#البطل_المغمور2 "زهور القمر"
#جمان_فريد
#الجزء_الأربعون "نهاية العام"
رمضانكم مبارك
عَنْ أَبِي ذَرٍّ، قَالَ: قَالَ لِيَ النَّبِيُّ صَلَّى اللهُ عَلَيْهِ وَسَلَّمَ: ( لَا تَحْقِرَنَّ مِنَ الْمَعْرُوفِ شَيْئًا، وَلَوْ أَنْ تَلْقَى أَخَاكَ بِوَجْهٍ طَلْقٍ) رواه مسلم
💐💐💐💐💐💐💐💐💐💐💐💐💐💐💐💐
"اشبح منين زرقت الشمس اليوم!؟"
اسيد؛مش فايق للسانك...اي حقه مبروك شن جو الزواج..
فاتح؛لاياشيخ درت حتى صغار اللي جاي تبارك توا..
اسيد بصدمه:كيف!!؟قصدك هدا علاش انت!
فاتح خدي مخده وحدفها عليه وهو يقول:تي لاياتافه...نتسهوك عليك اللي جاي تبارك توا ليا قريب شهر لتوا قاري فاتحه..
اسيد بضحكه؛كنت لاهي نصفي في شغلي غادي..
عقد حواجبه وقال:معاش بتولي قصدك!؟
اسيد؛مؤقتا..
فاتح؛اها معناها في عندك موال فلوس بتغنيه هني..
ابتسم ع جنب وحرك راسه بالنفي..
فاتح بإستغراب؛كان ماجابوكش الفلوس شن جابك!؟
اسيد بمزح؛جاي نتزوز..
فاتح؛تي غير قول راجل شن في!؟
اسيد بضحكه؛والله ندوي جديات..
فاتح رفع حواجبه وقال؛بتتزوج!؟..انت!!؟
اسيد:خيرني شن ناقصني بش مانتزوجش!؟
فاتح؛اها توا فهمت..موضوع الزواج هدا نفسه فيه فلوس..
ع جية نوال بسفرة القهوة ومعاها نوارة بالحلو..
نوارة:ده النهاره عيد ياحبيبي انا مبسوطه قوي..
اسيد:ديما مبسوطه امي نوارة ..
نوال وهي تمدله في القهوة؛بس مستغربه راهو حاسه في سبب قوي خلاك تروح..
فاتح:قال جاي يتزوج..
وتطلقها نوارة زغروده..
ونوال تشبحله وهي متفاجئه..وهو يضحك..
حطت نوال السفرة ع الطاوله وقالت:كان حق فيها ان..
اسيد؛معالي الوزيرة جايك بش تعاوني..
نوارة؛مالك ياهانم زغرطي في عبك من قال اسيد يقول ياجواز...
ضحكوا..
واسيد قال؛مقطوع الامل مني لهالدرجه!؟
فاتح؛واكثر..
نوال؛اشبحلي هني..من هي هادي اكيد وحده اجنبيه اصلا متوقعاتك دير مادار نوفل..
اسيد؛لا والله ليبيه ومن قعرها يخي..
نوال بإستغراب؛من هي هادي وين شفتها وكيف عرفتها!؟
اسيد؛عن طريقك انتي عرفتها في بريطانيا..
نوال مافكرتش هلبه بش عرفت من يقصد..مريم مافيش غيرها..
اتفاجئت هلبه...
اسيد؛توقعتك تفرحي!؟
فاتح؛من هي!؟
اسيد؛وحده من البنات اللي قرتهم ع حسابها برا..
نوال؛مكلمها انت..
اسيد حرك راسه بالنفي وقال؛ماعطتنيش فرصه..
وشرب من القهوة..
نوال هزت راسها وقالت؛بعدين نحكوا في الموضوع...
اسيد قعد يشبحلها وهو يشرب..
ونوارة تمرر في نظرها عليهم..
اما فاتح وقف وقال؛مالا اسمحولي بنطلع عندي ماندير..اوينا..
ومشي..
ونوال تقول:في حفظ الله...
طلع فاتح بعدين نوارة قالت؛اروح اعملك عشا من كل شي بتحبه..
اسيد؛عطيك الصحه قلبي..
نوارة؛تسلملي ياحبيبي..
مشت نوارة وهو يلحق فيها بين عيونه لين درقت بعدين شبح لأمه وقال؛حسيتك زي اللي ماعجبكش..
نوال حكت حاجبها وقالت ؛مش هكي بس الموضوع يعني فاجئني وخايفه ماتكونش واخده بجديه...يعني البنت عصت عليك وتبي تجيبها للطريق وتفوت معاها يومين بعدين تفوتها..
اسيد ضحك بعدين حط الفنجان ع الطاوله وقال؛شيباني وليت يانونو كانك مش ملاحظه جو اللعب هدا كبرت عليه..
نوال؛يعني انت تبيها بجديات!؟
اسيد هز راسه بإيجاب..
نوال:خلاص حاول معاها انت واتعب عليها مش ديما بنقعد نسهلك امورك...
اسيد شبحلها شويه بعدين قال؛تمام...تمام..
هي رشفت من القهوة وقعدت ساكته..
وهو قعد يشبح في الفراغ وهو يفكر بعدين قالت:امتى تشدي الوزارة..
نوال:نهايه العام قبل رمضان..
🍀🍀🍀🍀
وتمر الايام...ونهاية هالعام تقرب..
وعرس دانيه معاه يقرب....
وسارة معاها في كل شي اول بأول...
🍁من جهة تانيه..
كانت تهاني مع زياد عايشه جولات الكر والفر...
لين في يوم...
••في المستشفى...
جنان؛حلوة الباقه..
زياد؛لولا نقك ماخديتها..
جنان بضحكه؛تصخف فيا وين نشوف كيف تشبح لسارة وصاحبتها وشن يديروا معاهم رجالتهم وانت بكل مادير في شي حي عليك بعدين تكرهك..
زياد وكأنه خاف من كلامها بس قال مكابرة؛المواضيع هادي اكبر منك معاش تدوي فيها...شدت جنان ضحكتها وسكتت..
ع جية دكتورة..
زياد:دكتورة بشرى هادي جنان..
:اهلا جنونه..
جنان؛اهلابيك..
؛هي تعالي معاي..
زياد؛وصليها لمكتب بعدين.
:حاضر دكتور..هي تفضلي حبيبتي..
ومشت جنان مع الدكتورة..
وزياد مشي يدور ع تهاني..
لين لقاها في واحد من الممرات...
واقفه تشوف لتليفونها لاهيه بيه..
وهو جاييها من بعيد حاط يده ورا ظهره وقف عليها وقال:شن ديري هني..
