من كل بيت حكايه

خامس

#من_كل_بيت_حكايه
بقلمي :فردوس عبد اللطيف
خامس
اليوم ندخل لبيت شاكر خل نشوف حكايتهم
****
شاكر : خريج معهد نفط
ام شاكر : مبروك ابني بعد ماعندك حجه
تخرجت وتعينت بالنفط
اريد افرح بيك وازوجك بنت الحلال
شاكر : يمه شسوي بالزواج واني ابقى بالشغل اسبوعين
واجيكم اسبوع اكظي نوم
بنت العالم شراح تفتهم مني
ام شاكر : ابني اشو رتبنالك المشتمل يمنا وبابها وحدهه يمته ماتضوج تجي يمي تونسني
شاكر : يعني مراح تغارين منهه ودكولين اخذت ابني مني
ام شاكر : لا يمه خل تاخذك بس اريد اشوف جهالك كبل ما اموت
شاكر : عمرج طويل يمه ان شاء الله انت تربيهم
ام شاكر : لعد برد كلبي واقبل اخطبلك
شاكر : بكيفج امي اني باقي اسبوع يمج وراها التحق بالدوام
ام شاكر : كللللللوووووش عريس وربعه يزفونه
شاكر : ها يبين تردين تهزين بعرسي حاصرتج الركصه
ام شاكر : ولك يابعد امك كلما اروح لعرس تدمع عيوني واكول شوكت ازفك وليدي شكوري
شاكر : يمه لا تستعجلين دوري براحتج
****
مرحبا اني شاكر
شكلي اسمر طولي ١٨٠دخلت معهد النفط وحبيت زميلتي
وياي بالمعهد
طبعا قبلها حبيت بنت الجيران بفترة المراهقه كل الشباب
يفكرون بنت الجيران وبعدين تتزوج ويبقى بالحسره والذكريات لان البنت تتزوج قبل الولد
لكن زميلتي نهى تختلف عن باقي النساء جمال واخلاق
تقدملهه شخص غني وعايش بامريكا واهلهه ضغطوا عليها
وهي كذلك شافت المستقبل معاه وتخلت عني وعن حبنا
كملت السنه الدراسيه واختفت
سمعت بيها تزوجت وسافرت لامريكا
من يومها كرهت الحب وفقدت الثقه بالنسوان
قفلت قلبي وماعجبتني اي بنت من بعد نهى
لكن والدتي تريد تزوجني
اني الوسطاني
اختي الكبيره متزوجه ضابط بالمخابرات
واختي الصغيره طالبه
والدي متوفي وامي عايشه على تقاعد الوالد
شغلي يجبرني ابقى بالعمل فتره اسبوعين لهذا ماعتقد اكو بنت تقبل بهيج حياة زوجيه
خل نشوف نشاط الوالده بالبحث عن زوجه ؟
****
نور :
مرحبا اني نور اعيش مع عائلتي امي وابوي وخواتي الاثنين
مصار عدنا ولد وبقت امي طول عمرهه خايفه لا ابوي يتزوج عليها لان مجابتله الولد
اني حاليا طالبه بالثالث متوسط
احب ابن عمي كمل السادس اعدادي ويريد يهاجر للخارج
وعدني بس يستقر يجي يتزوجني
لكن كم سنه راح ابقى انتظر ؟
من سمعت بخبر سفره بقيت ابجي ليل نهار لكن دموعي ما أثرت بي ولا غير رايه
****
نور : الو عزام اذا تسافر احسب نفسك خسرتني والله العظيم راح اوافق على اي زوج يتقدملي
اعرف بنفسي راح انتحر لان حاكون جسد بلا روح لكن
انت السبب
عزام : انت مخبله واذا سويتيها يا نور ارجع للبصره واقتلج
لو اقتل زوجج
نور : حجي يفيدك
*****
بعد مرور شهر سافر عزام وتركني بحسرتي
تركت الامتحانات وتركت المدرسه وبقيت بالبيت
