من كل بيت حكايه

رابع

#من_كل_بيت_حكايه
بقلمي : فردوس عبد اللطيف
الرابع
السنه / ١٩٩٨
الاستاذ صهيب :مدير عام باحد الوزارات المهمه
الابن : عماد صهيب طالب كليه الهندسه مرحله رابعه
الام : معلمه باحد المدارس القريبه للمنزل
البنت : نغم مخطوبه وتعمل مدرسه
*****
ام عماد : صهيب اريد اسوي حنه لبنتي تفتخر كدام عيالهه
صهيب : وعلى شنو تفتخر وتردين تعزمين اهلج وكرايبج وصديقاتج ويجون ماعدهم غير
طلبات الي يريد يعين ابنه والي عنده مشكله بفلان وزاره
والي يريد يسفر ابنه يتعالج بالخارج على حساب الدوله
وتعال صهيب توسط للعشيره
ام عماد : شكو بيهه صهيب مو انت مدير عام ومعروف وعلاقاتك واسعه وتعرف كل المسؤلين
هاي غير كرابتك كلهم مسؤلين بالدوله
صهيب : تعرفين ام عماد اذا انزل راسي واروح اطلب واسطه من واحد منهم وره فتره حايجيني يطلب مني شغله
بالمقابل وبعض الاحيان يحرجوني على شغلات غير قانونيه
وانت تعرفين اذا وصل تقرير للمسؤولين على اي مخالفه
وداعتج يطيرون بليله ظلمه
خليني محافظ على مركزي ووظيفتي
ام عماد : شلون لعد مانسوي حنه ؟
صهيب : سوي شي بسيط ولا تعزمين غير عدد محدود
*****
نغم : ليش ماما حفلتي من دون البنات مابيها غير صديقاتي
واختج
ام عماد : ماما كوليلهم اهلنا كلهم مو يمنا بغير محافظه
نغم : حتى ام زوجي كالتلي شو ماعازمين احد
ام عماد : شسوي لابوج ميريد احد من صار مدير عام
عزل نفسه عن الناس بحجه يكلفوا يتوسطلهم ويحرجو
وهو ميحب ينزل راس لاحد
نغم : ابوي هوايه معقدهه
ام عماد : حبيبتي اليوم حفله زواجج لا تنقهرين ولاتخلين هالامور تأثر على حياتج
نغم : ان شاء الله بعدين احنا حانسكن وحدنا عمتي شعليهه بي
اكول ماما اكيد مراح يجي لعرسي
ام عماد : طبعا مايجي ابو العروس ميصير يجي
نغم : الناس تغيرت والحفله بالنادي
ام عماد : معوده يكول الحفله للعريس واهله ميقبل يحضرها
نغم : خل اروح اسلم عليه
****
صهيب : تفضل
نغم : ممكن اخترق خلوه بابا حبيبي
صهيب : تعالي بنتي
الله الله اجمل عروسه شافتها عيوني
مبروك حبيبتي ربي يسعدج
نغم : بابا حبيبي اليوم راح اروح لبيتي وراح اشتاقلكم
صهيب : حايفرغ البيت من شمعه منوره حياتنا
ربيتج احسن تربيه والحمد لله اليوم حاتنتقلين الى حياة ثانيه
مع شخص جديد عليج
لاتتصورين انت عرفتي احمد خلال فتره الخطوبه
اريدج تكونين صبوره على سلبيات زوجج تحاولين تحلين مشاكلكم بيناتكم بدون تدخل اي طرف
حاولي تفهمينه من نظره عيونه
من يكون تعبان من يكون منزعج
خليج انت دار الامان الي يلجأ الهه
ما اوصيج بنتي امورج الخاصه لاتحجيها لاحد
لا لصديقاتج ولا حتى لامج
نزلت دموعها نغم
وكف صهيب وحضنها
بنتي ترى الزوج مو مثل الاهل
نغم : شكرا بابا حبيبي على كل نصيحه
وابقى طول عمري اتعلم منك
غادرت غرفة مكتب صهيب ودموعها تجري
تلكتها امها