شبحتله وقالت؛خديت استراحه تعبت..
زياد:مافيش مكان تاخدي فيه استراحتك الا هني قدام الماشي والجاي!؟
تهاني برجاء :ارجوك زياد ماتبداش والله ماعندي حيل للنقاش والعراكات..
هو شبحلها ع جنب برفعة حاجب وقال:تمام..لكن هادي اخرمرة نلقاك فيها واقفه هني..
تهاني بملل؛حاضر..
هو ابتسم ع جنب وطلع من وراه باقة ورد حلوة ومدهالها..
هي من قوة المفاجأة قعدت تشبحلها بصدمه..وقالت..
تهاني بصدمة:شن هادي!!؟
زياد شبح للباقه وقال:ربطة جرجير..ورد ورد معاش تعرفي الورد توا؟!
تهاني:لانعرفه نحسابك انت ماتعرفاش..
رفع حواجبه وقال:بالله!
تهاني وهي شاده ضحكتها قالت:جديات..
هو رجع شاف للباقه بعدين هز راسه والتفت شاف للجيهتين متاع الممر وتهاني تشبحله بإستغراب..
ركز ايساره شاف ممرضه جايه...
لما وصلت فيهم وقفها وقال:سميه..
وقفت وشبحتله:تفضل دكتور..
هو ابتسم وجاها مدلها الباقه وقال:تفضلي..
تهاني فتحت عيونها ع وسعهم بصدمه..
الممرضه بصدمه اشرت ع نفسها وهي مش مصدقه..
زياد:شكر وعرفان مني لجهودك وتفانيك في الخدمه..
اكتسي وجه الممرضة باللون الأحمر وقالت بضحكه فرح؛شكرا شكرا هلبه دكتور..خدت منه الباقه وقالت..شكرا كلك ذوق...
زياد بإبتسامة:العفو..شوفي شغلك..
الممرضه بإبتسامه فرح:حاضر..
ومشت وهي فرحانه بطير بالباقه..
وزياد التفت لتهاني وشبحلها بربع عين وقال:وانتي زيدي ادلعي..
ولف ومشي ..
وهي واقفه جامده في مكانها وعيونها قريب يطلعوا من الصدمه..
وهو ماشي التفت وقف واشرلها بيده تمشي..
هي غمضت عيونها بغضب وفتحتهم ولفت ومشت بعصبيه تقول:بيجلطني بيشلني..
وهو يشوفلها كيف تمشي ضحك ولف ومشي..
🍁🍁🍁🍁
وفي قسم الاورام الخاص بالاطفال..
كان جنان في وحده من الغرف اللي فيها المرضى..
كانت جايبه معاها العاب...فرقت عليهم واحد واحد..
بعدين وقفت ع ولد العيله المحتاجه اللي ساعدتهم..
جنان؛ياوخيتي محلاه الضحكه ومحلاك انت..
:كلهم متاعي..
جنان،ايه كلهم متاعك انت..
؛باهي نبي دراجه..
جنان؛ان شاء الله لما تروح للحوش تلقاها قدامك..
؛باهي امتى نروح..
جنان؛لما تصح..خليك قوي باهي وادعي يارب نصح ونروح..
:يارب نصح ونروح ونلقى الدارجه..
جنان بإبتسامه وعيونها مليانات دموع؛يارب..
وقعدت تلعب معاه شويه لين تمت وقتها زيارتها..
وهي ماشيه بتطلع الدكتورة قالت؛هداكا هو رجل الاعمال اللي متكفل بعلاج هلبه مرضى في القسم هدا...
شبحتله جنان...
كان واقف ع واحد من اولياء امور المرضى يكلم فيهم...
تفاجئت وين شافاته..كان شاب صغير في العمر..
وفي نفس الوقت فرحت لأن في من يساعد في الصغار اللي ابتلاهم الله بهالمرض وماعندهمش قدر لدفع تكاليف العلاج..
جنان بإبتسامه؛ربي يبارك فيه..
🍁🍁🍁🍁🍁
"شن رايك رتاج"
رتاج:واو واو تحفه...
كانت سارة توري في رتاج فستان حتلبسه يوم حفلة دانيه
محتشم وتفصيله حلو...لونه بني لماع..
دانيه ؛خداته من محل الحسناء.
رتاج؛اها هداكا حلو وحاجاتهم كلها حلوة ومحترمه..
سارة:شريت لريحان وجنان منه وين لقيت عندهم مايناسب عمرهم..
رتاج؛حلو..ايه بش تجيبهم يوم تغليف البتات..
سارة بإبتسامه؛ان شاء الله...
🍀🍀🍀🍀
وجي يوم تغليف البتات...
ومشوا ريحان وجنان مع سارة لحوش سدينه..
وتعرفوا عليهم رتاج وسدينه تاني بعد ماكبروا..
سدينه؛الله يبارك الله يبارك..فيهم حاجه من امهم الله يرحمها..
كلهم قالوا؛الله يرحمها..
والتوأم فرحوا بتشبيهم لأمهم..
دانيه بتوتر:هيا بالله عليكم هيا معاش في وقت راهو..
رتاج؛الله يسامحه نسيبنا حشرنا حشر..
سدينه:لا كله الاالشايبي مانبي من يطق فيه بكلمه..
دانيه بضحكه؛سلم نسيبته ياربي..
رتاج؛وعبدالحميد يام!
سدينه بضحكه؛ربي يحفظه حتى هو راجل مقوم...لكن الشايبي راجل دنيوه حتى هو..
رتاج؛ناري عليك يارتاج..
قعدوا يضحكوا...
وهما داخل يضحكوا..
ومجيد برا مش مهني روحه...
عيونه يلحقوا في الخدامه اللي كانت ضم في الجنان...
مجيد؛تي شن هاللويزة هادي... مش حرام وحده زيها يديروها خدامه لعزوز النحس...
الخدامه كلمت خدمتها وجت بتخش داخل..
ناداها مجيد وقال؛ترا تعالى ياهوه..
الخدامه شبحتله شويه بعدين مشتله وقالت؛نعم..
مجيد:متزوجه انتي؟!
الخدامه شبحتله من فوق لتحت وقالت؛ايه متزوجه..
مجيد؛عليك حظ..
هي خافت وهربت منه وخشت داخل..
مجيد؛ماعندكش حظ في الحاجه الباهيه يامجيد بكل...
وحرك كرسيه وخش بيه للملحق...
🍁🍁🍁🍁🍁
في المستشفى...
كانت مريم خاشه وهي مبتسمه بشوق للمكان اللي قضت فيه ايام حلوة..
