من كل بيت حكايه

ثاني

#من_كل_بيت_حكايه
ثاني
بقلمي :فردوس عبد اللطيف

اليوم راح ندخل لبيت ابو علي
حازم مهندس عراقي ذكي وطموح كمل ماجستير بامريكا وعجبته الحياة تزوج ثريا مدرسه جميله جدا وخلوقه حبو بعض وسافروا الى امريكا لتحقيق حلم الهجره الي اغلب العراقيين يحلمون بالسفر الى امريكا والعيش هناك من اجل حياة حره كريمه
اشتغل حازم بتجارة السيارات ونجحت تجارته
رزق بنتين وولد
البنت الكبرى سنا
البنت الصغرى هيا
الصغير علي
خل ندخل لبيتهم
فيلا جميله وحديقتها كبيره
ثريا تحب تهتم بالحديقه واهم شي عدهه زراعة الورود الي تضيف جماليه لكعداتهم
يوجد بالحديقه مكان مخصص لجلوس العائله حولينه اشجار خضراء وبالوسط نافورة جميله مزخرفه
واليوم عطله الاسبوع والعائله السعيده مجتمعين بالحديقه وابو علي يشوي السمك المسكوف عالطريقه العراقيه والكل سعداء علاوي يلعب بالكره مع اصدقائة جيران امريكان
سنا بيدهه الابتوب وداخله على كروب بي عراقيين من الزمن الجميل
من كثر ما السيد حازم يحجيلهم على بغداد وجمالهه تمنت ان تسافر لبغداد وتحقق حلمها
لكن ظروف البلد ماتشجع
هيا مراهقه بعمر ١٤ سنه مدلله لابسه شورت ومخليه سماعات باذانهه وتركص عايشه بعالم ثاني
ثريا : هيا تعالي ساعديني نحضر السفره
سنا : ماما لاتعبين نفسج مراح تسمعج واذا سمعت مراح تسوي شي غير تخريب السفره
ثريا : شوكت تكبر وتشعر بالمسؤليه
سنا : ماعتقد تكبر عقلها بعده طفولي
جتي مسج لسنا عالماسنجر
هلو اني من العراق اذا تحبين ادزلج صور اي مكان بالعراق
دزيتلج مجموعه صور عن جمال بغداد اتمنى تعجبك
ثريا : عوفي النت وتعالي تغدي ماما السمك اذا برد ميصير طيب
سنا : لحظه ماما خل اشوف هذه الصور الجميله
حازم : اي موضوع مركزه بي حبيبتي سنا
سنا : بابا صور جميله من العراق
حازم : الله ......
اوعدج سنا اذا نجحتي بالكليه وبمعدل ممتاز اخذكم سفره الى بغداد
سنا : صدك بابا الا انجح وبمعدل ممتاز بس ها
لازم توفي بوعدك بابا حبيبي
حازم : ومتى أخلفت بوعدي ؟
ثريا : حازم تحجي صدك ؟ اروح اشوف اخواتي واخواني
حازم : كلنا نروح واخذكم عالاماكن الي دايما احجيلكم عنها
هيا : اني ميعجبني اروح شكو هناك ؟
حازم : كولشي حلو هناك بنتي
علي : بابا اريد العب ويه اصدقاء
حازم : اولاد عمامك هناك بعمرك حايعجبهم يلعبون وياك
******
سنا : انت ساكن ببغداد حسام ؟
هذا اسمك الحقيقي ؟
****
حسام يسكن بغداد متخرج من كليه الاداره والاقتصاد
لكن مامتعين مكظيها خروج مع اصدقائة وشرب الخمر تحت جسر الجادريه ...او يجتمعون بحدائق ابو نوآس
رفض عروض والدته يشتغل ويتزوج من بنات العائله
ومكظيها سهر مع اصدقائة وياخذ مصروفه من ابو وامه
حسام : مرحبا اعرفكم بنفسي ....
اني حسام شكلي اسمر طويل شعري اسود عيوني جوزي
اهلي مدلليني او الحقيقه اني مدلل نفسي ماحب العمل ولا احب الالتزام باي شغل
احب اطلع بالسياره وافتر بالمنصور والكراده هذه المنطقتين الي احبهم
مكظيها سهر وشرب مع اصدقائي والدي موظف وامي معلمه دائما احرجهه اطلب منهه فلوس واذا ماتنطيني ابقى اصيح لو ابيع موبايلي واخليها تنقهر وتشتريلي جديد
وقت فراغي افتح الفيس وشفت سنا معجبه بكل صوره تنزل تخص العراق
جربت نزلت كم صوره وهي تنبهر بيهن
راسلتهه ودزيتلهه صور لشارع النهر وشارع الرشيد
وابو نوآس
شو هاي نعجبت بالصور
واني هم استغليت الفرصه وتعرفت عليها
وكل يوم اخذ صور لمناطق جديده وادزهن الهه وهي تتعلق بي اكثر
