اختار وين اللقى ياحلمي الأجمل على كفوف القمر والا على الغيمه

الجزء الثالث

جراح ابتسم:ارقصي
ابتسمت ريحان ووقفت تنتطره يشغل لها اغنيه
تمايلت كعادتها قدامه ولا كانت تفكر غير في فرحتها بالرقص
ما كانت تفكر بالتغير اللي يصير له وجوات قلبه مع كل ميله تميلها
من انعوجاج خصرها الذهبي لابتسامتها الساحره
-
فارس
مشى مع حازم اخوه الصغير وهو يتكلم معاه:ادخل كلم امي تجي تتغدى
حازم هز راسه وهو لابس ثوبه وجاي من المدرسه
فارس:اسمع
لف وناظره وتكلم فارس:لا ترجع تنام ابيك بسالفه
حازم:ابشر
دخل حازم البيت وفارس لف وناظرها تنشر الملابس ورا البيت
وتعصر الملابس بيدينها وتنشرها بالحبل
ابتسم ووقف عند الجدار وهو يطلع عليها ويناظرهت بتأمل
رفعت خصلات شعرها عن وجهها بانزعاج
وعقدت حواجبها من الشمس وثبتت الملابس بمساكات
وشالت الكروانه بيدينها ومشت راجعه البيت
لف على ورا فارس عشان ماتنتبه له واخذ نفس وتنهد
غمض عيونه بحزن وضيق ومشى رايح للمجلس
جلس وناظر ملامح عبد العزيز وجموده ولف عنه بضيق
دخل جراح وناظر عمه ورجع ناظر فارس وجلس جنبه
همس له:شفيه؟
فارس هز كتوفه وجراح ناظر عبدالعزيز:عمي
لف له عبدالعزيز وجراح ابتسم:ماودك نخرج نتمشى بهالجو العليل؟
فارس ناظر جراح وعبدالعزيز تكلم:لا
جراح؛عمي بتكلم معاك ولمره اسمع قبل تتكلم
وقف جراح وجلس عند عبدالعزيز وعبدالعزيز يناظره بجمود
جراح:بناتك بنشرون بذهب ومؤدبات ومتأكد ان مافي وحده بتغلط بينهم واللي سوته سما كان من رفضك وظلمك لو تفكر شوي شتبي البنت من ابوها؟
فارس نزل راسه وهو يسمع جراح
وعبدالعزيز يناظر جراح وكمل جراح:تبي من ابوها يربيها ويسلمها لرجال شاريها يحطها بعيونه بعد ما كانت تحت جناح ابوها وادري لو كان الرسول بايامنا ذي مارضي على اللي تسويه لا بالاسلام ولا بالعادات تقدر ترفض لبنتك شخص كفو ويبيها
لف لفارس واشر له:واحد وخمسين مره طلبها منك وصامل ما يضرك ويسوي اللي سواه ساري لانه يبيها منك من ابوها وقدام الناس كلها
عبدالعزيز هز راسه بالنفي:ماتدري عن اللي براسي ولا تدري عن اللي احس فيه ما اقدر ابعد عيالي عني بايديني ابيهم حولي بهالبيت وبالديره
جراح؛بس ياعمي مايصير بهالطريقه تشردهم منك اكثر محد بيصفى لك صدقني
عبدالعزيز:لا تحاول فيني هالشي اخاف منه ولا ابيه لي اني اقوم وانام وحيد مخوفني
جراح ابتسم:حتى لو بناتك تزوجوا بيبقون حدك وحوالينك
عبدالعزيز:انت فتره وبترجع المدينه وانا ما اقدر اوقفك عن روحتك انت واهلك خلني اتمسك على الاقل بعيالي
تنهد جراح وسكت وهو يناظره وفارس وقف وخرج من المجلس
-
وقف عبدالعزيز من ناظر سيارات داخله البيت
عقد حواجبه جراح ولف لفارس:من ذول؟
فارس:معتمرين من الحفر يعرفهم عمي لا جو بيعتمرون يسكنون تحت بايجار يعني
هز راسه جراح وناظرهم
ابتسم عبدالعزيز بجمود وسلم عليهم
ابو تركي:شلونك يا ابو راشد
عبدالعزيز:حمدلله تسلم انتم وش احوالكم ابطيتم هالمره
ابو تركي:اي والله انشغلنا وكنا نتتظر تركي ياخذ اجازه ونعتمر
عبدالعزيز ناظر تركي مبتسم وواقف جنبه:ماشاء الله توظفت؟
تركي:حمدلله
عبدالعزيز:حياكم اقلطوا
لف لفارس:علم اهلك داخل يجهزون
فارس هز راسه ومشى للبيت وتركي دخل المجلس وناظر ابوه
وابو تركي ابتسم وناظر عبدالعزيز:صراحه يا ابو راشد جيناك لموضوع قبل ما نروح لمكه
جراح جلس ودخل راشد بسرعه بالقهوه يصب لهم وحازم جلس جنب جراح
وجراح ابتسم له ولف يناظرهم
ابو راشد:امر والله
ابو تركي ضرب فخذ تركي:هذا ولدنا توظف ومن زمن طويل كان وده يكمل نص دينه من وحده من بناتك بس لزمت انه اذا توظف نطلبها منك
راشد وقف وناظر ابوه ورجع ناظر تركي اللي مبتسم
عبد العزيز اختفت ابتسامته وهو يناظرهم وكأنه ناقص يكملها الحين
ابو تركي:ويبي من بينهم الكبيره اكبرهم واذا ما خاب ظني لجين
ابتسم راشد وبسرعه تلاشت ابتسامته اول ما حس ان ابوه بيرفض
عبدالعزيز:احنا من زمان نعرفكم ونعم فيكم بس بنتي ماتبي الزواج ولا تفكر
ناظره تركي وعقد حواجبه وابو تركي تكلم بهدوء:كل شي يتغير خلهم يتعرفون على بعض ويجلسون مع بعض يمكن يكون في نصيب بينهم
عبدالعزيز:ماعندنا هالحركات يشوفها ويقعد معها
ابو تركي تنهد؛والله بغيت القرب منك يا ابو راشد والنعم فيكم بس قسمه ونصيب
عبدالعزيز هز راسه وقطع كلامه جراح؛والله انكم ناس طيبين ياعمي واحنا بنشاور البنت ونرد لك خبر
ناظره عبدالعزيز وجراح ابتسم له وراشد توتر من نظرات ابوه
ابتسم ابو تركي:على خير ان شاء الله
-
فجر
تناظر من الشباك:لجين حقك رجع زي كل سنه
لجين:حقك وحقك وش هالكلام وقلة الادب
ريحان ناظرتها:يعنني ما كان بيننا نظرات ونغزات
لجين:كنت بزر وهو ماهو منا
دخل حازم وناظر البنات:عمي يبي شاهي مر عشان ابو تركي
ريحان؛تعال انت تعال
مشى حازم وجلسته ريحان قدامها:انت وينك ماتجيني وتسلم علي! هاه جحدتني من دخلت المدرسه؟
حازم ضحك:لا بس امي ماتخليني اطلع من البيت عشان اذاكر
ريحان ابتسمت:اي كويس عشان تنجح وتصير زي اخوك ساري دكتور
حازم:لا بصير زي تركي اللي عندنا بالمجلس
لفت لجين عليه وريحان ناظرتها ورجعت ناظرته:وش يشتغل تركي؟
حازم؛طيار
رفعت حواجبها فجر بصدمه ولجين رجعت تشتغل
ريحان؛وليش جايين؟
حازم:ياخذون عمره
ريحان:ماقالوا شي طيب من هنا ومن هنا !
حازم:الا بس عمي رفض
قفلت المويه لجين وجلست وهي تناظره:رفض وش؟
حازم؛الرجال يقول يبي لجين تركي بس عمي رفض قام قال جراح انهم بيسألونك اول وعمي واصح عصب
ضحكت فجر بصدمه:ياويلي صدق الرجال يبيك
لجين انصدمت وناظرتها ريحان ورجعت ناظرت حازم؛تعال هاك لا ينكب عليك
حازم هز راسه واخذ البراد ومشى طالع من المطبخ
ريحان ناطرت لجين:شوفي من الحين بقولك لو راحوا وابوي ملزم ورافص والله لاتهاوش معه عاد هو خلقه كارهني
لجين:لا لا خلاص مانبي مشاكل
فجر؛حرام بنات الولد طيار ومتربي ماشاء الله احس حرام ابوي يرفضه
ريحان ناظرتها:حتى فارس حرام يرده واحد وخمسين مره
تنهدت فجر وناظرت لجين:لجين تكفين لا تعندين كلمي امي وابوي سوي اي شي
لجين بلعت ريقها بربكه وتوتر وريحان ظلت تناظرها بضيق
-
طلع عبدالعزيز ومسك ذراع جراح:شدخلك انت تتكلم بيني وبينه؟
جراح همس وناظرهم:عمي لا تركب راسك الولد ينشرى ويبي اكبر بناتك وحرام لجين تستاهل كل خير
عبدالعزيز:جراح شوف انا اعزك واقدرك واسمع منك بس لا تتدخل اكثر في شي لاني والله لاعلن عليك حرب منت قدها
جراح:ماعلي من شي عمي انا فتره وارجع لشغلي وديرتي بس بوقف الباطل وانا هنا
عبدالعزيز:بناتي مهن لزواج
جراح؛اجل وش لعبادتك؟ يخدمونك طول عمرك! حرام والله حرام
عبدالعزيز مارد ورجع جلس بينهم وتركي جالس
يناظر المجلس ومعصب ماتوقع ينرد وبهالسرعه
بعد ماتعشى خرج من المجلس وجلس بالارض يغسل يده
من صنبور بالحوش وجنبه صابونه غسل يدينه
ووقف عنده جراح وابتسم تركي:ماعليش ثواني
جراح:لا خذ راحتك
وقف تركي وهو ينشف ايده وجراح ابتسم له:ماودي ادخل فيك وانت لا تعرفني ولا اعرفك بس خير ما اخترت صدقني احسن بنات عمي
تركي ابتسم له:مافي نصيب حمدلله
جراح بلع ريقه وتقدم له:اسمع اذا تبيها حاول مرتين وثلاث بعمي لين يوافق ما بتلقى احسن منها والله
تركي عقد حواجبه وجراح ضحك باحراج؛ادري ملقوف بس ابي الخير البنت محد سألها ولا بيسألونها بيرفضونك على طول روح انت كلمها واسألها وشوف
تركي سكت ولف يمين ويسار بتفكير وجراح جلس وغسل يدينه
-
لجين
واقفه عند الباب وسلة الفواكه بيدها متضايقه
ولا تدرس شتسوي مشى لها جراح واخذ السله؛لجين
ناظرته وعقدت حواجبها:هلا
جراح؛برسل لك تركي يكلمك
لجين شهقت بخوف:لا لا تكفى مانبي مشاكل
جراح عقد حواجبه:انتي متأكده انك شقيقة ريحان!