منال ام عماد : انت ليش تبجين خربتي مكياجج
روحي غسلي دموعج وعدلي المكياج حايجي العريس
شيكول عروستي تبجي
*****
تمت حفله زواج العرسان بقاعة نادي العلويه
وانتقلت نغم الى بيت الزوجيه
*****
عماد : الحمد لله يوم تخرجت وبقى بس التعيين
صهيب : تعينك حاضر
عماد : صدك بابا وين باي وزاره
صهيب : وزاره النفط
باجر تروح لمدير الاداره وتقدمله أوراقك والباقي علي
عماد : باجر من الصبح اني بالوزاره
صهيب : استنسخ كل مستمسكاتك واخذ صور
وحضر فايل واكتب طلب
عماد : ان شاء الله
*****
بعد مرور شهرين صدر امر تعيين عماد بوزاره النفط
عماد : بعد صدور امر تعيني باشرت بالوزاره
وتنسبت بمصفى الدوره
صحيح الراتب بوقتها ميسوى بس اسمها وظيفه
والوظيفه بيها تدرج وممكن اكدر اطور نفسي واكون مثل الوالد
لان هو القدوه ولازم اسير على نفس المسيره
*****
لكل منصب منافسين واعداء يتصيدون اي زله
صهيب : اليوم مالي خلك اسوق سيارتي وين عماد ؟
ام عماد : سلامتك صهيب انت مصخن لاتروح للدوام
لان عماد طلع من الغبشه
صهيب : عندي صكوك لازم أوقعها وعندي اجتماع بالوزاره
ام عماد : خل اسويلك حليب دافي افتح ريكك واخذلك بندول تخفض حرارتك
صهيب : عالسريع جيبيهن مستعجل
ام عماد : تاخر فد يوم شدعوه ملتزم الا با ل ٨ تداوم
صهيب : اذا اني اتاخر شلون راح أحاسب الموظفين عالدوام
ام عماد : هم حقك
******
الوقت الساعه العاشره صباحا
السكرتير امجد : الو صباح الخير ام عماد
ام عماد : صباح النور
امجد : حجيه استاذ صهيب كان تعبان وتخربط بالمكتب
واخذنا للمستشفى وحاليا هو بالانعاش
وكلت أبلغكم
ام عماد : يبوووووي لادكول مات ابو صهيب
امجد : لا لا ست اني دا انتظر وان شاء الله ماكو الا الخير
*****
ام عماد : ولج يمه نغم ابوج بالمستشفى هو جان مصخن وتعبان وهسه خابرني السكرتير يكول بالانعاش
اني رايحه للمستشفى انت خابري على عماد لان مجاي احصله خل يجي وراي
نغم : بابا حبيبي
*****
في المستشفى
ام عماد : ها امجد وين هسه ابو عماد
امجد : بعده بالانعاش الطبيب يكول انتظرو ٢٤ ساعه
ام عماد : زين شنو سبب الوكعه
امجد : الطبيب يكول جلطه بالدماغ  وممنوع يتحرك وميصير احد يدخل يمه
ام عماد تلطم على راسها تخربطت كعدت عالكرسي متكدر تحجي
دخل عماد
ماما ماما شبيج ؟
معوده كومي كافي ابوي  .... مابي هبطتين
شلونك امجد اشبي الوالد
نفس الكلام الي بلغ بي ام عماد
انت روح لبيتك تعبت ويانا احنا باقين يم الوالد
امجد : لا خليني خاف تحتاجون شي
عماد : معود هذا زوج اختي موجود روح ارتاح
****
عماد : يوم وجودج مراح يغير شي روحي للبيت ويه نغم
واني باقي ابات هنا
ام عماد : اي يمه هسه يجون يطلعونا
زين تحتاج شي ادزلك بيد زوج اختك
عماد : ماريد شي
ام عماد : ادزلك اكل
عماد : ماكدر اكل بالمستشفى مو تعرفين نفسيتي
