اختار وين اللقى ياحلمي الأجمل على كفوف القمر والا على الغيمه

الجزء الثامن

جراح
وقف من الصدمه وسند يده على مكتبه
وقفل جواله بصدمه من اللي يسمعه
خرج من المكتب وعيونه حمرا من السهر
ركض للبيت واول ماوقف عند البيت
نزل وترك سيارته مفتوحه
فتح الباب ولفت الهنوف وكوثر عقدت حواجبها من شكله
الهنوف:وش فيك جراح! صاير شي؟
جراح بلع ريقه:انكشف المدفون وعمي انجلط وهو بالمستشفى
الهنوف بصدمه:اي مدفون؟
كوثر ناظرت ملامح جراح اللي مصدومه
وناظرت امها بصدمه اللي ماهي فاهمه شي
—
في المستشفى
سما تهمس لساري:ياويلي دعيت عليه امس
ساري تنهد ومسكها من كتوفها:خلاص مو صاير شي ان شاء الله
عضت شفتها سما وناظرت ريحان جالسه وهاديه
راشد واقف ويناظر الغرفه قدامه ويفكر باللي شافه
وفارس جالس جنب امه ويهديها من الصدمه
الكل كان موجود لين ركض جراح لهم
لفت ريحان ومن شافته وقفت
ناظرها جراح وبلع ريقه وهمس:وش صار؟
ريحان ماردت وفارس وقف وسحب جراح؛تعال
جراح لف وناظر امه وكوثر جايين وراه
جراح همس لفارس؛وش صار؟
فارس:فيحان دخل البيت وكشف المدفون وانجلط خالي
جراح انصدم وهو يناظرهم وتكى على الجدار
طلع الدكتور وناظرهم وتقدم راشد وهو ساكت
الدكتور بهدوء:تقدرون تشوفونه
راشد ناظرهم بخوف وريحان بلعت ريقها بخوف
دخل راشد وساري وفارس وجراح مشى بيدخل
وناظر ريحان ترجف يدينها رفعت نظرها له
ودخل غمضت عيونها وهي ترجف بخوف
كل ماتتذكر شكل عبدالعزيز وهو مجلوط بالمجلس
يقشعر جسمها وترجف يدينيها
سما جلست جنب ريحان وهمست:بتدخلين؟
هزت راسها بالنفي وفجر تقدمت لهم؛امشوا بنات
ريحان؛روحوا يكفي اللي شفته
سما ناظرت فجر اللي تأشر لها ووقفت تاركتها لحالها
غضمت عيونها ريحان بخوف وخرج جراح
من شاف فجر وسما لحالهم داخلين لابوهم
ناظرها جالسه ومغمضه عيونها ويدينها ببعض تفركهم
حست فيه يجلس جنبها وفتحت عيونها وناظرته
جراح بلع ريقه بلهفه وهمس:ليش مادخلتي؟
ريحان هزت راسها بالنفي:يكفي اللي شفته
جراح نزل راسه بصدمه وهمس:مستحيل اللي صار
ريحان اخذت نفس طويل وناظرته؛فلوس ايش ذي؟ وفيحان وش عرفه؟
جراح؛علمي علمك
ريحان ظلت تناظره وصدت بتفكير
وجراح لف لها ومد يده ليدها وناظرته ريحان
جراح:امشي ادخلي
ريحان:ما اقدر ما اقدر اشوف الانسان اللي جبروته على الكل الحين طايح ولا بيده يسوي شي ،ما اقدر
جراح تنهد ووقف وشد على يدها:ماني تاركك تعالي
ريحان ناظرته وجراح يناظرها جالسه
وقفت بخوف ومشى جراح ودخل الغرفه
وناظرهم جالسين حوالينه وهاديين ومن دخلت ريحان
مسكت دموعها بخوف وربكه وهي تناظر عبدالعزيز
فاتح عيونه ويناظرهم ولا يقدر يتكلم
غمضت عيونها بخوف وجراح ناظرها وناظرهم
الكل كانوا حوالينه وساكتين مصدومين من الوضع
-
لجين
تناظر تركي جنبها وهاديين بالبيت
وابو تركي بين لحطه ولحظه يستغفر الله
اماني بخوف من سمعت صوت السيارات
طلعت من البيت وهي تناظرهم داخلين
جراح واهله وراشد وساري وفارس
ابو تركي طلع وناظرهم ملامحهم عليها الجمود
وراشد حاط شماغه على كتفه ويناظر الحفره
اللي حفروها واخذوا اللي فيها الشرطه
ابو تركي:وين ابوك؟
راشد والضيق بعيونه:بالمستشفى
رفع نظره لاماني واماني تناظره بهدوء
صد عن الكل ومشى لبعيد وهم دخلوا البيت
لجين ناظرت البنات؛وش صار؟
فجر؛وش صار! شفتي انتي كل شي
لجين:يعني بيقعد مجلوط كذا؟
ريحان ماردت وسما بخوف تحس بالغصه
جراح رفع جواله وهويتصل على فيحان
رد فيحان وجراح همس:وش سويت؟
فيحان:شلون عمك؟
جراح؛ماهو بخير
فيحان:مرني المركز نتكلم وافهمك
جراح:ياليت الكل يحتاج تبرير
فيحان:انتظرك
جراح قفل وناظر العيال:تجون معي؟
فارس:اي انا جاي
ساري:وانا بعد بس وين راشد؟
-
راشد
جلست جنبه بهدوء واخذت نفس
راشد:ما كنت ادري انها فلوس
اماني نزلت راسها بهدوء
وراشد ناظرها؛من وين هالفلوس؟ وليش مخبيها؟
اماني:روح اسأل راشد وتأكد بنفسك
راشد هز راسه بالنفي:لو شفتي ابوي
اماني تنهدت وراشد ناظرها؛لو شفتيه كيف طايح بالسرير مو قادر حتى يتكلم يناظرنا كلنا وكله ندم وضعف
اماني:الله سبحانه ياراشد مافي اكبر منه ابوك تجّبر بالارض وعاند وهذا جزاه
راشد ناظرها:وش بيصير فينا اكثر؟
اماني:كل خير ان شاء الله
راشد ظل يناظرها واماني ناظرته بهدوء
انحنى بجسمه وحط راسه على صدرها
واماني رفعت يدينها وهي تناظره
بلعت ريقها بهدوء ورفعت يدها على راسه
وبيدها الثانيه مسكت بطنها تحس بالطفل داخلها
وشهو شعوره وابوه قريب منه حاط راسه
على طفله ولا يدري بشي
اخذت نفس اماني وهمست؛كل خير ان شاء الله
رجعت بسرعه وتخبت وهي مصدومه
جاته تبي تصبّره تكون جنبه بمصيبته
وناظرته يميل بحزنه عليها !
بلعت ريقها كوثر ورجعت بسرعه للبيت
وهي تحاول تستوعب اللي صار وصدمتها براشد
—
راشد
رجع وهو يناظر العيال بيركبون سيارة جراح
جراح:امش
راشد:جايك انتظرني
دخل البيت وجراح ركب السياره
دخل وهو يناظر البنات ومن ناظر كوثر
عقد حواجبه وهمس:كوثر!
ناظروه البنات وكوثر صاده عنه
زاد استغرابه وناظرته لجين بحده؛راشد
ناظرها وكملت لجين:الرجال يناظرنك برا وانت جاي هنا؟ شتبي!
مارد عليها واستغرب هدوء كوثر ومشى خارج
بغاها جنبه توقع تجيه وتصّبر عليه
طلع ومشى وركب جنب جراح وساري وفارس ورا
حرك جراح وهو هادي وراشد ساكت
لين وصلوا ونزلوا ورا بعض
دخل جراح بارتباك وناظر فيحان خارج من المكتب
وبيده ملف واوراق ومن ناظره:حياكم تعال جراح
مشوا وراه ودخلوا المكتب وناظر جراح
اسم فيحان على المكتب وانصدم هذا اللي يبيع عقار ويشتري؟
فيحان ناظرها وجلس:حياكم
جلس جراح وراشد قدامه والعيال واقفين
جراح:وش السالفه؟
فيحان حط الاوراق واخذ نفس :ياطويل العمرعبدالعزيز قبل فتره قصيره من بيانات البنك اكتشفنا انه ممكن يكون مختلس اموال او يغسل اموال
راشد يناظره وساكت وجراح عاقد حواجبه
فيحان:زي مامذكور عبدالعزيز كان يشتغل بالبنك العقاري وتقاعد بدون اي مشاكل
فارس:طيب وكيف اخذ الفلوس وخباهم؟
فيحان:كان بينه وبين مدير البنك مشاكل فيوم صارت المشكله بعد ٣ سنوات من تقاعده اتُهم المدير انه مختلس الاموال
جراح انصدم وناظرهم بصدمه
فيحان:يعني دبس المدير بالتهمه والواضح ان قصده انتقام ابداً لان الفلوس من عهد الملك السابق
راشد نزل راسه وبلع ريقه كان يدري ورا ابوه شي بس سكت
فيحان؛وانا من يوم مسكت القضيه وعرفت عن بيتكم قويت علاقتي فيك ياجراح وفي زوجتك كله عشان البيت
جراح تنهد ورجع ظهره على ورا
ساري:طيب وش جزاه خالي! يعني هو الحين حالته الصحيه متدهوره
فيحان؛معاي خبر واعذروني على اللي صار
فارس:ابد،بس وش بيصير في خالي؟
فيحان؛ترفع القضيه للمحكمه والقضاة رح يحكمون
جراح ناظر راشد اللي منزل راسه وناظر فيحان
:مشكور فيحان بالنهاية انت سويت واجبك وشغلك
فيحان ابتسم له وجراح ناظر راشد:يالله راشد
خرجوا من المكتب وهم مصدومين ويناظرون بعض
ركب جراح وهو يناظر الطريق بهدوء
وراشد يناظر من شباكه وهادي
وفارس مصدوم كان يهدد خاله ويحطه تحت الضغط
ولا كان عارف ان الموضوع هذا ممكن يأذي صحته
لف لساري اللي يناظر حوالينه ومو مستوعب شي
—
كرهوا الديره وارض الديره
وكل مافتحوا شباك وناظروا الفوهه الكبيره بالحوش
تضايقوا وصكوا مليون شباك
مرت ايام وابوهم بالمستشفى ينتظر الحكم
راشد
انتظرها تفتح شباكها وانتظر وانتظر
ولا لقي منها اي جواب
جاي بيروح وفتحت الشباك ولف لها
وقف تحت الشباك وناظرها؛وش سويتي فيني؟
كوثر ماردت عليه وراشد كمل:٧ ايام ما اعرف الا شباكك
كوثر:راشد
راشد باستغراب ظل يناظرها
كوثر:من تبي؟ اختار
راشد بصدمه:تستهبلين! انتي ومابعدك احد
كوثر:اجل ليش يميل راسك في حظنها؟
راشد نزل راسه من تذكر ورجع ناظرها:كنت ضايع ومشتت
كوثر:راشد كنت جايتك وتاركه كل شي والاقيك معاها؟
راشد تنهد:كوثر تدرين بغلاتك بقلبي تشكين بحبي لك!