ضحكت لجين باحراج؛ابد مانتشابه تكفى جراح لا تسوي لي مشاكل
جراح:يابنت الحلال فرصتك
لجين بلعت ريقها بارتباك وجراح ابتسم وهز راسه
دخل بالفواكه وناظر تركي:تركي تارك سيارتك شغاله انت؟
عقد حواجبه تركي:لا
جراح لف وناظر السياره:اجل من شغلها؟
تركي وقف يناظرها وجراح همس له:البنت تستناك روح كلمها
ناظره تركي بصدمه ورجع ناظر وراه ابوه يسولف
مشى بهدوء للوصف اللي اشر له جراح
ووقف عند الباب المفتوح وعقد حواجبه؛في احد؟
لجين من ورا الباب همست:اي
تركي بارتباك اخذ نفس:والله ولد عمك فيه الخير بغيت اعرف رايك اذا كان نفس راي ابوك والا لا لاني ضايع
لجين من ورا الباب اخذت نفس:محد سألني واخذ رايي
تركي نزل راسه بالارض:طيب وش شورك؟
لجين ناظرت ريحان وفجر وراها ياشرون لها ورجعت تكلمت:ابوي ملزم وانت منت ملزوم تنتظره يلين ويوافق
تركي:ابد بس انا طول عمري ابي وحده بنفس صفاتك انا تركت بنات الحفر لانك ببالي من اول
ابتسمت فجر وناظرت ريحان بضيق على لجين
ولجين ساكته وتسمع كلامه بضيق
تركي:اهم شي اعرف رايك الحين اذا في نصيب بيصير صدقيني
سكت ثواني:موافقه؟
لجين اخذت نفس بتوتر وفركت يدينها ببعض
دقتها ريحان واشرت لها ولجين خافت منهم وهمست:اي والنعم فيك
ابتسم وهمس:على بركة الله ان شاء الله
مشى وتركهم وطلوا من الباب يناظرونه وضحكت فجر:تقول والنعم فيك
ريحان صحكت:خليها تقول اي شي المهم يصمل ويرجع يطلبها
لجين قفلت الباب:كله منكم فشلتوني مهابيل انتم وجراح
ريحان:حبيبتي جراح او ما كلمه وخلاه يكلمك كان الحين انتي عانس
لجين ناظرتهم:ماظنتي يوافق ابوي
فجر:ابوي يستحي منهم صدقيني ان شاء الله يوافق
ابتسمت ريحان:والله لارقص بعرسك لين تتكسر رجولي
لجين ابتسمت وتنهدت بتفكير
-
جراح
ناظر تركي جالس بالمجلس وساهي وثواني
رفع راسه لجراح وابتسم له ورد له الابتسامه جراح
لف لعبدالعزيز:عمي بدون مقطوع لكلامك
لف ابوه عليه وعبدالعزيز ناظره:هلا
تركي:انا ملزم وابي بنتك على سنة الله ورسوله ولابي عيب انرفض واذا رفضك لي بدون سؤالك للبنت ذا يدل على قلة تربيتي واصلي تهين ابوي اللي يعزك ويقدرك وانا ما ارضاها علي وعلى ابوي
سكت ابو تركي وعبدالعزيز تنهد بحده وناظره:ابد ماهو عيب لا فيك ولا فابوك وانا اعرفكم من زمن طويل ومدخلكم بيتي من طيب اصلكم بس مافي نصيب
تركي:ماعليه ياعمي انا ماني راضي الا اذا سمعت راي البنت واحنا مستعجلين ونبي الموافقه
لف فارس لجراح وابتسم وجراح يناظرهم بفرحه
عبدالعزيز تنهد:شوف ياتركي والله لو اني ما اعز ابوك وادري انه بيزعل مني ما وافقت بس انت مايعيبك شي
ابتسم تركي وناظره ابوه بفرحه:هذا العشم فيك يا ابو راشد
واقف راشد عند الباب ويناظرهم ومو مصدق ابد ان ابوه وافق
ضحك جراح وتركي ناظره وابتسم ورجع ناظر عبدالعزيز
-
البتول
واقفه عند الباب ولجين جنبها وابو تركي واقف جنب عبدالعزيز
عبدالعزيز:شاوري البنت يا ام راشد يبون يسمعون رايها
لجين واقفه جنب البتول ومتوتره ماتوقعت بهالسرعه ربي
بيحقق حلمها وتتزوج ولا تكون عبء على احد
البتول:وش رايك يالجين؟
لجين بلعت ريقها:شوري من شور ابوي
جراح كشر وهو واقف جنب تركي وماسك كف راشد بتوتر
عبدالعزيز:ابوك موافق وانتي وش شورك؟
لجين اخذت نفس بصعوبه وتكلمت بهدوء:موافقه
ابتسم جراح وفارس لف لهم وابتسم
غمض عيونه راشد بفرحه ووحده من خواته بتتزوج
هز راسه عبدالعزيز ولف له ابو تركي:على بركة الله ان شاء الله
تركي ابتسم وسلم على راس عبدالعزيز ومشوا راجعين المجلس
راشد ناظر جراح؛جراح
لف له جراح باستغراب
راشد؛مشكور انت اللي حاولت مع ابوي
جراح ابتسم :مابيننا راشد حنا عيال عم اهل
راشد ابتسم له ووقف وهو يسمعهم يتشاورون على الملكه
-
كوثر
ابتسمت لها وهي متوتره:وناسه مره فرحت يوم قالت لي فجر
ريحان:بظبط زواجك واخليك قمر
فجر:بس تروحين الحفر معاه؟
كوثر:اي عادي خليها تروح بالعكس حلوه حفر الباطن
لجين:مدري خايفه كل شي صار بسرعه
فجر:واضح انه نصيبك من يوم ماصار كل شي بسرعه
لجين ابتسمت لهم:مدري
ريحان:ماعليك اه لو كانت معانا سما
تنهدت فجر ولفت لهم كوثر؛من اقنعه؟
لجين:اخوك
عقدت حواجبها كوثر:اخوي من يوم ما جا هنا وهو متغير لو تعرفونه من ايام المدينه ابد مامعه اصحاب ولا يتدخل بشي
ريحان ابتسمت لها:اكيد يتغير هنا
كوثر ناظرتها وصدت من فهمت قصدها
-
الساعه ٣:١٤ ص
واقف بالدرج ويناظر السماء ومبتسم
لف من سمع صوت خطواتها وابتسم لها:هلا
ابتسمت بفرحه ووقفت قدامه:انت تدري شصار والا انا احلم؟
ضحك وتكى بظهره على الدرج:ادري
وقفت قدامه واخذت نفس براحه:يالله قد ايش فرحانه لو اوزع فرحتي للكون زاد
جراح:شوي شوي كانك انتي العروس
ريحان:لا جد جراح من بين خواتي لجين اكثر وحده بفرح لها طيبه وعاقله مهي زينا ابد
جراح ابتسم لها:نصيبها زين عمي وافق ندري كيف اقنعه تركي
ريحان:اي حمدلله بس ما كان لك تدخل بالموضوع؟
جراح ابتسم ورفع كتوفه:ما ادري ما اذكر
ريحان ابتسمت له:ادري انك كلمته شكراً
جراح هز راسه بهدوء:ماسويت شي،تجين؟
ريحان:لوين؟
جراح ابتسم:وقابليني .. فـ المكان اللي عسى قلبك يدله..
ابتسمت ريحان وهزت راسها:يالله
مشت قبله ولحقها وهي طالعه من البيت وتناطر الطريق ومبتسمه
ماشي وراها ومبتسم ويناظرها تمشي للجبل وتوقف
اخذت نفس وغمضت عيونها:ممنونه لابوي هالمره
جراح وقف جنبها وهو يناظر الجبل
ريحان لفت له وابتسمت من تذكرت شي:من زمان ماطلبت مني كباية شاي؟ والا كانت مجامله؟
ضحك جراح وناظرها:لا والله ماني كييف شاهي ترا بس كان حلو من يدينك
ريحان:لو تطلبني الحين اسوي لك سويت من وناستي
جراح:دوم ان شاء الله هالفرحه
ريحان ابتسمت وجلست وجلس جنبها جراح
ناظرت اللي قدامها وهمست:لو كانت سما موجوده كان احلى
جراح:ماعليه ابوك اليوم وافق للجين بكره يوافق لسما وساري
ريحان هزت كتوفها:ماظنتي
جراح:اتركينا من ظروف الزمن وقسوة ابوك تعالي اشرحي لي كيف ما اسرح الا على صورتك ولا اشتاق الا لحسك؟
ريحان ابتسمت له وناظرته جنبها وجراح مبتسم لها
جراح:قادره تصنعين من روحي الف طير منزوع الجناح بس يطير ولا تسأليني كيف!
ريحان اخذت نفس وناظرته:ودي ما افكر كثير بس خايفه من يوم يجي شرّاي للبيت وينباع
جراح؛خلي خوفك على البيت انا موجود هنا والا المدينه
ريحان لفت لقدام تناظر الجبل وتفكر ثواني
وجراح يناظرها ومبتسم رفع كفه لكفها ومسكه ولفت له
جراح ناظرها:احب ريحة كفي بعد كفك
ريحان ابتسمت له وناظرت يدها بيده ورجعت تناظر الجبل
-
واقف عند شباكها ومبتسم ويحكي لها عن شعورها
وهي تتأمل فرحته وكلامه اللي يطلع من قلبه قبل فمه
ابتسمت له:راشد
ناظرها وسكت:هلا
كوثر:شوي شوي على قلبي وقلبك
بلع ريقه وارمش بعيونه وهمس:الله يقلب يسلمه
ضحكت ونزل راسه ورجع ناظره:الله يسلم قلبك
كوثر ابتسمت وهي متكيه على الشباك:صدق راشد وش سويت؟
راشد حك جبينه وناظرها:مدري
كوثر ابتسمت له:ممكن تطلعني الصباح معاك زي ماوعدتني؟
راشد:انتي سهرتيني الليل وبعد بتبكرين الصباح معاي؟
كوثر:انت قلت اخذك وانا ارعى الغنم بس ماجا وقت مناسب
راشد:ابشري
كوثر ابتسمت:متى تطلع؟
راشد:اصلي واخذ الغنم
كوثر هزت راسها:انتظرني اليوم
راشد هز راسه وكوثر دخلت وقفلت الشباك
-
الصباح
على شروق الشمس جالسين لف لها جراح:مابترجعين؟
وقفت واخذت نفس:الا اكيد صحوا
جراح ابتسم ووقف وناظر المكان:مع اني مامليت
ريحان:راشد الحين وقته لازم ارجع
جراح هز راسه ودخلت ريحان قبله ودخل بعدها
ناظر راشد يفك الشبك وابتسم له ومشى بيدخل البيت
ناظر كوثر طالعه مستعجله وبوتها بيدها:على وين؟
كوثر:بتمشى
جراح ناظرها ثواني وهز راسه ومشى من جنبها ودخل
خرجت كوثر وهي تلبس وتناظر الغنم ينتشرون:انتظرني
ناظرها راشد وابتسم ومشت بسرعه تلحق طريقه
مشت جنبه وراشد ماسك عصاته ودواس يمشي جنبه
خرج من البيت وكوثر تمشي معاه وتناظر الطريق
لف لها وناظرها وابتسمت له كوثر:شفيك؟
راشد هز راسه وصد لقدام:ولاشي
كوثر ناظرت العصى بيدينه ومدت كفها ومسكت كفه واخذت العصى
ناظرها راشد ومشت قبله للغنم وهي تدلهم الطريق:ماتخاف يضيع واحد؟
راشد:لا يعرفون بعض ويمشون مع بعض
كوثر ابتسمت بخوف:كثيرين راشد
راشد هز راسه وكوثر ناظرت الغنمه جنبها وضحكت
وهي تمسح عليها وتضحك ناظرها راشد:لا تاكلك
ضحكت كوثر وهي ترفع رجلها وتجلس على الغنمه
وراشد مشى وراها يمسكها لا تطيح
كوثر:الغنمه مصدومه من الثقل
راشد:هذا ماهو غنمه هذا طّلي
كوثر لفت وناظرته ماسكها وابتسمت وهي تناظره
وراشد وقف من شاف نظراتها همس لها:وش عاجبك فيني؟
كوثر ابتسمت وهي تناظره رفعت سبابتها على حدود شنبه:من حدود شنبك الكثيف لين شخصيتك وغموضك اللي ماشفته في احد
راشد ظل ساكت ويناظرها
كملت كوثر :ما ملت هالقد لعماد ولا انشديت هالشده لغيرك وكأنك تجرني لعالمك
راشد:ووش نصيبي ونصيب عماد!
كوثر نزلت نظرها ثواني تفكر وهزت راسها:ما ادري
راشد هز راسه وصد بعيونه:انزلي عن الطّلي
نطت كوثر ونزلت وراشد اخذ العصى من يدها ومشى قبلها
تنهدت وهي تمشي وراه وتناظر الطريق
-
لجين
واقفه بالمطبخ وتناظر امها تكلمها وخواتها يناظرونها
البتول:ابوك عطاهم موعد لارجعوا من العمره
لجين:امي ماعندي جهاز
البتول:وشو جهازك ذهبك وملابسك بس
ريحان؛امي تبين تودينها بقمصانهت ذي!
البتول:انتي مالك دخل لا تتدخلين
فجر:لا امي صادقه خليها تروح مع راشد المدينه وتقضي لها وانا عادي متنازله مابي لبس جديد
ريحان:انا ماني متنازله ابي لبس جديد لزواج اختي
البتول:اصبري اصبري انتي واياها بكلم ابوك واشوف
ابتسمت ريحان للجين والبتول طلعت من المطبخ
ريحان:متى بيروحون العمره؟
لجين:اليوم بعد الظهر
مشت لجين ووقفت بشباك المطبخ ولفت لهم:اخاف مايرجعون
فجر:بسم الله الرحمن الرحيم وش هالنكد
ريحان:لا بسلامتهم بيرجعون ماعليك
تنهدت لجين وريحان لفت لفجر واشرت لها
تاففت فجر وطلعت من المطلخ وثواني ولحقتها ريحان
فجر همست:مابي اروح لا تحنين علي
ريحان:حبيبتي خذا مستقبلك تبين تتزوجين زي لجين روحي الحين قابليه
فجر:مابي ريحان خلاص تعبت كم مره اروح له وارجع مكسوره!