ام عماد : لعد باجر من الصبح اني يمكم
*****
ام عماد : دخلت لغرفتها تذكرت زوجها وشخصيته القويه وهيبته وهاي المرضه مبين مابيها رجعه لنفس الصحه وألقوه السابقه
ام عماد : فرشت سجادتي وتوجهت لرب العالمين
طلبت منه مايحرمني من ابو عماد ويرجعه لبيته حتى لو عليل
*****
اليوم الثاني في المستشفى
الطبيب : انت ابنه ؟
عماد : نعم دكتور اني ابنه
الطبيب : احنا سوينه العلينا بس الجلطه ضربت على الاعصاب ويظهر هذه مو اول جلطه
بس ماحاس بيها الوالد
ابوك راح يعيش بس شلل كامل
عماد : شلون دكتور شلل كامل
الطبيب : كل الأطراف شلل بس راسه يتحرك وعيونه
حتى لسانه ميكدر ينطق
عماد : لا دكتور عفيه يمكن حضرتك متوهم ارجوك كولي غير كلام
كولي اسفره لاي بلد يتعالج مستعد اسوي اي شي
الطبيب : ميفيد بعد لان الاعصاب نشلت شلون يحيوهه
والدك مات سريريا بس يمكن رحمه رب العالمين
بقى بس نفس وهذه الحاله اكو ناس تتمناها ولا تخسر
شخص عزيز
عماد : بس يبجي لان الخبر نزل عليه مثل الصاعقه
ام عماد : يمه شكو لادكول ابوك مات
يبوووووووي ولج نغم ابوج عافنا
عماد : لا يمه مامات لا تصيحين
ام عماد : ليش تبجي هبطتني
نغم : دحجي عماد ليش تخلينا بالهبطه
عماد : ماكو شي بس لادكوليله ابوي انشل
ام عماد : يبووووووي سوده علي صهيب المدلل
عماد : انت ماعندج غير يبوي كافي فضحتينا
*****
بعد مرور شهر
ام عماد  : نورت بيتك ابو عماد
صهيب ...جالس على كرسي متحرك ولابس دشداشه
لايكدر يحجي ولا يحرك اي طرف بجسمه بس يباوع بعيونه
بس ام عماد تفهمه من نظرة عيونه لان عشرة عمر
*****
عماد : يوم انت من باجر لازم تعوفين الدوام
ام عماد : راح اقدم على تقاعد وابقى أداري ابوك
عماد : اشو الطبيب كالي تاخذه علاج طبيعي بلكي جسمه يستجيب مادام هو انسان قوي وعنده اراده
اريدج انت تحاولين تسولفين وياه وتحجيله على شغله قبل
وشلون هو من يصمم على شي
ام عماد : وانت ابني ماعدنا غيرك هم لازم تتفرغ لابوك
عماد : عمري وشبابي لابوي
*****
بعد مرور شهرين
ام عماد : يمه ابوك
عماد : اشبي
ام عماد : ضعفان ميقبل ياكل رافض وظعيته صح هو ميحجي بس عيونه تحجي الحزن الي بداخله
يشعر بالمذله لما يشوفنا نغسله ونغير ملابسه
وهو عاجز عن عمل اي شي
بس دموعه تنزل
عماد : يمه حقه بعد ماجان مدير عام والناس تتمنى يرد السلام عليهم هسه صار مقعد على كرسي بالبيت وعاجز عن
تحريك اي طرف بجسمه
باجر اخذه للطبيب بلكي ينطيني امل لو ينطي علاج يساعده
*****
اليوم الثاني
عماد : اخذ والده للطبيب
ام عماد ماكدرت تروح معاهم بسبب وظعها الصحي
عماد اخذ والده للمختبر لإجراء بعض التحاليل
بعد استكمال التحاليل
عماد : حجي راح اعوفك هنا يم باب العياده
لان جوه ازدحام وأدري بيك تختنك بس اراوي التحاليل للطبيب ويكتبلك العلاج ،،،،
ابو عماد   بس يباوع بعيونه
....
