مساء الخيرات
#قصةعزيزالعاشقين_ذليل
#بارت ٣ و ٤
Roro Rose
بارت٣
النوب تذكرت امي لما تتهيج عندي الشقيقة وتعاملها ويايه وشلون يشتل حالها وتكعد يم راسي وقارنته بحالتي هسه حتى احس الوجع هالمره اضعاف وماكو امي بجيت قوي وهي تسألني شكو تبجين شكلت الج حتى تبجين شلون عيارة هاي
وكفت من الفراش الدنيا مغوشة بعيوني وشخابيط براسي اريد بس اوصل الحمام لان نفسي بدت تكلب بعدني يم الباب وما سيطرت اكثر وبديت ارد من راسي ورند خطيه تجيبلي السلة وتركض وانخبصت ووجد بقت باهتة بمكانها من منظري لان كعدت بالكاع وانتجيت بالحايط ومددت رجليه اي قوة ما عندي خدرت من راسي لاطرافي
راحت رند تركض ولمت شكو بالبيت اشخاص فوك راسي يريدون يوكفوني ما بيه بعد وكل شويه وارجع ارد لحد ما هلكت هو امي هيج من اتحربط لان جسمي كلش ما يتحمل
بس الفشلة مو من احد الفشلة من الشيخ اللي واكف بره الغرفة ويصيح عليهن كومنها دا اخذها للمستشفى اخر شي بعد ما انتهيت ولبسوني حجاب وعبايه دخل هو عاط عليهم يوصلوني لسيارته لا عبالكم راح يشيلني واطير بالهوا واحس نفسي خفيفه هاي قصة واقعيه وهو مو احمد مظهر ولا اني مريم فخر الدين ولااحنا بفيلم عربي كلاسيكي ههه بالحقيقة تكابلوا عليه وجد ورند كل وحدة من ايد وشحطوني شحط لان رجليه عطلن ما يمشون زين
هذا الواقع حبايب احنا ببيت الشيخ فاضل مو بامريكا والمرأة عنده عورة وصوتها عورة وحتى اسمها عورة وكل شي ما يجوز وما يصير بحيث يوم كامل واني ما شفت بس هو من ابناء عمي اللي ما متزوجين اللي هو واخته صخموني من الرزاله من الصبح لهسه بسببهم وهمه اصلا ما شافوني
هذا اول يوم كان الي يمهم مريضه وحاطيلي مغذي ومحبوسة بغرفتنا كا اطلع وكل شويه اتذكر شسويت بفاضل ووجد بالمستشفى واضحك حيل يستاهلون واحلاها من وكعت على صدره من كال اوكفي ووجد ما كانت يمي حتى تسندني ورديت من راسي للمره الالف وهالمره على دشداشته وعبايته الغاليات واتذكرت وجهه شلون صار متجهم ومشمئز فوك ما هو من الله هيج ملامحه بلا ما احد يسويله مثل فعالياتي 😂😂😂
بارت٣
سنا : كعدت باليوم الثاني وراسي الحمد لله صاير زين باوعت عالساعة بعد وكت بعدها بالسبعة دوام قررت ما اداوم وخبرت رند بهالشي
وكفت لبست تراك شويه مستور عريض وطويل وذبيت حجاب على راسي وطلعت من الغرفة البارحه اني ما طلعت من الغرفة من رجعت من المستشفى باوعت بالصاله ماكو احد سمعت اصوات جايه من جهة المطبخ مشيت لهناك مديت راسي اشوفهم لكيت البنات وعماتي وفاضل وشباب كاعدين يتريكون او بالاحرى مكملين بس دا يسولفون
زوجة محمود لمحتني كالت هاي هي كعدت تعالي حبيبتي شلون صرتي
ابتسامتها لطيفه البارحة اني ما شفتها هواي لان الظاهر ساكنة بالمطبخ تقربت وصبحت عليهم ردوا كلهم بس اليوم هادئين وحبابين سألوني عن صحتي كعدت عالسفرة يم عمتة ام فاروق اللي فتحت الي مكان يمها
تمشيت وكعدت بينها وبين رند ويم رند اخوها بعده بالمتوسطه وهنا تعرفت على اولاد عمي الباقين محمود وعلي وسالم
