي..
نزلوا دموع عفاف وهي تقول؛غير اهدي انتي وصلي ع النبي..
سدينه بصوت عالي غاضب؛اسكتي مانبيش نسمع منك شي تحسابي ولدي رخيص عليا ولادمه عندي ميه..لولا الخوف من ربي حرقتهم كلكم..كيف ماحرقتوا قلبي على ولدي ياعيلة مجرمه..
عفاف معاش تحملت الهدوء والثبات كلهم راحو بالمرة وبصوت اعلى من صوت سدينه غالباته البحه؛مش انتي بس اللي راح ولدك...حتى اني راح ولدي..مات وخلاه وراه عيل كل يوم ينشد فيا عليه...عيل لاجي من بو ولا من ام محروم ومقهور ومازال لما يكبر ويعرف بوه كيف مات الله اعلم شن يصير فيه...ولدي لو قتل ولدك مرة فهو قتل الف مرة باللي داره....ولدك مات وخلا السيرة الطيبه والذكر الباهي لكن اني ولدي مات وخلا السيرة العافنه ولحقوه دعاوي الناس عليه...ولدك ياسدينه مامتش..حي بين الناس اللي تعرفه وتشهدله بالخير..لكن ولدي اني مات مات خلاص..مات ووين مات هلبه ناس قالوا مات وريح...حطي روحك في مكاني وحسي اللي نحس بيه توا..
من اللي نارها اقوى من التانيه ياسدينه اني ولاانتي!؟
رتاج كانت واقفه في باب الصاله تشوفلها وتسمع فيها وتبكي..
وسدينه مازال تشوف لعفاف بنظرات غضب من داخل قلبها وجعها من الكلام اللي سمعاته..
وكملت عفاف تقول بنبرة مرتعشه كلها الم؛اني مش جايه بش نقولك سامحيه...ولاجايه نقولك سامحينا لان حني مالينا ذنب في شي...لااني ولابنتي ولا ولادي...بالذات ولدي الصغير اللي يحب بنتك ورايدها وع خاطرها قعد سنين من غير زواج..
انصدمت سدينه والتفتت لرتاج..
ورتاج منزله عيونها هربا من عيون امها ودموعها ينزلوا..
عفاف:ولدي يبي بنتك من سنين لكن نصيب ماجابهم لبعض من زمان والباين ربي راد توا بس الولد يبيها وشاريها ومستعد ع خاطرها يدير كل شي بش ترضوا تعطوهاله ياسدينه..
وعيون سدينه ع رتاج وهي مش مصدقه اللي تسمع فيه ولامستوعبه ردة فعل بنتها اللي تبين انها راضيه..
عفاف؛لاولدك عاش متهني ولابنتك تريحت في حياتها مرات ربك يبي هناهم مع بعض ياسدينه مرات ربك مش كاتبلهم يعيشوا مرتاحين كان مع بعض..مرات ربك كاتبهم لبعض ياسدينه...
شبحت سدينه لعفاف وقالت؛مستحيل...
ولفت ومشت طول للدروج وركبت فوق..
عفاف شبحت لرتاج بأسف ورتاج تشوفلها بحزن..
تنهدت بألم ولفت ومشت فتحت باب الفيلا وطلعت...
🔺️الوقت الحاضر..
عفاف؛فوت ع المكان اللي حجزنا منه العبمبر..
خليل؛حاضر يام...
🍁🍁🍁🍁
طلعت من دارها...
مشت للدروج ونزلت بخطوات بطيئة بعض شي..
تبي تمشي لبنتها بش تودعها..
لكن متردده...
تنزل وهي تتفكر في اللي صار مع بنتها بعد رفضها لطلب عفاف..
قعدت وقتها كله في العمل وماتروحش الا وهي تعبانه وهالكه وتخش دارها وترقد..
انطفت..وهبت...ومافي شي يرسم ع وجهها الضحكه اخطا ولدها..
صارعت في داخلها شعور الامومه اللي يفرض عليها الانصياع لرغبة بنتها...
وهالصراع خسراته لماجاها ولدها رشيد وتكلم معاها في الموضوع وكان حديث مؤلم للغايه..
🔺️قبل شهر...