ريحان تنهدت:مافي شي يجي ببلاش كل شي يتعب بالحياه روحي فجر روحي قابليه وكلميه يمكن ربي يحلها وييسرها
فجر تنهدت وريحان تناظرها هزت راسها فجر ومشت وهي تلف الشرشف على راسها
ابتسمت ريحان لها وخرجت فجر من البيت ماشيه
اخذت نفس تقوي نفسها ووقفت تنتطره ويدينها تفركها ببعض
وكأنها اول مره تشوفه واول مره تعرفه وتقابله
ناظرته جاي لها وبلعت ريقها بربكه
وقف قدامها وهمس:ياظالمه يا اقسى علي من الموت
فجر صدت بعيونها ولاردت عليه
فارس:ليش ماحنيت؟ وليش ماجيت؟ ليش ما سابقت اعذارك عشان تشوفيني!
فجر ناظرته:لاني مليت كل مره اجي واضغط على نفسي واروح مكسوره ليش من الاساس اجيك اجل
فارس:تبين نشرد زي اختك؟ والا تبيني احاول للميه؟ اختاري ولا تعذبيني اكثر طالت الايام وانا ماني قادر اتحمل اكثر
فجر:نسيت وش صار نسيت يوم دخلت الديره وبيدينك شقراء! فارس انا زين مني للحين اخليك تشوفني
فارس تقدم لها اكثر ومسك يدينها:ابعتذر عن كل شي الا الهوى ماللهوى عندي عذر
فجر بلعت ريقها بضيق وهي تناظره وفارس همس
:والله والله مابموت الا وانا احاول في ابوك وما بيوقفني شي الا الموت شوفيني حلفت
فلت يدها من يده ومشى راجع وفجر بضيق ظلت تناظره لين غاب عن عينها
عند فارس
دخل بيتهم وتنهد بضيق وانسدح
دخل حازم بكتابه وناظره:فارس تساعدني؟
لف فارس وابتسم وجلس:تعال وش عندك؟
جلس حازم قدامه ومد كتابه وفارس يناظر الكتاب وباله مشغول
ناظره حازم:فارس ساري مابيرجع؟
فارس ناظره وهز راسه:الا ان شاء الله يرجع بس بيرجع دكتور ان شاء الله
حازم ابتسم:ان شاء الله
-
وقف عبدالعزيز وجنبه جراح
وهم يودعونهم رايحين بسياراتهم
خرجوا من البوابه وهمس عبدالعزيز:عساهم ما يرجعون
لف جراح له وهز راسه بأسف:الله يهديك بس ياعمي شوف كيف فرحانين بناتك بالخبر
عبدالعزيز ناظره ولارد ورجع يجلس
جراح ابتسم وناظر السما مغيمه والظهر تو
لف لعمه؛اذا ماخاب ظني هذا جو مطر
عبدالعزيز:شكله
جراح:عمي خل نروح نتمشى كلنا نغير جو بدل قعدة البيت
عبدالعزيز:مافيني شده انا خذ راشد وفارس واطلعوا
جراح:لا عمي اخذ امي وعمتي البتول وعمتي زهور والبنات ونطلع سوا نتمشى
عبدالعزيز:وليه نروح نتغرق بالمطر ونرجع؟
جراح جلس جنبه:عمي تكفى لا تردني نروح ونرجع العصر الجو حلو
عبدالعزيز تنهد وهز راسه:روح كلم عمتك اول وشوف وش تقول
جراح ابتسم ومشى للبيت ودق الباب
انتظر ثواني وفتحت ريحان وابتسمت:هلا بحيي
جراح ابتسم وتقدم لها:اسمعي باخذكم مشوار وامشيكم بالديره بس نادي امك اقنعها
ريحان ابتسمت؛احلف؟
جراح؛والله روحي ناديها خل اقنعها
ريحان هزت راسها ومشت بسرعه وثواني طلعت البتول:هلا جراح
جراح:شلونك ياعمه؟
البتول:حمدلله
جراح:كلمت عمي نطلع كلنا نتمشى بهالجو الزين قال اسألك وناخذ شورك
البتول لفت لريحان اللي تاشر لها توافق:عمك موافق؟
جراح:اي ماعنده مانع
البتول:اجل زين خل نرتب الاغراض ونطلع
ابتسم جراح وهز راسه ومشى وريحان نطت بفرحه
-
شالت القهوه بيدينها والعبايه على راسها ومشت وهي تناظرهم
يتقسمون بين سيارة راشد وجراح كشرت من وانيت راشد
ولفت تناظر جراح واقف عند سيارته مشت لناحيتها
وناداها عبدالعزيز:هلا يبَه
عبدالعزيز:اركبي مع راشد
بلعت ريقها وناظرت راشد وركبت بضيق
ركبوا خواتها جنبها وتوزعوا وحركوا
ابتسمت وهي تشوف الجو مغيم وسيارة جراح قدامهم
طلعوا فوق جبل وتحته سد ووقفوا سياراتهم
نزلت وهي ترفع عبايتها على راسها ومبتسمه
فجر نزلت وراها:وش هالجو الحلو
لجين:اي والله ماقصر جراح طلعنا من البيت
فرشوا فرشتين وبانت على ملامحهم الابتسامه من الجو
عبدالعزيز مبتسم وجالس جنب البتول وزهور ويسولف
مشت ريحان بالقهوه بايدها ووقفت عند جراح ومدتها له
ابتسم جراح واخذها من ايدها ومشت راجعه وجلست بين خواتها وكوثر
وعبدالعزيز يسولف ومبسوط بالجو والعيال حوالينه
لفت زهور ناظرت حازم ونادته:لا تبتعد
حازم هز راسه وعبدالعزيز ناظره:خليه ماعليه خلاف
زهور:وش ماعليه خلاف السد تحته لو يزلق والا شي
عبدالعزيز اشر لها ومشى حازم ووقف عند الجبل
وقفوا البنات وهم يتمشون وريحان تناظره جالس ويناظرها
ابتسم جراح لها وصد بعيونه للعيال جنبه وراشد عقد حواجبه
وناظر حازم وهمس:ابتعد حازم
لف لفارس:روح الحق عليه
فارس تنهد ووقف وهو يلبس نعاله وجراح وقف:اصبر بجي معاك
وقف جراح عند الجبل وحط يدينه بجيبه وهو يناظرها
فارس مشى ووقف عند حازم:لا تقرب من السد ياخدك السيل
هز راسه حازم وهو يناظر المويه من تحتهم تجري
زهور لفت وناظرت حازم ورجعت تناظر عبدالعزيز
لف فارس وناظرها جالسه على الفرشه لحالها وتناظر الجو
وسمع صوت راشد يصرخ ولف ناظر حازم يتزحلق من طرف الجبل
وقف عبدالعزيز بخوف وزهور ركضت لهم
ناظرت حازم بالمويه والسيل يجره وفارس بيلحقه
سحبه راشد وجراح ناظره بخوف وفصخ جاكيته ونط بالسد
صرخت الهنوف وركضت لهم وهي تناظر جراح يحاول يسحب حازم
بس كان السيل اقوى ركض راشد لطرف الجبل ومد يده لجراح
ومسكه وشده له وسحبه لفوق ومشت الهنوف وجلست عنده بخوف
وزهور تناظر المويه وحازم مختفي عن نظرها
جلست على الارض ولطمت خدها بصدمه عبدالعزيز عقد حواجبه
والبنات واقفين بخوف ويناظرون الموقف اللي صار بسرعه
ناظر السد جراح وجنبه راشد بصدمه وهم ساكتين
وفارس جالس على الارض وماسك راسه ويناظر بصدمه
مسكت زهور البتول وهي تبكي وعبدالعزيز بلع ريقه بخوف
شد شعره فارس وهز راسه بالنفي وغمض عيونه
رفع راسه جراح وناظر زهور تبكي وتون وفارس لحاله جالس
حس انه غفل عنه وحس انه السبب باللي صار
لو ماطلعوا من البيت تحت اصراره بس هذا كان قسمه ونصيب
ريحان حاطه ايدها على فمها ومي مستوعبه اللي صار
ولجين وفجر ماسكين بعض ويناظرونهم مصدومين
-
البيت
الهنوف ماسكه جراح بخوف وجالسه جنبه
وعبدالعزيز تنهد بضيق وهمس:راشد جيب الزوالي وافرشهم بكره يمتلي البيت
راشد هز راسه وخرج من البيت
البتول ماسكه زهور:صلي على النبي الولد ان شاء الله طير من طيور الجنه
زهور تبكي وتهز راسها بعدم استيعاب
وفارس جالس وعيونه حمرا وقف اول مادق جوال عبدالعزيز
رد عبدالعزيز:السلام عليكم هلا..حمدلله ان شاء الله جايين
قفل وناظره فارس:هاه!
عبدالعزيز:لقيوه الدفاع المدني ويبونا نجي نشوفه
زهور:عايش؟
عبدالعزيز:الله يهديك شوفي الساعه كم وين يعيش الله يرحمه بس
فارس مشى بسرعه قبل عبدالعزيز وجراح لف للهنوف:بروح معاهم
الهنوف:تكفى جراح لا تتعب قلبي خلك
جراح:امي ماني مخليه ماني مخلي فارس لحاله
الهنوف:لا تبطي تكفى
وقف جراح ومشى معهم وركب السياره وحركوا
-
بعد اسبوع
جراح
طلع من البيت ودخل المجلس:سلام عليكم
ناظره عبدالعزيز:هلا وعليكم السلام
جراح:وين العيال؟
عبدالعزيز:ما ادري عنهم اخرج دور راشد وشوفه
جراح هز راسه وطلع ومشى للبيت
دق الباب وفتحت له البتول:تعال جراح تعال
دخل وناظر زهور جالسه بالنص وتبكي والهنوف جنبها
تنهد جراح:الله يهديك ياعمه باقي تبكين؟
زهور:ولدي هذا ولدي تبوني ما ابكي بعد
جراح:ما نلومك بس مو زين لك لا اكل ولا شرب ولا نوم
البتول:اجل ليتك تدري وش تقول؟
ناظرها جراح وكملت البتول:تبي تروح للمدينه ولعد تجي هنا
جراح ناظرها ورجع ناظر البتول:وين المشكله؟
البتول:صاحي انت لو يدري عمك ما رضى ولا وافق تترك بيتها هنا
جراح؛عاد ياعمه لين متى تلي تنقل تنقل بكيفها معها ولدها يرعاها
الهنوف:وانا رايي من راي جراح ماهو عيب ولا حرام تسكن بالمدينه واريح لها من هنا
زهور؛والله اني ماقدرت انام اتخيل طيوف حازم حواليني وكتبه وشنطته
تنهد جراح وناظرها تبكي وناظر البتول:ماسوت الا الصح وانا معاها لو تكلم عمي
وقف جراح وخرج من البيت وناظر فارس طالع من بيتهم
مشى له وناظره:كيف حالك؟
فارس هز راسه ولارد
جراح:فارس روح انت وامك انت تعبان وامك تعبانه وساري ماعنده خبر ولا حضر العزاء روح وبتلقى اخوك هنا
فارس بلع ريقه:ودي بس مابي اخليها
