عزيز العاشقين ذليل

٧

١٥______١٨
البارت 15
عزيز العاشقين ذليل 💘
زوجان

سنا:
خلص وقتي بهاي الاسبوعين واني اركض حتى احس نفسي تعبت وما الي واهس عرس وخايفة من الزواج كلش ما احس نفسي استوعبت الفكرة بعد
فاضل يوميه يتصل واني بس اسمع ما عندي قدرة ارد عليه ولا احجي وياه مثل ما هو يحجي حلو ولا كدرت اتأقلم وياه اصلا هو اني شأتأقلم وهو مختلف عني بكل شي

التزمت الصمت والاستماع فقط بس حسيت روحي اميرة عنده وكلامه معسول ورومانسي حتى مرات احسه يكذب عليه مو معقولة يحبني لهالدرجة

صار يوم عرسنا واخواتي واهلي كلهم حواليه بيوم عرسي كعدت من الفجر او بالاحرى ما اجاني نوم من القلق والتفكير
امي ما تحجي التزمت الصمت تجاهي وكل شويه وتبجي وخواتي يسكتوها سمعتها تكول الهم ولكم احس روحي دا تنأخذ مني وترجع تندعي ربنا الي ولسعادتي وتحجي عن خوفها وقلقها من زواجي من فاضل وكأن اني ناقصني ارتباك حتى هي تزيده

اما بابا فكان موقفه صدمة الي ٤ ايام قبل عرسي هو مفارق البيت وما يجي لحد ليلة الحنة قضاها بالبيت بس ساكت وما يحجي بس شكله مال واحد عنده مشكلة ما تنحل
بيوم عرسي الصبح هو عرض يوصلنا للصالون طلعت اني واغراضي وخبصتي وخواتي ورايه يركضون نخاف نتأخر وهو كان واكف بجانب سيارته وساكت ما انتبهنا اله الا لما صعدنا وسكتنا ننتظره ينطلق وهنا لكينا ابويه صافن عليه وعيونه بنظرة ما اعرف اوصفها كل ما اذكرها حاليا اتمنى لو ترجع ذيج اللحظه وانزل من السيارة واشمر نفسي بحضنه وابقى حاضنته انحرمت من احلى لحظات بسبب ابتعادي عنه

تقدم للسيارة وفتح بابها وكعد بمكانه بس كانت عيونه تجري دمع وبقينا الطريق كله اني وهو نباوع واحد للثاني من المرايا بدون كلام بس دموع هنا يلا حسيت بي يحبني صدك وانه اني غاليه عليه هوايه بس بقينا بنفس الجمود وما كدرنا نتقرب لو احضنه لو ابوسه مثل باقي البنات

دخلت الصالون وساعات اخذت وبهاي الفترة كلها واني افكاري تشرد مني بعيد وترجع تعكس مسارها لغير اتجاه بدون ما ترجع يمي لو ارجع لعقلي
لحد ما ام الصالون فززتني تكول عجبج لو لا ؟ حتى بالبداية ما فهمت عن شنو تحجي بعدين يلا استوعبت سؤالها عن رسم العين والالوان وكأنه اني راح اعترض لو اكول مو حلو هو اني اعرف شي بالمكياج حتى اعرف راهم الي لو لا
هزيت راسي بنعم عاجبني وهو اني اصلا ما عرفتها اللي بالمرايا لان تختلف عني وعن شخصيتي كليا اخواتي همه اللي اختاروا كل شي
طلعنا ورجعنا وجيران وصديقات ماما جايات وشكم بنيه اني عازمتهم حلو كان عرسي ما تقيدت مثل باقي العرايس اصلا ما تقيدت هوايه لان معازيمنا قليلين وهدوء واصلا احنا ساكنين منطقة كلش راقيه حتى الجوارين من طبقة محددة ومساوين لمستوى اهلي الاجتماعي

صار العصر واحنا بهالهدوء والكعدة الهادئة سمعنا هوسة اصلا ما صاير مثلها بشارعنا بحيث شايفين القبائل الافريقية بالتلفزيون من يطلعون يكمزون ويهوسون بلغة غريبة مثل هالصورة بالضبط دخلوا يجي خمسين شخص يهوسون ويكمزون