#ضياع
بقلمي : فاطمة الجابري
لا تنسون التصووويت حبايبي محتاجة دعمكم حتى اكمل الرواية وراح تعجبكم اكيد بيها احداث هواي وكلش حلوة ..
...................
كاعدة بغرفتي والتفكير محتل عقلي مثل كل يوم مخلية الهتفون بأذني واسمع اغاني حسيت بأيدين تتلمس جسمي عرفتة هوة جريت نفس قوي واني متضايقة ودرت جسمي وكعدت عدل
.. شتريد
.. يعني شريد غير مرتي ومشتاقلج
.. هههه تصدك ضلت تضحكني هل كلمة مررتي اشو اني ضليت اكرهة وماحب اسمعك دكولها
.. شبيج بس كليلي ترة طلعتي روحي
.. ليش ما تسأل روحك ليش ما تراجع نفسك ليش تتصرف وكأنك ما مسوي شي هيج تخليني اكرهك أكثر لؤي كافي كاافي ترة والله نفسيتي ادمرت بسببك اعتقني لوجه الله طلكني أنا لو رحت لاهلي وكتلهم طلكوني ماراح يقبلون وتعرف كلمن يجر بصفحة وينصح ومن هل حجي التعبان الي مليت منة كافي انطيتك من عمري ٩ سنين دمرتني اخذت كلشي حلو مني نفسيتي صفر صارت طلكني وخلصني
.. ما اطلك وتبقين هنا إذا مو لخاطري لخاطر الجهال يضيعون إذا اطلكنا
.. مايصير بيهم شي وانا خاطري مكسور ليش تفكر بنفسك وجهالك واني محد يفكر بية
جهالي اني اربيهم واعيشهم احسن عيشة بس طلكني الله يخليك
حسيتة عصب وعيونة صارت حمر لزمني من ايدي وضل يهز بية
..انتي شنو بس فهميني شايفتلج واحد منا منا وتردين تطلكين
..دفعتة بكل قوتي وكتلة
احترم نفسك واحجي عدل وياي اني سكون مو وحدة من الي تعرفهن ولا من هذن بنات الليل الي تبات يمهن فتح عينك زين لؤي ولا تشبش بلحجي زيين واني عرضك عيب تحاجيني بهل طريقة واذا عندك شك بية المن مخليني ترة طلعت روحي تعرف شنو طلعت روحي
تركتة وطلعت من الغرفة ورحت غسلت وجهي احسة نار من العصبية كرهتة وكرهت روحي والساعة الي عرفتة بيها ما مصبرني عليه غير جهالي باسل عمرة ٣ سنوات ونص ومرتضى عمرة سنة و ٨ اشهر هم كلشي بحياتي همة الي مصبريني ع سوالفة المكسرة والا اني ما اتحمل اشوف وجهة..شفتة طلع من الغرفة رجعت كعدت بيها شوي واجت عمتي ام لؤي
دكت الباب ودخلت كالت هاذة مرتضى ديري بالج عليه وباسل عفتة يم لؤي بالباب ما قبل يدخل وياي
.. ماشي عمة جيبي
اخذتة منها واني اشيلة ابوس بي وهوة يغمض بعيونة ويفتحهن يموتني بهل حركة اريد اكرطة خليتة يمي وطلعتلة العاب يلعب واني صفنت ورحت بغير عالم صرت اتذكر شلون جنت عايشة ومرتاحة ومايهمني شي
رجعت لأيام مدرستي وصديقاتي الي نحرمت منهم وماعرف وين صارو ووين راحو ماعندي اي تواصل وياهن
رجعت ٩ سنين لذكرياتي الحلوة
فلاش باك..
...
