ضياع

بارت ٢

# ضياع

وسعت عيوني بصدمة وشهكت
.. تحجين صدك انتي ليش ما كلتولي
.. شسوين إذ كلنالج هسة روحي البيت وشوفيها خطية حالتها حالة
... يمة سودة علية حبيبتي
عفتها واني استعجل بمشيتي وصاحت علية عبير
.. لج انتظري انتظري شبيج مستعجلة ترحين لوحدج
... اي شسوي بعد ويامن اروح محد ع طريقي
.. اوكفي بلكت بابا يوصل ونوصلج

وكفت وياها ننتظر ابوها وماكو طلعن كل الطالبات والمدرسات وهوة ماكو والجو حار ضليت احرك بيدي ع وجهي اريد هوى متت حر حجت عبير وهية بقمة عصبيتها
... هسة وين صار غير افتهم مو يدري بية هسة يخلص دوامي اللهي الصبر منك
... بلكت هسة يجي اصبري بعدين اني تأخرت راح اروح ع الاقل مشي ولا ماكو خاف أتأخر اهلي يضل بالهم علية اجيت امشي ولزمت ايدي
... اوكفي اوكفي هاذة عيسى ابن خالتي شجابة لمدرستي وبسيارة بابا

باوعتلها بأستغراب
... عجيب والله افتهمي منة وخليني اطمن عليج وامشي خاف صاير شي

اجة يمشي بتجاهنا ويبتسم جان لابس قميص ابيض وبنطرون رصاصي وحذاء ابيض كلش مرتب وحلو
وصل يمنة وسلم وهوة يباوع علية وع عبير
.. السلام عليكم شلونج عبير
باوعلي وكال شلون ويأشر لعبير حتى دكول اسمي
كالتلة
...سكون
.. عاشت الاسامي
.. ترة متت حر واني انتظر بابا شكو شصاير ليش جاي علية انتة
... شنو خاتون ما يعجبج أنا اجي ابوج صار عندة شغلة مهمة واني جنت عدكم كال أخذ سيارتي وجيب عبير ام السان
.. بابا مايكول ام لسان ويلة امشي متت حر وهم نوصل سكون بطريقنا اليوم لوحدها
رديت عليها وكتلها
... لا اني امشي للبيت انتو آخذو راحتكم الله وياكم
باوعتلي وهية تأشرلي بمعنى شكو
اتقربت منها وكتلها
... عيب ولد شاب وغريب شلون اصعد وياكم أنا عبالي ابوج ع الاقل اعرفة وبحسبة بابا
ردت علية وهية تسحبني من ايدي

... اكول انجبي وامشي وياي نوصلج براس الفرع وانتي امشي بعدين هاذة ابن خالتي كلش حباب ولا تخافين منة ولو بابا يعرف بي مو خوش ترة ما يودي علية ابد

مشيت وياها واني اكلها
... امري ل الله شسوي دنيا ظهر ومحد موجود جان رحت وحدي وتاخرت
مشينة اني وعبير وهية لازمة ايدي صعدت كدام واني صعدت ورة ومشت السيارة وهاذة ابن خالتها ضل يسولف وياها ومبينة علاقتهم كلش قوية لأن مندمج وياها ويحشش عليها وهية تتعصب وتغلط عليه وهوة ميت ضحك وانتبهت الة انو كلساع يباوع بلمراية وتجي عيني بعينة وادور وجهي أنا مو قصدي اباوع اصلا مو طبعي وما احب هاي السوالف بس تجي صدفة بالاخير ضلبت احجي وية نفسي واني متضايقة حيل
..كافي سكون باوعي ع الشارع عيب مو اخلاقج هاي يمة شكد عيب شيكول علية لا لا ما اخون تربية بابا ابد لو اموت شلون اباوع عليه اني هسة شيكول علية شكد مستخفة درت وجهي ع جام السيارة واباوع للشارع وبعد ما باوعتلة ابد
وصلني براس الفرع وكتلة اوكف هنا ومشكورين تعبتكم وياي
رد علية وهوة يلتفت ويبتسم
... تعبج راحة سكون
..شكرا ما تقصر
نزلت واني أخذ جنطتي التفتت علية عبير
... سكون باجر شنو امتحان عدنة
جاوبتها واني معاجبني سؤالها
..بربج صار ساعة بأخر درس شنو الغي وياج مو اكلج تاريخ  وباجر جمعة ع يوم الاحد واسهل امتحان وين جان بالج هزيت ايدي وسديت الباب وحجيت وياها من جان السيارة واني اصير يمها