٧________٨
عزيز العاشقين ذليل 💘
البارت السابع
اخطاء
وجد:
بيوم خطبة عمي ابو رائد بقينا كاعدين ويه عمتي ام رائد نواسيها كلش انقهرنا عليها الموضوع صار بي نوع من الظلم الها وفوك كل هذا عمي مصر انه هي ترجع وياه وتكمل حياتها رغم هي مو راغبة هالشي تكول لو بيدي وبتده العمر باوله انهزم واعوفه
صح اني احب والدي وعمامي بس بموضوع الزواج اكرههم كلهم سوها وبنفس الطريقة وفوك القهر المرأة الثانية تكون قريبتها للاولى يعني قمة الظلم
كاعدين وياها العصر وهي تبجي ودخل رائد راجع من بغداد من دوامه وصلته اخبار الخطبة
يحجي وعصبي على ابوه ويكول ليش هيج يسوي ويانا ويرجع يكول لامه كومي وياي اخذج قبل لا يجي وهي معانده تكول اله ما اريد ازيد المشاكل خليني اواجهه واعاتبه وينتهي كل شي ونسد السالفه بعد هو تزوج وانتهى
بهاي اللحظات دخلت سنا للبيت تبجي وركضت حضنت امها سكتت غصب عني ادري بيها وين جانت بس سكتت لان خفت لا يرجعون عليها وهي طالعه من غير علم احد منهم ورايحه مسويه هوسات ببيت العروس
الجو مشحون والكل صاير اعصاب وزادت الهوسة بدخول عمي للبيت يصيح وتقدم تجاه سنا واستلمها راشديات وكفخات واخوانها يخصلوها منه اندار لأمها وتهجم عليها وضربها من بينا كان يتص ف بدون وعي
طبعا كلش انقهرنا بعمرها ما ضاربها وبيوم زواجه يطلع من ايده هالشي لو يصح الكره لبشر كنت اكره عمي على فعلته هاي يعني يتزوج وهي ساكتة وفوك هذا يضربها والله شنو بنتها متهجمة على زوجته المصون
ما ينوصف الوضع لان بعمرنا ما مرينا بهيج شي
شلت الموبايل اتصلت على فاضل فصل الخط كلت يجوز عنده شغل اتصلت باخواني الباقين يجون اجوي محمود وفاروق وبالموت يلا هدأ الوضع
اخواني كمشوا عمي واني سحبت عمتي وسنا لغرفتي وسديتها عليهم وخليت امي وماما يمهم ورجعت اراقب الوضع دقايق ووصل فاضل وهنا رجع عمي يصيح لما ولده كالوا امنا ما ترجع للبيت وصار مصايح رائد عاقل مقارنة بقائد اللي يمكن لو المقابيل مو ابوه يمكن يموته متسرع كلش هالقائد واندفاعي وطبعه ابد ما يعجب
وبالاخير صفت اتفقوا وحكم بينهم فاروق انه كلمة عمي ما تنكسر وعمتي ترجع بس تبقى عندنا لما ترتاح يمنا شكم يوم ويخلص زواج عمي ويرتب البيت والوضع وهي ترجع
الولد وافقوا وعمي بقى يسب بيهم ويحجي عليهم من يمي طلعت روحي وانهزمت من البيت كله وطلعت بره بالحديقة هناك لكيت اسامة خطيه كاعد يبجي من شافني مسح دموعه وعدل كعدته يبوو غير متت قهر ولد بعده توه يشب يشوف هيج مشكله واهله يتفرقون
اسامه كلش هادئ وحباب واتوقع تكون اله شخصية حلوة لما يكبر
تقدمت وكعدت يمه ردت اكسر شويه من حزنه
-هلو اسومي
ابتسم ابتسامه خفيفه
-هلو
-اسامه يكولون انت تعرف بالموبايلات عفيه موبايلي بي عطل وبرامجي كلها تخربطت وكل شويه يطلعلي اعلان فجأة عالشاشه
-اي جيبي اشوفه
نطيته الموبايل واني اعرف شنو مشكلته وسهلة واعرف احلها بس ردته يلتهي
-ما بي شي هاي منزله تطبيق ومثل الفايروس يطلع الج اعلانات كوكل هسه اسويها شغله سهلة