تلاقت هي وناس تعرفهم وكان لقاء حميمي سألوا فيه عن احوال بعض وشن دارت فيهم هالسنين...
بعدين تلاقت هي وتهاني..
••تهاني بإبتسامه؛قداش ليك وحشة يامريومه وقداش انشغلت عليك انقطعت اخبارك بالمرة ومعاش عرفت عليك شي وبعدين سمعت انك سافرتي..
مريم يإبتسامه؛ايه ليا لتوا في بريطانيا تلاته سنين..
تهاني؛بعد تزوجتي سافرتي..
مريم بأسف؛لاالزواج ماصارش منه..
سكتت تهاني وهي تشوفلها مابتش تسألها علاش وتحرجها...
ابتسمت وقالت؛كملتي تخصص؟.
مريم؛مازال سنه بس..
تهاني؛شن جو القرايه غادي؟
مريم؛تختلف اختلاف جدري عن هني..صح هني الوضع تحسن شويه بس مايتقارنش بغادي بكل..
تهاني:اكيد لكن ان شاء الله يزيد يتحسن الوضع بعد يمسك عمي هيثم الوزارة..
مريم؛فرحت هلبه وين سمعت الخبر هدا عرفاته حيعطي هلبه ويغير هلبه حاجات...
تهاني :بإذن الله....
تنهدت مريم وقالت:ايه شن تخبرينا....
🍁🍁🍁🍁
واقفه ع بتات دانيه بعد ماغلفوه وقعدوا يزغردوا..
ودانيه عايشه قمة الفرح...
بدوا يغنولها وهي تسمع فيهم وتصفق معاهم والفرحه مش سايعتها...
وامها تشوفلها بإبتسامه حب ومتمنيه من الله انه يكمل ع خير ويديم سعادتها ويهنيها....
🌼سارة؛خلاص الاسبوع الجاي دنون..
دانيه؛ياريت لو فيها كيف تجوا تباتوا عندنا..
سارة؛ياريت والله بس وعد نجيك من الصبح ونقعد لليل.
دانيه بإبتسامه؛حتى هكي باهي...
جنان؛ربي يكمل ع خير..
دانيه؛تسلمي حبوبه..
ريحان:مبارك عليك..
دانيه؛الله يبارك فيك ريحونه...
ومشت سقدتهم..
طلعوا من الحوش وركبوا السيارة وهما في السيارة..
سارة؛استغفر الله...كيسة الكندرة نسيتها...بالله جنونه انزلي جيبيها...
جنان؛حاضر..
نزلت جنان ووقفت قدام الباب ورنت ع الجرس..
فتحلها الحارس وخلاها تخش...
••داخل الحوش..
كان رشيد طالع من داره بعد ماجهز نفسه متوجه للجامعه اللي دايرين فيها دورة تخص التنميه البشريه هو واحد من اللي حيحاضروا فيها...
وهو ماشي شاف دانيه نازله تجري من فوق...
رشيد بإستغراب؛خيرك..
دانيه مشت للباب بش تفتحه وهي تقول؛شويه بس..
وصلت فيه فتحاته...
هو لما شاف من في ورا الباب تفاجئ..
دانيه بضحكه؛اهيا..
جنان بإبتسامه؛ سامحينا تعبناك..
دانيه؛ تعب شني اني اللي تعبتكم.
جنان؛لا بالعكس والله مافيش تعب بكل..
دانيه بإبتسامه:حبيبتي ربي يحفظك..
خدت جنان الكيسه وقالت؛السلام عليكم..
دانيه :وعليكم السلام..
مشت جنان...ودانيه واقفه في الباب تشوفلها..
رشيد؛لوسمحتي ياااختي..
التفتت دانيه وقالت بضحكه؛سمحت يااختي..
وسعتله..وهو ضحك نص ضحكه وطلع...
وهي خشت وسكرت الباب..
وهو مشي للملحق يشوف بوه قبل مايطلع وعقله مشغول..
🍁🍁🍁🍁
"ان شاء الله نولي مرة تانيه"
تهاني؛ياريت مريومه هدرزتك ماينملش منها...
مريم بإبتسامه؛تسلمي عسولتي...
ابتسمت تهاني..
وهما ماشيات فجأة..
شافت مريم شخص صدمتها شوفته واقف يستنى..
مريم؛شن جابه هدا!؟
تهاني شبحتلها بتساؤل بعدين شبحتله..
هو بإبتسامه واثقه قدملها وقال؛حمد لله ع السلامه....
تهاني بعدت وخدت مكان وقعدت تشبحلهم..
مريم:من الاخير انت شن تبي!؟
اسيد بضحكه؛لو عطتيني فرصه من وحني غادي كنتي عرفتي شن نبي..
مريم شبحت حواليها بعدين شبحتله وقالت؛خل نطلعوا برا..
اسيد؛ok
ومشوا مع بعض طلعوا من المستشفى..
وتهاني واقفه تشبحلهم..
"شن ديري هني"
انتفضت من الفجعه بعدين شبحتله بحده ومشت وخلاته...
زياد؛وين ماشيه نكلم فيك...ولحقها...
🍁برا
وقفوا في مكان ومريم بدت تتكلم بدون توقف..
مريم:شن ماكان اللي في بالك مش حتوصله لهذا ارجوك خليني في حالي ماتجبرنيش ندير شي لايعجبني ولايعجبك..
اسيد:Sorry..بس اني يعني نيتي صافيه ومش قاصد حاجه غلط اني نبي الزواج يعني مش حاجه غلط..
مريم وعيونها معبيات دموع؛هذا بالذات لا..
اسيد؛علاش!؟ قصدي انتي واخده عني فكره غلط اوفي شي في بالك عني مش مزبوط انتي اسألي واني نوضحلك..
مريم خدت نفس وبعدين قالت؛اني مانصلحش بيك..
اسيد؛اني شايف انك تصلحي بيا...
مريم:اني كنت متزوجه قبل مرتين..
اسيد؛وين المشكله عادي يعني..هي تجارب مانجحتش وخلاص..
مريم بحده؛لا مش خلاص...التجارب هادي تعتبني نفسيا وخلتني نكره الزواج..
اسيد بضحكه:غلط طبعا..هو الزواج يقولوا عليه حلو في المر ويعتمد ع الحظ وكل حد حظه..فممكن انتي ارتبطتي قبل بالأشخاص اللي ماعندهمش حظ..اما اللي قدامك انسان محظوظ جدا...وابتسم ابتسامه واثقه..
مريم تبي طفشه بأي طريقه؛اني مش محظوظه ومانجيبش في الحظ وجنجيبلك النحس فوتني خير..
اسيد؛ومرات اني نجيبلك الحظ وينفك عليك النحس وتولي محظوظه!