كوثر:عاجبك يعني اثنين يحبونك ويهتمون فيك؟ تبي تلعب على الحبلين ياراشد؟
راشد:حشى والله كوثر انتي ومابعدك احد ولا قبلك اعيدها لك لين تفهمين
كوثر تنهدت بضيق وصدت لفوق
راشد:كوثر بخطبك
كوثر ناظرته وراشد ابتسم؛الامور مابتزين الا وانتي حلالي
اخذت نفس كوثر براحه وراشد كمل:انتظري لين تصيرين عروستي
كوثر ابتسمت له وراشد ابتسم
تركها ومشى راجع وكوثر تنهدت بضيق وقفلت الشباك
متى صدق يخطبها وتتحسن الامور تعبت تنتظر
-
ريحان
خرجت من الغرفه وناظرت جراح جالس
وقف من شافها وريحان مسكت الشرشف اللي عليها
:بغيتني؟
جراح تقدم لها:كل لحظه
ناظرته ريحان بهدوء وجراح كمل:اللي صار شفتيه
ريحان تنهدت ونزلت نظرها وكمل جراح
جراح؛كنت تحت تهديد السلاح،خفت عليك
ريحان ناظرته:تدري انها كانت اكثر من كلمه طعنتني ورحت!
جراح؛مارحت ظلت روحي عندك وظل بالي عندك
ريحان بعدت عنه وجلست وجراح جلس جنبها
ريحان:وش بيصير لابوي؟
جراح هز كتوفه؛المكمه تحكم بالعدل
ريحان نزلت نظرها:وش بيصير فينا؟
جراح تقدم لها؛نحنا ما انتهينا نرجع نكمل اللي بديناه
ريحان رفعت نظرها له وهمست:ماهو برضى ابوي
جراح؛يوم تعب ابوك صرتي تهتمين لرضاه؟
ريحان ماردت عليه وهي تعبانه من اللي صار
جراح:ريحان ابوك غلطان وهذا جزاه
ريحان ناظرت جراح ونزلت نظرها لتحت
رفع راسها جراح وناظرها:يالـ كل دكه من حُسنك شتل ريحان للجنه
ابتسمت ريحان له وجراح ابتسم من ابتسامتها
—
البتول
حاطه يدها على راسها وتناظره قدامها
يناظر وساكت ولايقدر يتكلم
تقدمت له وهمست؛ماهقيتك ضعيف ياعبدالعزيز!
غمض عيونه ولا قدر يجاوب
البتول:تضعف وتخليني لوحدي؟ وين اروح الحين؟
مارد عليها وناظرت الباب ينفتح
ويدخل راشد ناظرته وتنهدت ورجعت ظهرها على ورا
قفل الباب وتقدم لعبدالعزيز وجلس عند يده
بلع ريقه وهو يناظر ملامح الضعف والشيخوخه تبان فيه
اخذ نفس وناظره:يبَه
غمضت عيونها البتول وصدت بحزن
راشد كمل وهو يمسك يدينه:كان خاطري يوم من الايام اجالسك المجالس واكون على يمناك تفتخر فيني
عبدالعزيز يناظره وبعيونه كلام مايقدر يقوله
راشد بلع ريقه وكمل وهو يناظره؛كان ودي اقدر امسك هاليدين وابوس راسك واسولف معك كنت احس اني صبي عندك ماني ولدك وحيدك
البتول نزلت دموعها وهي تمسح بطرحتها
راشد:طول عمري اخاف منك وعليك،حرمتني منك ومن العلم ومن اللي احلم فيها
غمض عيونه عبدالعزيز وكمل راشد:مابغيت تسمع عالكلام من احد غيري ،انت ظالم
البتول همست:راشد
راشد ناظرها ورجع ناظر ابوه؛طول عمرنا نحبك ونحترمك ونسمع لك بس انت حرمتنا حرمتنا منك ومن امي
عبدالعزيز حاول يلف وجهه عنه او يصد ماقدر
راشد؛كنت احاول اتقرب منك يوم كلهم صدوا وخلوك مابقى الا انت بس ادري وش جزاي؟ جزاي اني جبان
غمضت عيونها البتول بحزن وقهر على حاله
راشد:الشي الزين اننا نحبك رغم اللي سويته كلنا جينا بضعفك ووقفنا حدك
اخذ نفس راشد وناظره؛لو كنت ادري انك ممكن تجاوب علي ماتكلمت بس اللي خلاني اتكلم سكوتك
انحنى راشد وباس يده ونزلت دموعه وعبدالعزيز غمض عيونه
حاول مايبكي راشد من منظر ابوه وهو يتذكره بصحته
ضحكاته بالمجلس وصوته وهيبته وجبروته كلها
سلبها الله فجأه وتركه ضعيف وحيد مايقدر على نفسه
رفع عيونه وناظر عبدالعزيز يبكي ونزلت دموع عبدالعزيز
رفع كفه راشد ومسح دموعه وهمس:لا تنزل دموعك ماتركناك تبكي!
مسح وجهه راشد بهدوء وناظر امه:ومالي كلام بعد هالكلام لامي
وقف وفلت يده من يد عبدالعزيز وناظره؛الله يسامحك
خرج وتركهم وجلس عند الباب يبكي
هو الوحيد اللي سكت وانظلم ولاقدر يسوي شي
ولا يقول غير سمعاً وطاعه
شاف خواته قدامه ينظلمون ويقسى عليه ولا تكلم
شاف حلمه وحبيبته تبعد عنه ولا تجرأ
تزوج اجبار ودرس اجبار ورعى غنم اجباري
-
لجين
ناظرت اماني تطبق شنطتها بتروح مع اهلها
همست:مابتقولين؟
اماني تنهدت:لجين تكفين لا تضغطين علي فيني اللي مكفيني
لجين؛تكفين انتي اماني تكفين ولدك يا اماني حرام
اماني ماردت عليها وغمضت عيونها بضياع
تنهدت وقامت وطلعت من غرفة لجين تاركتها
قامت لجين وهي مقهوره كانت تحاول تسكت بس ماقدرت
طلعت وهي تناظر ريحان مبتسمه وتتكلم مع كوثر
صدت وناظرت البيت مرتب ويستعدون لخطبة راشد
لفت وناظرت فجر وسما:بتخطبون وابوي بالمستشفى؟
ناظرتها كوثر وريحان تكلمت بهدوء:خطبه بس يا لجين كلام رجال
ماردت وهزت راسها ومشت عنهم
عند اماني تناظر البيت اللي سكنت فيه وتناظر زواياه
كل تفاصيل البيت بقلبها مستحيل تنسى شي
خرجت وهي تناظر راشد راجع ومن شافوه العيال
ابتسم لهم والفرحه بعيونه ومبسوط
دخل المجلس ورجعت اماني ودخلت البيت
قفلت عليها ولاقدرت تدخل وتشوف فرحة كوثر
بلعت ريقها وهي ترجف وتدارك غصتها
بس ماقدرت بكت بهدوء ولحالها وعلى حالها
-
راشد
يناظر جراح اللي يتكلم معه ومبتسم
جراح؛انا عطيتك وعد وانا عند وعدي ياراشد
راشد ابتسم وفارس وساري يناظرون فرحته
جراح؛ماني جابرك على شي بس وش نصيب زوجتك؟
راشد تنهد واخذ نفس طويل:مابيني وبينها شي غير الطلاق
جراح هز راسه وسكت وراشد ناظره:تم!
ابتسم جراح وهز راسه؛تم بس بعد مانطمن على عمي نملك
راشد ابتسم وقام ووقف جراح وهو يسلم عليه
عند كوثر
ابتسمت وهي تشوف فرحة امها لها
واخيراً هاليوم جاها وصار راشد من نصيبها
الكل يعرف ان كوثر بتصير لراشد
وراشد بيصير لكوثر ومافيها كلام
وقف راشد بيدخل يشوفها شوفه شرعيه
ويلبسون الدبل اللي خباها شهور لها
ابتسمت كوثر ووقفت وغطرفت امها
وراشد تتطاير بداخله غصون التوت وعناقيد العنب
وعصافير الحب مو مصدق شوفتها قدامه
قدامهم كلهم داخل لها يلبسها عهد باصبعها
جلس جنبها وجلست كوثر وهي تناظره بحب
لجين:مبروكين
ابتسم راشد لها وريحان ناظرتها باستغراب
لجين:وان شاء الله الله يقومها بالسلامه
عقدت حواجبها كوثر ولف راشد باستغراب
الدبله بيده ويناظرهم مو فاهم شي
ريحان:لجين!