بس ابجي تمنيت الموت لان حياتي بدون عزام مالهه قيمه ومالهه معنى هذا كان تفكيري
*****
ام شاكر : يمه سميه شو تأخرتي وين جنتي
سميه : صديقتي نور مريضه ورحت زرتهه
ام شاكر : نور بنت ام صبا ؟
سميه : اي تركت المدرسه دكول ماتريد تكمل الثالث
ام شاكر : خاف بيهه مرض معدي لو مو زين ؟
سميه : لا يمه كولشي مابيهه بس هي ماتحب المدرسه
ام شاكر : اكولج شدكولين لو نخطبها لاخوج شاكر ؟
سميه : بكيفج يوم لازم يشوفها اول
ام شاكر : هذا شغلج جيبيها يمنا بالبيت من يجي وخلي يشوفها
سميه : من يجي اروح اجيبها بحجه تعلمني اسوي كيكه
ام شاكر : اكولج خو ماعدهه منا منا سوالف البنات
سميه : البنيه تروح وترجع بطريقها ماشفت عليها شي
ام شاكر : بعد اسبوع يجي شكوري وان شاء الله يقتنع بيها
لان شكد جبتله صور بنات ماعجبوا
سميه : مو تعرفي متعجبه اي وحده
******
بعد مرور اسبوع
ام شاكر : هلا يمه الحمد لله ع سلامتك !!!شو صاير اسمر
شاكر : غير شغلنا بالصحراء وبالشمس الحاره
ام شاكر : الله يسهل عليكم ربي ينطيك الصحه والعافيه
اكول يمه لكيتلك وحده وهالمره اني متأكده راح توافق عليها
شاكر : الله كريم
ام شاكر : بنت جوارينه وصديقة اختك سميه وياها بالمدرسه
وبعدهه زغيره ربيها على ايدك
بنت ام صبا
شاكر : مامنتبه عليها
ام شاكر : هسه اسبح وارتاح والعصر خل سميه تجيبها لهنا وانت شوفها وبعدين انطيني رايك
شاكر : اليوم الحجيه داخله حامي
ام شاكر : غير اريد افرح بيك
*****
العصر
سميه : خالتي ام صبا اليوم اريد تسمحين لنور تجي لبيتنا تعلمني اسوي كيكه
ام صبا : علوا تطلع من هالعزله والكآبه بس بنتي بايدج رجعيها
سميه : شكرا خالتي
كومي نور تعالي لبيتنا
نور : ولج شسوي ؟
سميه : اولا اني ضايجه
وثانيا اريدج تعلميني اسوي كيكه مثل كيكه الي وكلتينياها شغل ايدج
نور : خل اسويلج هنا واخذيها لبيتكم
سميه : هاي شبيج مو اكولج ضايجه
نور : اوك خل اغير ملابسي واجي
*****
ام شاكر : تعال شكوري جتي البنيه
شاكر : يابنيه يمه شبيج فرحانه
ام شاكر : يمه حلوه تخبل وزغيره تعال شوفها بالمطبخ
سوي نفسك تريد ماي تريد جاي
انت بس كول موافق الا اخطبها باجر
شاكر : نطيني مجال يمه ليش مستعجله هذا زواج مو لعب
ام شاكر : اني متأكده راح تعجبك
****
شاكر : اضطريت اخضع لكلام الوالده ودخلت المطبخ
ماشاء الله البنيه حلوه وبيضا وطولهه متوسط
شعرها طويل اسود عيونها واسعه
بس بيهن حزن .... خلف ابتسامتها حسيت بألم بداخلها
البنيه مابيها اي عيب اتحجج بي
رجعت لغرفة الجلوس
ام شاكر : ها يمه كول عجبتك
شاكر : انطيني مجال منا لباجر وراح انطيج راي
صح البنيه ماشاء الله جميله وتنحب بس حسيتها حزينه
ام شاكر : يمه انت فرحها هي ماتحب المدرسه وبطلت وتلكيها ضايجه من كعدت البيت
شاكر : خل افكر اول