مريم من داخلها كانت مستلطفاته بس الحاجز اللي انبني بينها وبين الارتباط خلاها تتجاهل هالشعور..
هي من قبل اعجبت بضرار وانغرت بيه وغدر بيها..
وحبت جهاد وتمنت تكمل عمرها معاه وتخلى عنها..
وارتاحت لداوود وتمنت يكون هو العوض متاعها زاد كسرها وخلاها...
هدا كله كفيل يخليها تغض الطرف عن اي شي ليه علاقه بالارتباط نهائيا..
مريم بهدوء ورجاء؛اسمعني...صدقني اني والله ماننفع بيك مش حترتاح معاي بكل خليني في حالي من اولها معاش نتحمل اني خلاص...
اسيد بضحكه ؛شوفي انتي هكي تخليني نزيد اصرار...مريم اني واحد ماعرفش يحب في حياته نهائي حتى نفسه وتربيت في بيئة ماعرفتش نحب فيها ولاعرفت شن هو الحب من اصله تمام..بس انتي فيك حاجه جذبتني زي ال magnet انتي atrractive بشكل مش طبيعي...واني لصقت فيك معاش تقدري تبعديني مع الاسف...
مريم غيرت عيونها عنه وابتسمت بيأس..
اسيد بإبتسامه؛وباش نثبتلك اني صادق حنمشي لحوش اهلك طبعا امي حتمشي هي الاولى بعدين يعني اني ولانمشي معااها عادي!؟شوفي اني شبه عايش برا والبلاد نجيها زيارات بس ونسيت هلبه حاجات تمام..اوكي يعني نمشي اني وامي!؟
هي ضحكت بعدين شبحتله وقالت؛ماننفعش بيك صدقني ماننفعش بكل اني مش زي ماتشوف فيا راهو مش ملك منزه نازل من السمي..مايغركش لبسي ومنظري مايغرك شي شفته فيا توا في الحاضر متاعي لانك لو خديتني حتاخدني بكل شي فيا وليا ماضي وحاضر ومستقبل..ومرات الماضي متاعي مايخليش في بينا مستقبل...وختمت كلامها بإبتسامة الم...
ومشت بسرعه وخلاته يفكر في كلامها وهو مستغرب شن شكل الماضي اللي حيكون لإنسانه زيها تبان في عيونه نقطه بيضا وسط عالم مليان سواد هو عاش فيه!..
وهي هكي بدل ماتخليه يوخر...خلاته يتمسك اكثر بيها ويصر عليها...
🍁🍁🍁🍁
"مانعرفش"
اسيد؛لاتعرفي واضح من قلة حماسك للموضوع..
نوال قعدت ساكته..
اسيد؛باهي اني نبي نعرف ساعديني في هادي بس..
نوال:ماعندي شي مهم تعرفه تبي تعرف شن قصدها بكلامها اعرف منها هي اني ماعندي شي نقوله..
اسيد شبحلها شويه وهز راسه وقال؛okحنعرف بروحي..وشكرا بجد شكرا..تعرفي مع من توقفي ومن تساعدي..
ومشي وخلاها وهي متفاجئه..
ضحكت بصدمه وقالت؛هدا شن قصده!؟
••••••••
نرجس بضحكه؛والله تخيلته كيف قالهالك..شوفي ماما بش نكون معاك صادقه نشوف فيك تعاملي في فاتح معامله خاصه..
نوال بإنفعال؛اللي مر بيه خوكم مامريتوش بربعه مافيش حد فيكم طاح وانهار زي فاتح وعاش في هم زي فاتح..
نرجس؛ماتنفعليش ماما مش قصدي بكل ...عارفه وحاسه باللي مر بيه فاتح كنت نبصر معاك بس..
هدت نوال وقالت؛لاإله إلاالله...
نرجس؛اسفه..
نوال؛مش مشكله...المهم اني توا نفكر نخطبله البنيه..
نرجس؛اخطبيهاله مدام مصر عليها ويبيها هكي...
نوال تنهدت وقعدت ساكته وهي تفكر فهالموضوع ولأن تعرف اللي صار مع مريم..خايفه يكون ولدها سبب كسر جديد ليها..
🍀🍀🍀🍀🍀
بعد يومين...
كانت مريم تستعد للرجعة لبريطانيا هو وخوها ومرته بعد تمت الاجازة..
امها بحزن:كان نلقى تحضري معاي رمضان..
مريم؛الله غالب يام مجبورة نكمل قرايه ونروحلك ونقعد معاك معاش نتحرك من جنبك .
ابتسمت امها بحزن وقالت؛ربي يفتحها عليه بنتي وينجحك..
مريم وهي تسكر في شنطتها قالت بإبتسامه قالت؛آمين..
شويه وخش خوها معاذ وقال؛وحده فيكم دير قهوة.
امه؛علاش من جي..
معاذ؛واحد يام..
امه:باهي هاني ماشيه نديرها..
ومشت طلعت من حداهم...
مريم؛موعا..
معاذ؛نعم؟
مريم؛كله نصيب وخيي..
ابتسم بحسرة وقال؛ادعيلي ننساها بس ..
ومشي طلع من حداها.
هي تنهدت بضيق...بعدين نزلت شنطتها من ع السرير وحطتها في تركينه...
🍁🍁🍁🍁
في حوش هيثم الكاتب...
كانوا موجودات سارة وجنان بس..
ريحان كالعادة في النادي...وهيثم وزياد عندهم شغل برا..
جنان كانت مقعمزة في دارها تقرا..
وسارة ضم في الحوش وترتب هدا وين حصلت فرصه بش تقلبه بش تلهى بعرس صاحبتها..
فجأة رن جرس الحوش..
حطت المنشف اللي تمسح بيه..
ومشت خدت ملايتها وقعدت تلبس فيها وهي تقول؛زعمه تهاني!؟
مشت فتحت باب الحوش..
وطلعت للباب الخارجي..
وقالت:منو...
"افتحي"
غمضت عيونها بشده...بعدين خدت نفس...وفتحتهم..
وفتحت الباب..
لقاته واقف فم الباب وحامل ومحمل..
فاتح بإبتسامه؛السلام عليكم..مساء الخير..وسعيلي معليشي..
سارة؛مافي حد فالحوش...
فاتح خش وهو يقول:عارف خديت اذن بوك وخوك..وطبعا لازم نذكرك اني راجلك يعني خشتي للحوش مش حرام..
سارة وهي تشوفله بحده؛لكن عيب..
فاتح؛طز في العيب قدام الحلال..
وقدم بيخش..