رشيد ودموعه في عيونه؛الراجل يام مالاش ذنب بكل في اللي داره خوه ولارتاج ليها ذنب بش تدفع الثمن وتعيش عمرها مكسورة هكي..اول مرة يجي موضوع زواج لرتاج وتكون راغباته...مرتين يام تزوجت وكل تجربه كانت اسوأ من اللي قبلها...الزوز كانوا بعاد عليها من جميع النواحي..
سدينه ببكي:هان عليك دم خوك..
رشيد؛خوي القانون خداله حقه من زمان واللي قتله مات ابشع موته وانحرق قلب امه عليه..يعني يام خلاص خالصه ومنتهيه...اني متأكد لو صارت معجزة وربي رد مجاهد للحياة دقيقه وحده صدقيني مش حيوقف في وجه سعاده رتاج يام..
حطت ايديها ع وجهها وقالت:مانقدرش مانقدرش..
حط يده ع ظهرها وقال؛عارفها صعبه هلبه يام..صعبه عليا حتى اني..بس الحي يبي يام واختي من حقها تعيش حياتها وماتموتش ورا حد...
🔺️الوقت الحاضر..
مسحت دموعها وهي متوجه لدار بنتها..
وين قربت توصل فيها سمعتها تتكلم بالتليفون..
رتاج ودموعها ينزلوا؛عارفتها حترضى لما تشوفني مرتاحه ومتهنيه..
"ماتخليهاش بكل يارتاج"
رتاج؛مستحيل يادانيه لو لزتني الف مرة..وقعدت مقاطعتني..
سدينه وهي تسمع في كلامها دموعها مابطلوش نزول وقلبها ينعصر عصر من الألم...
"ربي يهنيك ويسعدك رتوجه العمر كله"
رتاج بإبتسامه من بين دموعها؛اللهم آمين..سلام دنو..
"وعليك السلام"..
وسكرت رتاج ونزلت التليفون وقعدت تشوفله وهي تتفكر في اخر مرة تكلمت معاها امها فيها...
🔺️قبل شهر...
واقفه هي وياها في دارها...
سدينه بحده؛تبي تتزوجي بري تزوجي مش واقفه في طريقك مانبيش نحمل ذنبك ولاتجي في يوم وتقول امي دارتها..لكن كان تبي تشوفيني تجيني هني اني حوشك مستحيل نخشله..وهو مايخشش حوشي يحطك ويمشي لانبي نشوفه ولانسمع صوته...وكان جبتي منه صغار مش واخدتهم بجريرة حد يقعدوا احفادي زيهم زي عطاالله بالزبط..
رتاج ودموعها في عيونها:يعني انتي راضيه!..
سدينه شبحتلها شويه بعدين غيرت عيونها عنها وهزت راسها ومشت طلعت من حداها...
🔺️الوقت الحاضر..
خدي نفس عميق ومسحت دموعها...
بعدين ناضت بش توتي روحها..
التفتت للباب لقاته مفتوح...
مشتله سكراته...
وامها فهالوقت مقعمزة في الصالون تبكي...
🍁🍁🍁🍁
الساعه الثامنه مساءا..
خش بسيارته للصاله داخل..
ودرس بيها قدام الدروج متاعها..
مريم:حي فيها دروج فيها!؟
اسيد:وين المشكله قلبي عادي..وفتح الباب ونزل..
وهي تبع في عيونها وتقول:هدا شن يبي يدير!
وصل فيها وفتح الباب وقال:انزلي My moon
مريم؛لالا اسيد من غير عار رانا في ليبيا حبيبي عيب..
خداها من يدها ونزلها وهو يقول:غير انزلي بس..
ونزلها وهي تقول:اسيد عيب مايجيش وقعدت تفنص فيه..
واسيد مش معدل عليها...سكر باب السيارة..
بعدين رفعها في حضنه..
مريم؛حي ع العار حي..وغطت وجهها بيدها..
وهو يضحك عليها ويقول:ختشه..
وركب بيها الدروج..
ع فتحة الباب متاع القاعه..طلعت امه وين شافاته ضحكت..
نزلها وين وصل فوق وهو يقول:هي بري خشي..
مريم بإحراج:عليك عار.
اسيد:عار شني ياهبله.
نوال بضحكه:في ليبيا راك..
اسيد:ليبيا ولا بريطانيا هادي مرتي وحامل مش حنخليها تركب دروج وتتعب بش نرضي الناس..
نوال بضحكه:هدا مادايرلك يامريم غادي..
مريم :حاله يحرج فيا هلبه..والله مرة في المستشفى..