****
نور : ماكتيلي اخوج بالبيت شكد خجلت منه من سلم علي
سميه : مايدري انت هنا مجان دخل هو اليوم اجه باجازه
نور : ها الحمد لله ع سلامته
سميه : الله يسلمج
*****
شاكر : بعد مرور اسبوع ومقاومتي للحجيه لازم اوافق لان هالمره ماكو حجه البنيه مابيها شي يتعيب واهلهه ناس خيرين وجيرانه صح ماندخل عليهم ولا يدخلون علينا بس نفس الشارع وعشرة عمر
*****
ام صبا : بنتي نور شلعتي كلبي ترى الولد مايتعيب ونعرفهم
كولي اي لو لا أستقرئ على رائ
نور : خلوني افكر
بقيت ابجي كل ليله واتذكر عزام الي عافني وخلاني وحيده
ياريتني اكدر انساه
مصيبتي احبه وماكدر انساه ومستعده اموت علموده
بس اني تحديته وكتله الا اتزوج
فعلا اذا بقيت انتظره سنين وأيام وليالي وتالي يجي متزوج اجنبيه وناسيني شراح يكون موقفي
هو الي كدر يعوفني ويسافر ويتخلى عني
مايهون عليه يدزلي رساله ولا يتصل بالتلفون
اني هم بشر انسانه وعندي مشاعر واحساس
*****
نور : مر شهر وشاكر التحق ورجع بالاجازه الثانيه
وجتي ام شاكر تريد جوابي
اهلي موافقين عليه لان الولد اخلاق ومستقبل واهله نعرفهم احسن من الي منعرفه
بعد ضغوطات الوالده واخواتي
وافقت ورحت لغرفتي ابجي وابجي
خالتي ام شاكر مستعجله تريد الاجراءات بسرعه
وشاكر مرتب اموره مأثث المشتمل الي بصفهم
*****
نور : ماما اريد الحك اشتري جهاز العرس ليش مستعجلين
ام صبا : يمه كولشي جاهز نفرغ نفسنا خلال اسبوع نشتري كل متطلباتج
نور : كولشي عجله مانطوني مجال احبه او احاول انسى عزام
زفوني لشاكر واني كنت جسد بلا روح
بيوم العرس دموعي تجري وتنزل الكحله وكلسع يعدلون مكياجي
سميه : اول عروسه اشوفها تبجي شبيج خايفه من العرس ترى اخوي حباب مو وحش
نور : لا حبيبتي سمسم دا ابجي مقهوره على فراك اهلي
سميه : وهما اهلج وينهم شو هنا خطوتين عن بيتنا
نور : لج ابوي ميقبل اروحلهم وحدي
*****
زهره اخت عزام : مبروك حبيبتي نور
نور : عزام عرف كتيله ؟
زهره : لا لا ماكتله مانريده ينقهر بعدين هو حصل اقامه بالسويد وراح يشتغل
نور : صدك اتصل بيكم
زهره : كافي نور انسي عزام وعيشي حياتج الي اخترتيها
نور : منو كلج اكدر انسى حبيب عمري اني مثل الطير المذبوح
زهره : كافي تمثيل انت وافقتي بارادتج ولا تلعبين بالنار
وانت حاليا على ذمه رجل وشايله اسمه
*****
نور : كلام زهره مثل الخنجر بصدري اذاني بس مضطره امثل السعاده امام الناس
*****
شاكر : شبيج نور مرتبكه
صح فترة خطوبتنا قصيره بس اني زوجج من اليوم اني مسؤل عنج واعتبري امي مثل والدتج
لان من اروح للشغل تبقين وحدج وحاتضوجين
نزلي يمهم غيري جو لاتبقين وحدج
هاي شبيج ترجفين وخايفه ؟
منين خايفه مني ؟
اخذي وقتج ترى اني مامستعجل اريدج تتعودين علي
*****
اليوم الثاني
ام شاكر : كللللللوش كلللللللوش
ها يمه بشر ؟
