من كل بيت حكايه

تاسع

#من_كل_بيت_حكايه
سلسله قصص قصيره
بقلمي فردوس عبد اللطيف
كعدت عالارض والطم وافتح بالحبوب اريد اخذهم جرعه وحده
ماشوف الا نكفخت راشدي من شهله كومي تردين يكولون بيها شي وماتريدنا نعرف
ولج فضيله حتى بشرفج تطعنج انت تخبلتي واذا تموتين ترحين لجهنم
بدريه مو اني عايشه بجهنم لا اني يتيمه من صدك واكول اهلي ميتين
وجوه التراب اشو عايشين بايران واني هنا والحرب مستمره مالها نهايه
شوكت يجون وينقذوني
حتى بيت عمي سهيل منعتني اروحلهم ومن يجون البنات  تخوزرهم وتسمعهم حجي وتدز وسيله تكابلنا وتسمع شنحجي
حتى ماكدر اشكي   لاحد بس انت ومابيدج شي تساعديني
شهله خل اساعد نفسي اول مو زوجوني لابنهم مامفتهمه منه شي
يجيني بترابه ووسخ المعمل ويريد يتقربلي
غير المعيديات  الي يصادقهن
همزين كدر يحجي ويه ابوه وبنالي هالمشتمل وكعدني بي
انت ماتكدرين تطلعين من سجنهم هذا قدرج ولازم تتقبلي
بدريه ياريتني اموت واخلص من هالعيشه
شهله بعدج صغيره وماكو شي يبقى ع حاله
بدريه ما ريد محمود لو ابقى طول عمري بلا زواج ماريده
شهله انت حبيتي ريسان
بدريه بالبدايه اخذت الموضوع ضحك لكن كلبي حبه
شهله احنا مانكدر نختار هما يختارونه من توفى ابوي
عمي جاسب هو الي يحكمنا
بقيت ابجي وادعي ربي يفرجها علي
والي مكتوب هو الي يصير
وسيله هاي انت هنا وامي خبصتنا تصيحج وانت طرشيتي
شهله مو تلفزيون صوته عالي ماسمعنا
وسيله دكومي اجه ابوي
بدريه ركضت غسلت وجهي ماريد عمي يشوفني ابجي وراح يسألني واني متأكده مراح يكدر يغير شي لان فضيله هي الي تتحكم
وره ماكملنا الغده جبت الجاي وسمعت عمي يحجي ويه زوجته
خل اول اكمل بناء القطع الي شتريتهم
اشتريت قطع اراضي اكل ولد قطعه وقطعه خليتها باسمج هاي ابنيها بيت جبير النا اني وياج واذا متت ماريدج تتبهذلين البيت باسمج
فضيله عمرك طويل حجي
اخذت قطعتين وحده بصف الثانيه الي باسمج والثانيه باسم كاظم
وقطعه جبيره قسمتها ثلاث بيوت محمود وصالح وعدنان ذولي مسافه عنا
بقت بس وسيله دفعت عربون القطعه مالتها خلال هالاسبوع تتحول باسمها
نطيني مهله سنه وحده ابني قطعة محمود وازوجهم
فضيله حجي البنيه صغيره وحلوه شلون نعوفها وحدهه بيت وتدري محمود عسكري مامتواجد
اول شي ابني بيتنا وبيت كاظم وتعيش ويانا لحد ما يتسرح من الجيش
بعدين اني احتاجها تخدمني بالبيت
جاسب خلال سنه ازوجهم

بدريه كلمن يفكر بمصلحته !!!اني منو يفكر بي ؟
عندي مهله سنه بلكي بهالسنه تخلص الحرب ويجون اهلي ينقذوني
رحت ع دفتري وكتبت رساله ل ريسان وحجيتله كل الي جاي يصير
ولازم ينساني واني هم لازم انسى لان راح اتعذب
شمرتله  الرساله وراح
يوم الثاني من الصبح شفته من السطح واني الملم الفرش
بيده رساله
نزلت ركض اخذتها من يم الباب وسديته
شكله تعبان ومقهور
رسالته كلام حزين وطلب مني انهزم وياه
كلامه مو منطقي وين ما نروح يلكفوني ويقتلوني لان عمي جاسب
يكدر يوصل باي مكان بعلاقاته
جاوبت ريسان بالرفض وكتله بعد ماراح استلم منك اي رساله ولا راح اطلع
بالباب ،،،
لان ماريد يلكفوني وراح يسودون عيشتي
بس ريسان مالتزم بقى يجي يوميه ويحاول يدزلي رسائل يشمرهن يم الباب
من يروح اخذهه اقراها وامزقها
علاقه فاشله من بدايتها ماناقصني هموم بعد اضيف ع نفسي باب جديد
كافي علي ظلم عمتي فضيله ودلع وسيله
اما شهله صح تساعدني بس مرات احسها تستغلني انظفلها واساعدها بشغل بيتها
كل واحد منهم ياخذ قبل ماينطي !!
مرت السنه تركض والبيتين خلص بنائهم ماعدا بيت كاظم يحتاج بعض تشطيبات
تحولنا للبيت الجبير وشهله بقت بالمشتمل
ممنوع علي اروح الا بيدهم يودوني يمها لان هي الوحيده الي اكدر  افضفض يمها وتسمعني