الهنوف:وش صاير؟
لجين:ماتدرون؟
راشد:وش السالفه؟
سما وفجر مشوا للجين:مو وقته امشي
لجين فلتت يدها:لا وقته الحق حق ليش نكذب؟
كوثر:راشد
ناظرها راشد مو فاهم شي وعقد حواجبه
لجين:راشد اماني حامل
جمدت ملامحه ولف لها بسرعه والهنوف انصدمت
بلعت ريقها كوثر بخوف وتمسكت بثوب راشد
لجين:ومن فتره طويله
راشد وقف وكوثر مسكته بقوه:راشد
راشد انصدم وهمس:حامل؟
ريحان اخذت نفس وجلست وهزت راسها
لجين:خبت عليك ودها تفرح وياعيني عليها هي اللي مافرحت
كوثر وقفت ومسكت يده وهي تناظره؛راشد
ناظرها راشد بينهم الف باب
كانت قريبه منه هاللحظه انها تصير له كوثر
بس واضح انه بينهم اسوار وبيبان صعبة المنال
لجين:روح شوفها ببيتكم وتأكد بنفسك
راشد مارد وهو يناظر كوثر وساكت
وكوثر تهز راسه وتناظره والدموع بعيونها
مستحيل هذي النهايه مستحيل يوم وصلت
ترجع تعيد كل شي ويرجع راشد لنفس المسافه
نزل راسه راشد وكوثر همست له:راشد
ناظرها ومسك كفها ولبسها الدبله:لازم اروح
ناظرت الدبله بيدها ورجعت ناظرته
وراشد تركها وخرج من البيت تحت انظارهم
جلست كوثر وهي ماسكه يدها بقوه وتناظر محله
طلع راشد ومشى بسرعه لبيته وفتح الباب
رفعت نظرها اماني بصدمه وراشد من ناظر دموعها
دخل وقفل الباب واماني مسحت دموعها ووقفت
راشد:شفيك تبكين؟
اماني هزت راسها بالنفي:وش جابك انت؟
راشد تقدم لها واماني تناظره بهدوء
راشد:ليش ماقلتي لي!
غمضت عيونها اماني وراشد تقدم اكثر:ليه ماقلتي لي؟
اماني فتحت عيونها وهزت راسها بالنفي
راشد:ولدي اماني ولدي بتحرميني منه؟
اماني:بحرمك من فرحتك من حلمك عشان كذا سكت
راشد:كوثر لي بولدك والا بدونه
اماني هزت راسها وصدت وراشد اخذ نفس
:اماني
اماني:مابي منك شي راشد لا نفقه ولا زياره يكفي تبعد عني
راشد عقد حواجبه؛تستهبلين! بيننا ولد بيصير
اماني:لا ما استهبل
راشد اخذ نفس وبجدّيه تكلم:بترجعين
اماني بضعف هزت راسها ورجعت على ورا:لا راشد لا
راشد ناظرها :اماني مستحيل ارضى ولدي يعيش بعيد عني!
اماني:وانا مستحيل اشوفها تشاركني فيك
راشد سكت واماني تقدمت له:اذا تبي تذبحني تزوجها علي
راشد:طلاق ماني مطلق
اماني بضعف همست:تكفى سو شي زين لو مره
راشد ناظر دموعها وتكلم بحده وعصبيه:ماني راضي ولا برضى اماني انتي زوجتي والحين صار بيني وبينك ولد مستحيل استغني عنك
اماني:وانا مستحيل اتحمل اعيش معاها
راشد فرك وجهه وصد يفكر
واماني جلست بهدوء صاده عنه
وبعد دقايق لف لها:تعيشين في بيت لوحدك
اماني رفعت راسها له وراشد كمل:اماني ادري كلامي مستحيل تصدقينه
اماني ظلت تناظره وكمل راشد:بس انتي شاركت نفس المكان كوثر انا احس بشي كبير تجاهك
اماني هزت راسها بالنفي وراشد جلس جنبها
:وربك ! وربك انك عزيزه يا اماني وان عشرتك ماتعوض لو خايفه اني احب كوثر وتاخذني منك فأنتي غلطانه
اماني ناظرته :وهي؟
راشد:شفيها؟
اماني:بترضى؟
راشد:اكيد كوثر تبيني
اماني سكتت وراشد يناظرها
هزت راسها اماني وراشد اخذ نفس براحه
وقف وناظرها؛كلميني اذا بغيتي شي
هزت راسها وخرج من عندها وغمضت عيونها بتعب
مستحيل تصدق فكرة انه ممكن يحبها اكثر من كوثر
شافته وهو يشوف كوثر كان فوق الحب احساسه
-
جراح
لف لها من دخلت ووقف وهو مبتسم
ابتسمت ومشت له ومسكت يدينه
ناظرها جراح واخذ نفس:طلاقنا باطل
ريحان غمضت عيونها وتنهدت؛ادري
جراح؛كنت تحت تهديد السلاح وهذا كافي يبطل الطلاق
ريحان:ادري
جراح؛وليه كل هالضيق في عيونك؟
ريحان؛ماتوقعت بيوم اسمعها والا اشوفك تتخلى عني وتروح
جراح شد على يدينها:الكل اخذ حقه يالريحان وانتي حقي وانا حقك
ريحان ابتسمت له وجراح كمل:مافي شي يفرقنا ابد
ريحان جلست وجلس قدامها جراح وناظرته
:جراح ابي اكمل دراستي
جراح ابتسم ورفع يده على خشمه:وش بعد!
ريحان ابتسمت:وابي نسكت بالمدينه للابد
جراح هز راسه:وش بعد!
ريحان:وابي اجيب منك ولد
ابتسم ريحان وباس كفها:بنجيب احلى عيال وبنات
ريحان ابتسمت براحه :مو انا ريحانك؟
هز راسه جراح وتقدمت له وهمست:من يوم شفتك! عرفت انك زهر عمري .. عرفت انك بسّاتيني
جراح لف وناظرها قريبه منه ابتسمت له وهو يناظرها بتمعن
-
فارس
لبس ثوبه وشماغه متوجه لشغله
ومشى بالشقه يدور عليها ودخل المطبخ
ناظرها تصور القهوه ومشغله اغنيه لفيروز
ابتسمت له وناظرته؛صباح الخير
فارس هز راسه:ياما تمنيت هالمنظر
فجر ابتسمت ومشت له وهي تعطيه كوبه:لا ينكب عليك بالطريق
فارس هز راسه:ابشري
فجر عدلت شماغه وابتسمت:وش تبي اطبخ لك!
فارس ابتسم:اللي تحب تسويه يدينك
فجر بتفكير عضت شفتها:طيب كلمني اول ما تخرج من دوامك
انحنى وباس خدها وهز راسه ومشى
شرب من القهوه وقفل باب شقته وراه وهو مبتسم
وفجر رجعت لمكانها وهي تدور بجوالها طبخه
ناظرت رسالته اللي جاته وهي تبحث وابتسمت برضا
"أنت الصبّاح اللي غشى الكون كله
‏و اشرق بحبك نور صبحي وزاده"
—
عبدالعزيز
يناظر الشرطي والممرض يدفونه
لين السجن المهتم بالمرضى
دخلوه زنزانته والممرض معاه يعتني فيه
غمض عيونه وناظر يدينه ملتويه ولاهو قادر يتحرك
انسدح بمساعدة الممرض وناظر السقف
يتذكر دموع بناته وصراخهم بكل مره
يوم يرفع البارود على جبهتها ويشوف دموعها ولا يهتم
ويوم يحرمهم من اقل احلامهم التعليم
ولا بيوم جلس حولهم وعرف اخبارهم
كان مابينه وبينهم الا كلمتين ويقبلون عليه بالاكل
كل مايتذكرهم يحس بنار صدره تحرقه
مستحيل ينشفع له منهم محد بينسى اللي جا منه
ظل يتذكر ويفكر طول الوقت وهو متحسّر
-
راشد
انتظرها تطلع وطلعت وقفلت الباب وراها
ابتسم ومسك يدها:وش هالدبله اللي ماتلوق الا عل..
قاطعته وفلتت يدها وناظرها بهدوء
كوثر ناظرته :تدري ان ليلي كله امس ابكي؟
راشد تقدم لها وتنهد؛وليه؟
كوثر:راشد نصيبنا وبختنا منحوس
راشد؛وليه منحوس! شوفينا باقي مخطوبين
كوثر:وش مصيري انا؟
راشد:الزواج
كوثر:ووش مصير اماني ام ولدك؟
راشد عقد حواجبه:كوثر!