سنا : شكرا شكرا حسام انت رائع وصورك كولهه جميله
حسام : بعدين اخذت صور يم الاماكن الجميله مثلا ساحة النسور وشارع الربيعي ببغداد
سنا : الله جميله الصور يا حسام لما اجي لبغداد اريدك تاخذني الى هذه المناطق الجميله
حسام : انت بس تعالي وانا اخذك لأجمل مناطق في بغداد
*****
سنا : ماما نجحت بامتياز وكملت الجامعه وراح اكدر اكمل ماجستير بس لازم بابا يودينا للعراق مثل ماوعدنا
ثريا : مبروووووك حبيبتي يوم تاخذين الدكتوراه وتفرحينا
هيا : مبروك اختي هنيالج خلصتي من الدراسه
كوه دا اقرى وماتهمني الدرجات المهم اعبر مرحله دراسيه
سنا : بعدين تعرفين قيمه الشهاده انت ملتهيه ويه الشله الفاشلين سهر وحفلات ذولي جماعتج ما ارتاحلهم
هيا : حبيبتي خل نصائحج لنفسج اني مسؤله عن نفسي محد مسؤل علي وصديقاتي كلهم بالشله شنو ترديني اكون معقده
مثلج مكظيتها بغرفتج وتقرين حتى عيونج ضعفت من القراءه
*****
حازم : استعدو للسفر الى بغداد حجزت طائره من دالاس الى تركيا ومن تركيا الى بغداد
سنا : الله شكرا باباتي هاي بوسه
ثريا : بنات كل وحده تحضر شنطتها واني احضر ملابسي وملابس بابا وعلاوي
حبيبي ابو علي اريد اشتري هدايا لاهلي واهلك
حازم : تعرفين ثريا اني اضوج افتر بالسوك اخذي سنا وروحي اشتري
ثريا : انطيني الكارت لو حولي فلوس
حازم : تدللين
*****
ثريا : نزلت للمول واشتريت هدايا لكل أقربائنا
سنا : ماما اريد اشتري هديه لصديقي
ثريا : تقصدين حسام ؟
سنا : نعم ماما
ثريا : اكو شي في بالج اخذيله ساعه اكو بالمول ساعات جميله واصليه
سنا : شكرا ماما
اشتريت ساعه ب 500 دولار لحسام
حلو الواحد يعيش لحضات ينتظر يلتقي باهله واقربائة
واصدقائة
ثريا : تدرين ماما صارلنا هوايه من كنتو صغار رحنا للعراق واليوم فرحتي ماتنوصف حا التقي باخواتي
واخوتي وصديقاتي
سنا : كنت اتمنى اروح لبغداد واتفرج على المعالم الجميله
واشوف كل المكانات الي شفتها بالنت
وحايتحقق حلمي الف الحمد لله ياربي
وراح التقي بحسام واشوفه بالحقيقه
ثريا : همم هو معجب لو صديق ؟
سنا : بصراحه ماما هو معجب واني هم معجبه بي بس كلت نلتقي وراح اكدر اتعرف عليه عن قرب وأحدد موقفي
ثريا : احسنتي طول عمرج ماتستعجلين
شكد تقدمولج وخطبوج بامريكا رفضتيهم سبحان الله انعجبتي
بشخص بالعراق
صدك لو كالو شما يطول طوله يرجع لأصوله
سنا : ههههه شنو هالمثل ماما ؟
ثريا : هذا مثل قديم
******
ثريا : تحقق حلمنا وسافرنا الى بغداد والتقينا باهلنا وأحبابنا
حتى صديقاتي المقربات بحثت عنهم واتصلت بيهم والتقيت بيهم
اما سنا
التقت بحسام وتعرف عالعائله ويجي ياخذهم هي وهيا وعلي
ويتفرجون على المناطق الاثريه
وبعض الاحيان حا زم يوديهم
حسام : سنا حبيبتي باقي اسبوع على سفركم وانت لحد اليوم ما ريحتي كلبي طمنيني
سنا : انت كلبك شيكول
حسام : كلبي من يشوفج يضطرب ويبقى يخفق سريع
تفكيري يتشتت عقلي يتوقف من التفكير
سنا : حسام انت شاب مثالي واني كنت انتظر اشوفك بالحقيقه
وأتعرف عليك وفعلا كلبي ماخذلني
واني حبيتك مثل ماحبيت بلدي واهلي وناسي
حسام : لا عفيه خليني وحدي وبس وانسي ذولي كلهم
سنا : الاهل هما السند والي مابي خير لاهله مابي خير لحبيبه.
حسام : اكيد اكيد الاهل هما العزوه وهما الاصل
افهم من كلامج انت هم تحبيني ❤️
اذن اتشجع واطلب ايدج واريد تحددين موعد ويه عمو
حتى اجيب اهلي يخطبوج ما دام انتو بعدكم بالعراق
واني مستعجل خل نعقد القرآن لان بس توصلين لازم تبدين
باجراءات الفيزه ...لان مابقى عندي صبر