اختار وين اللقى ياحلمي الأجمل على كفوف القمر والا على الغيمه

الجزء السابع

عماد
دخل البيت وناظرها جالسه بالصاله
ومن ناظرته وقفت
وقف عماد وناظرها بضيق وجمود
وتقدم لها شوي شوي لين ما وقف قدامها
تكلم بهدوء:كنتي لي ضحكه وضي وكان حبك كل شي
كوثر نزلت نظرها بضيق من كلامه
عماد بلل شفايفه؛صعبه علي اللي صار تحبينه اكثر مني؟
كوثر ناظرته وعمااد كمل:قدريني طيب اسمي مرتبط باسمك بيننا عقد نكاح ننتظر عرسنا يجي احترمي اني بيوم كنت بكون زوجك
كوثر ارمشت بهدوء ودموعها بعينها
عماد؛كنت معاك بكل لحظه ابعدت كل الشكوك وقلت لا تبيك ياعماد وهذا جزاي؟
كوثر همست؛انا انفضحت عند الناس
عماد؛وتحسبيني بغيتك تنفضحين؟ والله اني ابي لك الستر والخير كل حياتي اللي بغيتها معك بغيتها لك خير وفرح
كوثر بلعت ريقها وهي تناظره بضعف
عماد عض شفته وهمس:الله معاك ياكوثر هالمره مو زي كل مره
كوثر نزلت راسها تمنع دموعها وعماد كمل
:الله يوفقك مع غيري
ناظرت يده ورفعت راسها له
نزل دبلته من اصبعه وحطها بكفها وخرج من الباب
جلست على الكنبه بضعف وهشاشه والدبله بيدها
بكت من اللي صار لها من اخوها ومن عماد ومن راشد
لا حب ولا نصيب ولا اخوه ولا سند ربحته من هالحرب
حاربت وحاولت بس بالاخير خسرت ويوم خسرت
خسرت كل شي مره وحده وظلت لحالها
-
الساعه ١١:٠٠ م
تقرا قران بصوت واطي وهادي
حسته بحركته وفزت له؛جراح!
جراح لف لها براسه؛انتي لحالك؟
ريحان؛اي محد عندي بغيت شي؟
جراح؛شصار لراشد؟
ريحان؛مافيه الا العافيه خرج بنفس اليوم ورجع الديره
جراح همس:وكوثر؟
ريحان مسكت يدينه:جراح انت اهم من الكل عندي
جراح ابتسم وناظرت ابتسامته ريحان وابتسمت
:انت بالدنيا اهم شي
جراح ابتسم بضحكه:تدرين وش يطري على بالي؟
ريحان ابتسمت:وش؟
جراح:ثوبك الاحمر وشعرك الاسود اللي قبل وانتي ترقصين
ريحان ابتسمت وجراح كمل:شي يضحك صح؟
ريحان؛جراح لا تشيل هم شي كل الامور بخير صدقني
جراح؛عماد اكيد صار عنده خبر
ريحان:هذا اللي كان المفروض يصير خلاص جراح محد ياخذ نصيب الثاني
جراح تنهد وسكت وريحان تقدمت له وهمست عند اذنه:
طيب بسرعه عشان تشوف غصن ريحانك يتمايل لك
—
بعد مرور ثلاث ايام
كوثر
سمعت صوته بالصاله وبلعت ريقها بضيق
خرجت ريحان تاركته وطلت بعيونها وناظرته
جالس وعيونه مغطيه بشاش ابيض وهادي وساكت
بلعت ريقها ودخلت وهي تناظره وساكته
جراح:ريحان؟
دخلت ريحان وناظرت كوثر وناظرته؛هلا جيت
جراح:عطيني
ريحان مدت له الكاسه واخذها يشرب وريحان تناظر كوثر
وجراح مد الكاس وهمس:كرهت القزاز لعد تجيبين لي فيه
ريحان ناظرت كوثر واخذت الكاسه وجلست جنبه
هزت راسها لكوثر تجي تجلس وكوثر هربت وخرجت
تنهدت ريحان ولفت لجراح تناظره بهدوء
دخلت غرفتها كوثر وقفلت الباب خافت من منظر جراح
خافت لو جد يفقد بصره بسببها كيف بتكون حياتها
وهو اخوها الوحيد بالدنيا
-
راشد
وقف عند الباب وناظره ثواني ودقه
لفت اماني بسرعه على الباب وانصدمت
من يدق عليها! معقوله راشد؟ وش يبي!
وقفت بتوتر وفكت الباب ومن ناظرت راشد
لانت ملامحها بحب وضعف وطاحت عينها بعينه
بلع ريقه راشد وهمس:اقدر ادخل؟
اماني ماردت وبعدت عن الباب ودخل راشد
اخذ نفس ولف لاماني وناظرها:ماني جاي اعتذر
اماني ناظرته وراشد كمل:اللي سويته ماينغفر عليه ابد
حست اماني قلبها بيخرج من مكانه لحظة ان راشد يقول الكلام ذا
راشد:كنتي خير الناس بحياتي وكنتي شي جميل بس انا ماقدرتك ابد
اماني شدت من قبضة يدها وهي تناظره
وراشد كمل:انا ما اقدر اظلمك اكثر معاي جبت لك الهم والغم سكنتك بقريه بعيد عن اهلك وذليتك كثيير
اماني تجمعت بعيونها الدموع ونزلت نظرها بسرعه تصد
راشد:اذا على تركي ولجين نتكلم مع ابوي وابوك وينحل الموضوع
اماني رفعت نظرها له وراشد ناظر دموعها وبلع ريقه
:انتي تستحقين الاحسن مني اماني
اماني ماردت وراشد بلل شفايفه ومشى طالع من الغرفه
غمضت عيونها بقوه اماني وجلست بالارض
حطت يدها على فمها تمنع صرخاتها من الخروج
ليته يدري ان اللي يحب يغفر وان اللي يحب ينسى
-
فيحان
دخل المجلس وناظر جراح وابتسم:اجر وعافيه ماتشوف شر
جراح:الشر مايجيك حياك
جلس فيحان بجنب جراح وناظر عيونه:ان شاء الله انك زين؟
جراح؛زين اذا فكيت هالعصبه اللي على عيوني
فيحان:يالله ماعليه كلها كم يوم وان شاء الله ترجع زي زمان واحسن
جراح:ان شاء الله
فيحان اخذ نفس وهو يناظر جراح ويفكر
تقدم له وهمس:جراح
جراح لف له وهو ينتظر منه الموضوع
فيحان:طال الموضوع وودي يخلص بسرعه
جراح:فيحان انت شايف الوضع كيف متلخبط
فيحان:ماعليه جراح كلها كم ورقه توقع والاملاك تصير لي
جراح؛بهالحال؟
فيحان؛زين نأجلها شوي لين تطيب عيونك بس بعدها ياحراح ماني صابر
جراح تمنى يقدر يشوف ملامح فيحان وتكلم:معقوله يافيحان كل هالاملاك ومتعلق ببيت في الديره تاكل من سقفه الحمام؟
فيحان ابتسم لجراح وهمس:نشوفك على خير
وقف فيحان وخرج من البيت وجراح سند ظهره وهو يفكر
-
راشد
من دخل ابو تركي وهو خايف من العزيمه اللي فجأه طرت عليهم
ناظرهم وتركي خلفه:عسى ماشر يا ابو راشد!