سكون كومي كعدي نوارس تنتظرج بالباب يلة ماما
رفعت راسي من المخدة صباح الخير ماما
.. يلة كومي بنيتي تنتظرج بلباب تأخرتي
كمت ع السريع غسلت وفرشت اسناني وبدلت ولبست حجابي واخذت جنطتي وطلعت شفتها بلباب لازمة الكتاب تقرة ابتسمت وكتلها
صباح الخير نونو
... صباح النور عيني شنو لو باقية بعد شوي بلفراش بعد وكت يعني ع الدوام وتهز بيدها
.. شسالفة ترة ما تأخرت هية ربع ساعة وبعدين نمت متأخرة البارحة تابعت فلم هندي جديد اول عرض وتدرين مايصير يفوتني اموت والله
... اوف منج درستي امتحان لو مخلصتها وية الهنود لو اعرف شعاجبج بيهم
... اااه اااه هيج من الله احبهم الله زرع حبهم بكلبي شسوي كليلي
.. انجبي وكليلي درستي جغرافية لو لا ترة امتحان شهري والدرجات تنحسب لازم درجة عالية تجيبين
... اي اي والله درست
.. سكونة لا تضوجين مني لمصلحتج والله
.. لزمتها من خدها اكرص بي لج فدوة والله فدوة لهل خدود ماضوج منج شعندي انا كم سوسو
دفعت ايدي وهية دكول
..وسم حتى سم منا شارع والعالم تباوع شبيج
.. ماكو احد شبيج بال٧ ونص منو كاعد بس سواق المدارس والطلاب
... اي وهذول مو ناس
.. اهوو تدرين بية خجولة ولو اكو احد ما اسوي هيج فضيني امشي اريد اوصل واراجع امتحان
.. يلة امشي بسرعة ومن نرجع ابقي يمي وبعدين حسوني اخوي يوصلج
.. لا فدوة مالي خلك ماما تضل تحجي علية
.. ترة بيت عمج احنا سكونة مو ناس غربة
.. لا لا مو قصدها ماما والله بس يضل بالها وماتقبل اسوي شي اذا ما اكلها اول بس وعد باجر اكلها من ارجع من المدرسة ابقى ابيت عمو ابو نوارس تماام هيج كليبي
... اي تمام
وصلنا للمدرسة وكلمن راحت لشعبتها لكيت عبير اباب الصف تنتظرني رحتلها واني افتح ايدي وابتسملها
...حضنتها وكتلها افيش مشتاقتلج حيل حيل
.. حتى اني مشتاقتلج ياعمري
حجت وحدة ويانة بلصف اسمها حوراء
.. ترة امس سوة شدعوة كل هل اشتياق والاحضان
ردت عليها عبير وهبة تأشر بيدها
.. امداج قل اعوذ برب الفلق شتردين من عدنة غير صديقات ومقربات وخوات هم بس انتي شعرفج ماعندج صديقة مقربة
دفعتها من كتفها بيدها وهية دكلها
.. بعدي من طريقي
ابتسمت وكتلها
.. عبير ع كيفج وياها ما كالت شي
.. تولي معليج حاطة عينها علينا هسة تحسدنا ونتعارك
.. ماتصير بينا ابد احنا متفاهماات كلش زين
باوعتلي وهية تضيق عيونها وتضحك
.. شكد احبج يربي انوب اسم ع مسمى هدووء انتي ما تتعصبين ابد
... هههههه لا اتعصب بس للضرورة واذا كلش كلش انداس ابطني
ضحكت بصوت عالي كالت تعاي ادوس ابطنج اشوقت اشوفج عصبية
... ولي مني خلي اراجع واستبرق وين شو ما اجت وآية تأخرن
.. هسة يجن
... اكول عبير
تقربت مني وهية تحجي بهمس وتضيق عيونها
..كولي عيون عبير اظاهر موضوع مهم مدام كلتي اكول عبير اسمعج
.. لا ولج مو لهل درجة بس ما تحسين استبرق متغيرة هلايام اكو شي صاير هواي تصفن ومن نحجي بالها مو ويانة