جراح تنهد وحك جبينه:طيب كلم عمي هالمره يمكن يتعاطف معاك
فارس هز راسه بالنفي:خل الامور تهدأ مافيني شده اتكلم الحين
جراح:اسمع فارس انا موجود هنا روح بامك واستقر وانا اقنع عمي هنا
فارس:مستحيل اخليها امي اذا بتروح تروح ساري هناك انا ماني طالع من الديره الا وانا متزوجها
جراح هز راسه بأسف:براحتك مابي اضغط عليك
-
راشد
كوثر من شباكها تناظره؛وليش تتضايق انت؟
راشد هز كتوفه:مدري بس لو ماسهيت كان ماطاح
كوثر بضيق:لا تقول كذا هذا يومه ولو ماطاح بالسيل يمكن يموت بالبيت هذا يومه وراح للي احسن منه وان شاء الله شافع لامه وابوه
راشد رفع راسه لها وناظرها؛احس كل ما اشوف فارس يضيق صدري حاله مايسر واتذكر ساري اللي ما يدري عن شي ويضيق صدري اكثر
كوثر تنهدت وهمست:اطلع لي
راشد ناظرها ورفع راسه لها؛وين؟
كوثر:تعال غرفتي بكلمك احسن من هنا
راشد:لا خليني هنا شوي واروح اصلاً
كوثر:تكفى راشد تعال
راشد رفع راسه لها وناظرها وهز راسه ومشى للباب
مشت كوثر بسرعه من غرفتها وركضت للباب وفتحته
وقف راشد وناظرها وكوثر ابتسمت له وارتمت بحظنه
وقف ثابت ولا تحرك فيه شي مصدوم ويناظر اللي قدامه
ويحس بيدينها على ظهره شاده عليه
غمض عيونه ورفع يدينه حوالينها تقدم بخطواته لين دخل البيت
وكوثر ابتسمت وهي حاظنته؛مابغيت صدرك يضيق وانا موجوده
تنهد راشد وهو يتنفس بهدوء ومغمض عيونه
بعدت عنه كوثر وناظرته وابتسمت:مايضيق لا وربك مايضيق وانا موجوده
ابتسم لها ومسك يدينها الثنتين وهو يناظرها بتمعن
-
جراح
جالس بالحوش ويناطر الزرع حوله وهادي ويفكر
حس فيها تجلس جنبه وابتسم لها:هلا
ريحان ابتسمت بهدوء ورفعت يدها لكتفه وشدت عليه:ليش ابطيت عني؟
جراح تنهد؛انشغلت من فارس والعزاء
ريحان؛جراح عمتي بتروح وملزمه تروح تتوقع ابوي يوافق؟
جراح ناظرها وتكلم بجديه؛اي يوافق وغصب عنها والله حرام جالسه هنا وتبكي على ساري مره ومره على حازم
ريحان تنهدت؛مصدومه للحين ولاني مصدقه ابد كان حوالينا شلون غفلنا عنه
جراح صد لقدام؛يومه ولا تحزنين عليه ان شاء الله انه شفيع لاهله
ريحان جلست باعتدال جنبه وهمست:ليت ساري كان موجود
جراح لف لها وناظرها:يبي يميل راسي على كتف احد
ريحان ناظرته بضيق وبلعت ريقها:لا يميل الا على كتفي
جراح ابتسم لها وميل راسه على كتفها وغمض عيونه
ناظرته ريحان قريب منها ورفعت يدها لراسه بتردد
شدته لصدرها وهمست له:مابعد هالضيق الا وتزين
جراح مسك يدينها اللي محاوطته:ومابعد هالحب حب
سكتت ريحان وهدت انفاسها ورفع راسه جراح من حس عليها
ناظرها تناظره وبهدوء وهمس له من قريب:
ظنك بعد هذا كله مابحبك! ظنك شعوري كذاب ناحيتك؟ والله ان قلبي لك شغوف وان ماملكه وتملكه احد غيرك ارحمي ضعيف القلب وحسّي
سكتت وهي تناظره يهمس لها ولا هي قادره تبلع ريقها من كلامه
جراح ابتسم ومسك كفها وباسه وهو مغمضه عيونه ورجع ناظرها
:ولو تدرين اني حبيت الريحان من ريحة ايدينك وحبيت سمّي الريحان
ارمشت ريحان وابتسمت بهدوء وابتسم لها جراح:
لا ضقت اضيق ومتى ما تفرح افرح لك..ولاغبت اموت ومتى ماشفتك احيابك
وان كان ودك ترسّيني على كحلك!..لميت عمري وخاويتك على اهدابك
ريحان نزلت راسها ورجعت ناظرته:من متى تقول وتحفظ شعر؟
جراح هز كتوفه وهو يناظرها:تطلع من بين شفاتي ولا ادري
ريحان اخذت نفس وظلت تناظره بهدوء:متى تزين ويتصلح كل شي؟
جراح:من يوم ما افصخ دبلتي واعلن فصخي لخطوبتي
ريحان سكتت بهدوء وجراح ناظرها:شفيك سكتي؟
ريحان هزت راسها؛منت مضطر تخسرها عشاني؟
جراح:مو عشان احد بفصخ خطوبتي عشاني انا لان راحتي ماهي هناك ابد
ريحان سكتت وظلت تناظره وجراح ابتسم:راحتي بين ادينك والله
-
عبدالعزيز
وقف وعقد حواجبه:وين تبين؟
زهور:المدينه
عبدالعزيز ناظر فارس جنبها ورجع ناظرها:وليه؟
زهور؛ماني قادره ارتاح عبدالعزيز فكر فيني شوي خل انانيتك وتسلطك وفكر فيني ما انام الليل والله من نوحي على ولدي ضاع قدام عيوني
عبدالعزيز:تتعودين خسرنا احبابنا كلنا وشوفينا عايشين
زهور:هذا ضنى اكثر من احبابك اللي تقول عنهم
عبدالعزيز:وتخلين بيتك هنا وارضك؟
زهور:ماني جايه اطلب اذنك جايه اعلمك وولدي بيجي معاي مالي مكان هنا
عبدالعزيز سكت ومشت زهور وطلعت من عنده
وفارس ظل يناظره وهادي
عبدالعزيز ناظره وهمس:لا تقول شي تبي تروح مع امك روح بنتي مكانها عند ابوها
فارس اخذ نفس من صدره وكأنه يقاوم الموت داخله:خالي لمره وحده بس لمره وحده من بين الاثنين والخمسين مره وافق تعبت والله
عبدالعزيز:الحق امك ماعندي بنات للزواج
هز راسه فارس وتنهد وخرج من عنده بضيق ولا بيده حيله ابد
-
فجر
واقفه ولامه نفسها بشرشفها وتناظر الشنط والاغراض بالحوش
وفارس يشيلها من على ظهره ويحطها بالارض
ارمشت عينها ونزلت دمعتها على خدها وهي تناظره
طلعت زهور وهي تبكي وبعيونها ضيق ونوح مايعلم فيه الا ربها
مشت ووقفت جنب فجر وناظرتها زهور:والله اني كنت ابيك له كثر ماهو يبيك بس ابوك وهذا حاله الله يرزقك باللي احسن منه
حظنتها وفجر هاديه ملامحها ودخلت من جنبها للبيت
ظلت تناظره لين حط اخر شنطه ولف لها يناظرها
ميلت راسها على الباب من طاحت عيونها بعيونه
مشى لها وخطواته ثقال ويجرها لها جر
وقف وهي على حالها بنظراتها ووقفتها
همس لها:حاولت والله بس كل الخطى كانت عكسك شسوي؟
فجر ماردت وهي تناظره وفارس همس:صدقيني لو اروح لابعد مكان ماني ناسيك بنت خالي وقريبة قلبي مني لي
فجر همست؛روح فارس روح واذا كان مرواحك صعب عليك انا بعيش وانت بتعيش فيني وبدوني
فارس تقدم لها وسحب يدها من لمتها بشرشفها وسحب خاتمها من يدها
واخذ بيده وناظرها:بروح بس يحرم عليك احد غيري انا لك وانتي لي ان كان بغوها بالطيب والا بالقسوه
فجر اخذت نفس ونزلت دموعها وهمست له:مابقوى انساك
فارس ابتسم لها وتقدم لها وباس جبينها بقوه وطول
بعد عنها وبلع ريقه ومشى بعيد عنها وفجر تناظره ودموعها تشكي حالها
-
مشت السياره وهم واقفين يناظرونهم طالعين من البيت
عبدالعزيز واقف ونظرته حاده لمكان سيارتهم
والبتول جنبه واقفه وتتنهد كل ثانيتين
وفجر بالسطح تراقب السياره وتبكي وماسكه اصبعها
مشت لها لجين وضمتها وجلست جنبها بضيق
مهي قادره تطبطب عليها ولاندري شتقول لها
وريحان واقفه بالسطح وتناظرهم بضيق وساكته
-
عبدالعزيز
:الحين راحت اختي واكبر بناتي بتروح واصغرهم طاشت وراحت من يبقى لي؟
البتول:انا موجوده وشوف عيال عايض قاعدين وبناتك اربع ماهم ثنتين بس
عبدالعزيز تنهد:عيال عايض بيروحون بس مدري متى؟
البتول سكتت من دخل راشد وناظرهم
وتكلم وهو يناظر ابوه:ليش ماخليته ياخذها؟
عبدالعزيز ناظره وعقد حواجبه:من هو؟
راشد:فارس يبَه ليه ماخليته ياخذ فجر معه؟
عبدالعزيز:جاي انت تهاوشني والا وش تسوي؟
راشد؛جاي الومك يبَه هالمره ماني ساكت خواتي مهم عبيداتك خلها تتزوج وتشوف حياتها لمتى بتتمسك فيهم لين يشردون؟
عبدالعزيز احتدت ملامحه ووقف والبتول بخوف تااشر لراشد
عبدالعزيز:وانت من متى طلع لك لسان؟
راشد؛يوم ماقدرت اسكت عن الحق
تقدم له وهمس له:لو تدري اني سامع باذوني ذي فارس يكلم فجر ياخذها مثل ما اخذ ساري سما اختي
عبدالعزيز جمدت ملامحه وراشد هز راسه
:بيشردون من حولك وحده ورا وحده وانت اقعد تبلم
البتول ضربت صدره توخره؛اذلف عن ابوك ياعاق تقول لابوك تبلم!
عبدالعزيز ساكت ويناظره وراشد يرد له النظره
خرج من المجلس وعبدالعزيز لف للالبتول:اذلفي نادي لي البنت
البتول:هدي نفسك هدي نفسك انت
صرخ بوجهها:ناددديها
البتول رجفت بخوف ومشت بربكه للبيت تنادي فجر
عبدالعزيز واقف وينتظرها تجي ومايتخيل تنعاد له الكره
ووحده من بناته تهرب مره ثانيه وهو على قولت راشد يتبلم
راشد سبق امه وطلع لهم السطح وناظر فجر ومشى
جلس قدامها وناظرته باستغراب وهو مسك كتوفها
:اذا قال لك شي ابوي لا تنكرين فجر اذا تبين نصيحتي خليه يضربك ويحبسك بس لا تنكرين تسمعين!