شاكر : ماسويت شي البنيه خايفه مني
ام شاكر : شنو خايفه منك انت لازم تتصرف
مو انت الرجال ابني تروح عليها لو اجي اني احجي وياها
شاكر : يوم لاتدخلين اني خليتها براحتها ماريد اجبرهه واوعدج الليله اعتبري الموضوع منتهي
*****
نور : صباح الخير خالتي
دنكت باست راسها
الحجيه ضايجه بس ماتكدر تتكلم
سميه : مبروك حبيبتي نور شنو الاخبار
نور : ها ماكو شي تعبانين ونمنا من وكت
*****
شاكر : صباح الورد شلون عروستنا الحلوه
نور : هلو حبيبي صباح الخير (حضنته امام الام وسميه )
شنو يعجبك اسويلك ريوك
شاكر : استغربت من جرأتها
هالموجود حبيبتي سويلي
سميه : تعالي وياي للمطبخ واني اعلمج شيحب شاكر
*****
شاكر : من شفت نور تتقربلي تشجعت واخذتها للغرفه
حبيبتي البارحه شفتج تعبانه واليوم بعد ماعندج عذر
نور خجلت ودنكت راسها بابتسامه خفيفه
بس مشاعرهه مع عزام
نور : صدكوني شكد حاولت خلال هالفتره انسى عزام واحب زوجي مجاي اكدر
عزام الي تخلى عني وعافني لازم انساه واحب شاكر لان هو الانسان الي قدرني وانطاني اسمه
كافي مراهقه نور عيشي حياتج وحبي زوجج
*****
ام شاكر : ها يمه شاكر ؟
شاكر : هاي العلامه يمه روحي يمهه علميها ترى نور طفله متعرف
ام شاكر : كللللللووووش كلللللللوش
الف مبارك وليدي يوم الذريه الصالحه
شاكر : الله يبارك بيج امي
اكول يوم احنا من باجر ناكل بالمشتمل
ام شاكر : لا يمه لا خل مرتك بعدهه عروس واني اريد اطبخلك الاكلات الي تحبها تجون تأكلون يمنا
وبيتكم خل بس ريوك والچاي والكهوه
وغداكم وعشاكم يمنا
شاكر : حجيه ماريد اتعبج
ام شاكر : يمه راحتي من اشوف جهالك يمي يلعبون
ان شاء الله حجيه
******
خلصت اجازه شاكر ولازم يلتحق بعمله
سافر شاكر بعد ماودع زوجته وامه
نور طفرت دمعتها لان حيروح شاكر وتبقى وحيده وترجع تفكر بعزام
*****
نور : من يسافر شاكر ابقى وحيده مع وجود عمتي وسميه
بس اني طول الوقت ابقى وحدي بالمشتمل
الوقت ميخلص لا شاكر ممكن يدق الباب وانتظره وانشغل بجيته ولا عندي شي يشغلني بهيج وضع ابقى افكر ليش استعجلت وتزوجت ليش ما نتظرت عزام
بس الندم ميفيد بعد
*****
بعد مرور شهرين
شاكر : يوم شو نور وجهه اصفر وتتقئ
ام شاكر : اليوم اخذهه للدكتوره ان شاء الله خير
****
ام شاكر : الف مبروك ابني مرتك حامل
شاكر : مبروك حبيبتي نور ديري بالج على صحتج
نور : مجاي يبقى اكل بمعدتي
مرت أربعة اشهر واني بس دايخه ونايمه
الحمل تعبني الاكل ميبقى بمعدتي وجسمي ظعف
العطور تغيرت ريحتها اكره كل العطور حتى ريحه عزام كرهتهه أتضايق من يتقرب يمي
وره الشهر الرابع كدرت اكل واعوض قله الاكل
كملت فتره الحمل ودخلت بشهري
ام شاكر : بنتي ترى انت باي لحظه يجيج طلوك لازم تجين تنامين يمنا عالاقل نركض نوديج للمشفى
نور : خالتي ماعرف انام الا بغرفتي