عبدالعزيز:ماشر حياك اقلط
جلس ابو تركي وتركي جنبه وعبدالعزيز ناظر راشد:روح ناد البنت
وقف راشد ودخل البيت وناظر لجين جالسه وماسكه بطنها
وناظر اماني اللي هاديه وتناظر يدينها:تعالي
لجين وقفت؛بجي معاك راشد
راشد ناظر اماني اللي تناظرهم ومشى
دخلت اماني وناظرت تركي وجلست بهدوء تمنع بكاها يبان
جلست لجين جنب راشد وراشد ناظرهم واخذ نفس
هالمره لازم يكون قوي ويتكلم:عمي يبَه
ناظروه وعبدالعزيز عقد حواجبه وسكتوا
نزلت راسها لجين تناظر بطنها ولفت تناظر اماني
راشد:من بداية هالزواج ما كان خير ابد
ابو تركي عقد حواجبه وكمل راشد:هالزواج اسعد اثنين! واتعس اثنين
تركي ناظر اماني اللي جالسه وهاديه باستغراب
وراشد كمل:انا واماني ماعاد بيجمعنا شي ومانبي لجين وتركي يتأذون
عبدالعزيز:مهبول انت؟
راشد ناظره وبهدوء:واعي انا واماني قررنا ننفصل
انصدم ابو تركي وعبدالعزيز لف بسرعه عليه
وتركي عقد حواجبه وناظر اماني اللي رفعت راسها وكملت
:تكفى ابوي اذا انفصالنا بيأثر على لجين وتركي فكر زي بيجبهم ولد قريب
ابو تركي ناظرها:انتوا بدل! تدرون وش معنى بدل؟ تطلق اثنين يتطلق الاثنين بعد
راشد ناظر اماني اللي تناظره ورجع ناظر ابو تركي
:اذا راضي بنتك تصير مهجوره عندي فهذا قرارك
نزلت نظرها اماني وبلعت ريقها وابو تركي بصدمه يناظرهم
-
راشد
واقف عند المجلس بعد ماطلعوا كلهم
تاركين عبدالعزيز وابو تركي يتفاهمون
ناظر تركي جنبه مستصيب وتنهد
لف له تركي:من اللي مايبي الثاني؟
راشد ناظره ورجع صد:كلنا
تركي:راشد انت من البدايه ضد هالزواج وانا ادري انتي اللي ماتبي اختي؟
راشد؛قلت لك مو بس انا روح اسألها بتقولك ما تبيني
تركي تنهد وناظره:وماتقدر تصبر عشان اختك واللي ببطنها؟
راشد لف له بجسمه كله:وليه! ليه اصبر انا واماني عشان حياتكم انتم من البدايه احنا اللي اكلنا تبن وتبي نسكت الحين بعد
تركي:بنكمل سنه ياراشد
راشد؛قول لنفسك انك بتكمل سنه
تركي سكت وتنهد وراشد اخذ نفس طويل
لف من سمع صوت ابوه ودخل راشد ووراه تركي
عبدالعزيز:اقعد
جلس جنب عبدالعزيز وابو تركي بلع ريقه:تركي ولجين مالهم ذنب
تركي ناظرهم بصدمه وراشد عقد حواجبه
عبدالعزيز:ترجع البنت مع اهلها وكل واحد يروح بحال سبيله
راشد ناظرهم بصدمه:وش تغير؟
ابو تركي:بنتي ما ارضى على بنتي تنهان وتعيش مع واحد ما يبيها
راشد ناظر عبدالعزيز اللي يناظره ولف لتركي
تركي:ونحنا؟
ابو تركي:انت اقعد مع مرتك مافيكم الا العافيه
ابتسم تركي براحه وراشد بلع ريقه وهز راسه:الله يوفقها
-
اماني
اخذت نفس بصعوبه وقفلت شنطتها
ناظرت الغرفه والحوش من الشباك والغنم
شافت هالمكان جنه مع راشد
بكل سلبياته وحياته الممله كانت مرتاحه
بكل مره يدخل راشد بيده الجافه من الشغل
يجلس جنبها ويشرب شاهيه ويقطف من خبزتها
تكتفي بأي شي بالحياه وترضى عن كل المآسي
بس هالمره بتروح وترجع لبيت اهلها وحياتها الممله
اللي كل شي فيها موجود وممل
وقفت وهي تسحب شنطتها وفتحت الباب وناظرت تركي بالصاله
وقف من شافها واخذ شنطتها وخرج من البيت
دارت بنظرها تدوره ولا حصلته بالبيت
حز بخاطرها وطلعت من البيت
مشت بتركب سيارتها وناظر الشبك على يسارها
جالس راشد وبيده العصى يرسم بالتراب وساهي
انتظرت وقت طويل تناظره لين رفع نظره لها
بلعت ريقها بغصه وركبت تاركته يناظرها
مشت السياره وغابت عن انظار راشد اللي تنهد
بحزن على حاله خسر الثنتين ولا هو قادر يعيش
-
جراح
بعد فتره قصيره
في المستشفى فتح عيونه وهو يناظر بغباش على عيونه
وبتغبيش ميزها واقفه جنبه مبتسمه تنتظر منه يلمحها
رجع غمض عيونها وكرر الحركه لين ماوضحت الرؤيه
ابتسم وضمت يدينها ريحان ببعض برضا:حمدلله
جراح ارمش وهو يناظر بوضوح ويكرر الكّره
الدكتور:كويس ماشاء الله وضعك جراح
جراح ابتسم برضا والدكتور كمل:بس لا تتعرض للشمس اهم شي
ريحان ناظرت الدكتور ورجعت ناظرت الدكتور
الدكتور:يعني البس نظاره شمسه افضل، ايضاً فلاش قوي على عيونك لا لين مده قصيره
جراح هز راسه؛تمام
الدكتور:يالله اجر وعافيه
خرج وجلست ريحان قدامه وهي مبتسمه
جراح ابتسم:كنت محروم من هالنظر اسبوع كامل؟
ريحان ابتسمت له؛ليش ما كنت على خيالك؟
جراح مد يده لها؛كنتي هنا
رفع يدها على قلبه وقرب منها وهو يناظرها
وريحان ابتسمت له اخذ نفس وهمس:شسوي؟
ريحان ناظرت ضعفه وضياعه بعيونه وهمست
:اختك، اهم شي اختك خلك قريب منها جراح لو مهمها يصير خلك جنبها
جراح تنهد وهو يناظرها:وراشد؟
ريحان؛خلنا بكوثر وامك ترجع لها الضحكه وسعة البال ونشوف راشد
جراح همس؛تهقين؟
ريحان ابتسمت برضا وهي تناظره:يالله خل نرجع البيت نبشر امك
وقف جراح على رجوله وهو ماسك يد ريحان
ويحمد الله على نعمة البصر كانت مده قصيره ولا قدر يتحمل
-
كوثر
ناظرت امها بالصاله واخذت نفس وجلست جنبها
حست فيها الهنوف ولا ناظرتها ابد
حطت راسها على كتفها كوثر وتنهدت:ادري زعلتك كثير
الهنوف ماردت وهي تناظر التليفزيون
كوثر؛امي بنتك تعبانه وهالمره تعبانه حيييل
الهنوف غمضت عيونها وكوثر همست:تحس انها بتموت
رفعت يدها الهنوف على شعرها وهمست؛يومي قبل يومها
رفعت نظرها كوثر بدموع :امي تكفين خليك معاي صفيت لحالي
الهنوف غمضت عيونها وتنهدت بآه وحظنتها:لا حول ولا قوة الا بالله
كوثر:خسرت جراح امي كنت بسبب له العمى
الهنوف:مافيه الا العافيه ان شاء الله
تنهدت كوثر على صوت الباب ورفعت راسها
دخل جراح وناظر كوثر بحظن امه والهنوف ابتسمت
ودموعها على خدودها؛حمدلله على سلامتك
رفعت يدها ومشى لها جراح وحظنته بيدها الثانيه
ابتسمت ريحان وهي تناظرهم وواقفه عند الباب
الهنوف:اللي مر مُر ياعيالي وكبير علي بس اللي مزعلني زعلكم
كوثر ماردت وهي تناظر جراح جنبها بحظن امها
الهنوف:مابي يفتن بينكم شي وانتوا وحيديني اخوك ماله الا انتي واختك مالها الا انت الله ماعطاني الا انتوا
جراح نزل نظره بهدوء والهنوف كملت؛سعادتي من سعادتكم تكفون
كوثر ماردت وهي تبكي بدون صوت من كمية المشاعر
رفع راسه جراح وناظر امه:اهم شي رضاك امي
كوثر ناظرت جراح وبلعت ريقها بربكه ووقفت
وقفت قدامه وجراح رفع نظره لها وناظر دموعها
انحنت وباست راسه وغمض عيونه جراح ووقف
باس جبينها وناظرها؛اخوك ياكوثر بالدنيا ، اخوك ياكوثر
بلعت ريقها كوثر وهزت راسها وهمست:اسفه
تنهد جراح وناظر امه وابتسم:ماعليه تصير حمدلله محد تأذى
الهنوف ابتسمت وهي تمسح دموعها وتناظرهم جنب بعض
-
ريحان
سحبت نفسها ودخلت الغرفه وهي مبتسمه
وضحكت تذكرت امها وحز بخاطرها
فرق بين امها وام جراح تنهدت بهدوء
وفصخت عبايتها وهي تحط ادوية جراح على السرير
حست فيه وراها ولفت براسها وماترك لها مجال
حظنها وهو يمسك بطنها ويناظر اللي قدامه
ابتسمت ريحان ومسكت يدينه:لا تعورك عيونك جراح خل احط قطراتك
جراح همس؛ما توجعني عيوني وانتي قدامي
ريحان ابتسمت ولفت له :تعال انقط بعيونك
مسكت يده وهو ينسدح جلست جنبه ورفعت شعرها
نقطت بعيونه وهو يناظرها وغمض عيونها
ابتسمت وهي تناظره ومسك يدها:ودي في شي
ريحان عقدت حواجبها؛وش تبي!
