DAMNED (Dark Romance)

Chapter one

Naglakad pauwi si Mara mula sa kanyang pinagtatrabahuhang tindahan nang bigla siyang inatake ng malaking uwak. Hindi niya agad nadepensahan ang sarili kaya't bumangga ang uwak sa kanyang noo pero kaagad ring lumipad papalayo.

Panandalian siyang tumayo at pinagmasdang kumulimlim ang langit habang unti-unting binalot ng dilim ang paligid. Tila sunod-sunod ang pag-ulan sa kanilang lugar dahil sa masamang panahon pero hindi niya iyon pinanasin.

Ngunit sa kalagitnaan ng kanyang paglalakad ay laking gulat niya nang hinaplos ng malamig na hangin ang kanyang buong katawan na para bang tumagos hanggang sa kalamnan.

Hindi siya ma-superstitious na tao pero bakas ang pag-aalala sa kanyang mukha. Siya'y nakaramdam ng pagkabahala sa hindi maipaliwanag na dahilan na para bang may masamang mangyayari. Tinignan niya ang relo sa kanyang pulsohan at alas kwatro na pala iyon.

Naglakad siya ng mabilis ngunit dumagundong ng malakas ang kulog at kidlat sa kalangitan kaya't minabuti niyang tumakbo para hindi maabutan ng ulan.

Nang makarating siya sa tarangkahan ng kanilang bahay ay agad bumuhos ang malakas na ulan at tyempong bubuksan na sana niya ang gate nang may marinig na malakas na sigaw ng babae.

Kilala niya ang boses na iyon. Sofia!

Biglang nilamutak ang kanyang puso at dali-daling itinulak ang gate saka tumakbo papasok ng kanilang bahay. Kagimbal-gimbal ang mga nasaksihan niyang eksena. Walang buhay at puno ng saksak sa leeg ang kanilang alagang aso na halos maghiwalay ang ulo sa katawan. 

Bumaha ng dugo ang sahig at nagkarambola ang kanilang mga gamit na mistulang dinaanan ng bagyo.

Sobrang bilis ng tibok ng kanyang puso. Para siyang naparalisa habang nakatayo sa loob ng kanilang bahay. Nanlamig ang buong katawan niya na parang binuhusan ng malamig na tubig. Gusto niyang sumigaw at humingi ng tulong subalit walang boses na lumalabas sa kanyang bibig.

Agad siyang napakurap nang makarining ng mataas na tuno ng sigaw at ibinaling ang tingin kung saan iyon nanggaling.

"Help me, Mara!" sigaw ng stepsister niyang si Sofia habang pilit iniaabot ang kamay sa kanyang direksyon.

"Aaaarrgg!!! Parang awa mo na. Bitiwan mo ko!" umiiyak nitong pagmamakaawa sa isang lalaki habang duguan at nagpupumiglas. Gapos-gapos ng armadong lalaki si Sofia at sinasabunutan sa kusina ng kanilang bahay.

Lalapit na sana siya para tulongan ang kapatid ng biglang may maramdamang malakas at matigas na bagay na tumama sa kanyang ulo.

Hinampas siya ng dospordos ng isang armadong lalaki sa likod ng ulo saka unti-unting nanlabo ang kanyang paningin at bumagsak ang katawan sa sahig ng dugo bago tuluyang nawalan ng malay.

***

"Aghh" napa singhap si Mara sa sakit habang nakapikit ang mga mata.

Matinding kirot at hapdi ang kanyang nararamdaman sa likorang bahagi ng ulo. She felt like her blood were draining from it.

Pilit niyang iminulat ang mga mata saka nag flashback sa kanyang utak ang mga nangyari. Sisigaw na sana siya ng tulong nang mapansing naka-duck tape ang kanyang bibig habang nakagapos naman ang kanyang mga kamay sa likod.

Nakahiga siya sa maduming sahig at masangsang na paligid, medyo may kadiliman din ang lugar ngunit kahit ganoon ay kitang-kita niya ang isang lalaking nakaluhod sa kanyang harapan. Umiiyak iyon at nakikiusap sa isa pang lalaki na doon din nakaupo. Namamaga ang mukha nito at paulit-ulit na nagmamakaawa sa matandang kausap na huwag sasaktan ang kanyang anak.

Nanlaki ang mga mata niya sa gulat ng mamukhaan ang lalaking nakaluhod at humahagulgul sa kanyang harapan. Iyon pala ay ang kanyang ama na namimilipit sa sakit habang yakap-yakap ang binti ni Julio. Si Julio ay leader nang isang malaking sindikato kung saan na involve ang kanyang ama.