من كل بيت حكايه

ثامن

#من_كل_بيت_حكايه
سلسله قصص قصيره
بقلمي فردوس عبد اللطيف

من وعيت عالدنيا واني طفله مكظيتها بيت عمي سهيل
اهلي يسكنون منطقه التنويه 
قضاء بمحافظه البصره
والدي عراقي بس الوالده ايرانيه اختي فوزيه اصغر مني بسنه
واني بدريه واخوي خليل
والدي ياخذنا نزور لبيت عمامي يسكنون البصره نعبر  شط العرب
مراتٍ نعبره با ( عباره )
ومرات عالجسر مواليدي ١٩٦٥
بذاك اليوم اجه ابوي ياخذنا اني واختي فوزيه  واني ابجي متعلقه بنات عمي وصعدني عالبابسكل واني ابجي اريد بنات عمي العب وياهم
لان بيتنا امي ماتخليني العب بالشارع وبالبيت تضربني اذا اخربط ترتيب البيت ... بينما بيت عمي يختلف الوضع نلعب نخربط محد يمنعنا
طفرت من البايسكل وكتله روحو وعوفوني
ابوي كال ولج بابا اليوم نسافر لايران
ماقبلت كتله اني ابقى بيت عمي لحد ماترجعون
كالي مراح نرجع الا بعد شهر .... بنتي اليوم لازم نسافر مانكدر نتأخر اكثر واني جاي اخذكم مو هاي اختج ساكته انت ليش تعانديني
بدريه بويه عفيه خليني متونسه ويه البنات العب وياهم وانتو روحو ومن ترجعون تعال اخذني عفيه بابا
بوسته من خدوده ... باوعلي وكال ديري بالك ع نفسج
لا توكعين واني جريتها ركضه لا يغير رأيه
بنات عمي (سهيل ) هو بالحقيقه ابن عم ابوي وعنده ٣بنات بعمري يحبوني
ومن اروح لاهلي يبجون علي رقيه وخالده وسميره
من شافوني اركض كلهم جوي علي حضنوني ومن فرحتنا مادخلنا للبيت بقينا نلعب لحد المغرب من دخلت شافتني خالتي ام رقيه
ام رقيه يا بدريه ولك عبالي رحتي تعالي ابوسج حبيبيه
بدريه الحنان والعطف والدفو  والحب بيت عمي سهيل
بيت اهلي عباره عن مشاعر جامده مجنت اشعر  اني انتمي لهالعائله
ماعرف تفسير لهالشعور وانما هذا احساسي الي كنت احسه
خلص الشهر والشهرين واهلي مارجعو
وصلنا خبر منهم ان ابوي اشتغل بالاهواز يم اهل امي واستقروا
بس ينتظر تصير فرصه يجي ياخذني
بالنسبه الي كلبي ينقبض من اسمع يجي ابوي ياخذني لبيتنا وابتعد عن بنات عمي ... صح اشتاق لاهلي لحضن امي لبوسه ابوي
بس عقلي وتفكيري كوله يم اللعب والفوضى
لحد ما اجه يوم الاسود
دخل عمي اخو ابوي (جاسب)
بوسني شلونج بويه لمي هدومج جيت اخذج عدنا بالبيت
بدريه لحظه سكون مثل الي ينصدم بضربه ع راسه وكولشي بداخله يتوقف
هو يحجي واني نشلت كل حواسي
جاسب خويه سهيل بدريه بنت اخوي واني اولى بيها مثل ماتشوف الحدود ويه ايران نغلقت لا احد يكدر يروح ولا يجي
وابوها دزلي خبر كال اخذها عندك لان انت اخوي
سهيل والله ياخوي ترى البنيه طفله وحالها حال بناتي بس اذا ابوها كال تاخذهه بكيفكم تدلل
بنتي بدريه لمي  ملابسج وروحي ويه عمج
بدريه بقيت بس دموع تنزل ماكدر حتى امسحها لان اصلا ايديه نشلت
البنات لملموا ملابسي ويبجون ع فراكي
جوي بوسوني وكل وحده منهم تحجي حجايه زرفت اذني
بدريه تعالينا مو تنسينا