جراح اخذ نفس:كباية شاي نفس اللي كنت اشربها بالديره
ابتسمت ريحان وضحكت؛كل شي هنا صناعي ماظنتي تعجبك
جراح؛هي ماهي بمكونات هي باليد اللي تصنعها
—
عبد العزيز
جالس بالحوش ويناظر الارض والصخور
طلعت البتول وناظرته؛الغدا
عبدالعزيز ناظرها؛راحوا
البتول تقدمت له ووقفت جنبه
عبدالعزيز:عيالي كلهم راحوا تاركيني وحدي هنا
البتول:شتبي فيهم ياعبدالعزيز خلاص اللي راح راح
عبدالعزيز:بعض اللي يروح تنخاف يرجع
البتول:اذا قصدك عن الدفون فأرتاح مايخرج الخافي الا اذا مات واحد فينا
عبدالعزيز ناظر البيت جنبه؛وراشد!
البتول:راشد جبان ومابيتكلم خايف على نفسه
عبدالعزيز تنهد واخذ نفس
البتول:تعال نتغدا
مشى عبدالعزيز ودخل وخرج راشد من ورا الجدار
ناظر مكان عبدالعزيز ورجع ناظر مكان الصخور
وتتردد على مسامعه جبان
اخذ ثواني يناظر الحوش واختفى راجع لبيته
-
جراح
جلس عند كوثر وكوثر تناظره
اخذ نفس:كنت بتكلم معك لحالنا
كوثر نزلت نظرها ثواني وناظرته
جراح؛الشي اللي صار غلط وان شاء الله انك تعرفين انه غلط بس خلينا الحين بالمهم
كوثر عقدت حواجبها:صاير شي!
جراح؛بيتنا بالديره لازم ينباع امي تبيه ينباع وانا من رأيي مالنا قعده هناك
كوثر بلعت ريقها وهي تناظره بحيره
جراح:مالنا شي هناك كوثر خلينا نبيعه
كوثر:وعمي!
جراح:وش فيه؟
كوثر:شارط قبل تتزوج ريحان البيت ماينباع
جراح:ماعلي من عمي بيقعد يشرط على الكل لين ما يموت
كوثر:واذا صارت مشكله جراح؟
جراح؛وش بياخذ ريحان مني!
كوثر هزت كتوفها وجراح تكلم بهدوء:ماعليك مو صاير شي بس انتي بيعي البيت لفيحان
كوثر ناظرت جراح ثواني وهزت راسها بالايجاب
وجراح ابتسم:زين
وقف وتركها وخرج وهو يكلم فيحان يتفق على موعد للبيع
ومن قفل فيحان ضحك وناظر اللي قدامه:تم البيت بينباع
ضحكوا وفيحان اخذ نفس براحه وهو يفكر
ناظره اللي قدامه وصفق بيدينه:فيحان نبي شغل مو معناته البيت انباع يعني خلاص لا شباب نبي الهمه بعد ماينباع البيت
هز راسه فيحان:اكيد ماعليك
-
ريحان
تكلم سما وهي تلعب بزرار بجامتها؛اي؟
سما:بس راحت اماني بيت اهلها واكسد بيطلقها راشد
ريحان بتفكير:يعني راشد الحين منفصل؟
سما:كنك تقرين اللي ببالي صح؟
ريحان:لا اوك صح ان كوثر بعد انفصلت بس ترا محد طلق خلي راشد بالاول يطلق
سما:ريحان، سوي خير على الاقل عطي كوثر خبر ان راشد انفصل
ريحان؛واذا صارت مشكله براسي ؟
سما:اي مشكله مابيصير شي كلمي كوثر وشوفي وش يصير
ريحان:وليه مانعلم راشد؟
سما:راشد كيف يجي بيتك وهو متهاوش مع جراح؟
ريحان:عادي يجي ويتكلم معهم
سما سكتت وريحان كملت؛اكلمه؟
سما عضت شفتها؛مالي دخل انا
ريحان:اي طلعي نفسك من الحين
سما ضحكت:لا لا معاك خلاص كلميه انتي وشوفي وش يصير
ريحان ابتسمت:طيب قفلي بكلمه
قفلت سما وريحان جلست باعتدال وهي تاخذ نفس
دورت رقم راشد واتصلت عليه
رد راشد وهمومه بعيونه جالس يناشد القمره لحاله
وحيد بديره مافيها الا الملاب والغنم
رفع جواله ورد:نعم!
ريحان تنهدت من صوته:شلونك راشد؟
راشد ابتسم:بخييير
ريحان بضيق:سمعت ان اماني رجعت لاهلها
راشد مارد وريحان اخذت نفس:وفي خبر ثاني ودي اقوله لك
راشد ناظر السما بهدوء :وش بعد؟
ريحان:كوثر انفصلت عن زوجها
لمعت بعيونه نجوم وجلس وهو يناظر اللي قدامه
عقدت حواحبها ريحان:الو!
راشد بضياع همس:وش يعني؟
ريحان:تسألني انا؟ انت تبي كوثر؟
راشد ولاول مره احد يسأله من يبي لاول مره احد يخيره ما يختار له
ابتسم وهو مو مستوعب حجم الكلام:وش يعني ريحان؟
ريحان ابتسمت:راشد كوثر انفصلت عن عماد واذا تبيها طلق وتعال اخطبها
راشد وقف وهو يناظر حوالينه مو مصدق
هل اللي حوله حلم والا علم هل اللي حوله خيال والا حقيقه
اللي يسمعه سراب؟
ريحان ابتسمت:بخيك انا وانت فكر
قفلت منه وابتسمت وهي تتنهد بفرحه ياليت لو راشد ياخذ اللي يبيها
-
لجين
دخلت الغرفه وناظرت اماني بضيق مشت
وجلست جنبها:بتقعدين بغرفتك دايم؟
اماني ماردت عليها ولجين تنهدت
:اماني محنا مطولين وراجعين ابي اسولف معاك ونتسلى سوا
اماني ناظرتها:الله معاكم
لجين تنهدت:قومي اقعدي طيب بتكلم معك
اماني تاففت وجلست وناظرتها:نعم؟
لجين؛في شي مخبيته عني؟
اماني عقدت حواجبها ولجين كملت:صار لنا مده طويله وانا حاسه ان اللي فيك ماهو عشان فراق راشد
اماني صدت بعيونها ولجين بخوف همست:اماني وش مخبيه؟
اماني ناظرتها بهدوء ولجين تناظرها بتمعن
همست اماني:حامل
غمضت عيونها لجين وبللت شفايفها وصدت
اماني:بذمتك لجين لين يوم الدين والله لو قلتي لاحد من اهلي او لراشد والله ما اسامحك
لجين:وش بتسوين تربينه لوحدك؟
اماني:اي ولدي انا اربيه راشد لا يدري تكفين لجين
لجين ناظرتها بصدمه وهزت راسها بالنفي:مستحيل اقدراسكت
اماني:قبل فتره قصيره عرفت مارح يكبر بطني الا وزانت الدنيا
لجين:ليش ماتبين تعلمين راشد؟ ماتبنيه يرجع لك؟
اماني اخذت نفس بضيق:مابي اكون سبب في تعاسته اكيد انه بيخطب كوثر الحين وتزين امورهم
لجين:بس هذا غلط اماني لازم يكون عنده علم بيجبه ولد
اماني:مو الحين اهم شي مو الحين تكفين
لجين تنهدت:على راحتك مابي اضغط عليك
وقفت وتركت اماني اللي انسدحت وهي تضم نفسها بتعب
-
فيحان
واقف جنب جراح ويناظر العقد ومبتسم
وكوثر جالسه وتوقع الاوراق
لف جراح لفيحان وصافحه:مبروك
فيحان:الله يبارك فيك بلغ عمك انه انباع
جراح:مابي المشاكل
فيحان:انا اقول روح له وكلمه وجهاً لوجه ويمكن يرضى
جراح ناظر كوثر ورجع ناظره:بشوف وقت مناسب
فيحان:يالله عساها مباركه عليكم
جراح ابتسم وخرج فيحان وجراح لف لكوثر اللي مشت وراه
ركب السياره وركبت جنبه وهي هاديه ولا تتكلم
ومن وقف جراح نزلت ودخلت البيت
ناظرت ريحان شايله صينية شاهي وفناجين
وقفت من شافتهم وناظرت كوثر:بعتوه؟
