من كل بيت حكايه

ثالث

#من_كل_بيت_حكايه
الثالث
بقلمي : فردوس عبد اللطيف

مهيمن : مرحبا اني مهيمن اعيش باحد المحافظات الجنوبيه
خريج اداره واقتصاد
طولي ١٨٠/ عيوني جوزي شعري بي رده ولونه ينطي ع حمار وبشرتي من الشموس صارت سمرا
شغلي / عندي محل أدوات احتياطيه للسيارات
كافي خيري شري حبيت زميلتي بالكليه واهلهه معاندين ميقبلون يزوجوهه مخليها تخدم امها المريضه واخوتها الصغار
والدهه توفى باحد الانفجارات وامها تمرضت وحاليا مقعده وهي الي تداريها
واخوهه الكبير يصرف عليهم وزوجته ماتريد تتحمل مسؤليه
اخوتها الصغار
بنين سبع سنوات
امير عشر سنوات
حبيتها حب جنوني بس اخوهه يرفض يزوجنياها واني باقي انتظرها يمكن كلبه يحن ويوافق
****
هذا ابن خالتي محمد يتصل خل ارد عليه
محمد : هلو مهيمن شعندك ؟
مهيمن : كول حمودي سوآلك معناها محتاجني ماعندي شي فارغ
محمد : مو الساعه ب ٨ بالليل وكلت خاف نايم
مهيمن : ولك شنام هو العاشك يعرف النوم دا احجي ويه الحب !!!!
محمد : الله يجمعكم باسرع وقت
اكول هيموني خالتك تريد تروح للمستشفى التعليمي وكالت خابر ع مهيمن يودينا
مهيمن : خير شبيها خالتي
محمد : لا مابيها شي بس جوارينا مسويه عمليه وكالت تروح توديلهه شوربه وهي تعرف ممرضه هناك حاتدخلهه
مهيمن : مو اكول شلون حاتدخل بهيج وقت
اني جاي تحضروا
محمد : فدوه لكلبك ابو الوكفات انت بس توصل سمعني هورنك المزعج
مهيمن : صار مزعج اني الك
******
الخاله : هلا يابعد خالتك يوم زواجك الا اركص ركص بعرسك واخلي كل البنات يركصن
محمد : هاي من هسه مفاولتك تريد تركص وتوكع الستيج يمه انت سمينه اذا ركصتي بالستيج راح يوكع
الخاله : اسكت ولك وانت هم من تعرس عبالك ما اركص
مهيمن : خالتي خاف متأثره بفيفي عبدو
الخاله : يا فيفي يانجوى فوآد ذني اذبهن كشر بشبابي جنت اركص ركص غير كبرت والعمر اله حوبه
مهيمن : اكولك انت متأكد هاي خالتي اخاف غير وحده
محمد : بصراحه اليوم اعترفت بلسانها اني انصدمت
يمه خاف جنتي تركصين بالفرقه الشعبيه
الخاله : دروحو اثنينكم كاعدين تقلدون اذا بيكم خير روحو عرسوا وخل نشوف منو يحجي صدك
محمد ومهيمن : ههههههه بالكصه
*****
الخاله : مو ترحون تفرفرون اني ماراح اطول
محمد : يمه اذا مو ساعه ماتقبلين
الخاله : غير سالفه تجر سالفه
هيأتها سهيله تنتظرني ابقو بمكانهم
مهيمن : خالتي هذا باب المستشفى ميصير نوكف هنا راح اطبك هناك على صفحه وانت بس رني علي اني اجيج يم الباب
الخاله : حبيبي ربي يحفظك
****
محمد : شخبار ك ويه أزل ؟ اخوهه ماغير رايه
مهيمن : معود بعده معاند .والسبب مرته مسيطره
مخليه الشغل كوله على أزل وهذه ماتكدر تحجي شي
واني هم تعبت ومليت
محمد : زين اذا امها ماتت هم مراح تنحل المشكله
مهيمن : طبعا ماتنحل لان اخوتها منو يهتم بيهم منو يدرسهم ويحتار بأكلهم
محمد : معناها مخليها وقف ؟
مهيمن : اي اكولك هاي سياره الشرطه شو وكفت كبالنا احنا ممخالفين
محمد : نزل الشرطي خل نشوف نزل الجامه
****
الشرطي : ولكم شجاي تسوون بهالظلمه
لواطه بالسياره الا ابلغ عليكم !!!انطوني موبايلاتكم اثنينكم
الموقف صعب لما انت كاعد بحالك ويجي رجل امن يتبلى عليك بجريمه عار وخزي وانت عمرك ممفكر بيها
بقوا الاثنين صافنين مع انهم يعرفون نفسهم ابرياء بس امام رجل القانون ...الشخص الذي يفترض بي يحمي المواطن
مهيمن : فتح باب السياره يريد ينزل
الشرطي :ابقى بمكانك لاتنزل ممنوع تنزل انتو اثنينكم ضبطتكم تمارسون اللواط بالشارع وبسيارتك وهذا عمل فاضح
مهيمن : انت تعرف كولش زين كلامك مو صحيح وجاي تتبلى علينا احجي من الآخر شتريد ؟
الشرطي : ها تريد ترشيني حتى اسكت
مو شفتكم بعيني
محمد : انفكست عينك ان شاء الله
الشرطي : ها سمعني شتحجي مو تحجي بصوت ناصي
هاي موبايلاتكم يمي وبيها كل خصوصياتهم وكل صوركم
هلا هلا عندك حبيبه واسمها أزل وهاي صورهه
شوف حبيبي اني راح اخذ موبايلاتكم وانت ولك باجر خابرني على رقمك انتظر منك مكالمه واكولك شروطي
****
الشرطي صعد بسيارة النجده ومضى بطريقه مبتسم وكأنه محقق العداله اشرلهم بايده وهو مبتسم
وسط ذهول الاثنين الي لا كدروا يتكلمون ولا يتصرفون اي تصرف
مهيمن : حمودي روح انتظر خالتي يم باب المستشفى
واني كاعد انتظركم
محمد : نزل من السياره حزين من الموقف الي تعرضله مهيمن بسببهم
الخاله : ها يمه شبي وجهك اصفر ؟
محمد : ماكو شي يوم صعدي بالسياره ولاتحجين اي كلمه بعدين بالبيت راح احجيلج
الخاله : يمه شصاير كولي
محمد : مثل ماكتلج لا تحجين ولا كلمه
*****
صعدت الخاله بدون ماتتكلم اي كلمه
خيم السكوت عالثلاثه لحد ماوصلوا للبيت
الخاله : شكرا حبيبي مهيمن تعبتك تعال تعشى ويانا
مهيمن : تسلمين خالتي عندي شغل ضروري
محمد : مهيمن على شنو ناوي سكوتك يخوف ؟
مهيمن : هذا الشرطي متمرس واكيد مسويها ويه ناس غيري هواي ومبتزهم والا انطي درس وادفعه الثمن غالي
محمد : شراح تسوي خوفتني ؟
مهيمن : بعدين احجيلك بس اذا احتاجك للشهاده أبلغك
محمد : اوك اني حاضر
خل اروح لا الحجيه تقلق مع السلامه