كوثر هزت راسها وتجمعت الدموع بعيونها
:راشد هدمت بيتها مابي اهدم بيت طفل
راشد عقد حواجبه وكوثر نزلت دموعها
:راشد مابي اخذ ابوهم منهم
راشد:ماهدمتي بيت احد ولا بتهدمين بيت احد انت بتهدميني انا لو فكرتي تتركين
كوثر رفعت كتفها:فكرت كل ليلي افكر راشد ماقدرت
راشد يناظر دموعها وعاقد حواجبه
كوثر:راشد احبك
راشد ناظرها مستغرب:يوم جيتك ووصلت لك تبعدين؟
كوثر:ياراشد انا هدّامة بيوت وقلوب
راشد تقدم لها ومسك يدها وحطها على قلبه وهمس بقهر
:انتي زرعتي فيني الف آه بكل مره اشوفك
كوثر وهي تبكي همست:اذا انا بكون مرتاحه صدقني اماني مابترتاخ
راشد:والله لأعدل والله
كوثر هزت راسها بالنفي :منت فاهم
راشد:بينا كلام كوثر مستحيل اسمح لافكارك تقرر عنك
كوثر ناظرته وراشد صد عنها ونزل من الدرج
تنهدت ودخلت البيت وهي تمسح دموعها
مشى راشد وتنهد بصوت مسموع ودخل المجلس
ناظر محل ابوه وجلس فيه رفع يدينه
على راسه بضياع ووصلت فيه مرحلة انه يدعي
:ياربي اختار لي ولا تخيرني يارب اجمعني مع نصيبي
رجع ظهره على ورا وغمض عيونه
-
لجين
ناظرت سما:تبيني اسكت زيك؟
سما:لا بس على الاقل مو بهالطريقه عيب لجين
لجين:مو انتي تعلميني العيب وانا مع الحق
سما:منتي مع الحق مع اخت زوجك
لجين عقدت حواجبها:لا ياحلوه ماهي عشان اخت زوجي عشانها مسكينه وضعيفه
سما تنهدت وصدت ولجين كملت:سما لا تصيرين كذا
سما:ماني ضد انك تقولين بس مو بهالطريقه ابد
لجين:يمكن صح غلطت بس من قهري عليها
سما :وش بيصير الحين؟
لجين:علمي علمك الله يعين راشد
سما:ماظنتي بترفض كوثر بتتزوجه تحبه مستحيل تخليه
لجين رفعت كتوفها:الله يعينه
-
كوثر
جلست قدام الهنوف بقلة حيله
:علميني وش اسوي؟
الهنوف تنهدت:ما كان ودي تتزوجين متزوج من الاساس والحين بيجيه عيال؟
كوثر:امي هذا راشد
الهنوف:ادري
كوثر تنهدت:مايهون علي امي اتركه
الهنوف:اذا تبين شوري هذي غلطه من البدايه اصلاً
كوثر لفت للباب اللي يدق وناظرت امها
وقفت وفتحت الباب وناظرته واقف
تنهد:بتكلم معك
الهنوف من سمعت صوته نادته:تعال ياراشد ادخل
بعدت كوثر ودخل راشد وجلس قدامها:شلونك ياعمه؟
الهنوف:حمدلله
جلست كوثر وهي تناظره والهنوف اخذت نفس
:راشد يبي لها شور هالسالفه مانبي نستعجل
راشد:ادري ياعمه والله ادري كل شي فجأه اختبص بس
ناظر كوثر تناظره ورفع كتوفه:ما اقدر اتركها
نزلت نظرها كوثر والهنوف هزت راسها:هذا الصح اصلاً لانها شايله ولدك
كوثر ناظرت امها والهنوف حطت يدها على رجلها
:انا من رايي ياراشد انكم مابينكم نصيب ابد
غمضت عيونها كوثر وراشد تقدم:عمه كل شي له حل كوثر تسكن ببيت لحالها
الهنوف:ماهو بسالفة بيت وما بيت،بس شوف كم مره كان بيصير بينكم نصيب ويصده ربي
كوثر همست:راشد ماهو شر
الهنوف:شر عليك انتي يابنتي مو معناته ان راشد مو زين بس يمكن ربي مخبي لك الاحسن وله الافضل
راشد ناظر كوثر وكوثر ناظرته
الهنوف:فكري كم مره ربي صدك عنه!
كملت الهنوف بعد سكوت:انا من رايي تتكلمون وتاخذون راي جراح بعد
راشد نزل راسه وهو يناظر الارض وناظرهم
:انتي عندك مانع؟
ناظرته كوثر ورجعت ناظرت امها:انا خايفه
الهنوف تنهدت وكوثر كملت:خايفه راشد
راشد سكت وظل يناظرها وهز راسه ووقف
:هالمره الله يكتب اللي فيه الخير وان شاء الله انك تكونين خير
الهنوف لفت لكوثر اللي تناظر راشد
-
جراح
لم اغراضه وقفل شنطته وريحان جالسه تناظره
جراح:مادري وش قرارهم؟
ريحان:انت وش قرارك؟
جراح جلس وتنهد؛انا قلت ماعندي مشكله راشد يتزوج كوثر
ريحان:وامك؟
جراح؛امي رافضه،تقول يكفي ان كوثر خربت بيته
ريحان نزلت راسها وناظرته:جراح قوم شوف رايها خل نخرج من هالمكان
جراح ناظر البيت حوالينه:حتى انا ضايق خلقي من بعد اللي صار
ريحان ناظرته يوقف ويخرج من الغرفه
وقفت ومشت للشباك وهي تناظر بيتهم قدامها
ضمت نفسها ورفعت شعرها وابتسمت
مستحيل تنسى الايام والطفوله اللي عاشتها بالديره
صحيح كانت تتمنى حياة المدينه واقلها تلبس بجامه!
بس كانت حياه هاديه ومريحه حتى الحب فيها جميل
بعيد عن مشاكل ابوها وامها الا ان حياة الديره حلوه
يكفي تصحى من النوم حوالين السفره تتجمع مع خواتها
على صحن زيتون وصاج بيض وشاهي بالحليب
خواتها اللي مستحيل تنسى حياتها معاهم
لجين اللي صارت ام ولا توقعت بيوم تتزوج ابد
وفجر اللي خذت فارس حلمها من الصغر
وسما اللي بتدخل محاكم وتدافع عن الحق
حست بجراح يضمها من وراها وابتسمت
وهي تفكر في حالها هي من شافت جراح
ما حست بيوم ان ممكن توقف هالوقفه وتناظر بيتها
ناظرها جراح مبتسمه وعقد حواجبه:شفيك!
رفعت كتفها وهمست:ولاشي
مارد جراح ولفت له ريحان؛وين كوثر؟
جراح؛نايمه لاصحت اتكلم معاها
هزت راسها ورجعت تناظر من الشباك
وباس راسها جراح وهم يطلون على الحوش
-
اماني
تنهدت وهي تناظر لجين وابتسمت لها
لجين:احمدي ربك علي
اماني ابتسمت بهدوء:بتوحشيني
لجين ابتسمت ومشت لها وحظنتها
اماني همست:ببقى لحالي بهالبيت؟
لجين؛ماظني واشد بيقعد
اماني هزت راسها وناظرت ولدها وباسته
لجين:يالله مع السلامه انتبهي لنفسك
هزت راسها اماني وطلت من الباب
ناظرت اهلها يلمون اغراضهم
وابتسمت من لف تركي للجين
واخذ الولد وهو مبتسم والفرحه بعيونه
ركبوا سيارتهم وحركوا طالعين من البيت
اخذت نفس ولفت ناظرت غرفة راشد
من امس ماشافته ابد ولا تكلمت معه
مشت بتردد وفتحت الباب وناظرته
نايم على ظهره وعاقد حواجبه
ودبلته بيده مشت له وهي تناظره
غمضت عيونها بهدوء وانسدحت جنبه
لفت بجسمها تناظره نايم وتفكر
تقدر تتغاضى عن كل شي مر وتمشي معه
لاخر الحياه عشان حبها!
غمضت عيونها بهدوء لمجرد
انها تحس بانفاسه معاها بنفس الغرفه
كافيه تجعلها بامان وراحه
—
الهنوف
جالسه جنب جراح وريحان جنبه
وكوثر قدامهم جالسه وتفرك يدينها
ينتظرون منها جواب
رفعت راسها كوثر وناظرت امها
وجراح وريحان واخذت نفس
شجعت نفسها وقّوت نفسها
مصّره بقرارها ومستحيل تغيره
هالمره اخذت تفكير طويل
وواثقه من اجابتها
ريحان ناظرت جراح باستغراب
وجراح شايل هم راشد وهمها
جراح:هاه كوثر! نمشي للمدينه تاركين كل شي؟
ناظرته كوثر وكمل جراح:والا نزفك لراشد؟
الهنوف:فكري يمه كوثر هالقرار ماله رجعه
كوثر ناظرتهم وهمست ريحان:كوثر
بلعت ريقها كوثر و
نزلت نظرها ورجعت ناظرته وتنهدت
وهي تتكلم بهدوء:
—
بعد مرور ثمان اشهر
نايمه على ظهرها وهي تحس بيده
فتحت عيونها بانزعاج
وهمس بتوتر؛ازعجتك؟
اخذت نفس:انا نمت اصلاً!
راشد ابتسم وجلس بارتباك؛حسيت فيه يتحرك
ابتسمت اماني واعتدلت بجلستها
راشد:ابطى علينا
اماني ناظرت بطنها ورجعت ناظرته:متى رجعت؟
راشد:توني
اماني عقدت حواجبها:على اساس بترجع العصر؟
راشد؛لا اعتذر الدكتور
اماني مسكت يده وناظرها:شد حيلك راشد تونا بيداية السنه
هز راسه راشد؛ماعليك ان شاء الله اني متخرج باعلى الدرجات
ابتسمت اماني له بحب:خلك جنبي هالايام مابي اولد وانت بعيد
راشد جلس جنبها وحط يده وراها:لا ماعليك جنبك لا تخافين وفارس حوالينا بنفس العماره الشقه اللي تحت لو صار شي دقي على فجر
اخذت نفس اماني بخوف وراشد همس:لا تخافين كل شي زين
اماني ابتسمت برضا وانسدحت على صدره
حاوطها راشد وغمض عيونه بتعب
—
ماقدرت تتحمل اكثر
كل يوم يطري عليها الف مره
ناظرت المكان وبتردد نزلت راسها
غلطت كثيير وانهانت كثييير
معقوله بيسامحها! معقوله تزوج!
بلعت ريقها ونزلت من السياره
وقفت وهي تناظر المبنى ومتوتره
شدت من قبضة يدها وطاحت عينها
عليه وهو طالع وقف وعقد حواجبه
وهو يناظرها من بعيد نزل نظارته
ومفتاحه بيده وانصدم من عرفها
تقدم لها ومن شافته توترت اكثر
وقف قدامها وهو يناظرها باستغراب
:كوثر؟
غمضت عيونها وهمست؛اسفه على الازعاج
عماد هز راسه بالنفي:حياك تعالي
مشى وتكلمت بسرعه:لا لا جيت بس مريت من هنا قلت اسلم
عماد بهدوء:طيب اركبي السياره نتكلم جوا
ناظرته كوثر وعماد هز راسه:يالله
مشت معاه وفتح سيارته وركبت
ناظرت سيارته اللي ياما ركبت فيها وانبسطت
قفل الباب عماد واخذ نفس ولف لها؛كيفك؟
كوثر ابتسمت له:حمدلله وانت!