ماردت كوثر ومشت بتدخل وحطت الصينيه ريحان بسرعه:كوثر؟
دخل جراح وناظرهم وكوثر لفت لريحان
ريحان:بتكلم معك لحالنا
كوثر ناظرت امها وجراح ورجعت ناظرتها ومشت لغرفتها
ابتسمت ريحان لجراح:اجلس سويت شاهي
ومشت ورا كوثر ودخلت الغرفه ووقفت عند الباب
لفت لها كوثر وجلست:بيننا كلام؟
ريحان هزت راسها:بيننا شخص
عقدت حواجبها كوثر وريحان جلست جنبها:بيننا راشد اخوي
كوثر صدت ورجعت ناظرتها؛لا تجين تلوميني وتهدديني فكيني من هالسيره
ريحان تناظرها وساكته
وكوثر لفت لها وتكلمت بهدوء:خلاص طلعته من راسي استانسوا خلي زوجته له وهو لزوجته
ريحان:مابراسك تكملين هالحرب؟
كوثر:استسلم
ريحان:حتى لو في طرف استسلم قبلك؟
عقدت حواجبها كوثر وتاففت:بتقعدين تقولين الغاز مالي خلق اطلعي
ريحان؛راشد انفصل عن اماني واماني ببيت اهلها الحين
انصدمت كوثر وجمدت ملامحها ولفت بجسمها لريحان
ريحان ابتسمت بهدوء:يمكن اكون زوجة الاخ اللي تكرهينها بس ابي لاخوي قبلك الخير وجيت قلت لك عشان يكون عندك علم
تقدمت منها وهمست؛ان الطريق قدام راشد مفسوح لك
كوثر تناظرها مصدومه لين ماقامت ريحان وخرجت من الغرفه
ظلت كوثر تناظر الارض وتستوعب كلامها
كيف يعني راشد انفصل عن اماني! ما كانوا بدل ؟
فزت كوثر ووقفت وهي تضحك بدون استيعاب
بلعت ريقها اللي نشف وهي ماسكه راسها وتستوعب الكلام
-
جراح
ناظر امه وابتسم؛بعناه
ابتسمت الهنوف براحه :الحمدلله
لفت ريحان لجراح:عنده علم ابوي؟
جراح بخوف هز راسه بالنفي
ريحان؛مابتعلمه!
الهنوف:انا اقول خله امام الامر الواقع لا تتمشكل معه
جراح ناظر الهنوف:تهقين ما اروح له!
ريحان:لا جراح خلصنا من المشاكل
جراح:يمكن لو جيته بهدوء بيفهم
الهنوف:مايجي معه الهدوء ابد اتركنا منه
جراح اخذ نفس وناظر ريحان اللي تناظره بخوف
يدري ان عبدالعزيز مارح يعديها على خير
بس كله ولا يصير بينه وبين ريحان اي شي
-
راشد
دخل بيته وهوي يطلع اغراضه من الدولاب
هالفرصه جات لين عنده الطريق قدامه مفتوح
اخذ ملابسه وطلع وهو يحط الشنطه بالسياره
طلع عبدالعزيز وعقد حواجبه:هيه على وين؟
راشد فتح الباب وركب وهو يرويس ووقف عنذ عبدالعزيز
:رايح هالمره ماني جبان وبروح واللي يصير يصير
عبدالعزيز عقد حواجبه وراشد خرج من البيت
ومشى في الطريق متجه للمدينه
ناظر الساعه ٦:٠٠ م
ومشى في الطريق لين وصل وناظر الساعه
وناظر البيت وهو يدق على ريحان
ردت باستغراب وهي بالصاله:الو!
ناظرها جراح وهو يشرب شاهي
راشد؛ريحان انا برا تستقبلوني؟
ريحان ناظرتهم وابتسمت ومشت وطلعت من الصاله
:مهبول انتي والا مجنون! تجي بهالوقت؟
راشد:تونا ماجينا نص الليل ريحان
ريحان:لا روح دور مكان تنام فيه لين اتكلم مع جراح
راشد قفل جواله وريحان عضت شفتها بتوتر
مشت بتدخل الصاله ودق الباب
رفع راسه جراح وعقد حواجبه:بيجينا احد؟
ريحان:راشد
مشى جراح والهنوف وراه تشوف وش السالفه
فتح الباب جراح وناظر راشد وتكلم بهدوء؛نعم!
راشد:وعدتني اني اذا تزوجت رح تعطيني كوثر
الهنوف عقدت حواجبها وناظرت ريحان ورجعت ناظرت راشد
جراح؛الحين تذكرت وجيت؟
راشد:لا الحين تأكدت اني لها
ريحان عضت شفتها وهي تناظرهم وارتبكت
جراح؛تعال بوقت مناسب نتكلم
راشد؛مابيننا اوقات ياجراح صبرت شهور مابصبر كم ساعه
الهنوف ناظرت جراح اللي لف لها وتنهد
ناظر راشد اللي صامل وبعد عن الباب ودخل راشد
-
الهنوف
تناظر راشد جالس وجراح قدامه
حطت التمر ريحان قدام راشد وجات بتصب له
قاطعها:ماني جاي عشان قهوه وتمر
جراح ناظر ريحان اللي جلست جنب راشد وسكتت
الهنوف:هالمره مانبي حكي رجال هالمره بتدخل وبتكلم
جراح سكت واخذ نفس وانحنى بظهره
الهنوف:خلنا من البدايه نجي،علاقتك مع كوثر بالديره ما كان لها اساس كانت مخطوبه وملكت وهي بالديره واستمريتوا
راشد بلع ريقه وهو يناظر الهنوف وجّديه كلامها
الهنوف:على بنتي الغلط الف مره وبكل مره
راشد:وانا ابي الغلط وجاي عشان الغلط تعبت امشي بطريق الصح وانا الاغلاط تجرّني جّر
الهنوف:راشد
جراح لف لامه والهنوف كملت؛انتي عزيز علي واحترمك لانك محترم نفسك بس يكفي كلام الناس عنا
ريحان ناظرت راشد ونزلت راسها بهدوء
الهنوف:تكلموا بما فيه الكفايه
راشد:انا انفصلت عن اماني وقريب برفع الطلاق للمحكمه
الهنوف تنهدت وسكتت وناظرت جراح
اللي اعتدل وناظر راشد؛يمكن صار بيننا سوء تفاهم بس انت ولد عمي ولك قدر عندي وانا للحين عند وعدي بس مو بذي الظروف
راشد:اي زين عادي ننتظر بس الحين تعطيني كلمة تم
جراح تنهد والهنوف ناظرته؛روح راشد ارتاح والصباح ارجع نتكلم هالوقت ماهو وقت كلام
راشد ناظرهم بخوف ولاهو قادر هالمره يثق ويسكت وينتظر
شدت على يده ريحان وناظرها تهز راسها له
اخذ نفس ووقف ومشى طالع من البيت قفل الباب
ونزل خطوتين ورفع راسه لفوق ناظر شباكها وابتسم
:بكل مره ميعادنا شباك
انسدلت الستاره وغابت عن عيونه ومشى لسيارته
-
لجين
منسدحه وتناظر الفراغ وتفكر في اماني
لف لها تركي وعقد حواجبه:مابتنامين؟
لجين:لا شوي احس بطني متحجّر
تركي:اذا تعبتي صحيني تسمعين؟
هزت راسها له وتركي تغطى باللحاف ونام
وبعد وقت طويل من تفكير لجين عقدت حواجبها
من الوجع وغمضت عيونها وهمست؛بسم الله
بلعت ريقها واخذت نفس وهي تحس الوجع يزيد
مسحت جبينها وقامت ووقفت وهي تلتقط انفاسها
ناظرت رجولها بينهع قطرات مويه وعضت شفتها
همست بصوت مسموع؛تركي
فز من نومه وناظرها ووقف:شفيك؟
لجين:تركي
مشى لها ومسك يدينها وهو يناظرها بخوف
—
راشد
ناظر الوقت ٤:٣٠ م العصر
نزل من السياره
ومشى ووقف عند الباب وهو يدقه
فتح جراح وناظره؛هلا راشد حياك
دخل راشد وهو يناظر حوالينه
جراح؛مبروكين
عقد حواجبه راشد:على وش؟
جراح؛اختك لجين جاها ولد ماشاء الله
راشد رفع حواجبه بصدمه وابتسم بهدوء
جراح؛تمشي للديره ؟
راشد؛الحين!