هي سكرت الباب ومشت وراه وهي تقول؛حتى لو كنت نسيب ماتاخدش راحتك لهالدرجه .
فاتح خش للحوش وهو يقول؛اني ولد الحوش هدا مش نسيب بس..
خشت وراه وهي تقول؛حول من رجليك..
وقف وشبح لوطا وقال؛الله...ريحه مطهر...شكلك كنتي حايسه حبي...
حول كندرته وخش..
سارة وهي مصدومه؛ياربي شن هدا!؟
هو خش للكوجينه ع جية جنان لما شافاته في الكوجينه ولت تجري للدار بش تلبس حجابها..
واختها وقفت ع رخامه البار وحولت ملايتها بعصبيه بعد ماسخنت من الغضب وهي تقول؛لاعاد زودتها راهو..
فاتح قعد يطلع في الحاجات اللي جايبهم وهو يقول:هادي شكلاطه لتوامه..وهادي لعمي...وهادي مفاجأة...وهادي بيتزا نحلف ماذقتوا زيها في حياتكم...
قام عيونه وقال؛ع فكرة...وسكت..
وسارة تشوفله برفعة حاجب...
هو ابتسم بإعجاب بعدين قال؛نسيت حتى شن نبي نقول..
سارة وهي تحاول تغلب ارتباكها؛اسمع لو سمحت اطلع من الكوجينه وبرا قعمز في الصالون..
ضحك وقال؛تمام لكن ردي بالك تفتحي البوكس هو..
سارة؛مش ميته عليه ..
ضحك تاني ومشي طلع من الكوجينه للصاله...
قعمز ع الكنبه المقابله الكوجينه وقعد يشوفلها كيف ضم فيها...
ع جية جنان بعد مالبست حجابها...
بإبتسامه قالت؛السلام عليكم فاتح..
فاتح؛اهلا اهلا وعليكم السلام..شن جو جنان..
قعمزت جنان ع كرسي بعيد عن فاتح بمسافه وجاي مقابله وتفصل بينهم طاوله وقالت؛الحمدلله تمام..انت شن جوك..
فاتح بإبتسامه؛مليح بكل..واشرلها بحواجبه ع سارة..
هي التفتت شافتلها لقتها تمسح في الرخام..
شبحتله وقالت؛تقلب في الحوش قبل عرس صاحبتها يبدا غدوة ان شاء الله..
عقد حواجبه وقال؛اها...باهي شن جو القرايه..
جنان؛اهو الامتحانات قريب نقروا ليه ليه..
فاتح؛وعمي جوردن وين؟
جنان بضحكه؛في النادي...
فاتح بضحكه؛جو عليها البنت هادي...
وجنان تضحك..
فاتح بصوت عالي؛ديرولنا قهوة ياهوه..
شبحتله سارة من الكوجينه بحده..
وهو يشوفلها بإبتسامه...
سارة:جنان نوضي ديري قهوة..
فاتح؛نوضي ياجنان نوضي شكلها مازال ماتجيبش فيها صح..
جنان ناضت وهي شاده ضحكتها
سارة؛قعمزي ياجنان خلاص..
قعمزت جنان وهي تشوف لفاتح وبتضحك خلاص..
وفاتح يضحك وهو يشوف لسارة اللي بدت دور في القهوة بعصبيه..
🍁🍁🍁🍁
"كان نعرف من هو اللي جاي هدا اللي نادوا خوتك ع خاطرك"
مريم بقلق؛ان شاء الله مش صايرة مشكله بس..
جاوبتها امها وهي تقول؛مال باهي اللي بوك مشي لعمك...
شويه وخش ياسر وهي يقول؛مريم..
مريم ؛نعم!..
قعمز وهي يقول؛تعرفي واحد ليبي في بريطانيا اسمه اسيد بشر الشيباني..
مريم بصدمه؛علاش خيره!؟
امها شبحتلها بآستغراب.
ياسر:تعرفيه معناها..
مريم بشي من الارتباك؛ايه..هو نعرفه يكون ولد استاذة نوال اللي قريت برا ع حسابها...
ياسر؛قولي الحق صاير بينكم دوة..
مريم تنهدت وقالت؛ايه كلمني ع موضوع زواج واني رفضت..
امها؛وعلاش!؟
ياسر؛اصبري يام...علاش...؟
مريم بضيق؛شن علاش ياياسر اللي صار مش شويه راهو..كرهني في الزواج وسيرته..
ياسر؛لا هدا مش سبب سلم وخيتي غلط التفكير هدا..هو نصيب في الاخير ومرات نصيبك في الراجل هدا ماتعرفيش..
مريم بضيق:هاك قلتها بروحك مرات اني مش مستعده نعيش تجربه تانيه عييت...
امها؛ولأمتى بتقعدي هكي يابنتي قوليلي..
مريم؛بالله عليكم ماتضغطوش عليا..
وناضت ومشت من حداهم..وامها وخوها معاها بعيونهم..
امها بحزن؛هدا اللي كنت خايفه منه البنت تتعقد من الزواج..
تنهد ياسر وقال؛خليها براحتها يام...
امه؛هو الراجل اللي جاي توا هو نفسه اللي حكيت عليه؟
ياسر ناض من حداها وهو يقول:ايه..
امه؛شن بتقوله..
ياسر؛مافيش نصيب شن بنقوله...ومشي للمربوعه...
تنهدت امه وقالت؛لاحول ولاقوة الابالله..
🍁🍁🍁🍁
خش زياد بسيارته للحوش ومعاه ريحان...
درس ونزلوا الزوز..
ريحان؛مانحكيلكش خليتهم مايفهموا شي..
زياد بضحكه؛صحه ليك..
ومشوا الزوز للباب..
فتح زياد الباب وقال؛خشي..
خشت ريحان وهو خش بعدها..
سمع صوت هدرزة فاتح..
ريحان؛فتوح عندنا..!
زياد بضحكه؛ايه..
وخشوا الزوز داخل...
زياد:بونسيب...
فاتح؛اووو دكتور..شن جو..
زياد؛تمام...شويه وجاي..ومشي جهة داره...
اما ريحان قالت؛شن جو فتوح..
سارة فنصت في ريحان ..وريحان ولاشافتلها..
فاتح بإبتسامه؛مليح جوردن شن جوك اني وجو كورة السله..
سارة بحده؛مليحة في الكورة لكن القرايه قبيحه..
ريحان تعكرش وجهها..
وجنان تشبحلها بضحكه..
اما فاتح فرحه ع الآخر تجاوب سارة معاه وقال:لالا ريحان مايجيش هكي القرايه قبل كل شي هادي مستقبلك كذب عليك راهو شهادتك هي اللي تلقيها بعدين..
سارة:والله حق..