عماد حك جبهته:حمدلله على حالك
كوثر ناظرت يدينه ورجعت ناظرته
لف لها عماد وهمس:من بعدك ما تجرأت اخطب ابد
كوثر عقدت حواجبها:ليه؟
عماد ناظر اللي قدامه وابتسم:ادري غريب الكلام
لف لها وناظرها:بس ما احس بعدك احد
ماتوقعت ابد هالرد منه وماتوقعت كمية المشاعر
اللي يحملها لها لهاليوم بعد شهور طويله
نزل راسه عماد:انا ماني غبي بس انا اغفر
كوثر نزلت راسها وعماد ناظرها؛ماتزوجتي؟
كوثر ابتسمت وناظرت اللي قدامها وهزت راسها بالنفي
عماد ظل يناظرها وهمس:بيننا كلام
كوثر ابتسمت وهزت راسها:اكيد
فتحت الباب ونزلت وعماد شغل سيارته وحرك
-
ريحان
خرجت من الجامعه وركبت السياره
وحرك جراح؛كيف الدوام؟
ريحان ابتسمت:دكتوراتي يجننون جراح
جراح ابتسم وناظرها:زين حمدلله
ريحان سكتت وهي تناظر اللي قدامها ومبتسمه
ناظرها وعقد حواجبه:بس؟ العاده تصجين راسي سواليف وفلانه وعلانه اليوم مافي شي؟
ريحان ابتسمت:اليوم في كل شي
عقد حواجبه بابتسامه وهو يناظر الطريق:وش السالفه؟
ريحان؛ولاشي قابلت سما قبل تجيني وجلسنا سوا
جراح:اوه فيها سما الله يجيب الخير
ابتسمت ريحان ولاردت ومن وقف جراح نزلت
دخلت البيت وابتسمت؛سلام ياعمه
الهنوف:هلا هلا يالله تعالوا الغداء جاهز
هزت راسها ريحان وجراح فصخ شماغه ودخل وراها
ريحان فصخت عبايتها ولفت له:ثواني واجي
هز راسه واخذ جواله وطلع
بدأ ياكل جراح والهنوف تسولف له
جات ووقف ريحان وهي مخبيه يدينها ورا ظهرها
ناظرته الهنوف وهي تغرف بالصحن؛شفيك؟
جراح وهو ياكل عقد حواجبه:وشفيك؟
ريحان ابتسمت ورفعت تحليل الحمل بيدها بدوم ماتتكلم
نزل الملعقه جراح وهو يناظر التحليل
وما استوعب الا ركضت الهنوف لها تحظنها
ابتسم ووقف وهو يناظر فرحة امه
الهنوف:وه ياجراح بيجيني حفيد من اغلى عيالي
ابتسمت ريحان وناظرت جراح اللي واقف
رفعت كتفها:مافي ردة فعل؟
ابتسم ومد يده:تعالي تعالي
ابتسمت وحظنها وهو مبتسم وناظر امه:هذي دعواتك
الهنوف بابتسامه:حمدلله عقبال كوثر ان شاء الله
ريحان ابتسمت وهي تناظر التحليل ومبتسمه
دخلت كوثر وناظرتهم واستغربت
الهنوف:تعالي كوثر باركي لاخوك
كوثر ناظرتهم:وشو؟
جراح ابتسم:بتصيرين عمه
ابتسمت كوثر وناظرتهم كلهم؛احلفوا؟
ريحان هزت راسها ومشت كوثر وحظنتها:اي تكفين نبي بيبي بالبيت
الهنوف:وه ياربي حمدلله معد ابي اكل من الفرحه
جراح ابتسم:سمي بالله امي
الهنوف ضحكت وجلس جراح وكوثر حطت شنطتها
وجلست وناظرت ريحان:شدراك؟
ريحان؛كلمتني سما وقالت لي احلل وحللت
كوثر ابتسمت وناظرت جراح:وش شعورك ؟
جراح ناظر ريحان اللي لفت له:وشهو شعور اللي يجيب ضنى من شخص يحبه؟
ابتسمت ريحان ولفت الهنوف لكوثر اللي مبتسمه
خافت يحز بخاطرها بس هالمره فرحتها واضحه
حمدت الله ولفت تناظرهم يسولفون وياكلون
-
كوثر
ناظرت اتصاله وابتسمت
اخذت نفس طويل وردت:هلا
عماد ابتسم بشوق يالله قد ايش كانت ايامها ايام حلوه
:شلونك؟
غمضت عيونها كوثر :حمدلله،وانت؟
عماد:زين بعد هالصوت
كوثر ابتسمت وانسدحت؛وكيف اهلك؟
عماد؛باثريني اتزوج وانا ماعندي نيه ابد
كوثر :وليه! اعرف امك كانت فرحانه فيك
عماد؛يوم كنتي لي كانت فرحانه
كوثر اخذت نفس:محد ياخذ نصيب غيره
عماد:طيب لو قلت لك وانا ماني متردد ابد، تجين نكمل؟
كوثر غمضت عيونها ورجعت فتحت وتنهدت
عماد:كوثر انا اعرفك من زمان وابيك والله لو اني ما اعرفك ما كان دقيت وتعنيت وسألت
كوثر:عماد خايفه
عماد:من وش؟
كوثر:من كل شي خايفه تصير نفس المشاكل اللي قبل خايفه هالمره اخسرك
عماد؛اذا وعدتيني انك تنسين كل شي ونرحع نبدأ من جديد؟ انا اوعدك ان حياتك مافيها خوف معاي
كوثر سكتت بتفكير وكمل عماد؛نجي؟
كوثر:وين؟
عماد؛نخطب من جديد
كوثر انصدمت وجلست باعتدال ورفعت شعرها:انت جّدي؟
عماد؛وواثق بعد
كوثر اخذت نفس وعماد تكلم:ردي علي تكفين كوثر
كوثر:طيب
قفل منها وناظرت جوالها ورفعت راسها تفكر
لو ترجع لعماد بتنسى اللي صار وتنسى راشد وايامه!
هالمره بيضحك لها الزمن وتلقى اللي يحبها ؟
-
البتول
حطت فنجانها وهي تشوف اماني تطلع
اماني جلست وهي عاقده حواجبها:شفيك قاعده لحالك ياعمه؟
البتول:مع من تبيني اقعد
اماني ابتسمت:انا عندك
البتول ناظرت بطنها ورجعت ناظرتها:تحسين بوجع؟
اماني:من امس احسها قربت
البتول اعتدلت وناظرتها:اذا تعبانه قومي ناخذك المستشفى
اماني هزت راسها بالنفي:خليني لين يزيد الوجع
البتول:اتصل على راشد طيب؟
اماني:لا لا توه يطلع خليه لا تخوفينه
البتول سكتت وهي تناظر اماني هاديه
-
راشد
ناظر جواله في المحاضره يهز
قلق وبلع ريقه وهو يناظر المتصل فارس
عرف انه اماني بتولد رفع يده وناظره الدكتور
راشد:تسمح لي استأذن
الدكتور عقد حواجبه:ليش!
راشد:في حالة ولاده
ابتسم الدكتور بضحكه والطلاب ابتسموا
الدكتور:يالله بالسلامه ان شاء الله
قام راشد وخرج من الجامعه وهو يتصل على فارس
فتح سيارته ورد فارس عليه:وينك! ولدت زوجتك
راشد انصدم:ولدت؟
فارس:اي من ساعتين كلمتك بعد ماولدت قلت ما ازعجك
—
وقفت كوثر
وضحكت من الموقف لفت عليه:معقوله؟
عماد رفع كتوفه:انك تختارين نفس الفستان بالمرتين؟ ابد مي معقوله
كوثر بتردد ناظرت عماد وعماد ابتسم:يالله
كوثر ناظرت المحل:عماد؟
عماد سحبها من يدها:بتصيرين عروس تعالي
دخلت المحل وناظرت الفساتين ووقف عماد
عند الفستان ولف لها:تخيلته عليك وعاجبني
كوثر:خلني اختار غيره
عماد؛لا عاجبني تكفين بشوفه عليك
كوثر بتردد ظلت تناظره قاسته وفصلت على جسمها
بس باخر بحظه تكنسل كل شي
عماد؛يالله؟
كوثر بقل حيله ابتسمت وهزت راسها
عماد رفع يده وكوثر لفت تناظر الفستان
وناظرت عماد اللي يتكلم واخذت نفس برضا
-
راشد
شايله بين ايدينه ومبتسم
سما:هي بلا كذب ريحينا توه مابنات ملامحه
ريحان؛والله انه يشبه راشد
فجر ناظرت اماني:وش بتسمونه؟
لفت اماني لراشد وراشد رفع حاجبينه؛امه تسميه
اماني:ولدك وبتتنادى باسمه
راشد ناظرهم ورجع ناظر اماني:اذا مو عاجبك قولي
اماني هزت راسها وتكلم راشد:سفيان
ضحكت سما وريحان ضربت جبينها:تكفى راشد باقي انت بالديره؟
اماني ناظرتهم:وشفيكم! اذا عاجبك راشد سمه ماعليك
راشد  ناظرهم بصدمه:ماعجبكم؟
فجر:لا تكفى راشد وش سفيان!