جراح:اي
راشد سكت ثواني وهز راسه:اي اكيد
جراح:يالله مشينا
خرج راشد وجراح فتح شنطة سيارته وهو يحط الاغراض
تنهد راشد ووقف عند سيارته يناظر البيت
-
عند كوثر
لبست عبايتها وطلعت وهي تركض لهفه
مرت من جنب امها ووقفت عند الباب تناظره
رفع نظره راشد ومد يده لقلبه لا شعورياً
اطال النظر لها وهو يحس انها خيال ماهي حقيقه
يحس بانفاسه تتسابق وحرارة حسمه تزداد
بكل مره يشوفها وكأنه يشوفها من جديد
ابتسمت كوثر له من بعيد وهي تناظره
الهنوف وقفت جنبها وناظرتها:يالله لا نتأخر
كوثر هزت راسها ومشت ورا الهنوف
قفلت الباب ريحان وناظرت راشد وركبت مع جراح
ركب جراح وراشد ناظر السياره تمشي وركب بسرعه
حرك سيارته وراهم وهو مبتسم ويناظر السياره
طال الوقت وراشد يناظر السياره وكل ما تزيد سرعة جراح
يزيد من سرعته لين يصير وراه بالظبط
دخلوا مع البوابه وراشد ناظر البيت بضيق
وقف سيارته جراح ونزل راشد وناظر عبدالعزيز يخرج
بلل شفايفه جراح بتوتر وهو يترقب نظراته ويسأل
عرف! والا ماعرف!
عبدالعزيز؛ابطيت ياراشد
راشد تقدم له وباس جبينه بهدوء
عبدالعزيز ناظر جراح؛اخذت اللي تبيه وخلاص معد شفناك؟
جراح ابتسم براحه ومشى وباس راسه؛السموحه ياعمي اعذرنا مشاغل
عبدالعزيز:حياك
دخل جراح وناظر ساري جالس على جواله بلبس الطب
ابتسم جراح؛هاه دكتور ساري
وقف ساري من انتبه له وسلم عليه:شلونك؟
جراح؛حمدلله متى جيت؟
ساري:تونا وصلنا
جراح جلس جنبه وناظره:وين فارس؟
ساري:كلمته يقول بالطريق
جراح هز راسه وناظر عبدالعزيز وصد بنظره بتفكير
-
ريحان
ركضت بسرعه وهي تصرخ وتجلس جنب لجين
:ياااي لجين صغير
لجين ابتسمت؛الله يسلمك وعليكم السلام
ريحان:اسكتي خل اتأمله زين
لجين لفت لسما واخذت منها الكاسه:مشكوره
سما:جات المطفوقه
ريحان:امانه سما شوفي ماشاء الله يشبه ابوه
لجين؛ماشاء الله؟
ريحان:اي تركي احلى منك نضحك على بعض؟
لجين:وخري بس قليلة ادب
ريحان:هاتي اشيله تكفين
لجين:لا بعدي لا تمسكينه اجل تركي احلى مني؟
ريحان:خلاص انتي احلى اف هاتيه
شالته ريحان بتأني وعاضه شفتها بحب
لفت لفجر اللي دخلت وركضت للجين:ياعمررري حمدلله على السلامه
لجين:الله يسلمك
فجر ناظرت الولد بحظن ريحان:ياعمري ماشاء الله يشبه ابوه
ضحكت ريحان وسما ناظرت وجه لجين وضحكت
فجر ناظرتهم:وش فيكم؟
لجين:بنات
ناظروها وكملت لجين:ياليتك كنتوا معاي شعور حلوو الله يجعلني اشوفكم امهات
ابتسمت ريحان وسما اعتدلت بجلستها:انا ان شاء الله اذا خلصت دراستي
فجر ناظرتها:وليه؟
سما:فجر انا ادرس وساري يدرس وين يقعد الولد؟
ريحان:خليهم ذولا يدرسون لين يموتون
سما ابتسمت:باقي لي كم سنه واخلص ياحلوه
ريحان ماردت وهي تناظر الولد بحظنها ومبتسمه
-
الهنوف
ابتسمت وناظرت البتول:وهذا اول احفادكم الله يخليه لكم
البتول تنهدت:اي والله كبرنا
زهور؛انا توني صغيره ماصرت جده بعدني
البتول:بتصيرين بتصيرين وين بتروحين يعني عندك اثنين متزوجين من عيالك
الهنوف ضحكت ولفت لكوثر من وقفت وتنهدت
كوثر طلت من الشباك ولفت تناظر امها تسولف
اخذت نفس بتوتر وعضت شفتها وفتحت الباب وخرجت
نزلت من الدرج وهي تشوف حذايين الرجال بالمجلس
نزلت بخطوات هاديه ولفت من طل لها راشد من ورا الجدار
ومن ناظرها انصدم وظل واقف بمحله
وهي ابتسمت بحب ياما حبت هالمكان وهالديره وهالانسان
بلع ريقه راشد بارتباك طال الوقت والسكوت بينهم
من زمان ماتكلم معها ومن زمان ماشافها قدامه مبتسمه
اخذ نفس راشد بصوت مسمعوع ونزلت اخر خطوه كوثر
وصارت قدامه تدرس ملامحه وتحفظها عن ظهر غيب
وراشد ضايع من وين يبدأ بالكلام ياما رتب لهاليوم
بس كل الحروف تلاشت وكل البلاغه تذبذبت
همس باول حروف يلتقطها لسانه:
التقينا بليله من ليل البعاد
والهوى والحب في القلبين عاد
ابتسمت كوثر وهي تناظره ورفعت كتفها وتكلمت بهدوء
:ماتركتك فصيح اللسان وتنطق اشعار
راشد:من اخر يوم غياب لك سجّيت مع نفسي واغتنمت الشعر
كوثر نزلت راسها ورجعت ناظرته:مرت ليالي سود ياراشد علي
راشد تقدم لها بوحع بقلبه وهمس:
اذا حسيت انك من احزانك غريبه!
تدرين! ان ضلوع صدري لك بلد؟
ابتسمت كوثر ابتسامه واسعه وابتسم راشد من ابتسامتها
وتكلم بلهفه:تدري وش بخاطري! خاطري اخذك لنفس المكان حوالينا الغنم ونحنا نسابق خطواتها
كوثر مدت يدها لكفه وناظر يدينهم راشد ورجع ناظرها
تكلمت له بحب ينطق من داخلها:راشد
راشد تقدم لها اكثر يناظر ملامحها:يالبيه
كوثر:هالمره لا تخليني
راشد ابتسم؛مهبوله انتي! حبيبك راشد هالمره ماهو جبان
ابتسمت كوثر وراشد كمل بهمس وابتسامته على محياه
:حبيبك هالمره عشقان وولهان
اخذت نفس براحه كوثر وصدت لصوت السياره اللي تدخل من البوابه
لف راشد وعقد حواجبه ومن وقفت السياره وعرف صاحبها
لف لكوثر اللي ناظرته بهدوء وفلتت يدينها ومشت داخله البيت
تنهد راشد وناظر ابو تركي ينزل من السياره
واماني من وراه صد راشد وغمض عيونه بشعور غريب
ماوده يشوفها قلبه حزين عليها
وقفت اماني وهي تشوفه من بعيد صاد بعيونه
لفت لامها اللي تمشي ومشت وراها وهي صاده
مرت من جنب راشد ودخلت البيت بضيق
ناظرت كوثر جالسه جنب امها وتناظرها
حست ودها تركض لها وتخنقها وتنزع روحها
بمجرد ما انها شافت راشد وشافتها بنفس المكان
حست بالضيقه تعتلي صدرها وتضايقها
وقفت الهنوف من شافت اماني وبللت شفايفها بتوتر
جلست ام تركي واماني جنبها وكوثر تناظرها
البتول ابتسمت لها:يتربى بعزكم يا ام تركي
ام تركي ابتسمت:الله يسلمك يارب
سكتوا وتوتر الجو بينهم لين ماوقفت كوثر
تبعد عن المكان وتدخل الغرفه ومن دخلت
رفعوا روسهم البنات وناظروها وسكتوا
همست باستعجاب:كل مابدخب مكان بتسكتون!