عقدت حواجبها ولجين ناظرته:وش السالفه؟
دخلت البتول بسرعه وسحبت فجر من يدها؛بتشردين انتي؟
فجر ناظرتها بصدمه ورجعت ناظرت راشد واقف
البتول:الله ياخذكم من بنات بتجلطون ابوكم انتم امشي يبيك يبي يذبحك عساه يفكني منك
فجر ناظرت خواتها بخوف ومشت مع امها
وريحان لفت لراشد:صاحي انت والله ليذبحها والله
راشد؛ما بيذبحنا اعرف ابوي انا بيضربها ويحبسها بس والله مايذبحها
لجين:ياويلي امش طيب فرع بينهم
راشد نزل وخواته جنبه خايفين ويسمعون صوت صراخ عبدالعزيز
طلت كوثر من الشباك بخوف وناظرتهم
الهنوف:وش صاير بعد؟
كوثر:مدري شكلهم يتهاوشون
الهنوف:ادخلي ادخلي لين يجي اخوك لا تخرجين تسمعين؟
هزت راسها كوثر وهي تناظر من الشباك ولاهي فاهمه شي
-
واقفه فجر وتناظره معصب من قريب ويهاوشها
ماسكه يدينها بخوف ودموعها على خدودها
عبدالعزيز:تبيني اشويك؟ واحرقك لين تموتين واقول ماتت محروقه؟
فجر ماردت وعبدالعزيز مسكها من شعرها:ردي علي بتشردين معه كنتي؟
فجر بكت ولا ردت وعبدالعزيز يجرها وهي تصرخ:رددي
البتول:خلاص اعتقها من ايدينك خلها احبسها ولا اخليها تخرج بس اتركها
عبدالعزيز دفها وطاحت على الارض تبكي :شيليها ما ابي اشوف وجهها
البتول مشت ومسكت فجر ودخلتها البيت:وخري انتي واياها
ريحان؛امي انتي اللي وخري والله ان حبستيها لا اصرخ بالديره كلها
البتول:يمين بالله ياريحان ان ماعقلتي لاعلم ابوك عليك انتي بعد وخري
مشت فجر مع البتول ودخلتها الغرفه وصكت عليها
ولجين وريحان يناظرونها بضيق
مشت البتول وخرجت من البيت وركضت ريحان للغرفه
جلست عند الباب وهي تتكلم مع فجر؛فجر والله لاخرجك ولا اخليهم يحبسونك زي الكلاب
فجر تبكي ولا ترد عليهم وريحان لفت للجين:وينه راشد؟ وينه ورطنا وراح؟
لجين:اسكتي تكفين لا يجينا ابوي بعد
ريحان مشت بسرعه وخرجت من البيت ومشت لين حصلت راشد
وقفت قدامه وصرخت بوجهه:تورطها وتروح تتمشى؟
راشد؛ماورطت احد اذا تبي تخلي ابوي يوافق كان من زمان المفروض تسوي كذا
ريحان؛اي والحين هي محبوسه داخل وانت تبي تمشي نظريتك علينا؟
راشد:ريحان وخري عني حتى انا معصب مو بس انتي
ريحان؛ليه تبي تروح لكوثر الدنيا؟
وقف راشد ولف لها وناظرها وعقد حواجبها
ومشت له ريحان:اي عبالك ما ادري عن غبائك؟
راشد لف لها:غبائي! وش سويت عشان اكون غبي؟
ريحان:لابسه دبله بيدينها ومملكه وتتسلى معك وانت ولا داري عن شي
راشد ضحك بصدمه:هو بس انا الغبي بهالبيت؟
ريحان سكتت وبلعت ريقها وراشد كمل
:حتى انتي يعني انتي احسن مني زين اني عارف وساكت ومخليه يضحك عليك زين ماسويت معروف وبعدتك عنه
ريحان؛مايخصك ابد
راشد:وانتي مايخصك اذا انا غبي فتراني رجال واقدر انساها واتزوج ولا علي بس انتي اللي بتقعدين حالك من حال اختك تبكين بالسطوح وتنوحين
ريحان ماردت وهي تناظره بعصبيه وراشد مشى وتركها
-
جراح
نزل عند البيت وفارس جنبه يناظر حوالينه
نزل ساري وناظرهم وانصدم:امي؟
مشى بسرعه وضمها وسلم على راسها ويدينها
لف لفارس وناظرهم باستغراب:وش جابكم؟امي وش صاير؟
زهور حاطه يدينها على وجهه وتبكي وساكته
ساري:وش فيكم؟ جراح وش صاير؟
فارس بلع ريقه:حازم اخوي عطاك عمره
جمدت ملامح ساري ولف يناظر امه اللي تبكي
ورجع ناظر فارس:متى؟ وليش ماعلمتوني؟ ليييش؟
جراح مارد وفارس ناظره بهدوء:اترك امي ترتاح وانا اتكلم معاك
ساري بعد عن امه وهو مصدوم وفارس مسك امه ودخل الشقه
خرجت سما وناظرتهم بصدمه وعقدت حواجبها:عمه؟
ناظرتها زهور وابتسمت بتعب ومشت لها
حظنتها وسما تناظر فارس ومستغربه ولاهي فاهمه شي
دخل ساري وجراح ماسكه من كتوفه وناظرتهم سما:شفيكم؟
ساري مارد وهو يناظر الارض وهادي
لفت لعمتها؛عمه ابوي فيه شي خواتي امي؟ احد يتكلم
فارس:مافيهم الا العافيه بس اخوي حازم عطاك عمره
لفت سما ناظرتهم ومن استوعبت همست؛الله يرحمه
ساري:كيف خسرناه؟ وش صار احذ يقول لي؟
فارس:رحنا السد كلنا وهو ابتعد وطاح بالسيل كان بيلحقه جراح بس زين ماخسرنا جراح وراه
ساري جلس وهو ماسك راسه بين ايدينه ويتذكر اخوه الصغير ومو مصدق ابد
تنهدت سما وجلست جنب عمتها وجراح واقف يناظرهم
:مابي اطول اكثر موصي امي ما اتأخر خذوا راحتكم واذا احتجتم شي كلموني
زهور:ماقصرت ياجراح الله ينور بصايرك يارب
جراح هز راسه وخرج من البيت ركب سيارته وحرك
ماشي ويناظر اللوحه قدامه تدله لليمين عقد حواجبه
وهدأ سرعته وهو يناظر الطريقين ولف يسار واخذ نفس
-
الساعه ٣:٠٠ ص
ريحان خرجت من الغرفه ومشت لغرفة فجر
جلست عند الباب ودخلت الورقه من تحت الباب
ولان الصوت يسري خافت تدق الباب على فجر واحد يسمعها
كانت كاتبه بالورقه"اذا كنتي صاحيه كحي"
انتظرت ثواني وسمعت فجر تكح اخذت نفس
وطلعت المفك من جيبها وهي تحاول تفك القفل وتحاول ماتطلع صوت
طاح القفل على الارض وغمضت عيونها ريحان بتوتر
نزلت تاخذه وجمدت محلها وهي تشوف رجول احد واقف وراها
بلعت ريقها وانفك الباب ووقفت فجر بخوف ومن ناظرت اللي وراها
جمدت محلها وظلت تناظره بخوف وتناظر ريحان اللي ماقدرت تتحرك
لفت ريحان ومن ناظرته وقفت وطاح المفك من يدها
عبدالعزيز متكتف ويناظرهم بجمود همس لها:بتهربينها؟
ريحان ماردت وبلعت ريقها وعبدالعزيز تقدم لها:بتهربينها زي ماهربتي سما؟
فجر نزلت راسها ونزلت دموعها ورطهم راشد وخرج من الموضوع
همست بين دموعها:انا طلبت منها
عبدالعزيز وهو يناظر ريحان:وتعرفين تفكين اقفال؟ ما استفدنا منك ياخساره
ريحان ماردت وهي تناظره وترجف ايدينها
عبدالعزيز نزل لتحت واخذ المفك ورجع وقف قدامها
:تدرين انك الوحيده اللي مابندم اني زوجتها! مشغلتني وجايبه لي البلا براسي مابحزن واندم على فراقك
نزلت راسها ريحان وبدون ماتحس دموعها تساقطت بالارض
عبدالعزيز رفع راسها وهمس:تبيني اذبحك واعلقك بالحوش عشان تكونين عبره لخواتك؟
مسكت يدينه فجر بخوف:لا تكفى اذبحني انا انا اللي بجيب لك العيب ماهو ريحان تكفى يبَه
عبدالعزيز دفها:وخري عني
مسك ريحان من يدها وناظرها:امشي معي
مشت معاه وهي تحس ان رجولها ما تلامس الارض من قوة يدينه
لحقته فجر وهي تتمسك فيه وتبكي وعبدالعزيز ماشي
خرج من البيت ونزل من الدرج وهو جارها بيدينه
فز راشد من صوت فجر وطلع من المجلس وناظرهم
وانصدم تقدم لهم وناظر ريحان؛يبَه وش فيكم؟
عبدالعزيز:اوسط خواتك تلعب بذيلها وتحسب كيدها يشفع لها تبي تدوس على كلامي وتهرب اختها
راشد ناظر ريحان ساكته ومغمضه عيونها
فجر مسكت راشد:تكفى راشد والله يذبحها ولا يفكر
راشد ناظره ياخذها لاخر الحوش ولحقه ومسكه من يدينه:يبَه صل على النبي انت فاهم غلط فجر ماتبي تهرب ولاشي قلتها انا كذا
عبدالعزيز مارد وراشد متمسك فيه وهو يمشي معاه
عقدت حواجبها كوثر من بعيد وهي تناظرهم
طلعت بسرعه بخوف ومشت لهم تركض ولف لها راشد
كوثر:عمي؟
عبدالعزيز لف وناظرها وارتبك:اطلعي بيتكم
كوثر:شسالفه شفيكم؟
فجر:تكفين لا يذبحها
عبدالعزيز ناظرها وفلت ريحان من يدينه وكوثر ناظرته:
عمي تذبح بناتك؟
عبدالعزيز ناظر راشد ورجع ناظرها:ارجعي بيتكم
لفت لراشد اللي يهز راسه بالنفي
مسكت يد عمها:شدعوه عمي الواحد يغلط بس مو حل اللي تسويه بتعذبها يعني؟
فجر:قد سواها والله قد ربط اختي سما بالحوش يومين
عبدالعزيز مارد عليها وهو يناظر فجر
كوثر:تكفى عمي اتركها عشاني انت الحين معصب بس بعدين بتندم لو صار فيها شي الايام مو كلها لنا وبيجي يوم وكل واحد ياخذ حقه من الحياه شوف محد باقي لك الا هالبنات ماتقدر تبرهم قبل مايبرونك!
راشد ظل يناظرها وكوثر تناظر عبدالعزيز وهاديه:والله ياعمي اني كنت اشوف فيك ابوي ولا ابي اخسرك زي ماخسرت ابوي
راشد سحب ريحان وناظرها:ادخلي داخل ادخلي
مشت ريحان مع فجر لداخل وكوثر ناظرته:عمي شفيك كذا بعيد عن عيالك؟ ليش مصر تخسرهم بدل مايكونون حولك!
عبدالعزيز:عشان مايتركون بيوتهم هنا واراضيهم ويتركوني هنا لحالي ويروحون مدينه ثانيه
كوثر:بس مو كل الحياه بيعيشون هنا لين متى؟ لا دراسه ولا زواج ولا شغل؟
عبدالعزيز مارد وهو صاد وراشد نزل راسه بهدوء
كوثر رفعت يدها على كتفه:الله يطول بعمرك ياعمي ويخلي لك عيالك لا تخاف من الوحده لان اذا ما كنت وحيد بالدنيا بتكون وحيد بقبرك بتتحاسب لوحدك
سكتت دقايق وهي تناظره ومشت رايحه للبيت وراشد ناظر ابوه
ومشى داخل البيت وراها
مشت كوثر وناظرت ريحان جالسه وفجر جنبها ضامتها
جلست عندها وناظرت فجر:ليش سكتوا ياخذكم يربطكم بالحوش وتسكتون؟
ريحان ناظرتها ولاردت وهي ضامه نفسها
فجر:مشكوره كوثر كلمتيه الهيتيه عنها والله مافينا حيل يصير فيها نفس اللي صار لسما من زمان
تنهدت كوثر وجلست جنبهم وهي ساكته
وراشد واقف ويناظرها:ليش فتحتي لها الباب؟
ريحان:كنت ابيها تشرد ادري بيخليها اسبوع بالغرفه محبوسه
راشد تنهد وصد ورجع ناظرها:لا تطلعين له ولا يشوف وجهك مانبي مشاكل
هزت راسها ريحان ولاردت وراشد ناظر كوثر:تعالي ارجعك بيتكم
كوثر هزت راسها ومشت معاه
طلعت من البيت وراشد جنبها يمشي وهادي
شوي ولف لها:مشكوره لو ماجيتي كان مادرى عن نفسه
كوثر :ماسويت شي بس مستغربه والله من قوته الله يهديه
راشد هز راسه ووقف عند درجهم
لفت له كوثر وابتسمت:لا تتفشل والا شي ترانا اهل ولا بيننا
راشد تنهد ولارد عليها
مشت وطلعت بيتهم وراشد مسك راسه بتعب وجلس على الدرج
حط يدينه على راسه ويفكر لمتى بيجلس مع ابوه ويتحمله
مو مجبور ابد يجلس بالديره ويترك جامعته ووظيفته
اللي بعمره شاف نفسه وتزوج وتوظف وهو يرعى غنم باقي
-
جراح
لف من الطريق يسار ووقف عند بيت خالته
دق الباب وفتحت له خالته وعقدت حواجبها:جراح؟
جراح ابتسم:كيفك يا خاله؟
ابتسمت:حمدلله حياك تعال اهلك معك؟
دخل جراح؛لا والله جيت لحالي
ام رنا:اي علومك؟
جراح جلس وابتسم:حمدلله كل امورنا زينه بس اذا ماعليك امر بغيت رنا بتكلم معها
ام رنا عقدت حواجبها:عسى ماشر في شي ؟
جراح:بغيت نتكلم انا واياها اول وبعدين تعرفين منها
ام رنا استغربت ومشت عنه وتركته ينتظر
جالس جراح ويناظر دبلته بايده ولف من شافها تدخل
ام رنا:اتركم لحالكم اجل
جلست قدامه رنا؛عرفت الحين وش تبي؟
جراح؛رنا انا جاي هنا نتفاهم واخلي الامور بيننا تمام ما كلمت امي بالموضوع ولا احد بس شفت من الافضل نتفاهم بالاول انا واياك
رنا تكتفت:تبيها؟ انا جالسه هنا انتظر رايك يعني؟
جراح:لا تصعبينها علي اذا تبين تعيشين معي وانتي تدرين ان ببالي وحده ثانيه وراضيه ماعندي مانع كيفك
رنا:ولا وحده بالدنيا تقدر ترضى
جراح؛اجل خلينا بكل ود نفصخ دبلنا وكل واحد يروح بطريق قبل ما نملك ويصير بيننا طلاق
رنا متكتفه وتهز رجلها وتحاول تمسك نفسها
جراح تنهد؛ادري صعب الموضوع عليك بس انا ولد خالتك ومو صاير الا كل خير حطي العيب علي اذا احد سألك ماعندي مانع
رنا ماردت وهي منزله راسها وتهز رجلها
جراح اخذ ثواني يفكر وفصخ دبلته من اصبعه وحطها على الطاوله
وناظرها وهمس:الله يوفقك يارب ويرزقك باللي احسن مني
رنا ناظرته وعشان كرامتها ما تنهان اكثر نزلت دبلتها وحطتها جنب دبلته وهزت راسها له
وقف جراح واخذ نفس وخرج من البيت بضيق
ركب سيارته وحرك راجع للديره ويفكر في ردة فعل امه كيف بتكون
-
وصل البيت على الساعه ٥ الصباح قبل الاذان بشوي
دخل البيت وناظر كوثر بالصاله جالسه
استغرب وعقد حواجبه:وش تسوين؟
كوثر ناظرته:تاخرت كنت استناك
جراح:ليش صاير شي؟ وين امي؟
كوثر:امي نايمه بس عمي
جراح عقد حواجبه:شفيه؟
كوثر:شكل ريحان سوت شي خلاه يعصب منها لدرجة كان بيربطها بالحوش
جراح انصدم وتقدم لها؛ليش؟
كوثر:ما ادري جراح بس رحت وكلمته لين فكها ورجعت البيت كنت خايفه منه بس ماقدرت اسكت واروح
جراح مسك راسه:لا حول ولا قوة الا بالله وينهم هم الحين؟
كوثر:رجعوا البيت وعمي مدري وين طلع من البيت
جراح جلس واخذ نفس وكوثر ناظرته:تاخرت كنت استناك تجي انت تكلمه
جراح همس لها:رحت لخالتي وكلمت رنا
كوثر جلست جنبه:رنا؟
جراح مد يده لها وناظرها:فصخت الخطوبه
ماردت كوثر وهي تناظر اصبعه خالي وجراح وقف ومشى للغرفه
ظلت كوثر تناظر محله وتفكر معقوله جراح
ضحى بخطوبته ورضى امه وتخلى عن رنا بس عشان ريحان!