وقعدت تشرب في القهوة..
وفاتح قعد يشبحلها وهو يفكر في قصدها من كلامها..
ريحان تنحنحت وقالت؛تعالي جنو..
جنان ناضت وقالت؛باهي..
ومشوا الزوز لدارهم..
فاتح؛سارة..
شبحتله برفعة حاجب..
ناض وجاها قعمز جنبها وهي تشوفله ..
طلع من جيب جاكيته حاجه ومدهالها..
كانت علبه سودا مسطحه...
سارة؛شن هدا..
فاتح؛خوي افتحيها وشوفي..
هي شبحتله شويه...بعدين حطت الفنجان ع الطاوله..
وخدت العلبه وفتحتها..
توسعوا عيونها ع الآخر من الصدمه...
فاتح.بإبتسامه؛طاح منك اول مرة شفتك فيها بعد طلعنا من الحبس..في المزرعه..خلته عندي بس توا قلت لازم نعطيهولك خير من اللي تلبسي فيه مايطلعش عليك..
سارة شبحتله وعيونها معبيات دموع وقالت؛تعرف هدا من مني جاني؟
عقد حواجبه بإستغراب بدون مايسأل...
سارة بإبتسامه ألم؛هدا من مجاهد...
انصدم فاتح صدمه حس قلب بيوقف فيها..
اما هي ناضت ومشت طول لدارها ودموعها ينزلوا...
خشت لدارها وسكرتها عليها وقعدت تبكي..
عقلها طول قاللها هادي علامه اخرى...
نفس الهديه جتها....شن معناه هدا!؟...
دموعها اللي نزلوا...مانزلوش الا خوف ع فاتح من نفس المصير..
وفاتح الموقف وجعه هلبه كان موقف جدا سخيف حط روحه فيه...
ماتحملش..وطول خدي بعضه ومشي طلع من الحوش...
وزياد فهالوقت طلع من داره بعد ماخدي دوش وبدل حوايجه...
وين وصل فالصاله استغرب لما مالقي حد..
وقعد يدور وينادي لين طلعوله التوأم..
ريحان؛خلينا سارة وفاتح هني ومشينا للدار.
غمض زياد عيونه بشده بعدين فتحهم وقال؛تمام تمام...
🍁وسارة تسمع فيهم شن يقولوا وهي تبكي...
وزاد وجع قلب سارة لما عرفت ان فاتح جاب تورته جنب الحاجات التانيه بش يحتفلوا بذكرى ميلاد التوأم...
ليلتها روح هيثم واستغرب لما مالقاش فاتح..
وزياد اختلق سبب وقال ان جاه شغل مفاجئ...
لكن هيثم ماعدتش عليه...وحس ان في شي صاير..لما قعد يتمعن في وجه سارة اللي كان باين فيه الحزن..
🍁🍁🍁🍁
ولأنه اب...والاب يقعد حامل هموم صغاره ع كاهله العمر كله بالذات البنات منهم..فكر يدير شي لعل وعسى يقدر يساعد بيه بنته وراجلها مع بعض..راجي من الله تكون خطوته هادي موفقه..
توجه تاني يوم لمطعم راجل بنته بش يقعمز معاه ويهدرزوا بتجرد هالمرة....
••هيثم؛اني ياولدي مانبيش نحملك فوق طاقتك ولاني جاي نقولك تحمل بنتي بالسيف..بس نبي نذكرك اني من قبل نبهتك وقتلك حتتعب معاها بنتي اللي صار معاها تعبها..وقتلك مش حتقدر تتحمل..
فاتح اللي كان مقعمز معاه ع وحده من طاولات المطعم كان يشبح لايديه اللي ضامهم لبعض وحاطهم ع الطاوله ويسمع في كلامه...
هيثم؛في نفس الوقت نقولك بنتي ونعرفها كل ماتحس انك قربت منها حتبعدك اكثر كل ماحتحس انها حتتعلق بيك حتتعامل معاك بعنف بش تجبرك تخليها..
وانت لو قتلي توا اني ياعمي سامحني هدا شي فوق طاقتي ومانقدرش نتحمله والله مانلومك وبالنسبه ليا معذور معذور معذور...
فاتح؛عمي فكرة اني نسيبها هادي نبيك تنساها بكل..مانكذبش عليك انها صعبه وصعب التعامل معاها لكن هدا مايعنيش اني مستسلم ومسلم فيها واني قتلك صعب مش مستحيل...مع الوقت ووحده وحده تو تلين والامور كلها تتيسر بس نبي شوية صبر...
هيثم؛ماتقولش في الكلام هدا لأنك متحشم مني ولا؟
ضحك فاتح وقال؛لا والله نهائيا كلامي طالع من وسط قلبي..
تنهد هيثم وقال؛ربي يهدي سركم ياولدي ربي يهدي سركم...
فاتح بإبتسامه:آمين.....
🍁🍁🍁🍁
وبدي عرس دانيه...
من اول يوم سارة كانت موجوده معاها وماسيبتهاش بكل...حتى للمزين كانت تمشي معاها...
تفاصيل عرس دانيه كانت مميزة...
احييوا ليالي بالدربوكه والاهازيج "الشتوات" الحلوة ..
وعاشوا فيه الفرحه من وسط قلوبهم...
اجمل يوم فيهم كان يوم عقد القران...
••وحده من صاحباتهم؛احلى من شفت عليها البودري طالعه خيال بالذات مع لون عيونك..
دانيه بإبتسامه خجل؛تسلمي يارب..
هبه:مش مصدقه اني حضرت عرسك درتله نهارات حرف بش خلاني واني نقوله صاحبة الطفوله مانحضرش عرسها..
ضحكوا البنات..
انبار؛فرحتي اني لاتوصف لأنها عزمتني الدنيا شغلتنا وكل حد لهي في روحه بس والله مانسينا الايام الحلوة..
ربى؛صدقتي...
دانيه؛العرس من غير الصاحبات مالاش بنه..وحضنت ذراع ساره وحطت راسها ع كتفها...
وسارة حطت راسها ع راس دانيه وهي مبتسمه..
وبعيد عليهم شويه كانت في بنيه مقعمزة تمرر في نظرها ع الموجودات..
بعدين ناضت ومشت طلعت من حداهم..
تلاقت هي ورتاج قالت؛ماشية للحمام..
رتاج:تمام...
مشت رتاج للصالون..
والبنت مشت بس مش للحمام...
فهالوقت ..
كانت جنان تصلي في العصر في دار التقعميز اللي كانت فاضيه...
وهالدار موجوده في الممر اللي فيه دار رشيد..
كملت صلاتها وناضت بتطلع...شافت البنت خاطمه..استغربت..