اماني ناظرته وراشد حرك كتوفه؛اجل هاتوا اسم انتوا
اماني ناظرته وهمست:ابراهيم
سما:يالليل اسمائكم الخايسه
راشد ناظرها وابتسم:تبينه؟
اماني هزت راسها؛بخاطري
راشد حط اصبعه على خشمه:ابو ابراهيم
سما كشرت وريحان ناظرتها:والله حلو وش عليك انتي؟
سما تكتفت ولا تكلمت وفجر ابتسمت
ناظرت اماني وهي تفكر سبحان الله
اقرب وحده لها كانت كوثر وارتاحوا لبعض
وتمنتها تكون قريبه منها وتصير زوجة اخوها
بس النصيب
—
بعد ٦ سنوات
جالسه ويدها بيده ويناظرون الحفل
والطلاب واقفين ببشوت التخرج
هتفوا باسمه:ساري
وضحك جراح ولف لها من طلع ساري للمنصه
يتوج من ضمن مرتبة الشرف الاولى
وقفوا العيال وهم يصفقون له وابتسم لهم
سما ابتسمت وهي تناظره بفخر وحب
رفعوا اياديهم بالقران وهم يحلفون القسم الجامعي
ومن انتهى الحفل وقفوا وهو يصفقون له نازل لهم
ابتسم وناظرهم كلهم:اوح جيتوا كلكم؟
سما ابتسمت ومسك يدها وهو يسلم على العيال
فارس:مبروك دكتور ساري
ساري ابتسم وسلم على جراح:هلا ابو عبدالعزيز
ابتسم جراح:مبروك منها للاعلى
ساري:الله يبارك فيك
لف ساري لسما وشال بنته من حظنها وهو يشيلها لفوق
ضحكت وحطت اصبعها بفمها صاحبة الثلاث سنوات
ساري:حياكم البيت
جراح:والله ماقدر العيال لحالهم عند امي
ساري ناظر ريحان:خل تروح ريحان انت تعال
ريحان كشرت:الشرهه علي جايبت لك هديه
ساري:لا بالله اصحاب الهدايا حياكم
فارس:وانا فجر بالبيت مقدر اخليها لحالها
ساري:طيب العشاء؟
جراح لف لفارس وهز راسه فارس:اي ان شاء الله
جراح مسك يد ريحان:يالله مبروك مره ثانيه
ابتسم ساري ومشى جراح وريحان وفارس ركب سيارته
لف ساري لسما وابتسم:جبتي لي هديه انتي؟
سما رفعت حاجب:وليه! ما اكفى انا وبنتك هدايا؟
ساري:اي بنتي تكفي بس انتي لا
سما ضحكت:تعال خل نمشي
مسك يدها وهو يبوس بنته وخرج من الجامعه
ناظر اسم جامعته وابتسم وناظرت ابتسامته سما وركبت السياره
اخذ نفس بفخر بنفسه وركب السياره وحرك
-
جراح
دخل البيت ورفعت راسها الهنوف:ابطيتم
ريحان:معليش ياعمه اذوك؟
الهنوف:ماغير ذا ماخلى شي بالبيت
ريحان ضحكت وجراح ابتسم وجلس
ريحان مشت لعيالها الاثنين وابتسمت:ماما جات
تعدوها وركضوا لجراح وضحك جراح
جلسهم على فخوذه وناظرها وضحك
عزيز سمي عبدالعزيز:بابا ابغى البقاله
ناظر ولده الثاني:وانت تبغى البقاله بعد؟
هز راسه وجراح ناظر ريحان:خلاص نررح البقاله
ريحان وقفت وناظرتهم:مو معناته ماما ماتقدر توديكم البقاله يعني صارت كخه
ضحكت الهنوف وهزت راسها بأسف
ووقف جراح وهو شايلهم:ماببطي بوديهم وارجع
هزت راسها ريحان ومشت معاه:اصبر البسهم حذاينهم
وقف جراح وريحان تلبسهم وناظرها وابتسم
ابتسمت له ريحان ورفعت حاجبها؛نعم!
جراح عض شفته وضحك ولارد وخرج وريحان ابتسمت
-
فارس
دخل البيت وسمع صوت بنته وفجر تتكلم معاها
طل في المطبخ وابتسم وبققت عيونها بنته:بابا
لفت فجر وابتسمت:جيت! كيف ساري؟
فارس ابتسم:زين ماعليه
فجر حطت يدها ورا ظهرها:كلهم جو؟
فارس باس بنته وناظرها:اي جراح وريحان وسما
فجر تنهدت وفارس ناظرها:تجين العشاء نروح لهم؟
فجر:فارس مافيني شده مرره ظهري بينكسر
فارس وقف قدامها:شدعوه ياشيخه بيت اختك اذا تعبت ادخلي نامي
فجر حطت يدها على بطنها:ما ادري لوقتها اشوف
فارس مسك يدها وناظر بطنها:تعبانه انتي تحسين؟
فجر:لا لا بس تقلصات تونا بالسادس
فارس هز راسه وتقدم لها باس جبينها:بغير واجي نتغدا
فجر هزت راسها ومشى فارس ونزلت بنته من الكرسي
فجر:فارس جات وراك
لف فارس وناظرها تركض له وشالها وهو يمشي لغرفته
-
كوثر
صحت من النوم وعقدت حواجبها
شالت اللحاف عنها ومشت بكسل وهي تناظر سرير بنتها
طلعت بالصاله وناظرته يضحك وهي تضحك
مشت ولف لها:صحيتي من الازعاج؟
كوثر هزت راسها بالنفي:وش تسوي؟
عماد؛جيت ولقيت ريحتها فايحه وغيرت لها
كوثر جلست على الطاوله وناظرت البنت
بعمر السنه والنصف تلعب بيدينها وعماد يغير لها
عماد ناظرها؛شفيك تعبانه؟
كوثر:لا حيت من الدوام كسلانه مرره
عماد مد يده ومسكت يده كوثر وهو يتكلم:طيب وين نتغدا؟
جلسها على رجله وناظرته وهزت كتوفها:اي مكان
عماد:قومي غيري طيب وهاتي اغير لبيلسان
كوثر:لا خلاص انا اغير لها
عماد دفها؛روحي جيبي ملابس
ضحكت كوثر:عماد
عماد ناظرها تضحك وابتسم:انا ابي اغير لها
كوثر:لو تدري امك صارت سيرتي على كل لسان
عماد :اي ماعليه
ابتسمت كوثر ودخلت الغرفه وهي مبتسمه
يساعدها بكل شي يغسل معاها ويطبخ ويشاركها كل شي
طلع هذا نصيبها اللي كانت ماتبيه!
-
المغرب
ساري
فتح الباب كله وناظر فارس:ارحب
فارس ابتسم وسلم عليه ودخلت فجر لليمين
ناظرت الصاله فاضيه وجلست بنتها على الكنبه
مشت للمطبخ وناظرت سما:بنت جاكم الضيوف
سما لفت وابتسمت:ياهلا
فجر سلمت عليها:اساعدك بشي؟
سما:لا لا مخلصه
طفت الفرن وناظرتها؛وين البنوته؟
فجر؛بالصاله
سما غسلت يدها:امشي الصاله
فجر جلست جنب بنتها وسما زمت شفايفها:ليت غنى تقول تلعب معاها
فجر؛نايمه؟
سما هزت راسها ورفعت راسها من دخلت ريحان
ابتسمت وقامت سلمت عليها
ريحان؛تعال عزيز جيب اخوك
دخل عزيز وماسك اخوه وسما باستهم وجلست ريحان
لفت لهم؛جايه لجين؟
سما:كلمتها العصر قالت بنتها عندها تطعيم اذا خلصوا بدري تجي
-
جراح
ناظر ساري واقف:بالله ساري ادخل ناد عزيز
ساري حط الدله ودخل ينادي سما
طلت له وناظرته؛وش فيك؟
ساري:جراح يبي ولده ناديه
هزت راسها ودخل ساري بعزيز وجلس جنب ابوه
فارس ناظر عزيز وابتسم لجراح؛تعودتم تنادونه عزيز؟
جراح رفع راسه؛اي من يوم غيرنا اسمه خلاص
ساري جلس:صح انت متى غيرت اسمه؟
جراح:سنة وفاة عمي عبدالعزيز كان بعمر ال٦ شهور وغيرناه
ساري اخذ نفس:الله يرحمه
سكتوا ثواني وعزيز ناظر ابوه؛بابا ابي قهوه
ساري ضحك وجراح ناظره؛لو تدري امك بتهاوشك
عزيز؛امي مي هنا
فارس:صب له مو صاير له شي
وقف ساري وصب له واخذ الفنجان عزيز وهو مبتسم
وقف ساري اول مادق الباب وفتحه؛هلا
راشد ابتسم؛كيف الحال؟
ساري؛افا ماجيت الظهر الجامعه ليه؟
راشد؛حاولت استأذن من دوامي والله بس شغل
ساري:حياك
دخل راشد وناظرهم وابتسم:سلام عليكم
سلم عليهم وجلس وناظره جراح:ماشفناك من زمان
راشد:اي والله صارت مشكله قبل فتره بندرسة ابراهيم
فارس عقد حواجبه:عسى ماشر!