وانا امشي بدبلتي باصبعي مع راشد واخذه بحظني ولا ابالي؟
عند جراح
من دخل غرفته مسك راسه مصدع ولف للشباك
ناظر البيت ظلام كان يبي يعرف السالفه ويطمن عليها
بس قال ينتظر للصباح ويشوف الحال
-
عند ريحان
ناظرت فجر نايمه وترجف ومعقده حواجبها
تنهدت على حالها واخذت نفس طويل
غمضت عيونها وهي تحاول تلقى حل
متى تتخلص من ابوها وحياته وتكمل دراستها
وتحقق اللي نفسها فيه وابسط احلامها
تلبس زي البنات وتعيش زي البنات الباقين
ناظرت خواتها جنبها بضيق وفراش سما اللي
مطبق بالزاويه لحاله تنهدت على حالهم
وكان ودها بهاللحظه اختها تكون جنبها
سما اقرب لها من اي احد تكون معاها
وتضمها بهالوقت وتطبطب عليها
فزت فجر وناظرت ريحان وهمست:مابتنامين؟
ريحان هزت راسها لها وانسدحت وناظرت فجر
تمد يدها وتمسك يد ريحان وتغمض عيونها
ابتسمت من بين ضيقها وشدت على يدها
وغمضت عيونها تحاول تنام وتهرب من الواقع
وتستعد لبكره يوم جديد ماتدري وش يحمل من عواصف
-
يوم جديد
صحى جراح وناظر الساعه قريب الظهر
وفز بسرعه وخرج من البيت ومشى
لين المجلس ودخل وناظر عبدالعزيز جالس
وقف من شافه ناظره وملامحه جامده
مشى وجلس جنبه وصد عبدالعزيز عنه
جراح:عمي؟
مارد عليه وجراح اخذ نفس:وش صاير امس؟
عبدالعزيز:خذ اختك وامك وارجعوا
جراح ابتسم:افا ياعمي نرجع ونخليك؟
عبدالعزيز:بيجي شرّاي ويشتريها بس خذ اختك وامك وارجعوا لا تتدخلون بيني وبين عيالي
جراح:عمي حنا عيال اخوك محنا غراب عشان ماندخل
عبدالعزيز:اكبر بناتي بتتزوج واصغرهم شارده والوسطى تتمرد علي من جيتم وهذا حالي مع عيالي
جراح؛هذاا كان من زمان المفروض يصير بس انت ماتدري عن شي ابد
عبدالعزيز:اختي راحت وش انتظر بعد من يروح الحين ويتركني
جراح تنهد:عمي صدقني بتتعب وانت تلملم الناس حوالينك غصب عنهم خلهم على راحتهم والله مهم مضطرين يعيشون بالديره
علدالعزيز:عيالي ويعيشون مع ابوهم باي مكان هو فيه
جراح هز راسه:على راحته بس احنا محنا رايحين الا بعد ما ينباع البيت
مارد عبدالعزيز وجراح وقف وتنهد وخرج من المجلس
مشى للبيت ودق الباب وانتظر ثواني وانفتح الباب
لجين من ناظرته:جراح ماهي طالعه لك مانبي ابوي يشوفها
جراح؛ناديها ماعليك من ابوك ناديها بكلمها
لجين:اسفه ما اقدر اخاف ابوي يشوفها
جراح:اذا ماطلعت انا بدخل لها صدق ما امزح
لجين تاففت ودخلت وتركت الباب مفتوح
انتظر وانتظر وانتظر ولا جات تافف ولف للباب
وناظرها واقفه وواضح واقفه من زمان
وقف وناظرها وهو ساكت وبلع ريقه:ليش ما تكلمتي؟
ريحان ماردت وهي تناظره وجراح تقدم لها
:وش صار علميني؟
ريحان هزت راسها بالنفي:مافي شي
جراح:يذبل الريحان وانا موجود؟ يزعل الريحان وانا موجود؟ ما يميل كتفك الا علي مو هذا كلامك!
ريحان:جراح تعبانه ابي ارتاح لحالي
جراح:غطي راسك وتعالي معي
ريحان هزت راسها:لا لا مابي لا تضغط علي
جراح :غطي راسك وتعالي المره الجايه بسحبك بدون ما تتغطين
ريحان تاففت ودخلت داخل واخذت شرشفها وطلعت له
مسكها من يدها بقوه ومشى من ورا البيت وطلع من البيت
وريحان تمشي معاه وتنهدت من شافت الجبل:مو وقته
جراح ابتسم ووقف عند الجبل ولف لها وابتسم:وقته وذا افضل وقت بعد
ريحان عقدت حواجبها وناظرته باستغراب
طلع من جيبه غصن الريحان ومسك يدها ولف على اصبعها
الغصن وهو يناظره استغرابها ابتسم وهمس:تتزوجيني؟
جمدت محلها وجراح مبتسم يناظرها وينتظر جوابها
-
راشد
دق شباكها وهو ينتظرها تفتحه ولا فتحته
ناظر ظلها وتنهد :افتحي شباك وجهك للظلام..علمي هذا الظلام انك قمر
انتظر ثانيتين وفتحت الشباك وناظرته بضيق
راشد ابتسم:اجيك بكل هالضيق وماتفتحين شباكك؟
كوثر:مابي افتحه وابتسم لك اكثر
راشد تقدم للشباك وحط يدينه عليه:وليه؟
كوثر هزت راسها:ما اقدر اكمل راشد يا انفصل واكمل معك او انقطع عنك واكمل معه
راشد سكت ثواني:وانتي وش تبين؟
كوثر مسكت راسها وهزته:ما ادري
راشد نزل راسه ورجع ناظرها:اختاري الاحسن والافضل لك انا ماني زعلان ولا بزعل بس ابيك انتي ترتاحين اذاكانت شوفتي تضرك وتصغط عليك فانا رايح
رجع خطوه على ورا وكوثر تناظره بضيق
لف وعطاها ظهره وغمض عيونه بضيق وسمع صوتها
:لو كنت انت الافضل والاحسن واخترتك انت؟
لف وناظرها وكوثر رفعت كتفها:تبيني؟
راشد سكت وهو يناظرها من الشباك تسأله
-
ساري
جالس وزهور جنبه هاديه وتتكلم معاه
ساري ناظرها؛ادري يا امي حمدلله على كل حال
زهور:بديت دراسه؟
ساري:اي
زهور:وكيف حالك مع سما؟
ساري هز كتوفه؛انتظر عمي يطق ويزوجنا
زهور:اختها لجين بتتزوج
ساري ناظرها بصدمه:احلفي؟
زهور هزت راسها:وانا لو كلمته بيوافق لك بس انت انتبه لدراستك
ساري هز راسه وصد بتفكير
دخلت سما بالقهوه وجلست بالارض:سمي ياعمه
زهور:لا لا ابي ادخل ارتاح مابي شي
سما ماسكه الفنجان وتناظرها وتنهدت وهي تشوفها تقوم
مدته لساري واخذه من يدها وسما ناظرته؛وش صاير؟
ساري:بتنصدمين بس اختك لجين بتتزوج
جمدت ملامحها وهمست:قول والله؟
ساري ابتسم؛وانا زيك ماني مستوعب وش صار معهم في غيابنا
سما ابتسمت:وفجر؟ وريحان؟
ساري هز كتوفه؛ماقالت لي امي اكثر بس تعرفين وش يعني هالكلام؟يعني اننا ممكن نتزوج ويوافق ابوك
ابتسمت سما وتنهدت براحه:معقوله بهالسهوله؟
ساري هز كتفه:نقول ان شاء الله
-
جراح
ناظرها وطول سكوتها:لهدرجه السؤال صعب؟
ريحان هزت راسها:اصعب من ما تتخيل
جراح وهو ماسك يدها؛وليش؟ اذا عشان ابوك ساري وسما مهم احسن منا واذا علي انا فصخت خطبتي تراني لاني اخترتك وابيك
ريحان هزت راسها بالنفي:على الظروف جراح امك وابوي مابتتسهل السالفه صدقني
جراح عقد حواجبه:وليه؟ ابيك قبل ينباع البيت واخذك للمدينه تكملين دراستك وتعيشين مع امي
ريحان تنهدت:ما ادري جراح
جراح اخذ نفس:مابي ازيدها عليك بس انا ماني مستعد اتركك هنا وارجع المدينه بدونك
ريحان؛حتى لو تضطر تاخذني بدون استئذان من ابوي؟
جراح ابتسم لها ورفع يدينه على وجهها:حتى ولو
ريحان ابتسمت له وهزت راسها؛ابيك
ابتسم جراح بامتنان وريحان مبتسمه ومتطمنه من كلامه
-
راشد
تقدم لها وابتسم:لو تبيني انتي والف متر بيننا ابيك
كوثر ابتسمت وهزت راسها:بشوف وش يخبي لنا الزمن
ابتسم لها راشد وكوثر قفلت شباكها واخذت جوالها
وهي متأكده من القرار اللي بتتخذه وارسلت
"ابي اكلمك اذا عندك وقت"
قفلت جوالها واخذت نفس طويل تهدي اعصابها
تسهلت الامور كلها وتوقعوا كلهم ان الامور بدت تتسهل
الهنوف
ناظرت جراح واقف قدامها ووقفت بصدمه:نعم؟
جراح؛فصخت خطوبتي من رنا بنت خالتي
الهنوف:وليش تتصرف من كيفك؟ليش ماجيت لي انا!