اسيد بضحكه:لكن انقلبت كلها تصفيق..
ضحكت مريم..
اسيد؛مرتي يعني وهدا الطبيعي قصدي علاش اسمي راجلها كان بنخليها تتعب وتتبهدل..
مريم شبحتله وهي مبتسمه بحب..
ونوال بإبتسامه قالت:هي تعالي بنتي خشي ..
خشت مريم..
واسيد قال:نونو ردي بالك عليها..
نوال؛في عيوني ماتخافش..سلام توا.. وسكرت الباب..
وهو لف ونزل ومشي ركب سيارته وتحرك برا الصاله...
🍁🍁🍁🍁
وفي صالة تانيه..
كانت فيها الحفله مشتركه...
حفلة سارة وتهاني...
المعازيم معبيين كل طاولاتها...
واناشيد الافراح الجميله شغاله...وكلهم في انتظار دخول العرايس...
واخيرا جت اللحظه المنتظره...
وخشوا العرايس الزوز مع بعض..
وايديهم في ايدين بعض...
كانوا اجمل عرايس بطلتهم المبهره المحتشمه..والابيض زايدهم جمال ع جمالهم...
يدرجوا الزوز ع كلمات الزفه..
وعيون عفاف ونسيبه وماجده والتوأم معاهم بنظرات كلها حب وفرح وقلق..
ماجده؛ياواقي عليهم من العين..وقيهم واحرسهم ياربي..
عفاف:آمين يارب الله يبارك عليهم ...
وهما الزوز يدرجوا والمصورة قدامهم تصور فيديو...
ريحان؛سارة زي الملكه طالعه..
جنان؛ايه تهبل حبيبتي الله يبارك..قولي الله يبارك..
ريحان بضحكه؛الله يبارك..
ووصلوا العرايس في الكوشه وقعمزوا..
وماجده وعفاف يساووا في فستاينهم البيضا بياض الثلج..
ماجده:الله وحد الله وحد..الله يبارك على بنيتنا وكنتنا..
سارة؛تسلمي خويله..
تهاني:تسلمي..
عفاف:مستريحات هكي..
تهاني:ايه..
سارة:قيمولي الطرحه شويه بس..
ماجده؛هيا هي...
ومشت تساويلها في الطرحه ....
ماجده؛هكي باهي..
هزت سارة راسها وقالت؛تمام...
ع جية نوسه رفعت صوابعها الابهام الزوز وهي تأشر عليهم قالت؛مزز ..
ضحكوا الزوز..
سارة بإبتسامه؛حتى انتي طالعه تهبلي عميمه..
نسيبه بضحكه؛سلمها ياربي..
جو التوأم ومعاهم المصورة بش ياخدوا الصور..
ريحان:هيا جي دور الصور هيا...
عفاف بضحكه؛هيا..
ووقفوا كلهم حدا العرايس وبدت المصورة تصور...
وبعد التصوير..
بدوا اصحاب العرايس يجوهم يهنوا...
وابرز المعازيم كانت...
فاطمه؛اللهم لك الحمد شفناك عروس واخيرا..
ضحكت سارة..
فاطمه بإبتسامه؛الله يباركلكم يارب ويرزقكم الذريه الصالحه..
سارة وتهاني:آمين..
فاطمه؛ماقدرتش تحضر دانيه؟
سارة؛ايه ماتقدرش تسافر في الطيار خلاص خشت شهرها..
فاطمه؛ع خير ان شاء الله..
الزوز قالوا؛ان شاء الله...
🌼ومشت اجواء الحفله احلى ماتكون اجواء الفرح..
وعدت ساعاتها...وجي وقت مرواح العرايس...
بس قبل ليروح بيهم عرسانهم...
••هيثم:تعامل مع بنت الناس بلطف واحترام احتويها وماتجرحهاش بالكلام..
زياد؛ليك من امس توصي فيا بنفس الكلام في حد قايلك حاجه!
هيثم:من غير قول والله ولدي ونعرفك ..
زياد:ظالمني هلبه..
رفع حواجبه وقال:ايه هلبه..!
قعد يضحك ...
شويه جي فاتح وقال؛طلع مرتك انت قبل ..
زياد؛تمام..
ومشي وهو متحمس ..
هيثم وهو يشبحله؛يستر الله وخلاص..
ضحك فاتح..
شبحله هيثم وقال:فاتح مافيش داعي نوصيك ولا..