وصلت في الباب وهي تشوفلها..
لاحظت انها تحاول تفتح دار رشيد...وفعلا فتحتها وخشت وردتها وراها...
وجنان تعرف ان هالدار دار رشيد لأنهم مدهورين في الفيلا قبل وعارفين شن فيها...
فكرت في الاول انها تتجاهل اللي شافاته لأنه مايعنيهاش..
بش قلبها اللي كان حاس ان في شي مش طبيعي ماهناش..
قعدت واقفه في الدار اللي هي فيها...لين لمحت البنت طلعت منها..
طلعت من الدار..
ومشت لدار رشيد..
وفتحها وخشت...انصدمت لما شافت سرير يبان مرشوش بميه
خافت..
وخرت ومشت طلعت وسكرت الباب ولما التفتت وقفت جامده في مكانها...
رشيد وهو رافع حاجبه قال تعجبا؛عفوا!
وجنان مسكينه كانت ترعش من الخوف بسبب الموقف...
وزادها انه شافها وهي طالعه من داره..
اكيد لو خش وشاف اللي فيها حيتهمها هي ...
جنان بخوف؛اسمع..اني كنت نصلي في الدار هديكا..وبعد ماكلمت وجيت بنطلع شفت بنت ماشيه لدارك وخشتلها الحق يعني خفت مانعرفش علاش قعدت نراجي فيها لين طلعت بعدين جيت للدار وشفتها ولقيت..وسكتت.
رشيد وحواجبه معقودات؛شن لقيتي؟!
جنان بخوف؛مانعرفش خش شوف انت..
رشيد شبحلها شويه بعدين خش لداره...
وقف في الباب لما شاف سريره مرشوشه عليه ميه...
طلع طول وسكر الباب..
رشيد؛كان شفتيها تعرفيها..
جنان؛ايه..
رشيد؛اوصفيهالي.
جنان بخجل؛طويله شويه وبشرتها حنطيه..
رشيد؛بس!؟
جنان؛مانقدرش نوصف اكثر من هكي..
رشيد؛متأكده!؟
شبحتله وقالت؛انت شاكه فيا عارفه لكن والله العظيم اني ماليا دخل بحاجه ومانعرفش هي شن دارت والله...
رشيد؛مصدقك لأني عارفك..
جنان بتساؤل؛تعرفني؟!
رشيد:بري انتي توا وماتقولي شي ع اللي شفتيه ولاتحكي لحد..
جنان ؛باهي..ولفت ومشت بسرعه وهو قعد معاها بعيونه لين درقت... بعدين التفت شبح لداره وهويفكر...هز راسه بعدين مشي بيطلع جهة الصالون ونادى...
"دانيه"
شويه وطلعت دانيه من الصالون وجاته...
دانيه؛نعم!؟
رشيد؛اسمعي قولي لاني ورتاج مايخشوش لداري بكل داري مانبي حد يقرب جيهتها..
دانيه:حاضر..
رشيد:الشايبي شويه وجاي يبي يشوفك..
نزلت عيونها وهي متحشمه وقالت؛باهي..
رشيد؛ماتبوا شي..
دانيه؛سلامتك بس..
رشيد:زي ماوصيتك دانيه الدار مايخشلها حد...
دانيه؛حاضر..
ومشي رشيد طلع من الفيلا...
وهي ولت للصالون...
🍁🍁🍁🍁
"والله اني قدمت وتو نشوف شن يصير معاي"
الشيخ؛كل خير بإذن الله..ان لم تفلح هادي المره تفلح في غيرها..
خليل؛ان شاء الله..رغم اني ياشيخ والله خاطري فيها ونحلم بيها حتى الحلم اني نصلي بالناس التراويح في رمضان..
الشيخ:ربي يوصلك ياولدي..ربي يوصلك..
خليل؛اللهم امين...
الشيخ؛الا بننشدك ع حال خوك.جهاد مازال يبي يقعد اعزب..
خليل؛مازال ياشيخ..
الشيخ؛والله ع اكثر من مرة بنكلمه وين يجي يصلي ونتراجع نقول بالك في حاجه اني مانعرفهاش..
خليل؛مانخفيك سر ياشيخ..قلبه مش خالي ومتعلق باللي مستحيل يوصل فيه..
الشيخ؛توقعت والله..تشوف اني نكلمه ولانخليه..
خليل؛مش حتستفيد شي ...
الشيخ؛نحاول...وبالمرة نزكيله بنيات صالحات لعل يختار وحده فيهم وتكون ليه نعم الزوجه...
خليل؛حاول ياشيخ لعل الله يجعلك سبب..
الشيخ بإبتسامه؛يارب...
🍁🍁🍁🍁🍁
واقف تحت مظله بكراسيها في حديقة الفيلا ويستنى...
كان يمشي ويجي ومتوتر...
لين شافها جايه...
وحاطه مظله ع راسها لأن المطر تبشبش...
وين جو عيونها في عيونه ابتسموا الزوز لبعض...
وصلت في المظله وخشت تحتها..
ونزلت المظله التانيه...حطتها ع الطاوله وقالت:دكتور وقعت...
الشايبي بضحكه؛وقعتلك ع قلبي خوديه وتهني بيه..
دانيه:باهي والامتياز!؟
الشايبي؛مادخليش العلاقات الشخصيه في الخدمه ..
دانيه قعدت تضحك..
الشايبي بضحكه؛تعالي تعالي..يادعوة امي تعالي..
دانيه ضحكت ومشتله وين قربت توصل فيه نطت..
وهو تلقاها وقعد يضحك.....
{منذ أن التقينا وأنا أسأل نفسي:
أي عمل صالح ذاك الذي كان ثوابه انتي؟}....
🍁🍁🍁🍁
الساعه الحادية عشر ليلا...
في الصالون شوط دربوكه قايمينه الصديقات والاقارب...
وفي دار رشيد..
كان موجود شيخ يقرا في رقيه تبطل السحر...
وبعدين تصرف في الحاجات اللي لقوهم مرشوشات بالميه...
بعد ماكمل الشيخ شغله وروح..
••في حديقة الفيلا..
مجيد؛شن صار ياولدي..
رشيد؛كل خير يابوي..هي تعال خش..
دخله للملحق وخش وسكر الباب..
مجيد؛رشيد قولي..
رشيد قعمز ع سريره وقال؛نعم؟
مجيد؛الشغاله هادي اللي عند امك متزوجه..
رشيد؛علاش تسأل؟
مجيد؛هكي وخلاص نبي نعرف اللي في حوش كلهم..
رشيد شبحله شويه وقال؛ايه متزوجه.