بعد تاخير عشر دقايق يم الطبيب
طلع عماد
الصدمه
وين ابوي ؟؟؟؟؟
رجع دخل جوه سال السكرتير
اني تركت الوالد باب العياده وعالرصيف
ماشفته
السكرتير : لا خويه ماشفته بس من دخلته للطبيب
وانت ليش تركته بره وحده
عماد : طلعنا بره سألنا الناس  الماره بلكي احد شافه
لكن كلمن ملتهي بنفسه
سالت الصيدليات والمحلات الي بالشارع
محد منتبه
تخبلت وين صار ابوي
منو ياخذه وشبسوون بي ؟ رجل عاجز !!!!شلل رباعي
شيسوون بي مثلا
ركضت على مركز الشرطه بلغتهم انطيتهم أوصافه
افتريت على كل المستشفيات
ماكو فايده
شلون ارجع للبيت الساعه الان ١٢ ليلا
شراح اكول لامي ضيعت ابوي
شنو هو طفل ويضيع ؟
******
عماد : رجعت للبيت في الساعه الواحده
ام عماد واكفه بالباب
ولك يمه وين صرت وين ابوك ؟ شنو السالفه
خابرني كولي شي خليتني مثل المخبله
لازمه الباب وخابرت بيت اختك وراح يجون بالطريق
احجي ولك عماد ابوك وين ؟
عماد ساكت
ام عماد : اكولك اني دا احجي ويه حائط لو شنو ؟
جاوبني ريحني ابوك وين وديته
عماد : يلطم على راسه
ابوي ضاع اني ضيعته بايدي
ام عماد : ولك شنو ضاع ؟ قابل جاهل ويضيع شو هو بالعربانه وميكدر يتحرك
عماد : يمه مابقى مكان مادورت عليه
ام عماد : شو اخذني وديني لنفس المكان
عماد : يمه عزلوا الاطباء مابقى احد وين ترحين شوارع فارغه
هو اني خليت  مكان مادورت بي
ام عماد : وهسه جاي للبيت تريد تنام وابوك بره
روح عماد رجعلي رجلي مثل ماضيعته
نغم : حبيبي بابا وين صار ؟ روح احمد ويه عماد بلكي تلكؤ
عماد : انتو ليش مجاي تصدكوني
ليش متصورين اني قصرت بحق والدي ومحتاج احد منكم يجي يدور عليه
احمد : هسه مو وكت ملامه امشي نروح على صديقي ضابط
نكلفه يهتم بالبلاغ الي سويته
****
مر الشهر الاول
والعائله بحاله صدمه لا الشرطه كدرت تعثر على ابو عماد ولا عماد واهله كدروا يلكون اثر لابوهم
مر الشهر الثاني
ونفس الوظعيه لا خبر ولا اثر لصهيب
بعد مرور ثلاثه اشهر لحادث اختفاء صهيب
نعيم صديق عماد : الو شلونك عماد
عماد : الحمد لله انت شلونك
نعيم : اكول عماد بعدك تدور عالوالد ؟
عماد : ماكو اثر أيسنا
نعيم : شوف عماد
اني البارحه رحت للزياره بالنجف وباب المرقد
شفت شخص يشبه والدك جالس بكرسي متحرك ومخلين ورقه على صدره مكتوب بيها انا شلل اربع اطراف
ساعدوني محتاج علاج ومخلي كاسه يخلوله بيها الصدقه
بس هوايه ضعفان ومبهذل والحقيقه لحيته طويله ووسخ
العفو من هذه الكلمه
بس هذا الي شفته اتمنى ميطلع ابوك
عماد : اشكرك نعومي
يوم وينج اني مسافر