كوثر:امي اتركيه على راحته
الهنوف:انتي لا تتدخلين،وش السبب اللي خلاك تفصخ الخطوبه؟
جراح:ماني مرتاح
الهنوف:جراح انت ولدي واعرفك من جيت هنا وانت متغير وش عندك؟
جراح تنهد؛ابي بنت عمي
الهنوف جلست ومسكت راسها؛بنات الناس لعبه؟
جراح:لا مو لعبه بس انتي اخترتي لي رنا وانا اخترت غيرها وبالنهايه انا اللي بتزوج
الهنوف:شوف جراح انا اختي ما ارضى عليها ولا على بناتها ولا دريت انك بتفشلني عندها وش قلت للبنت انت؟
جراح:ماكذبت قلت ابي وحده ثانيه
الهنوف مسكت راسها وكوثر جلست جنبها:امي لا تعقدين الامور اكثر خليه على راحته
الهنوف:كننا ناقصين عمك عشان تبي وحده من بناته؟
جراح جا بيتكلم وسكت من سمع اصوات البواري
طل من الشباك وعقد حواجبه:اهل تركي
الهنوف:قفل على الموضوع لين نتكلم مره ثانيه
جراح مارد ومشت الهنوف لغرفتها وقفت كوثر جنبه جراح وهمست:جراح
ناظرها وعقد حواجبه:شفيك؟
كوثر:ابي اتطلق
جمدت ملامح جراح ولف يناظر مكان امه ورجع ناظرها:صاحيه؟
كوثر:اي ماقدرت وابي اكلم عماد واطلب الطلاق
جراح تافف ومسك راسه:خلاص بعدين نتكلم ونشوف حل بالسالفه
خرج من البيت وهو يناظر اهل تركي ومشى لهم
سلم عليه وجلس جنبه:تقبل الله عمرتكم
تركي ابتسم بهدوء ومارد
استغرب جراح ولف لعبدالعزيز يناظره يتكلم
ابو تركي:شلونك يا ابو راشد
عبدالعزيز:حمدلله انت وش اخر علومك؟
ابو تركي ابتسم وناظر تركي اللي جامد محله:اخباري تسرك ان شاء الله
عبدالعزيز عقد حواجبه:في شي جديد؟
ابو تركي:اي والله في
دخل راشد بالقهوه وجلس وهو يصب لهم
عبدالعزيز:اسلم وش عندك
ابو تركي:حنا على كلامنا نبي تركي للبنت بس تشاورنا مع الاهل وقلنا لو يكون بدل عشان لا تصير مشاكل بيننا
راشد رفع راسه وعقد حواجبه وعبدالعزيز جلس باعتدال:والله ماني فاهم شي
ابو تركي:انا خايف على تركي وانك رفضت بالبدايه قلت عشان نكون بالعدل ياخذ ولدك بنتي ويكون بدل تركي لبنتك وبنتي لولدك
لف عبدالعزيز على راشد وراشد يناظره باستغراب
ضحك عبدالعزيز:تخطب ولدي؟
ابو تركي:حشى بس قلت انه بدل لا مهر بين الاثنين ولا شي
جراح ناظرهم؛يالطيب البدل حرام من زمن بعيد
ابتسم ابو تركي:وانت من اهل المدينه باين منت من اهل القرى؟
جراح:الدين مافيه قرى ومدن وانا ماني راضي على اللي يصير
ابو تركي لف لعبدالعزيز؛ولدك يعيش عندك بزوجته وتركي يستاجر بيت هنا ويعيش مع بنتك ويكونون قريبين منك وحواليك
عبدالعزيز سكت وراشد ناظره؛مابي اتزوج انا ولاني مره مايكون لي راي
ابو تركي:افا يا ابو راشد بناخذ شور العيال احنا؟
جراح ناظر عبدالعزيز يفكر وهمس:عمي؟
عبدالعزيز:تقهوى يا ابو تركي ونشوف بالموضوع ذا
وقف عبدالعزيز وسحب راشد معه وخرج جراح معاهم
لف وناظره؛لا تتدخل جراح احسن لك
راشد ناظره:ماني متزوج
عبدالعزيز:اسكت انت بعد جات لين عندك النعمه وترفسها اذا تبي اختك تتزوج تزوج انت
راشد:وليه مو بالبدايه جونا يبون لجين ليه الحين اختلف كل شي
جراح؛عمي حرام اللي يصير وش بدل وما بدل؟
راشد:زواج ماني متزوج
عبدالعزيز:والله اذا تبي لاختك الزين تزوج عشان ماتعنس والا مو هذا كلامك؟
دخل عبدالعزيز وجراح ناظر راشد وهمس:صاحي ابوك؟
راشد هز راسه بالنفي:مستحيل يستهبل على راسي؟ عساها ماتزوجت مانبيهم
جراح سحبه:اسكت وط صوتك اصبر ندور حل للسالفه
رفع راسه راشد وناظرها تخرج من بيتهم رايحه لبيته
رفع راسه جراح وناظر كوثر تمشي وهاديه وجوالها بايدها
لف وناظر راشد يناظرها وصد وتنهد بتفكير
دخلت كوثر ومشت للمبطخ على رنة جوالها وناظرت الاسم
عماد يتصل اخذت نفس ووقفت عند الباب وردت:هلا
عماد تكى على كرسي مكتبه؛امري بغيتيني
كوثر اخذت نفس:اي
عماد:امري
كوثر:عماد صراحه ادري ان الموضوع كبير بس انا فكرت ولا اقدر اكمل
عماد عقد حواجبه وجلس:تكملين ايش؟
كوثر:ما اقدر اكمل ونتزوج
عماد جمدت ملامحه؛وليش؟ وش تغير؟ وش اسبابك؟
كوثر تنهدت :ماني مرتاحه ولا ابي اظلمك معاي يمكن افضل وخيره
عماد ضحك:تستهبلين داقه وتقولين ما ابغى ولا عندك اسباب؟
كوثر :لا تزيدها علي انا ابي اتطلق ولا تسألني اكثر اذا عندي لك معزه طلق
عماد هز راسه؛هذا الموضوع لازم اهلي واهلك يتكلمون فيه انا ما اقدر من راسي اطلق واتصرف اذا عند اسباب قوليها لاهلك
قفل وناظرت جوالها وتاففت بضيق
-
لجين
واقفه وتناظر ملامح راشد؛وش فيك صاير شي؟
راشد بلع ريقه ولارد
لجين همست؛بطلوا؟
راشد؛لا يبونك بس عندهم شرط
لجين:وش شرطهم؟
راشد ناظر ريحان تدخل الغرفه وتناظرهم باستغراب
لجين؛راشد تكلم وش فيهم؟
راشد؛يبونا بدل انا وانتي
لجين عقدت حواجبها وريحان انصدمت
لجين؛بدل؟
راشد؛يبوني اخذ بنتهم عشان تاخذين ولدهم بدون مهر
ريحان؛هيه وين قاعدين بالجاهليه؟
لجين بلعت ريقها وانصدمت وظلت تناظره
راشد؛لجين انا ابي لك الخير وبفرح لو تزوجتي بس مابي اتزوج
ريحان؛لا تتزوج لا انت ولا هي مانبيهم وع
لجين جلست على الارض وتنهد راشد بتوتر وارتباك
ناظرته لجين؛مايبوني يعني؟
راشد جلس عندها وناظرها:يبونك بس هذا شرطهم وانا ما اقدر عليه انا ابي وحده ثانيه وقلبي متعلق فيها
لجين ناظرت ريحان؛وانا؟ لو بطل راشد يبطلون؟
ريحان:لجين عاد انتي الف واحد يتمناك شتبين فيهم
لجين؛وينهم هذا وبالحسره وافق ابوي
راشد:لا تصعبينها علي لجين ما اقدر
لجين هزت راسها ودموعها نزلت
صد راشد بضيق وجلس وهو ماسك راسه
وريحان ناظرت لجين؛لجين انتي ماتحبين تركي وعادي عندك لو بطلوا بس فكري براشد
لجين؛ليش ماهو يفكر فيني هو يقدر يتزوج عليها اللي يبيها بس انا؟
راشد ناظرها وعقد حواجبه؛انا جايك وافكر فيك وانتي تقولين هالكلام؟
لجين؛اي راشد اي انت تزوج اللي تبيها بس لا تقطع بنصيبي تكفى
راشد سكت وريحان تكلمت بهدوء:كلكم لا توافقون لجين شفيك عاد قالك مايبي مو غصب
لجين:خلاص بكيفه بس خليه يحط براسه انه قطع بنصيبي
مشت وتركتهم وريحان ناظرت راشد وجلست عنده:راشد
راشد ناظرها؛ابيها مستحيل اتزوج غيرها والله امشي مجنون
ريحان تنهدت؛كلم ابوي كلم جراح كلم اي احد طيب تصرف
راشد هز راسه ووقف ومشى خارج من الغرفه
نزل من الدرج ووقف من شافها واقفه مع فجر وناظرته وابتسمت
مشى وتركها ولارد وطلع من البيت عقدت حواجبها كوثر
ولفت لريحان اللي نزلت وتناظرها:شفيكم؟
فجر؛شفيها لجين تبكي؟ بطلوا؟
ريحان:يبونهم بدل
كوثر عقدت حواجبها؛من هم؟
ريحان:راشد ولجين
جمدت ملامح كوثر وفجر لفت عليها تناظرها
سمعت صوت جوالها يدق بيدها وناظرت الاسم عماد
ورجعت رفعت راسها لريحان وهي مصدومه
-
راشد
خرج وهو يمشي بسرعه وركض جراح ومسكه؛راشد
لف له راشد وهو معصب وناظره؛نعم؟
جراح؛روح تصرف ابوك عطاهم كلمه حاولت اتكلم بس ماسمع مني
راشد:وخر عني
جراح؛وين بتروح وين رايح؟
راشد؛بروح ارمي نفسي بالسد بلحق ولد عمتي حازم
جراح تنهد؛امش راشد مو وقتك والله
راشد؛والله لارمي نفسي
جراح مسكه بقوه؛امش اجلس امشش
سحبه بقوه وجلسه بالارض ومسك وجهه بقوه؛ماتبيها ادخل زي الرجال وتكلم وخل عنك الهبال ترمي نفسك
راشد:مابيسمع مني
جراح؛اجل اشرد انت بعد الحق الباقين واشرد
راشد؛ولجين؟
جراح:ولجين شتبي بواحد كذا واهله كذا
راشد؛ماني اناني مابي اخليها تعنس مابي اكون سبب في تعاستها
جراح؛والحل؟ توافق؟
راشد؛لا اموت احسن خل يزوجونها وانا ميت ارحم لي
جراح:راشد وافق عليها خلاص اذا تبي سعادة اختك وافق اذا تبي سعادتك ارفض اما شغلت الموت ذي بطلها
راشد ناظره بضيق ومسك راسه وهو يفكر
وجراح واقف وعاض شفته ويتنهد ويفكر بطريقه يحل الموضوع
راشد وقف وناظر جراح؛عطني كلمه اجل الحين
جراح عقد حواجبه؛انا؟ كلمة وش؟
راشد؛اتزوج بنتهم وبعد فتره تزوجني اختك
جراح جمدت ملامحه:انت تعقد الامور اكثر؟
راشد؛ابي اختك ولو مادخلت حياتي كان وافقت الحين بس الحين ما اقدر اضحي فيها
جراح تنهد؛وهي تبيك على علمي تبي تطلق
راشد؛تعطيني اياه لو بغيتها؟
جراح تافف وهو يفكر:براحتها هي اذا تبي تتزوجك او لا
راشد؛انت عندك مانع؟
جراح هز راسه بالنفي:لا
راشد:اجل على وعدك لي بدخل واوافق على البنت
جراح هز راسه بوهقه ومشى راشد للمجلس
-
يوم جديد
منسدحه وتناظر اللي قدامها وهاديه ملامحها
ناظرت جوالها اللي يهز على الارض وبجمود
اخذته وناظرت الاسم عماد وردت
:الو
عماد وهو بسيارته:ايوا هلا دقيت عليك بعلمك اني جايك
جلست كوثر وعقدت حواجبها:جايني وين؟
عماد:بطريقي لكم بتكلم معاك ونجلس ونفهم وش السالفه
كوثر مسكت راسها بانزعاج:قريب؟
عماد:يبي لي نص ساعه واوصل
كوثر:طيب
قفلت منه وتنهدت وقامت طلعت من غرفتهاز
ناظرتها الهنوف وهي تلبس حذيانها:تجين تفطرين معي عند البتول مع البنات؟
كوثر هزت راسها بالنفي:لا عماد جايني
الهنوف عقدت حواجبها:ليه في شي؟
كوثر:بنجلس مع بعض ونتكلم
الهنوف:زين اجل بجلس واسوي قهوه عشان لا جاك
كوثر:لا امي ما يحتاج روحي انتي انا اسويها
الهنوف:على راحتك
طلعت من البيت الهنوف وكوثر مشت للمطبخ
وطلعت الدله وهي تلقم القهوه واخذت المويه الحاره
وحطت الدله على النار وجلست تنتظر فورانها
رفعت راسها للشباك تناظر الحوش فاضي
جلست تفكر وتحاول تلاقي حل
ليش خطواتها له كل مالها تزيد بعد اكثر
وليش يوم حصلت اللي ابتسم له قلبها ضاع منها
وليه يوم دقت على عماد بلغته ماسمعت قبل ماتتصل
طاشت القهوه ومسكتها بيدها وصرخت وفلتتها وانكبت على الارض
بكت وجلست بالارض ماسكه يدها وكأن انفجارها كان ينتظر
مع فوران القهوه بكت بصوت عالي ودخل جراح وناظرها بخوف
مسك يدها وناظرها:تعورت؟
كوثر هزت راسها وجراح مسكها وطلعها من المطبخ
جلسها وهي تبكي ومشى للمطبخ قفل الغاز وتنهد وهو يناظر القهوه بالارض
رجع لها بمنشفه مبلوله ومسك يدها وناظرها:شوداك المطبخ؟
كوثر مسحت دموعها ولا ردت وجراح تنهد
-
راشد
جالس بالمجلس لحاله ويناظر السماء قدامه
وملامحه جامده ويدينه مشبوكه ببعض
عقد حواجبه على صوت السياره ووقف
طل براسه وناظر السياره تدخل لين البيت
عرفها وعرف راعي السياره ومستحيل ينساه
لف وناظر جراح يطلع له وهو ينزل من السياره
رجع دخل المجلس وتخبى ولا يبي جراح يشوفه ابد
عماد ابتسم وسلم على جراح:شلونك؟
جراح:حمدلله حياك ادخل
عماد ابتسم ومشى معاه للبيت وجلس بالصاله
جلس جنبه جراح وابتسم:كانت بتسوي قهوه كوثر بس تأذت يدها
عماد ابتسم:لا عادي ماني جاي اشرب جيت اتطمن عليها
رفع راسه جراح وناظر كوثر واقفه وتناظرهم
ابتسم ووقف:اجل اتركم على راحتكم وانا بستأذن
مشى جراح وخرج من البيت وهو يلبس جاكيته
-
جراح
مشى بالحوش واستغرب هدوءه كان يلاقي
فارس وساري وراشد بهالوقت بالحوش
مشى للبيت واخذ نفس ودق الباب
وفتحت له وناظرته وهو لف لها
تكت براسها وناظرته بضيق:ماتسهلت لاحد تتسهل لنا؟
جراح تقدم لها وناظر ضيقها بعيونها:تتسهل لنا ولهم بس مافي امطار بدون بروق!