ام شاكر : يابنتي شلون اكدر انام راح ابقى بقلق
نور : خالتي راح اخلي تلفون يمي واخابرج اذا حسيت بوجع
وأطمني الدكتوره كالت بعد كدامج فد اسبوع
ام شاكر : ربي يسهل عليج
*****
الوقت الساعه الثانيه ظهرا
نور : خالتي لحكيني داتوكع مايات هواي وعندي وجع
ام شاكر : وين شنطه الطفله
نور : جبتها وياي وتحضرت لان مبين عندي ولاده
ام شاكر : سميه ديري بالج اذا اتصل شاكر كوليله راح تجي بنتك
سميه : خابروني من تجيب مو تعوفيني وحدي
ام شاكر : راح تجي ويانا ام صبا
****
بعد مرور ساعتين ولدت نور بنت حلوه مثلهه
ام صبا : شفتي بنتج شكد حلوه حضنيها بنتي
نور : حضنت بنتي ودموعي نزلت
شكد تمنيت هالطفله من عزام حبيبي
ليش صارت قسمتي لشاكر
*****
بعد مرور خمسه اشهر وبدت طيبه بنت نور وشاكر تنور حياتهم
لكن نور اكو غصة بداخلهه
العائله كلهم فرحانين بالطفله الا نور حزينه وماتحبها
بحجه متعرف تربي لو متعرف تلزم طفل واكثر الاوقات ام شاكر هي الي تداري الطفله
****
نور : خالتي اريد اروح لاهلي اليوم ماما مريضه
ام شاكر : اني اوديج ومن تردين ترجعين خل امج ترجعج ولو حانشتاق لطيبه
*****
رِن التلفون الارضي بيت اهل نور
نور : الو
عزام : نور هاي وينج ياعمري شكد اتصل على بيتكم ماتردين يطلعولي اهلج ومرات اغلقه ومرات احجي وياهم بدون ما أسال عليج
حبيبتي مشتاقلج
نور : عزام ودموعها تجري
اني تزوجت
عزام : شنو الووو مجاي اسمع انت شكلتي
نور : اني تزوجت انت عفتني ورحت
عزام : اششششش بس كافي
نور : لا عزام مو كافي اني احبك ومستعده اعوف الدنيا واهرب واجيلك لان اني مو سعيده
اني جسد بلا روح انت عفتني وبقيت وحيده احسب الوقت شوكت يخلص اليوم
اسمع حبيبي راح انطيك رقم بيتنا وانت اليوم بالليل خابرني
عزام : لج نور انت ذبحتيني
شلون انطاج كلبج تتزوجين واحد غيري
شلون كدرتي تنامين ويه رجال غريب
نور : اسمع ماما جتي ماكدر احجي سجل الرقم وخابرني بالليل
*****
في المساء الساعه ال ١٢ ليلا
عزام : هذا رقم بيتج انت عايشه وحدج ؟ زوجج وين
نور : زوجي بالشغل يجي اسبوع يمنا ويروح اسبوعين
عزام : نور سمعيني انت لازم تطلكين منه
نور : من يجي راح اكوله يطلكني
عزام : وراها ادزلج طلب تجين يمي
نور : واهلك لان اختك كالتلي انسي عزام
عزام : محد مسؤل عني
انت بس تطلكي والباقي عوفي علي
****
شاكر : اي الحمد لله نطوني اجازتي قبل يوم راح تتفاجئ نور بجيتي خل ادخل على كيفي خاف طيبه نايمه
دخلت على اطراف اصابعي
وسمعت نور تحجي بالتلفون
وصوتها مال وحده سعيده وفرحانه
سمعتها باذاني دكوله
(عزام انت حبي الاول والاخير ومستحيل كلبي ينبض لرجل غيرك )
سمعت الجمله ومامصدك معقوله هاي زوجتي الي دا تتكلم
يتبع التكمله بالجزء الثاني
****بقلمي فردوس عبد اللطيف ****