مجيد وجهه انقلب وقال؛معناها حق..
رشيد؛شن اللي حق!؟
مجيد:شي شي..امتى بيتم وجيج هالعرس هدا كسرولي الراس..
رشيد؛هانت غدوة اخر يوم...ربي يكمل ع خير ويهنيها..
مجيد؛تعال حطني ع السرير تعال...
رشيد ناض وهو يقول؛حاضر..
ضم بوه ورفعه وحطه في سريره ورقده كويس..
بعدين حط عليه الغطا...
ومشي قعمز ع السرير وبدي يقرا في سورة البقرة عن ظهر قلب...
🍁🍁🍁🍁🍁
الساعه الواحده ليلا..
ريحان بصوت منخفض؛غير انتي شن دخلك علاش تحشري روحك في اللي مالكش فيه بس..
جنان بضيق وهي تتكلم بنفس نبرة الصوت؛مش عارفه خفت قلت مرات دايرتله حاجه ولامصيبه..
ريحان؛اهي تو بتجيك مصيبه ع راسك..
جنان؛معاش تخوفيني ريحان..
جنان؛لازم تخافي بش تبطلي تحشري روحك في اللي مالكش فيه فاهمه..
جنان بنرفزة؛فاهمه..ورقدت وغطت راسها...
ريحان حركت راسها يمين ويسار بأسف ورقدت...
🍁🍁🍁🍁🍁
تاني يوم...
الساعه الثالثه ظهرا...
في احد مراكز التجميل..
الميكاب ارتست:كان تخليني نديرلك رموش تو تشوفي عيونك كيف يطلعوا..
دانيه بضحكه؛ماتحاوليش رموش من حنركب..
ضحكت وقالت؛مكسح راسك سكرتيه ع تنقاية الحواجب وسكرتيه ع الرموش تعرفي كنتي حتطلعي ملكه الليله..
دانيه؛ملكه في عيونه ياعيوني من غير شي..
سارة؛ووجهها صافي مادير فيه حاجه بيهبل عليها..
ضحكت دانيه..
؛ياستي ربي يهنيكم..
دانيه؛تسلمي...
وقعدوا المزينات في المركز يخدموا ع دانيه وع سارة..
طبعا كملت سارة هي الاولى وقعدت تراجي في دانيه ..
وهي تراجي رن تليفونها..
شافت المتصل قالت بضيق:مصر ينكد عليا..
فتحت الخط وردت..
سارة؛السلام عليكم.
"وعليكم السلام...شن الأخبار.."
سارة؛تمام الحمدلله..
"كملتوا ولامازال"
سارة؛مازال..
"تمام لما تكملي كلميني بش نخطم ناخدك.."
سارة:زياد بيروح بيا..
"قتلك تكملي كلميني "
سارة؛واني قتلك زياد...
سكتت لما سمعت صوت الخط فاصل..
شبحت لتليفونها بصدمه بعدين قالت؛باهي زيد زيد انت اللي تجيب فيه لروحك...
شويه وجتها وحده وقالت؛تعالي شوفي صاحبتك..
ابتسمت سارة وناضت ومشت معاها بش تشوف دانيه..
لما وصلت فيها وخشت شافتها..
من الذهول حطت ايديها ع فمها وهي تمرر في نظرها عليها..
ودانيه تضحك...
حولت ايديها وقالت ؛الله يبارك عليك الله يبارك خيال يادنو خياااال...
دانيه بإبتسامه؛جديات سرو..
سارة بإبتسامه وعيونها مليانات دموع؛والله تهبلي يادنو الله يبارك عليك ويحفظك ياروحي...
🍁وشويه وجو رشيد ووراه فاتح...
رشيد كانت معاه رتاج..
لكن فاتح بروحه..
طلعوا رتاج ورشيد دانيه للسيارة..
وبعدهم طلعت سارة لسيارة فاتح..
ركبت بلاسلام ولاكلام..
فاتح؛وعليكم السلام ورحمة الله وبركاته..
مابتش تعلق..
هو تحرك بسيارته وقال..
فاتح وهو يسوق:زياد رفع خواتك وعمتك للصاله .
سارة ولاكلمه..
فاتح؛شن لبستي...
شبحتله وهي تفنص...
فاتح:اعتقد من حقي نعرف مرتي وهي ماشيه لعرس شن لابسه..
سارة؛لبسي مستور ومحترم...
فاتح؛خليني نشوف بش نتأكد..
سارة؛من شني تبي تتأكد!؟ اسمع ماتستفزنيش بش مايطلع أسوأ ماعندي..
فاتح؛تمام..بينك وبين ربك..
سارة قعدت ساكته وهي مضايقه..بعدين قامت عبايتها وقالت؛هاه شوف طويل ومستور..
قامت كم العبايه وقالت..كمه طويل..من زمان من لما كنت في عمر جنان وريحان ماكنتش محجبه ومع هدا لبسي ديما مستور..
ابتسم وهو يشبح للطريق..
هي شافت ابتسامته قلبها قعد يدق بقوة وشبحت القدام...
وقعدت من بعدها ساكتين..
لين جت لفاتح مكالمه..
شاف الشاشه اللي قدامه في السيارة طلعله اسم المتصل..
وسارو شافاته..
ضغط ع زر وقال:ايوه كعيب..
"هاه فاتح شن الامور"
فاتح؛تمام الحمدلله..
"فاتح غدوة نبدوا تصوير بإذن الله"
فاتح؛غدوة امتى بالزبط..
"انت تعالى مع 11الصبح"
فاتح؛كلمت الباقي..
توا بعد مانسكر منك"
فاتح:تمام...نتلاقوا غدوة ان شاء الله..
"وانت طيب ياغالي"
فاتح؛السلام عليكم..
"وعليكم السلام"
وسكر فاتح وهو يسوق وقعد ساكت..
وسارة عندها رغبه شديده في سؤال فاتح عن تصوير الاعلان ومن بيكون فيه...او بالأحرى هل حتكون فيه صاحبة الفكرة او لا...
بس طبعا ماقدرتش...
وصلها للصاله...وخش بيها داخل..
فاتح:بيروح بيك زياد..
بدون ماترد بحرف نزلت وخشت للصاله وهو معاها بعيونه..
بعدين ابتسم وتحرك طلع من الصاله...
🌼🌼🌼🌼🌼
وبدت حفلة دانيه..
اللي كانت مميزة جدا...
كانت خشة دانيه ع نشيد جميل اسمه..
ياحامل القرآن...
وانزفت ع كلماته العروس حاملة كتاب الله
دانيه...
ياحامل القرآن قد خصـك الرحمن / / بالفضـل والتيجـان والروح والريـحــان