ام عماد : وين طالع بهالليل ؟
عماد : رايح للنجف
ام عماد : شتسوي
عماد : بعدين اكولج
****
عماد : سافرت للنجف عيوني ماتشوف الطريق
مستعجل اريد اوصل
زين لما راح اشوف ابوي بعد ما أيست
شراح اكوله سامحني اني عفتك يم الباب
دموعي تجري ماتوقفت طول الطريق
وصلت بالليل
رحت ركض عالامام ماشفت ابوي بالباب
دخلت زرت واندعيت يطلع ابوي
اخذتني غفوه نمت من التعب
سمعت الاذان
غسلت وصليت
طلعت يم الباب كعدت انتظر يجيبووو بنفس المكان الي وصفليا نعيم
ماكو ما اجه
رحت اتريك واشرب چاي لان دايخ ماطولت عشر دقايق
رجعت وعيني عالمكان
اي اي اي هذا هو كاعد عالكرسي
هذا ابوي حبيبي
ركضت عليه دنكت بوسته وحضنته
المسكين بس يباوع بعيونه ودموعه تجري
اني من الفرحه ابجي مدري اضحك مدري اصرخ
يابوي وين جنت وشجابك هنا
بعدين تذكرت ميكدر يحجيلي الي صار بي
بهالاثناء جتي مره كبيره
هاي شنو وين ماخذه هذا الحجي زوجي
عماد : شنو زوجج هذا ابوي وانت خاطفته
التموا علي مجموعه ماعرف منين طلعوا
سحبو مني العربانه وابوي
وكالولي وخر منا جاي تخطف ابونا
بقيت اصيح معودين ابوي
شفت ميفيد وياهم لا تهديد ولا خوف
وراح ياخذوا لمكان ثاني وبعد مراح الكي
دقيقه حجيه انت شتردين اني حاضر
الحجيه : اني اشتريته بفلوس
عماد : منين اشتريتي
الحجيه : وانت شعليك تريدهم يقتلوني
عماد : حجيه ابوس ايدج  والله هذا ابوي
الحجيه : واني شعلي
عماد : زين شكد تردين ؟
الحجيه : ولو هو فايدني وخوش وارد حصلت بي
بس مو مشكله نطيني الفلوس الي دفعتهن وأخذه
*****
عماد  بعد ما بقيت اتوسل بيهم
شوفي حجيه هذا المبلغ ماعندي حاليا راح اتصل بزوج اختي
يحولج الحواله باسمج
الحجيه : يا تريدني انطيك اسمي حتى تحبسني
عماد : زين تعالي وياي ونأخذ الوالد ويانا نروح لمكتب الصيرفة استلم المبلغ واسلمج الفلوس وآخذ الوالد
الحجيه : انت تعال وياي اني اخذك لمكتب وهناك نخابر
اعرف اذا اركض للشرطه راح تتاخر الاجراءات ويمكن يودوا لمكان اخر ومراح الكي لذلك تصرفت بنفسي
واتصلت باحمد وحولي حواله بالمبلغ وسلمته للحجيه
واخذت ابوي ورجعت بي للبيت
***
ام عماد : يمه عبالي تخبلت من شفتك طلعت ركض
ثأري رايح تجيب ابوك الله ينطيك العافيه ولا يحرمني منك
خل نخابر اختك نبشرهه
رجع ابو عماد لبيته بعد ماتعذب فترة ثلاث اشهر بيد من لا يرحم وكل تفكيرهم الماده واستغلال صحه المريض
***
حبايبي هذه الحادثه حقيقيه وعلى لسان عماد ابن المريض
تمنياتي لكم بالسلامه وربي يكفيكم شر الاشرار
انتظروني بحكايه جديده
****** فردوس عبد اللطيف *****