ريحان ناظرته وهي مميله راسها على الباب:انا من زمن متعوده على البروق بس انت تقدر تتحمل؟
جراح ابتسم لها؛انت شايل مظلة حبنا وهي بتخليني احتمي من البروق
ريحان نزلت راسها بهدوء وناظرته؛راشد وينه؟
جراح؛مدري طلعت ولا لقيته بالحوش
ريحان؛وافق؟
جراح هز راسه وكمل بهدوء:بس يبي كوثر اختي
ريحان عقدت حواجبها:كلمك؟
جراح:كلمني وكوثر كلمت عماد ما ادري وش بيصير بس الله يستر
ريحان تنهدت واعتدلت بوقفتها:اذا صار شي جديد كلمني
جراح هز راسه ومشت ريحان بتقفل الباب
ومسك يدها جراح وابتسم:تسوين لي كباية شاي؟
ابتسمت له وهزت راسها:انتظرني
هز راسه ودخلت ريحان المطبخ وهو لف يناظر السما
-
فارس
طلع من الغرفه وناظر امه ومشى لها:جالسه لحالك؟
زهور هزت راسها:ساري خرج بسما وكل واحد راح جامعته
فارس هز راسه وجلس وهو يفكر
وزهور همست له:فيك شي؟
فارس تنهد:اي افكر ارجع بريطانيا
زهور عقدت حواجبها:وليه؟
فارس:بروح اشوف احوال سابين واكمل طلاقها اللي مابدا
زهور:جراح قال يمديك تحلها بالسفاره
فارس:مابي اتعب جراح بروح لين تحل اموري وارجع
زهور تنهدت:تخليني لحالي ماتعودت على المكان!
فارس:ساري عندك امي منتي لوحدك
زهور بضيق:من بعد حازم صرت اخاف بعدكم عني
فارس وقف وباس راسها وجلس جنبها:اوعدك اني مارح اطول بس بروح الديره قبل اسافر
زهور؛ليه؟
فارس سكت ثواني وناظرها:بودع عمي
زهور هزت راسها وفارس ابتسم لها وجلس يفكر
-
ساري
وقف السياره ولف لها؛يالله انزلي
سما بلعت ريقها وهي تناظر بوابة الجامعه:ساري خايفه ماعرف شي
ساري:تتعلمين انا متأخر على المحاضره سما يالله عجلي
سما بخوف هزت راسها واخذت شنطتها ونزلت من السياره
مشت ودخلت البوابه وهي تناظر اشكال البنات ولبسهم
مدت بطاقتها الجامعيه اللي تحمل تخصص قانون
ودخلت من بين البنات وهي تتلفت وتناظر الجامعه ومساحتها
الكبيره والمباني الطوال والقاعات الوسيعه تمنت امنيه وحده
ان خواتها يكونون معاها ويدرسون معاها ولا تكون لحالها
-
عماد
ناظر كوثر وسكوتها اربكه:كوثر ادري ضغطت عليك بمكالمتنا بس انصدمت من تغير رايك
كوثر ماردت وهي تناظر الارض وساكته
عماد مسك يدينها وناظرته وتكلم:فهميني وش مغير رايك ليش من جيتي هنا تغير كل شي بيننا
كوثر ماردت وهي ساهيه وتسمع كلامه
عماد؛كان بيننا مواقف كثيره قبل ما اخطبك حتى وش تغير الحين ليش تبين تكنسلين كل شي بعد ما وصلنا لهنا؟
كوثر بلعت ريقها وهمست:خايفه
ناظرها عماد وعقد حواجبها وكوثر كملت والدموع بعيونها
:متردده وخايفه داخلي ضيق عماد ماني قادره اتنفس وضايعه
عماد بخوف همس لها:احد مضايقك احد تعرض لك جاوبيني؟
هزت راسها بالنفي:بس احس اني ماني قادره اعيش اكثر
عماد بلع ريقه من نزلت دموعها وحظن راسها وتنهد
:اجل ارجعوا لا تقعدين اكثر بهالمكان اصلاً هالمكان يقتل الواحد ارجعي وروحي مع صديقاتك واطلعي احسن من القعده هنا
ناظرته كوثر وعماد ناظرها بجديه:وانا اكون قريب منك هناك ازورك اكثر ارجعي كوثر شتبين تقعدين هنا؟
كوثر هزت كتوفها:امي وجراح؟
عماد:انا اكلمهم ماعليك انتي بس ارجعي لجامعتك وصديقاتك ولي
كوثر ظلت تناظره وهو يناظرها بهدوء
-
عبدالعزيز
خرج من الدور الارضي المكان اللي مستقرين فيه اهل تركي
وهو مبتسم ويدور بمسباحه على اصابعها ومبسوط
وقف عند المجلس على خروج راشد منه
جمد محله راشد وهو يناظر ابتسامته
وابتسم عبدالعزيز:هلا بالعريس
راشد مارد عليه وعبدالعزيز ربت على كتفه:كلم جراح يعطي خبر لعمتك زهور
مشى من جنبه ولا انتظر جوابه وجلس
ناظره واقف وعقد حواجبه؛مطول؟
مارد راشد وخرج من المجلس ومشى للبيت ووقف
وهو يناظر السياره جنب سيارة جراح
رفع يده بيدق الباب وغمض عيونه وشد من قبضته
فتح الباب وناظر راشد وراشد بادله النظر
عقد حواجبه عماد وابتسم:امر؟
وقف جراح عند الدرج بيطلع وكوبه بيده
ناظرهم واقفين قدام بعض ومشى لهم بهدوء
مارد راشد وهو يناظره وعماد عقد حواجبه
ولف لجراح؛ابكم؟
جراح بلع ريقه:امر راشد وش بغيت؟
راشد ناظر عماد ولف لجراح وهمس:ابوي يبيك
عماد صد عنهم وهو يطلع من جيبه دخانه ويدخن
جراح هز راسه:يالله جايكم اسبقني
مشى راشد وعماد لف لجراح؛جراح بغيتك قبل تروح
جراح وقف جنبه؛هلا
عماد؛كوثر تعبانه ونفسيتها تعبانه بعد انا اقول لو ترجع امك واختك المدينه وانت تبقى هنا احسن
جراح عقد حواجبه:هي قالت لك؟
عماد؛انا كلمتها وهي ماعندها مانع جراح اختك منهاره وشكلها اكتئبت وانا تهمني صحتها وسلامتها
جراح تنهد وهز راسه؛بكلمها واشوف رايها
عماد رمى سيقارته ودعس عليها؛زين اجل انا راجع
جراح:بالسلامه ان شاء الله
عماد هز راسه ومشى نازل وركب سيارته وحرك
دخل جراح البيت ومشى لغرفة كوثر ودخل
ناظرته كوثر ولاردت وهي تناظر الفراغ
جلس جنبها جراح وهمس:تبين ترجعين المدينه؟
كوثر هزت كتوفها ولاردت
جراح:كوثر علميني وش يريحك واسويه اذا مستصعبه انك تتطلقين من عمال انا اقوله
كوثر ناظرته وهزت راسها؛ما ادري
جراح تنهد ولف لقدام:كلمي امي وشوفي وش تقولك وانا مستعد ارجعكم واتم هنا لحالي
كوثر ماردت وجراح وقف وخرج من غرفتها
ناظرت الشباك مقفول ومسكت يدينها ببعض ولا تجرأت تفتحها ابد
-
جراح
لف وناظر راشد ورجع ناظر عبدالعزيز
عبدالعزيز:وش فيك تتبلم؟ كلم عمتك قول لها بيملكون الناس بنفس يوم الزواج قريب خلها تجي تقعد لين تحظر
جراح:خلها عمي تجي يوم العرس وترجع اريح لها
عبدالعزيز:انت كلمها ولا عليك من شي
جراح هز راسه:طيب طيب
سند ظهره وسكت وانتظر دقايق وخرج من المجلس
ودق على جوال ساري وانتظره ورد عليه:هلا جراح
ابتسم جراح:هلا بالدكتور كيفك؟
ساري:حمدلله زين خارج من الجامعه توي
جراح:يالله كويس بالتوفيق
ساري قفل باب سيارته:امر
جراح؛مايامر عليك عدو راشد ولجين تحدد زواجهم
ساري عقد حواجبه:راشد؟
جراح هز راسه بضيق:اي راشد ولجين بدل وزواجهم تحدد قريب
ساري هز راسه؛زين مبروكين
جراح:عقبالك بس بغيت اقول عمي يبي عمتي تجي لين زواجهم وترجع
ساري:ماظنتي صراحه بس بكلمها ابشر
جراح؛انت مابتجي مع اهلك؟
ساري اخذ نفس:ودي بس خايف والله
جراح:براحتك بس لو تجي عشان سما وخواتها احسن تجاهل عمي عاد انت بس اهم شي يكونون مع بعض الخوات
ساري:بشوف بكلمها واعطيك العلم
جراح:يالله اجل مابطول عليك سلام
ساري:سلام
قفل منه وناظر قدامه ثواني وحرك سيارته لجامعة سما
-
بعد مرور يومين
الليل الساعه ٢:١٠ ص
جفى عيونه النوم وقاست عليه الوساده
اتعبه صدره قبل راسه وجوف قلبه يعاني
جلس وهو يناظر السماء ظلما والجو ساكن
صوت الكلاب وصراصير الليل يتغنى مع القمره
ضم رجليه وبلع ريقه بتفكير وهو لحاله بالمجلس
وقف وحس الضيق ياكل شتات عظامه واخذ نفس طويل
لف وناظر البيت ولمباته المطفيه ظل يناظر البيت
لين انفتحت لمبة غرفتها وفز من مكانها ووقف
تردد يروح وتردد يظل جلس مابين اي ولا
عند كوثر
جراح؛عادي اجلس؟
هزت راسها كوثر وجلست وجلس جنبها جراح
لف لها:صاحيه؟
كوثر هزت راسها:ماجاني النوم
جراح اخذ نفس ولف لها:تبين ترجعين؟
كوثر:امي تبي ترجع وتاخذني معها وانا ما ادري عن شي
جراح:خليك من امي امي توترت يوم عرفت انك تعبانه من عماد بس انتي تبين ترجعين المدينه ؟
كوثر اخذت نفس ولفت له:اي خلاص مافيني شده اكثر هنا
جراح:تنتظرين الزواج والا ترجعين قبله؟
كوثر هزت راسها:قبله احسن
جراح تنهد وهز راسه :على راحتك وانا اخوك
وقف ومشى وكوثر صدت للشباك وهي تشوف الظل من وراه
غمضت عيونها بضيق وقف جراح وناظرها وقفل النور وخرج
ناظرت ظله ويدينه على الشباك ووقفت بالظلام تناظره
مشت للشباك ورجلينها تسوقها له لين فتحت الشباك
ورجع خطوه على وراه من شافها تفتح الشباك
ونشف دمه من عروقه وبين شرايينه من شافها تناظره
مبطي عنها من زمان لا شافها ولا عرف احوالها
يدور مابين الشباك والشباك لو يسمع صوتها بس
كوثر وقفت وهمست له:ليه راجع؟
راشد ارتبك وهو يطيل النظر فيها:ماشاقني الا جابني
عقدت حواجبها كوثر وبلعت ريقها
وراشد نزل راسه وهمس:ماجابني الا الشوق
كوثر جلست على الشباك واخذت نفس طويل:ابطيت
راشد ناظرها وتقدم لها وناظرها:وانتي ابطيتي وقتلتي الروح معك
كوثر ظلت تناظره وهمست:راشد
نزل راسه وغمض عيونه ولارد
وكوثر كملت:برجع بمكان ماجيت
رفع راسه وعقد حواجبه وكوثر تناظره وهاديه
كوثر:انت كنت اشياء حلوه بحياتي ولا بنساك بس ماني قادره اكمل
راشد:تبيني اكنسل واعنّس اختي؟ تبيني الحقك لوين ماتروحين؟ عطيني حبل يوصلني اك ولا تقطعينه تكفين
كوثر بلعت غصتها وهزت كتفها:فتره وتمر وتنسّي صدقني
راشد:عندك يمكن بس انا لا مارح انسى ولا بتناسى عبالك سهل تجين وتروحين؟ عبالك سهل تقربين وتبعدين على كيفك؟
كوثر:بتتزوج راشد افهم مابي العب على الحبلين
راشد ابتسم بسخريه؛اخذتيني باحظانك ودبلتك باصبعك ماشفتني تكلمت ابد
كوثر صدت بعيونها وهمست:خلاص راشد تكفى خلني امر واروح
راشد هز راسه ورجع على ورا وهو يهز راسه:مو غريبه لو رحلتي
وقفت كوثر وصكت شباكها وبكت بضيق وبخاطرها تصرخ
بس ماقدرت ولا بتقدر فكرت ان البعد بيكون سهل
وعلى مقولة البعيد عن العين بعيد عن القلب بس بتمؤمن بها!