ابتسم فاتح وقال؛في عيوني ياعمي الله في عيوني ماتخاف عليها بكل..
طبطب هيثم ع كتف فاتح وهز راسه من غير مايتكلم...
🌼وطلع زياد بتهاني بدون مايخش للقاعه داخل ..
وركبها السيارة وتحرك طول بيها للفندق اللي حجزوا فيه يومين..
وبعده فاتح طلع سارة وكذلك بدون مايخش للقاعه داخل...
وتحرك بيها لحوشهم...
وعيون بوها مع السيارة اللي رافتعها وقلبه يبكي لفراقها اللي مش متعود عليه...
وبروحه روح بالتوأم..
وكانوا طول الطريق يحكوله ع الحفله واهم المواقف اللي صارت فيها..
هيثم بضحكه؛باهي توا فكرتوا في قرايتكم ليكم اسبوع هاملين..
جنان؛بما انه مافي شي غدوة يومي كله قرايه..
هيثم؛وانتي انسه ريحان!؟
ريحان بضحكه؛حتى اني زيها بابا اطمن..
هيثم؛راك تنسي هادي اخر سنه تلعبي فيها كورة .
ريحان؛بعد جبنا البطوله خلاص شبعت منها كورة السله..
ابتسم وقعد ساكت..
وهما الزوز كملوا الطريق وماسكتوش بكل عن الهدرزة...
🍁🍁🍁🍁🍁
"هي هادي بس"
رتاج؛ايه مش رافعه غيرها...
رشيد رفع الشنطه ومشي طلع....
كنعان؛امتى تجي تاني ماما..
قعمزت ع روس صباعها قدامه وقالت؛بعد اسبوع ان شاء الله انت تجيني واني نجيك..
هز راسه وهو ساكت..متعود ع بعد امه من زمان مش جديد عليه..
هي ضماته وباساته...بعدين وقفت ع حيلها وهي تشبح للصالون وتراجي امها تجيها وتودعها
بس للأسف مش باين انها حتقدر تودعها...
رتاج؛مع السلامه ماما..
كنعان؛مع السلامه..
ولفت ومشت طلعت بسرعه...
وسكرت وراها الباب..
وقفت وخدت نفس عميق...بعدين مشت بإتجاه الباب..
وهي ماشيه..جت بين عيونها هديكا الليله اللي جت بتهرب فيها معاه..
فرق كبير بين امس واليوم كبير هلبه..
زي الفرق بين الذنب والحسنه...وبين الحلال والحرام..
قبل لتوصل في الباب خش رشيد..
هي قعدت تشبحله وهو يشوفلها..
بعدين قدمتله وضماته وهو حضنها وباس راسها وقال؛ربي يسعدك..
بعدت عنه وقالت؛عيونك ع امي ماتغفلش عنها..
رشيد:من غير ماتوصي..
تنهدت وقالت؛السلام عليكم..
رشيد؛وعليك السلام..في امان الله..
ومشي مع اخته طلعها...
وصلها لسيارة راجلها وفتحلها الباب...
وهي ركبت...
رشيد؛تصبحوا ع خير..
الزوز ردوا عليه وقالوا؛قدامك كل خير..
وتحرك جهاد..
ورشيد قعد مع السيارة بعيونه وقلبه موجوع ع اخته..
بعدين تنهد وخش للفيلا...
••في الطريق..
رتاج ماقدرتش تتمالك نفسها قعدت تبكي..
هو خدي يدها وشدها وقال:ماتبكيش مانحبش بكي النساوين بالذات انتي..
هدت شويه وقالت؛حاسه قلبي مغموم طلعت وامي مابتش تسلم عليا..
شد ع يدها وقال؛صدقيني كله يتصلح مع الوقت وين تشوفك كيف عايشه بعدين تفرحلك وتولي معاك احسن من قبل..
رتاج؛يارب..
جهاد؛هي اشش..
شبحتله..
غمزلها وقالت؛نحبك..
ضحكت من بين دموعها وشدت يده بإيديها الزوز..
جهاد:معاش نبي من ربي كان الجنه توا خلاص..
رتاج؛واني معاك فيها..
ضحك وقال؛مالاشنو ولامية حوريه يغنوني عنك..ماصدقنا حصلناك رانا..
قعدت تضحك..
