#ضياع...
بعد يومين من اتصالي ع عيسى ما حجينة ابد صادف عندي امتحانات وما كدرت احجي وياه بس جان يجي يوصلني للمدرسة ويرجعني للبيت كالعادة
وموضوعنا باقي متوقف ما حجينة ولا سألتة شنو قرارة خليتة ع راحتة وكلت هوة يكلي بالاخير
بعد هل يومين اجة عمو ابو خالد النة وحجة وية بابا حتى يخطبني لخالد
اجتني نادية تركض وتجر نفسها كوة....لج كومي سكون كومي
فتحت عيوني متفاجئة ....شكو شبيج وين اكوم
حجت وهية تجرني من ايدي ....لج تعاي عمو اجة يخطبج لخالد وجاي يحجي وية بابا
سحبت ايدي بسرعة وانا مصدومة....شنوو شنوو تحجين صدك
كل يوم نعيد ونعيد مو كلت ما موافقة ماريدة اريد اكمل دراسة شنو لزكة خوما لزكة
جاوبتني تهدي بية....اول شي اهدي العصبية والصياح مايفيد بشي ادخلي سلمي واحجي وية عمو بكل هدوء
...اوووف اووف ياربي شيخصلها ترة والله بعدني صغيرة ولو ما احب عيسى ولا أخلي يجي يخطب ابد بس حبيتة
...تعاي نسمع شيحجون بلة
مشينا اني ونادية حتى نسمع شيحجون
خليت اذني ع الباب واني اتفاجىء من كلام بابا وية عمو
حجة بكل حزم وإصرار....بنتي بعدهي صغيرة وما انطيها اريدها تكمل وبعدين هوة اخو صديقتها اجة خطبها ورفضنا وخلص سدينا الموضوع
....لا ما نسد الموضوع الولد جاي خاطب اكثر من مرة
جاوبة بابا بعصبية ....الي وصلك الحجي جذاب الولد اجة مرة والمرة الثانية جاب ناس وكال لأن صديقة اختي وبنت خالتي ويعرفنها خوش بنية ورفضنا وهبة ما موافقة اصلا ماتريد تتزوج بعدهي صغيرة
حجة عمو بنزعاج واضح....اي يصير خير ان شاء الله
اترخص أنا مع السلامة
اني ونادية سمعنا هيج وطفرنا ركض للمطبخ قبل لا يطلع ويشوفنة واني فرحانة حيل بكلام بابا يعني ماراح يجبرني ع خالد اني اعرف ما يسويها بس جنت خايفة عمو يأثر ع بابا ويخلي يوافق بس الحمدلله
ثاني يوم رحت للمدرسة وية نوراس شفت عبير ورحنا نتمشا ونسولف
حجت وهية تباوع كدامها....شنو نهايتكم سكون
جاوبتها بحيرة....ماعرف عبير بس ماكو حل ابد وعيسى ماعتقد يقبل ب الي طلبتة منة ماعتقد يعوف اهلة وراه ويغير ديانتة للاسلام واني مستحيل اقبل بي .
وانتي حضرتج ما كتيلي من الاول خليتي هل علاقة تبدي لو من البداية كايلتلي ماجان انطيتة مجال ولا قبلت نتعرف ولا نتقرب ونتعلق ابعض
...ماعرف شكلج سكون هوة حلفني ما احجي بهل موضوع وكال اني احل كلشي ووعدني ما يلعب عليج وانو صدك رايدج وعاجبتة
...شنو الفايدة وهوة ماجاي يسوي شي حتى نكون لبعض
صراحة عبير اني مليت والله وتعبت هاي راح يصير سنتين واحنا ع هل حال