راشد؛ابد ابتدائي وتضاربوا وفقع عين صديقه
جراح رفع حواجبه بصدمه؛لا ياشيخ
راشد:اي والله ونشبت بابوه الله لا يوفقه يقول بيشتكي ومدري وش
ساري:من هو يمكن فارس يتصرف
فارس:اي والله هات اسمه انا بالتعليم واخرجك من السالفع
راشد:لا لا حليناها حمدلله اشوا وبنقل ابراهيم هالفتره
فارس:وده حكومي اريح لك
راشد؛لا ياشيخ اهليه احسن
جراح:والله حكومي راشد احسن الاهليه عيالهم مدري كيف والاهالي واصلين اغلبهم شتبين بعوار الراس
راشد:والله مدري هو بعد شيطان مايقعد
فارس ابتسم:الله يصلحه ويخليه لك
راشد:اللهم امين
—
الصاله كلها سواليف وضحك
وصراخ اطفال وبكى اطفال
لفت سما لفجر؛روحي عن الازعاج غرفتي
فجر:لا تكفين مبسوطه هنا
ريحان؛بنات
لجين ناظرتها ولفوا البنات
ريحان:بنروح انا وجراح نهاية الاسبوع الديره
فجر كشرت:اما
ريحان؛بنقفل البيت خلاص
سما:الله بجي معاكم
ريحان؛اي تكفون خل نروح كلنا بخاطري اتذكر كل شي
لجين:انا كارهتها ولا ابي اطبها
ريحان:شدعوه عليك كم ساعه ونرجع عزيز اصلاً وده يروح ناشب لنا
اماني:انا عادي ماظنتي راشد بيرفض
سما:وانا اجي عادي
فجر ناظرت لجين اللي تناظرها:يالليل طيب بجي انا بعد
ابتسمت ريحان وناظرت لجين ولجين صاده
سما:هيا بالله
لجين:اف وتركي وش اقول له؟
فجر:عادي نتجمع ساعتين ونرجع محنا نايمين هناك
لجين:طيب بشوف وارد لكم
اماني دق جوالها ووقف بعيد وردت:هلا
راشد:نروح؟
اماني:براحتك كأنه تأخر الوقت اصلاً
راشد:اي اجل يالله مشينا
اماني قفلت ولفت لهم:بنات مررره شكراً انبسطت اليوم
سما:رايحه؟
هزت راسها اماني وهي تلبس عبايتها:اي والله خلاص ابطينا
سما:مو من جدك تكفين بكره جمعه
اماني:طيب بكره جمعة اهلي من الظهر غدا والعيال متى ينامون
لجين بققت عيونها وناظرتها:احلفي بكره؟
ضحكت اماني:اي يالله ابراهيم ناد اخوانك
سلمت عليهم ومشت وطلعت وركبت السياره
وراشد حرك ولف لهم:هاه انبسطتوا؟
ابراهيم؛بابا تكفى نجي بكره عندهم
ضحكت اماني وراشد لف له:ليه؟
ابراهيم:انا وعزيز لعبنا بلاستيشن سوا
راشد:نروح عند عزيز وش له نروح لعمك ساري؟
ابراهيم:عزيز ولد عمي ساري
ضحكت اماني وراشد هز راسه بأسف
واماني ناظرت راشد وهمست؛تبي نروح البيت؟
راشد عقد حواجبه وناظرها:بخاطرك مكان؟
اماني هزت راسها:اي بالله نروح حديقه شوي
راشد:متى ينامون ذولا؟
اماني:تو ماجات ١٢ وبكره جمعه تكفى راشد
راشد هز راسه وناظر الطريق:طيب
ابتسمت اماني وراشد وقف عند بقاله ونزل
ابراهيم:ماما بنروح حديقه؟
هزت راسها اماني:اي شوي ونرجع
ابتسم وضحك لاخوانه الاثنين وهم مبسوطين
راشد
اخذ شبسات وعصيرات ومشى يحاسب
طلع بوكه واخذهم في الكيس ومشى محرك للحديقه
وقف ووقفت وراهم سياره 
تافف وطل يأشر للرجال ونزل وناظره
عقد حواجبه راشد وعماد تذكره ومشى له وصافحه:راشد؟
راشد من تذكر عماد بهتت ملامحه وهز راسه:اي
عماد هز راسه:شلونك؟
راشد؛بخير
رجع عماد وركب سيارته وحرك راجع ورا ووقف ونزل
نزلت اماني وهي تناظر راشد باستغراب
وراشد يناظر السياره بترقب مسك يده ابراهيم:يالله بابا
ووقفت وراه اماني:راشد!
نزل عماد وانفتح الباب ونزلت حامله بنتها بيدها
وابتسم راشد ولفت كوثر وناظرت عماد يناظره
ولفت وناظرت العيال وراشد ماسك ولده ويناظرهم
لفت اماني ومن عرفتها ناظرت راشد بسرعه
رفع يده راشد لعماد وهو مبتسم وعماد هز راسه
مشى راشد وهو مبتسم ويناظر عياله واماني تناظره
استغربت ابتسامته ولا فهمت تفكيره ابد
اما راشد كان ينتظر يشوف عماد ويبي يعرف نهاية كوثر
يوم نزلت وبيدها بنتها ارتاح وتطمن
يعرف انها مبسوطه معاه من البدايه كان يعرف ان عماد متعلق فيها
لف لاماني اللي تناظره ومسك يدها؛شفيك؟
اماني:انت اللي شفيك؟
راشد:مبسوط
ابتسمت اماني وهي تمشي ويدها بيده
رفع راشد ابراهيم من يده يلعبه وابراهيم يضحك
-
كوثر
ساكته ولا تتكلم وعماد يناظرها ويأكل بنته
ناظرها:تبين نمشي؟
كوثر ناظرته وابتسمت:اي
عماد وقف وهو يشيل بنته بيدينه وكوثر جنبه
اخذت نفس كوثر بابتسامه ٦ سنوات ماشافته
ويوم شافته كان حاله افضل من اخر مره
اب لاثلاث اولاد  والفرحه بعيونه
لبسه وشكله وشخصيته اللي تغيرت
لفت لعماد اللي شايل بنتها وابتسمت
مدت يدها ومسكت يده ولف ناظرها
مبتسمه وتناظره ابتسم ومشى لسيارته
اخذت البنت وركبت وركب وحركوا للبيت
-
جراح
يشرب من كباية الشاي اللي بيده
ويناظر الهنوف:كلمتك؟
الهنوف:انا دقيت عليها
جراح:اي وش قالت؟
الهنوف:تقول ان ودها تقعد بالديره اكثر
جراح؛عمتي البتول ودها كل عمرها تعيش هناك مايصير البيت كبير عليها ويمكن احد يجيها لا سمح الله شي تتعب هي !
الهنوف:قلت لها بس وش عليها مني
جراح؛بنروح كلمنا الجمعه
الهنوف:من؟
جراح:ساري وفارس وراشد
الهنوف:ماشاء الله زين حلو
جراح:اي بنتعشى ونرجع وراشد ياخذ عنتي البتول
الهنوف:يالله زين
جراح:تجين معانا؟
الهنوف:لا لا مافيني شده رجولي توجعني خلني ارتاح
جراح:عزيز يبي يروح والا ماودي اطبها ابداً
الهنوف:خله يروح مسكين الجو حلو تستانسون
جراح:ليتك تجين معنا
الهنوف ابتسمت؛روحوا انتوا انا بظل بالبيت
جراح حط الشاهي ووقف:على راحتك تبين شي؟
الهنوف:وين رايح؟
جراح:بمر اخذ ريحان من دوامها واخذ العيال من المدرسه
الهنوف:مو كنه بدري؟
جراح هز راسه بالنفي ومشى وركب سيارته
دق عليها وانتظرها ترد عليه:هلا
جراح:هاه خلصتي؟
ريحان:اي وين بنروح؟
جراح:باخذك مشوار قصير ترقصين لي ونرجع
ضحكت ريحان وناظرت اللي حولها وهمست:تستهبل؟
جراح:لا والله استاجرت مكان ترقصين لي ونظلع ناخذ العيال
ريحان عضت شفتها:ياويلي جراح تجننت؟
جراح:اي والله احد عنده هالزين يرقص ومايتجنن
كتمت ضحكتها ريحان وجراح همس:انتظرك برا
قفل منها ولبست عبايتها ريحان بحيا وهي تضحك
-
ريحان
خرجت من الدوام وركبت جنبه وناظرته
:جراح!
جراح حرك وهو مبتسم ويضحك
ريحان:عبالي نطلع نتغدا من الصباح على جوعي
جراح:انا قلت لك بنتغدا؟
ريحان:لا بس قلت استأذني بدري
جراح رفع كتوفه ولف للطريق
ريحام:طيب بالله جراح خل نرجع البيت
جراح هز راسه بالنفي:حجزت وخلصت
ضحكت بصدمه:منجدك؟
جراح هز راسه:اي ترقصين ونخرج من المكان
ريحان ضربت جبينها وجراح لف بسرعه
واخذ الكيس من ورا ورجع ناظر الطريق
ناظرت الكيس وعقدت حواجبها؛وش ذا بعد؟
جراح:اللي وعدتك لاتزوجنا ترقصين فيه
ريحان ظلت تناظره وجراح لف لها:عند غصن الريحان وعدتك
ريحان هزت راسها بأسف :احلف؟
جراح ضحك من ردة فعلها وريحان
ابتسمت وهي تناظر الكيس وتناظر الطريق
وقف جراح وسحب بريك ولف لها؛يالله
نزل وهي تناظره بصدمه فتح لها الباب ونزلت
دخل الفندق وريحان تناظره وتضحك
فتح الباب وناظرت الاكل جاهز والغرفه بارده
تقدم جراح واخذ الورد من على السرير ومشى لها
ضحكت وحطت شنطتها على الرف واخذتها منه
جراح ابتسم:تستاهلين الورد
ابتسمت ريحان وهي تناظر الورد وتناظره
اخذت الكيس ومشت عنه وجراح جلس وهو يناظر الاكل
سمع صوت اللبس وراه ولف وابتسم
ضحكت ريحان وميلت راسها:طلع حلو والله وقدي مع اني جايبه بطنين
جراح مارد وهو يناظر شكلها ولبسها
فتح جواله يحط اغنيه وريحان تضحك
حط جواله جنبه ولف لها:يالله
ابتسمت وبدأت ترقص وجراح جالس ويناظرها مبتسم
وريحان تضحك وترقص على الاغنيه
اخذ نفس جراح بحب وهو يناظرها وريحان
تقدمت له وهي تسحبه من يدينه يرقص معاها
ابتسم وريحان ترقص وماسكه يدينه وتضحك
-
جراح ؛من قابلك ... لا تِـسأله كم تمنّاك !
‏انت السّما ، وانت الامل .. والتمنّي
ريحان؛ماني راضي بـ أنصاف الحُلول
‏أبي كل الوجيه اللي تمرني وجهّك !