لجين ماردت وصدت عنها
وريحان ناظرتها؛تعالي اجلسي يتهيأ لك
فجر ناظرت سما اللي تناظرها وسكتت
ظلت كوثر تناظر لجين اللي صاده عنها
وريحان تناظر البنات بتوتر وهمست تدور سالفه
:من جانا؟
كوثر ناظرتها بهدوء:ام تركي
بلعت ريقها ريحان ورفعت حواجبها:اوه لحالها؟
كوثر هزت راسها بالنفي وسما كحت تناظر ريحان
سكتت ريحان ولفت تناظر لجين
-
جراح
يناظر الريحان ومبتسم تطري عليه الذكريات
لف من حس بحركتها وابتسم يناظرها جايه
لفت حوالينها ورجعت ناظرته ووقفت قدامه
وابتسمت بضحكه:كنك تنتظرني؟
جراح ناظر القمر فوق ورجع ناظرها:تدرين!
ريحان ابتسمت تنتظره يكمل كلامه
وجراح اردف:يالـ كل دكه من حُسنك شتل ريحان للجنه ،اخذتي من اسمك نصيب
اعتلت ضحكة ريحان بفرح وناظرته:احب اللي يحب اسمي
جراح ابتسم من ضحكتها:وانا احب صاحب هالاسم ومن تسمى عليه
اخذت نفي ريحان وناظرت الزرع حوالينها:طال الزرع واشتقت له
جراح ناظرها :المكان كله يشتاق لك
ناظرته ريحان بحب وجراح كمل:الزرع والريحان وهبت النسمه وليلٍ مع القمره
مدت يدينها ريحان ومسكت يدينه:يطري عليك وش قلت لك مره!
جراح ضحك من حس وش بتقول ومثل النسيان:لا
ابتسمت ريحان واخذت نفس:قلت لك اختار وين اللقى ياحلمي الاجمل؟
جراح ضحك وعقد حواجبه:اي؟
ريحان:على كفوف القمر والا على الغيمه؟
فلت يدينه جراح وحاوط خصرها وهو يناظر رموشها وعيونها
:تبين نعيد الذكرى ببيتنا؟
ابتسمت ريحان وناظرت البيت مقفوله ابوابه:على اساس انباع؟
جراح:الا
ريحان:تبنيي ارقص بارض ماهي انا؟
جراح:رقصتي لواحد ماهو لك
ريحان ابتسمت وناظرت البيت ورجعت ناظرته
وجراح رفع المفتاح باصبعه وهو يناظر خجلها
ابتسمت ريحان ومشى جراح وهو يسحبها من يدها
وقف عند الباب وهو يفتحه وريحان تناظر وراها
ربكة المكان للحين فيها حتى وجراح حلالها خايفه
فتح البيت ودخلت ريحان وهي تناظر الظلمه
قفل الباب جراح وفتح الانوار ولف لها:جاز لك؟
ريحان هزت راسها بالايجاب وجراح ابتسم
كان وعدها ونذرها ماترقص بعد
لكن حنين المكان وشوفة جراح خلتها تتراقص
على نفس النعمات وتحت نفس الانظار
انظار جراح ..
كلها حب وشوق ولهفه تنطلق من قلبه اسهام
لناحيتها تتسابق حوالين خصرها الخيول والمهرات
تتطاير حوالينها غزلان الريم وتداعب خجلها
عناقد الريحان اللي بكل ميله وميله تهب ريحه
يتناثر شعرها حول خصرها وهي تناظر لجراح
ابتسمت وهي تدور وترفع رجلها وترقص
مانست ولا خطوه تخطيها بالرقص
ولا طفى حبها للرقص ولا مّل
كانت ترقص وترقص ماهي حاسبه للوقت حسبان
ولا هي تعطي للعاشق قدامها اي اهتمام
كل اللي فيه الحين ترقص بعيد عن المصايب
والمشاكل وسوء الحياه ترقص
—
جراح ؛علموا عنق الغزال يخاف ربه
‏كاسبٍ ذنبي على كل التفاته
ريحان؛لك خصري وفستاني ولي ذراعيك والنظر
-
اماني
انتظرت لين كوثر طلعت من الغرفه ودخلت للبنات
ناظرتها لجين وابتسمت:هلا
اماني سلمت عليها؛حمدلله على السلامه
لجين:الله يسلمك ياروحي
ابتسمت لها ريحان:كيفك اماني؟
هزت راسها بابتسامه وناظرت الولد جنب لجين
ابتسمت للجين وهمست:عادي اشيله؟
هزت راسها لجين وشالته اماني بخوف
بلعت ريقها بارتباك وهي تناظره وتفكر
كم شهر وكم يوم بتصير ام ياترى بتفرح مثل فرحة لجين
بتشوف الرضا بعيون راشد زي عيون تركي اخوها
لجين ناظرت البنات وابتسمت:يابنات باركوا لاماني
جمدت ملامح اماني وناظرت لجين وهمست:لجين؟
لجين ناظرت البنات؛اماني حامل
جمدت ملامح البنات وسكتوا وهم يناظرون اماني
اللي غمضت عيونها وتركت الولد وصدت
لجين سحبتها من يدها؛اماني
اماني:هذي الامانه اللي قلت لك عليها؟ هذا الوعد اللي وعدتيني اياه؟
لجين:لمصلحتك ياغبيه عشانك
اماني:مابي احد يشفق علي ولاني محتاجه احد
ناظرت البنات وتكلمت بهدوء:اتمنى الموضوع مايطلع من بينكم
ناظرت لجين بزعل وطلعت من الغرفه تاركتهم
رفعت يدها ريحان على راسها وناظرت سما؛كله منك
سما؛اي حطيه براسي انا
ريحان:ليتني ماتكلمت ليتني ماتكلمت
لجين:ريحان مو عشانها اخت جراح تظبطين نفسك عندهم؟
ريحان:شدخل؟ كله عشان راشد اللي سويته
لجين؛راشد حياته مع اماني افضل صدقيني
ريحان ناظرت البنات وسكتت
وفجر همست؛انا من رايي انه ياخذ كوثر بنات بس اكيد نعلمه عن اماني
لجين ناظرتها:لا ياشيخه نطقت العروس
فجر؛صدق لجين ماهي حاله الولد طاير في كوثر يحبها ياخي ماتحسون انتوا بالحب؟ كنت بمووت لين تزوجت فارس وتذكرون حالي يوم جاب البريطانيه اظن
سما تنهدت؛خلاص قفلوا على هالسيره احس فيني صيحه
-
خرجت اماني وناظرت الحوش بضيق
رفعت يدينها تضم نفسها وهي تفكر
لفت على صوت شبك الغنم
مشى راشد بيرجع وحط شماغه على كتفه
ولمحها ووقف يناظرها ناظرته اماني
وبلعت ريقها وصدت بنظرها
بلل شفايفه راشد ومشى ووقف جنبها بالدرج
ومن حست فيه غمضت عيونها
راشد:شلونك؟
اماني لفت له وناظرته؛باهت
راشد نزل نظره لتحت ورجع ناظرها:ما تجرأت اتكلم معك
اماني هزت راسها وهي تناظره
وراشد ناظرها؛بس قلت اسأل عنك
اماني:راشد!
تنهد راشد وناظرها بضيق واماني زمت شفايفها
كانت بتخرج من فمها الكلمه بس نطقت بسرعه
:الله يوفقك معد بيننا كلام
راشد هز راسه واماني صدت عنه تنهد راشد
ونزل ومشى راجع للمجلس واماني
نزلت راسها بين يدينها تمنع غصاتها
واخذت نفس بصعوبه ورفعت راسها للسما
-
جراح
صحى على صوت تليفونه وتحرك بانزعاج
ناظر ريحان نايمه جنبه ورد:الو!