مشيت وره عمي جاسب واني ماعرف شمنتظرني بيتهم لان مره وحده رايحتلهم اصلا زوجته ماتحب امي تغار منها
زوجة جاسب فاقده احد عيونها (يسموهه عينها كريمه )
بس عمي جاسب يحبها ويخاف منها
اخذته عامل بناء بسيط وبمرور الايام كدر يشتري هذا البيت الي اخذني
بي دخلت ولد عمي ٧ ولد وبنت وحده اسمها وسيله
ابنه الجبير متزوج وعنده ولد واحد
فضيله زوجة عمي جاسب خزرتني وباوعت ع عمي ها جبتها !!!!!
جاسب جبتها وروحي صبي العشا ماريد حجي زايد
بدريه جنت كاعده بالزاويه بيت عمي حلو جبير ونفه بي حديقه
وره البيت عدهم مثل الطارمه يفرشون بيها حصران ويرشوها تبرد
يطلعون التلفزيون بره وكعدتهم بالليل عالتلفزيون بالطارمه
واني لازمه بقجه ملابسي وكاعده وخايفه من نظرات زوجة عمي
وهي مرت من يمي رفستني برجلها كومي تعالي وياي ساعديني
طفرت من مكاني وبيدي ملابسي
من دخلت وراها للمطبخ خمطت من ايدي البقجه وشمرتها عالارض
روحي غسلي ايديج وتعالي بسرعه
ركضت غسلت وجيتها نعم عمه
نطتني السفره روحي فرشي وتعالي اخذي الاكل
ركضت فرشت السفره واني خايفه وارجف من صوتها مرعب
رجعت رحت يمها للمطبخ
لزمتني من اذني شدعوه تاخرتي بسرعه تفرشين السفره وتجين ركض
كمت اركض لا احصلي كفخه
كملنا صب الاكل كلهم كعدوا وعمتي فضيله تخزرني تتمنى ما اكعد اكل
اشرتلي جنتهم شهله اكعد يمها
باوعتلي فضيله وكالت روحي جيبي كلاصات بعد ذني مايكفن
طفرت للمطبخ ادور ع الكلاصات ما اندل
هذا اول يوم وين مخلين الكلاصات ياربي رحت عالبوفيه اخذت جم كلاص ورحت
فضيله ولج انت غبيه جايبه كلاصات الخطار
بالمطبخ اكو جوه الميز روحي رجعيهن وجيبي من ذولاك
رجعت وديتهم وجبتلها الكلاصات
شفتهم كملوا عشاهم ومابقالي شي غير الخبز والخضره
كعدت اريد آكل رفستني كومي لمي المواعين وغسليهن وسوي جاي
وجيبي الطارمه
ركضت الم المواعين واباوع ع بنتها وسيله متمدده وتبرد باظافيرها
وتتفرج ع التلفزيون
جتي وياي شهله
سهله انت شجابج هنا ولج مارحتي ويه اهلج لايران
بدريه واني شمعرفني راح تنغلق الحدود
جنت متونسه ويه بنات عمي سهيل هناك يحبوني ومحد يصيح علي
شهله انت جيتي يم السعلوه فضيله كولشي بيدهه هي الي تحكم هنا
عمج مابيده شي
بدريه لعد خل تقبل اروح يم عمي سهيل وتخلص مني
شهله بهالموضوع ماتكدر ع عمج حاسب
لان يعتبره عار اذا يعوفج بيت ابن عمهم وبيته موجود
الله يعينج ع الي راح تشوفي
اني صارلي خمس سنوات من تزوجت شربت المر ورجلي ماعنده شخصيه
لان يشتغل ويه ابوه ،،، مايكدر يفتح حلكه
بدريه بيومها ادركت اني دخلت لسجن والسجان فضيله
كعدت عالارض ابجي سمعت اسمي منو يصيحني
وسيله صوتها ناصي ماتسمعين جاي اصيحج
امي دكول روحي فرشي الفراشات بالسطح واخذي سطل ماي رشي السطح
بدريه اخذت سطل ماي ورشيت السطح
اكو فرش نفر واحد واكو كله  مال شهله وزوجها وابنهم
لعد عمي وين ينام ؟
فرشه وحده مينام ويه عمتي فضيله كل واحد فراشه وحد
بس ينزلون وقت الفجر يختلون بغرفتهم