—
هز جواله وهو ياكل ولفت له ريحان
اخذه ورد وهو ياكل:هلا ..اي جاي اخذهم
قفل ولف لها:شبعتي؟
ابتسمت وهزت راسها
جراح:مشينا لعيالنا ناخذهم
ابتسمت من كلمته ووقف جراح وهو يمسح فمه
ووقفت ريحان وهي تلبس عبايتها
لف لها وابتسم ومد يده
ناظرت يده ريحان وابتسمت ومسكتها
وناظرها قريبه منه ومبتسمه ورفع راسه وباس جبينها
خرج من الغرفه وهو ماسك يدها ومشى وركب سيارته
وقف عند مدرسة اولاده ونزل وريحان تناظره
شال اصغر عياله وماسك بيده عزيز وييتكلم معاهم
ابتسمت ريحان بحب ورفعت جوالها تصورهم
-
فارس
دخل الغرفه وناظرها على جوالها منسدحه
ميلت راسها وناظرته؛جيت!
فارس قفل الباب ومشى لبنته نايمه محله
فجر؛معليش ياعمري نامت جنبي ولا اقدر اشيلها غرفتها
فارس انحنى وباس فجر وشال بنته وغمض عيونه لها
ايتسمت فجر ومشى فارس ببنته
ناظرها نايمه واخذ نفس وباسها وغطاها
قفل الباب ورجع الغرفه وجلست فجر
وهي ترفع شعرها:كيف دوامك؟
فارس انسدح جنبها ولا تكلم وفجر ابتسمت
مسكها من ذراعها وانسدحت جنبه وانسدح على صدرها
فجر رفعت يدينها لراسه:تعبان!
فارس:لا
فجر:امم طيب جوعان؟
فارس:لا
فجر:امم مشتاق لي؟
فارس ابتسم ورفع يده لبطنها:تقدرين تقولين ولهان مو بس مشتاق
فجر حطت يدها على يده وفارس سكت ثواني
:تدرين جاتني مشكله من معلم ومدير بالتعليم
فجر :ايوا!
فارس:يوم جلست مع المعلم تذكرت حالي قبل ما نتزوج
فجر عقدت حواجبها وفارس رفع راسه لها
:يقولي انه كان مضغوط امس خطب اللي يبيها ورفضوا
فجر ابتسمت وفارس ابتسم:تدرين وش قلت؟
فجر:يرجع يخطبها من جديد؟
فارس:قلت له ان ام بنتي خطبتها ٥٦ مره
فجر ابتسمت من تذكرت:شقال؟
فارس:انصدم قلت له يصّر عليها اذا يبيها لين المليون مره مردها بتصير له اذا هي من نصيبه
فجر:وام بنته بعد
ابتسم فارس:وتوسطت له مسكين
فجر:زين سويت
فارس:الله يرحمه خالي ٥٦ مره ماقد احد سواها
فجر:عشان كذا انا محظوظه فيك
ابتسم فارس ونزل نظره لبطنها:شرايك تولدين؟
ضحكت فجر وفارس كمل:مستعجل عليه
فجر:صبرت علي ٥٦ مره ماتصبر شهرين عشان ولدك؟
فارس:تقارنين احد فيك!
فجر ضحكت وفارس مسك يدها وهو يناظرها مبتسمه
—
هلا باللي عجزت ألقى عذاريبه
‏هلا باللي تحبه كل أسبابي
-
انفتح الباب ودخلت وارنبها القطني في يدها:مام
فجر قامت وفارس ناظرها
فجر؛هلا ياماما تعالي
طلعت على السرير بصعوبه ومشت لهم
انسدحت بينهم وابتسم فارس:وش صحاك؟
هناي:شفت كابوس
فجر ابتسمت:كابوس؟ من وين تعلمتي هالكلمه
هناي ناظرت فارس وحاوطت رقبته وابتسم
انسدح وبنته على صدره ويجلس يحكيها
وفجر جالسه وتناظره ينوّم بنته وابتسمت
—
ساري
ناظر اللابتوب وماسك يدينه بارتباك
سما وبنتها بحظنها:ماعليك ساري اذا ماتوظفت خيره
ساري ساكت وسما تناظره
هز رجله ولف بتوتر:وش فيه النت؟
سما:ماعليه ساري معلق الموقع الكل عليه اصبر
ناظر التحميل اكتمل وتقدم وسما جنبه
نزل للاسماء وهو يقرأ بينها اسمه
ابتسمت سما وهي تأشر:شوفه موجود موجود
ساري ابتسم بعدم تصديق وسما ضحكت:شفت قلت لك
وقف ساري وانحنى يسجد على الارض
ونزلت بنتها سما وركضت لظهر ساري تتعلق فيها
وقف ورفع بنته وسما وقفت له:هاه دكتور ساري
ساري ابتسم وحظنها؛حمدلله يارب
سما:ساري ماشاء الله نسبتك تساعدك من اول اقول لك
ساري:ببشر امي
سما:لا خلنا نروح لها على العصر ومنها تبشر فارس
ساري ابتسم لها وضحكت سما:يالله مبروك
ساري ابتسم بفرحه وجلس وهو يناظر اسمه
جلس وهو يفكر قبل هالسنين وين كان
كان في مكان وحلمه في مكان
حلمه الدكتور ساري البالطو الابيض
وحوالين رقبته سماعة الاطباء
حس فيها تمسك كتفه ورفع راسه لها وابتسم
:بديتي معي من الصفر
سما ابتسمت:٧ سنين صبرت على كتبك ومذاكرتك اللي ماتخلص
ساري ضحك وكملت سما:مانطلع ويكند ابد
ساري:كنت ابي انجح
سما:ونجحت
اخذ نفس ساري:ابشري لك اللي يعوضك اول راتب نسافر فيه
سما جلست جنبه:احلف ساري؟ تسفرنا؟
ساري:اي جايتكم ايام دلع انتي زوجك دكتور يابنت
سما ابتسمت:وناسه ساري
ساري ناظر بنته ورجع ناظرها:بس خلينا نبشّر امي
سما هزت راسها وساري لف لجواله:مافيني صبر
انتظر يسمع صوتها وردت؛هلا ساري
ساري:شلونك امي!
زهور؛حمدلله وش فيه صوتك؟
ساري:ابد مبسوط وقلت ابشرك
زهور:وش تبشرني سما حامل؟
ساري ابتسم:لا ماهي حامل انا توظفت حمدلله
ابتسمت زهور ونزلت دموعها وسكتت
ساري ضحك؛الو امي؟
زهور:حمدلله
ساري:وليه تبكين المفروض تفرحين
زهور؛تو اخوك بشرني يقول فجر بتجيب ولد وبيسميه على اخوك الله يرحمه حازم
ساري ابتسم وزهور كملت؛وانت الحين صرت دكتور قرت عيني ياساري
ساري:كله بفضل الله ثم بفضلك يا يمه ودعواتك هي لا تبكين عشان لا اجيك الحين
زهور مسحت دموعها؛لا تشيل هم دموعي وانتبه لوظيفتك ولبيتك ياساري
ساري:ابشري الله يطول بعمرك
زهور قفلت جوالها ومسكت يدينها تبكي
تذكر حال عيالها قبل والحين
تنشد فيهم الاظهر وتفتخر فيهم
—
فتح الباب ودف البوابه وانفتحت كلها
هبت ريح حلوه من الحوش وابتسم بحنين
لف للسيارات وراه وركب سيارته ودخلوا
رصصوا السيارات بالحوش ونزلوا
رفعت راسها ريحان للبيت ومسكت قلبها
ايام طويله مرت هنا مابين الفرح والحزن
لفت على طول لخواتها من نزلوا ويناظرون البيت
تلفتوا بالحوش يناظرون مكان عبدالعزيز ويترحمون عليه
نزل عزيز من جنب ابوه ووقف جنبه يناظر الحوش
فتح شنطته فارس ونزل فرشه كبيره
وساعده ساري وجلسوا وجراح واقف
لف لريحان من تكلمت؛بندخل البيت شوي
هز راسه ومشت مع خواتها ودخلوا
طلت البتول تناظرهم وهي شايلع اغراضها
ناظروا كل زاويه بحنين ريحة فطور الصباح
للحين بالبيت بين الشاهي والخبز الحار
وصوت ابوهم يعجّل بالفطور
كلهم حزن على فراق هالمكان بكل ماضيه
طلعت ريحان من البيت وهي تناظر
شبك الغنم اللي واقف قدامه راشد
يناظر الشبك فاضي وخالي
ابتسم راشد ونزل راسه وين كان ووين صار
طلت ريحان على عيالها وناظرتهم جالسين
جنب جراح وماسك يدين عزيز ويتكلم معه
ابتسمت ومشت بهدوء لبيت عايض ابو جراح
وقفت بالدرج تناظر الديره والبيوت الصغيره
وتاخذ نفس من حست بريحة الريحان حوالينها
زين اذنها بالريحان وابتسمت ولفت له
جراح ابتسم:الريحان للريحان
ابتسمت له :كنا محتارين وين نتقابل بأول ليله عرفنا بعض
جراح هز راسه ووقف جنبها يناظر الجبل
:واخترنا الجبل نروح له مدري ليه جاك هالكلام بعد مالقينا الجبل
ريحان عقدت حواجبها:اي كلام؟
جراح؛اختار وين اللقى ياحلمي الاجمل على كفوف القمر والا على الغيمه؟
ابتسمت ريحان وكمل جراح:لاني معك لاقصى حدود السما
ابتسمت بحب وانحنى راسها على كتفه
،
مابين رضا راشد واماني وبين قسمة كوثر
اللي لاحقتها وابت تخليها لانها خير لها
وبين عوض فارس وفجر لين فخر ساري وسما
لين حب جراح لاغصان الريحان وللريحان
-
كل قصة حب .. أحلام ومدينة ..
‏ليل ونخيل وهبوب ..
‏لكل قصة حب لو كانت حزينة ..
‏أجمل ألوان الغروب ..
‏ناظري ضيّ الحوانيت القديمة ..
‏ونقش أبواب البيوت ..
‏كلها شعر ومواعيدٍ قديمة ..
‏وصوت قلبي اللي يموت .. وما يموت

-
نهاية روايتي الثامنه ولله الحمد " صلوا على النبي "
حسابي استقرام r_46sho