فيحان:هاه ياجراح؟
عقد حواجبه جراح وجلس:فيحان؟
فيحان:الله الله
جراح:وش صاير؟
فيحان:ابد جاي البيت قلت بما انك هناك يصير تقول لعبدالعزيز
جراح انصدم :وين جاي؟ الحين؟
فيحان:اي عيالي وزوجتي معاي
جراح فرك راسه وجلس :فيحان ماودي اكدرك بس ما اقدر أجل المرضوع شوي
فيحان:اي تأجيل انا بالخط وقريب جاي دبّر نفسك
قفل وجراح عض شفته وهو يناظر الجوال
لف وناظر ريحان نايمه وقام للحمام يغسل
-
عبدالعزيز
ناظر ساري وفارس وهمس:وين راشد؟
ساري:خبري فيه بالجبل
عبدالعزيز ناظر فارس وفارس ناظره وصد عبدالعزيز بحده
ناظره ساري وسكت فارس على صوت بوري
عقد حواجبه عبدالعزيز وناظرهم ووقف
خرج وهو يناظر سيارات ورا بعض وعفش في سيارة
انصدم عبدالعزيز وهو يناظر باستغراب
وساري وفارس وراه
على طلعت جراح وجمدت ملامحه وهو يناظر فيحان يوقف
نزل فيحان وابتسم لجراح:هلا والله
جراح ناظر عبدالعزيز اللي مو فاهم شي ورجع ناظر فيحان
فيحان ابتسم:علامك؟
جراح عض شفته وناظر العفش وعياله ينزلون من سياراتهم
تقدم لهم عبدالعزيز؛على وين؟
فيحان:شلونك يا ابو راشد؟
عبدالعزيز ناظر جراح اللي صاد ورجع ناظر فيحان:شتبي؟
فيحان:ابد جايين انا وعيالي نصّيف بهالبيت
عبدالعزيز:لا انباع البيت تعالوا
فيحان ضحك وناظر جراح ورجع ناظر عبدالعزيز
:البيت لي يا ابو راشد
عبدالعزيز جمدت ملامحه ولف لجراح بسرعه
بلع ريقه جراح وصد بنظره خوف من عمه
فيحان ناظرهم وهو مبتسم وعياله وراه يناظرون
عبدالعزيز؛بعت البيت؟
جراح ناظره وهز راسه بهدوء
عبدالعزيز:تزوجت ريحان بشرط ماينباع البيت
فيحان عقد حواجبه:ليه يا ابو راشد وش المشكله؟
عبدالعزيز:انت اسكت
فيحان ابتسم وعبدالعزيز لف لجراح:تغدر فيني ياولد اخوي؟
سكت جراح وعبدالعزيز تقدم له:تغدر في عمك؟
فيحان لف لعياله ودخلوا البيت مع امهم مهره
جراح لف وناظرهم يدخلون ورجع ناظر عمه؛عمي محتاجين الفلوس وبعناه برضى امي
عبدالعزيز مصدوم ويناظره:وتبيعه بدون علمي؟ والله لو انت اللي يبتفضح المستور لاعلمك ياجراح
عقد حواجبه جراح وفارس تأكد من شكوكه
فيحان؛الخافي بيبان يا ابو راشد
مشى وتركهم ودخل البيت وعبدالعزيز مصدوم
شاب شعر راسه في دقيقتين من سمع الخبر
-
راشد
دخل وناظر العفش والسيارات واستغرب
مشى وناظر فارس وساري واقفين مع جراح
راشد ناظرهم:وش فيكم؟
جراح ناظره وصد وفارس ناظر راشد
:راشد خالي وش مخبي؟
راشد عقد حواجبه:مافهمت وش صاير؟
فارس:وش فيه خايف ينباع البيت
راشد:انباع البيت؟
جراح ناظر صدمته وهز راسه؛بعناه
راشد انصدم ولف ناظر السيارات وبلع ريقه
فارس:راشد تعرف شي انت؟
راشد بتوتر نزل راسه بتفكير
ولف جراح بخوف من شاف عبدالعزيز مطلع الباروده
ساري وفارس تكلموا بصوت عالي:خالي خالي
جراح انصدم وجمدت ملامحه وهو يناظر عبدالعزيز
وقف قدام جراح اللي يبلع ريقه وفارس وقف جنبه:خالي
ساري:خالي تكفى اسمع اترك البارود واسمعني خالي
عبدالعزيز:وخر انت وياه وخر
فارس بخوف بلع ريقه:خالي نخيتك تكفى نزل البارود
عبدالعزيز:روح جيب اختك انت
راشد بلع ريقه بخوف وعبدالعزيز صرخ:رووح
مشى بسرعه راشد ودخل البيت ووقفت اماني من شافته
راشد:ريحان وين؟
لفت ريحان باستغراب وراشد من لفت مشى لها
سحبها من يدها:امشي
ريحان لخوف:وش صاير راشد فكني
راشد:تعالي بسرعه
رحيان سحبت شرشفها وطلعت ومن ناظرت جراح
جمدت ملامحها وفلتت يدها من راشد وركضت
مسكت يد عبدالعزيز وانحنى البارود:يبَه تكفى
جراح بلع ريقه وهو يناظر اصبع عبدالعزيز وحدته
ساري لف لفارس وصرخ بوجهه:سو شي
ريحان:يبَه اسمعني تكفى نزل البارود
عبدالعزيز ناظرها:تعالي وراي
ريحان ناظرت جراح ورجعت ناظرت عبدالعزيز
حست باعدامه قدام عيونها وبخوف وقفت وراه
ناظرت جراح وطاحت دموعها بخوف:يبَه
عبدالعزيز همس:طلق
انصدمت ريحان وناظرته بصدمه وجراح يبل ريقه كل شوي
عبدالعزيز:طلق الحين
ريحان بكت:لا تكفى يبَه تكفى اسمعني
لفت لراشد تستنجد فيه؛راشد تصرف تكفى
راشد ماكان بيده حيله واقف ومصدوم ومرتبك
عبدالعزيز ناظر جراح وصرخ؛طلق
جراح رجفت يدينه:ماني مطلق عمي اسمعني
عبدالعزيز رفع حاجبينه؛مابتطلق؟
جراح بلع ريقه وتكلم بثقه:لا
عبدالعزيز سحب ريحان من وراه وجلسّها بيده
وحط البارود على جبينها وغمضت عيونها بخوف
جمدت ملامح جراح وناظر ريحان ورجع ناظره
سواها المره الاولى وكان بيذبحها لو ماتدخّل جراح
مسكت فوهة البارود ريحان وهي مغمضه عيونها
وراشد شد من قبضة يده بخوف
وساري وفارس يناظرون ومتوترين
عبدالعزيز:تطلقها الحين
جراح؛عمي مافي تفاهم باسلحه
عبدالعزيز:تزوجتها تحت تهديد السلاح وتطلق تحت تهديد السلاح
غمض عيونه جراح يمسك اعصابه:عمي استهدي بالله
عبدالعزيز:مو انباع البيت تطلق الحين والله مالها قعده عندك
جراح نقل نظره بين عبدالعزيز وبين ريحان
والبنات عند البنات يناظرون وخايفين
طلعت الهنوف وانصدمت والبتول وراها يناظرون
بلعت ريقها ريحان وفتحت عيونها تناظر جراح
اللي متردد يتكلم وكرر كلامه عبدالعزيز
:طلق الحين
اخذ نفس جراح وغمض عيونه وريحان تناظره
وتهز راسها بالنفي وتحس بفوهة البارود على جبينها
جراح نزل راسه بعيد عن عيونها وهمس:انتي طالق
غمضت عيونها ريحان وبدال ما تتصاوب براسها
حست النار بصدرها سمعت منه ابشع كلمه في حياتها
نزل البارود عبدالعزيز وناظر جراح؛والحين خذ اهلك واطلعوا من هالديره
راشد بخوف ناظر جراح ورجع ناظر عبدالعزيز:يبَه
رفعت يدها على فمها كوثر من خرجت من البيت
وراشد وقف قدام عبدالعزيز وناظر جراح؛يبهَ
جراح صد مايبي يشوف ردة فعل ريحان
وعبدالعزيز وخر راشد عن طريقه وتقدم لجراح
:مابي اكرر كلامي خذ اهلك واذلف من هنا
جراح ناظر عبدالعزيز ومشى من جنبه رايح
وريحان تناظره ماشي بعيد والهنوف من شافته
اخذت اغراضها طالعه سحبت كوثر من يدها
اللي تناظر راشد ومصدومه من اللي صار
نزلت راسها ريحان وهي تبكي وعبدالعزيز ناظرهم
ماسك البارود بيده ويناظرهم يركبون سيارتهم
وريحان تبكي وتناظر الارض مسكت التراب بيدينها
تنوح على فراقه وعلى الكلمه اللي قالها
ماهي حلاله ماهي له ولا له رجعه لها
في اقل من ساعه كانت جنبه وحوالينه
وصارت حرام عليه وطليقته
كوثر ناظرت جراح بالسياره راجع على ورا
:جراح
جراح مارد وهو معصب ولف السياره وخرج من البيت
ماسك اعصابه وشاد من يده والهنوف تناظر
عروق جبينه بارزه وتدري انه ماسك اعصابه
تنهدت الهنوف وهي تدعي ان الله يبعد عن عيالها السوء
بكل مره يروحون ديرة ابوهم واصلهم يصير شي
بس المشكله ان قلوب عيالها ماهي لهم
قلوبهم بين راشد وريحان
يناظر راشد السياره تغيب ومصدوم ماسك شماغه
ويلف يناظر ريحان اللي تبكي وخواتها حوالينها
ويناظر عبدالعزيز اللي واقف يناظر البيت
وكله ثقه وشموخ ان البيت بيطلع منه فيحان
وهالمره عشان حياته وعشان المدفون
ياقاتل يامقتول وابتدت الحرب من هاللحظه
حرب اطراف كثيره منهم من يدور على حب
ومنهم من يدور على حرية ارض
والرابح واحد .