ابتسم وقال؛وحق من خلقني وحق من خلقني يارتاج لما نعوضك ع كل شي يارتاج كل شي..وربي..
ابتسمت وهي تشوفله بحب..
جهاد شبحلها شويه بعدين شبح القدام وقال؛عليك عيون عيونك هادوا اللي جابوا اجلي...
رتاج ابتسمت بخجل وقعدت ساكته...
وهو كملها غزل داسه سنين وسنين واليوم قرر يطلعه كله ومايدس شي...
وكانت ليلة سعيده وكلها بركه وحب..
ع قلوب انعقدت ببعضها بمباركه رضا الله...
بعد صبر..ومجاهده...ومعاناه...واللي يصبر ينول اضعاف صبره..
هدا عوض الله مالاش حد ولازيي...
🍁🍁🍁🍁
شرب ميه من الكوجينه بعدين طلع وهو يقول؛بابا ياسركم هدرزة هي نوضوا ارقدوا..
الزوز مع بعض قالوا:حاضر بابا..
هو مشي لداره وخشلها...حول جاكيتها وحطه ع السرير..
بعدين حول الساعه وحطها في الدرج وسكر عليها..
بعدها مشي للدولاب طلع حوايجه وبيمشي للحمام..
هيثم؛خل نحول السير هني..
حول سير السروال وحطه السرير...شبح ليده مالقاش الساعه قال:وين حولتها..!؟ ع المدخل تقريبا..
حط حوايجه ومشي طلع وتوجه للمدخل وهو يقول؛مش قلنا نوضوا ارقدوا..
ناضوا الزوز وهما يقولوا:هيا هي...وطلعوا من الصاله..
جنان شافتله لقاته يدور:ع شن دور بابا؟
هيثم؛ع ساعتي بابا نحساب روحي رميتها هني..
جنان؛لالا انت مشيت للدار وهي في يدك..
التفت وشبحلها وقال؛متأكده..
ريحان؛ايه بابا حتى اني شفتها..
قعد يفكر ويحاول يذكر وين حطها مااذكر شي..
مشي طول للدار وهما الزوز يشبحوله..
بعدين ريحان مشت للدار...
اما جنان قعدت واقفه في مكانها وتفكر.
وهيثم في الدار يدور ع الساعه لين لقاها في الدرج وقال بإستغراب؛شن جابها هني!؟ معقوله رميتها وحطيتها هني وناسي!..
قعد يفكر شويه...بعدين التفت وشبح لحوايجه..ومشي خداهم وتوجه للحمام...
🍀🍀🍀🍀
ومرت الايام..
والعرسان في شهر العسل عايشين احلا ايامهم..
منهم اللي عايشها كلها عسل في عسل...
زي فاتح وسارة...وجهاد ورتاج...
وفي اللي يوم عسل ويوم بصل..
زي زياد وتهاني...
ومع هدا زي مانقولوا ماشيه الامور...
••لبس جاكيته وقال؛اتصلت سارة؟
جنان وهي ترتب في الكوجينه؛ايه بابا اتصلت وهي تقدر ماتتصلش..
ضحك وقال؛شن تخبر..
جنان؛شي زي قبل متصله تسأل وخلاص..
هيثم هز راسه بعدين قال؛شن بديري العشي..
جنان؛مش عارفه مازال ماقررتش..
هيثم؛اشوي صدور دجاج عندي نيه فيهم..
جنان:من عيوني..
هيثم بإبتسامه؛يسلموا...وحط ايديه في جيوبه بيطلع المفتاح مالقاشي وقال؛نسيته في الدار شكلي..
ومشي للدار وجنان مشت طلعت الدجاج وصبت عليه ميه..
شويه ولى بيطلع وقال؛بابا اني طالع ولما نروح نجيب عشي من برا تمام..
التفت جنان وشبحتله وقالت؛كيف غيرت رايك معاش تبي دجاج مشوي!؟
هو قعد يشبحلها بدون مايتكلم وحواجبه مرفوعات بعدين نزلهم وابتسم وقال:ايه غيرت رايي تو نجيب من برا..
هي بالغصب ابتسمت بدون ماتقول شي..
وهو هز راسه ومشي طلع من الحوش..
وجنان تشبح لمكانه بنظرات شاخصه..
ودموعها طول طاحوا..
#البطل_المغمور
#البطل_المغمور2
....يتبع في القسم الاخر وهو النهايه ان شاء الله......