—
ريحان
منسدحه والبنات حوالينها يهمسون لبعض
سما:ريحان تعالي مع المدينه والله لاهربك زي ماهربت انا
لجين:انا عندها هنا لا تخافون
ريحان ماردت وفجر قامت وهي تلبس عبايتها
انحنت وناظرت ريحان:بيجي يوم يموت ابوي ونفتك
لجين بققت عيونها:هيه انتي وش تقولين!
فجر:اي خلاص عاد لين متى الواحد يتحمل ؟
سما:استغفر الله وهي صادقه
لجين:لا تزيدينها روحي
فجر تنهدت وقامت وطلعت من البيت
ركبت مع فارس وناظرته؛اطلع من الديره لا انا اطلع منها لوحدي
فارس همس:بسم الله بنمشي للمدينه وش فيك؟
فجر ناظرته:شفيني! بعد اللي صار وتسأل؟ وين كنت يوم ابوي بغى يذبح ريحان؟
فارس تنهد وناظر الطريق:كلنا كنا موجودين بس وش نقدر نسوي ؟
فجر:لا ماعليش فارس طحت من عيني
ناظرها فارس وفجر صاده:لا انا ولا راشد الجبان ولا ساري ؟
فارس:تعرفين خالي محد يقدر يقوله شي ولا يوقف بوجهه
فجر:والله لو صار بريحان شي لاروح انا بيديني واحفر المدفون ونفتك
فارس صد ولارد وفجر مقهوره وساكته
-
اماني
بلعت ريقها وهي جالسه جنب لجين وتناظر ريحان
هسمت للجين:اخاف تنفجر بأي لحظه
لجين ناظرتها:مو صاير شي لها ان شاء الله ماعليك
ريحان اعتدلت بجلستها وناظرتهم يناظرونها بخوف
همست بتعب:ابي مويه
اماني فزت وخرجت بسرعه وهي تصب لها من المطبخ
ولفت وناظرت راشد قاعد بالصاله وماسك راسه
بلعت ريقها ومشت لريحان وعطتها المويه
وطلعت طلت على راشد بهدوء ومشت له
انحنت عند رجوله ورفع راسه راشد من ناظرها
جالسه على الارض وتناظره
هز راسه بالنفي وهمس:ماقدرت اسوي شي
اماني ماردت وراشد كمل:لا لي ولا لها
اماني همست:كان بإمكانك تسوي المستحيل وتوقف بوجه ابوك
راشد:ادري والله ادري بس انا جبان اللي قاهرني ريحان
اماني بلعت ريقها وراشد كمل:كانت بالمدينه ببيت زوجها مرتاحه ووجهها مشرق وش ذنبها باللي صار بيوت وعقار وبطيخ
اماني:راشد اذا تبي الراحه لاختك مره وحده تصرف بدون خوف
راشد سكت وهو يناظر اماني واماني هزت راسها له ومشت
تركته يناظر مكانها ويفكر
-
يوم جديد
عبدالعزيز
بالحوش قاعد ويناظر البيت ويترقب
مارمشت له عين او غفى له جفن
ناظر فيحان يخرج من البيت
ووقف عبدالعزيز وفيحان لف وراه:يالله
خرج واحد من عياله بالزوليه وفرشها بالحوش
جنب الصخور وتكى فيحان عليها وطلعت مهره
بالقهوه والدله والتمر والرطب وجلست جنبه
وناظر عياله الصغاار يلعبون بالكره حوالينهم
ولف ناظر عبدالعزيز ورفع يده:صبحه بالخير!
عبدالعزيز مارد عليه وهو يناظره بحده
شاك في امره وفي تصرفاته معقوله عارف بكل شي
لف لراشد اللي خرج من البيت وناظر فيحان
ورجع ناظر عبدالعزيز اللي واقف
ناظره عبدالعزيز وهمس:قل لهم يجهزون الفطور
مارد عليه راشد ومشى لشبك الغنم
رفع حاجبينه عبدالعزيز وهو يناظر راشد صاد
دخل المجلس واخذ نفس عبدالعزيز حس ان النهايه قربت
وبينكشف كل شي مستور ومخبى
-
جراح
من وصل ودخل غرفته وناظر اغراضها الباقيه
سند ظهره على الجدار بضيق
كره الديره وساعة الديره من هاليوم اللي مر عليه
انسدح وهو يناظر محلها جنبه ويتخيلها نايمه
غمض عيونه بصعوبه يحاول النوم
بس جفاه النوم واقلقه التفكير
وش صار بعد ما راح! وش صار لريحان؟
تذكر اخر ليله لهم مع بعض ويوم رقصت له
ضحكهم وابتساماتهم ونظراتهم كنها كانت وداع
ماتوقع يرجع المدينه بدونها
عقد حواجبه بقوه من سمع صوت ضحكاتها
حس بالطعن جوا صدره ماصدق ابد انه
طلقها تحت تهديد السلاح واجبره عبدالعزيز
لو درى ما كان طلعها الديره وظل معاها هنا
حبسها عن الدنيا كله ولا سمح لاحد يقرب لها
بس ماتوقع كل ذا يصير بيوم وليله ويتغير كل شي
دق الباب وغمض عيونه بهدوء وحس بالهنوف تدخل
تتطمن عليه بين لحظه ولحظه وهو يمثل النوم
قفلت الباب وفتح عيونه جراح بضيق يناظر الفراغ
—
فيحان
ناظر مهره وعياله ورد على جواله
:موجود وشكله متوتر وخايف
مهره تاففت وهمست لولدها؛بنطول هنا؟
رفع كتوفه ومهره تذمرت من الذباب والنامس
فيحان:ابشر ابشر حالاً
قفل وناظرهم:قوموا لموا عفشكم وادخلوا
مهره:وش صاير؟
فيحان:الحين تعرفين بس ادخلوا
مهره:ومتى بنرجع من هالبيت !
فيحان:محنا مطولين ان شاء الله
قاموا ودخلوا البيت وطل عبدالعزيز على اصواتهم
ناظرهم يلمون الاغراض واستغرب
ناظره فيحان وركب سيارته وحرك طالع من البيت
تافف عبدالعزيز ورجع جلس بالمجلس
-
ريحان
غسلت وجهها وعقدت حواجبها وهي تسمع صوت بالحوش
طلعت وناظرت لجين تناظرها:وش صاير؟
هزت كتفها ريحان بتعب ومشت وفتحت الباب تناظر
انصدمت وهي تشوف شيول اصفر كبير ووراه سيارة فيحان
لفت للجين بصدمه:بنت تعالي شوفي
قامت لجين مع ولدها وهي تناظر مصدومه
وراشد من شاف الشيول جمدت ملامحه بخوف
وعبدالعزيز وقف شعر جسمه ولاقدرت تشيله رجوله
نزل فيحان وتلثم وهو يأشر للعامل يبدأ الحفر
خرجت ريحان ولجين معاها والبتول من شافتهم انصدمت
وقفوا جنب بعض وابو تركي طلع هو وعياله
مصدومين من الصوت ومن اللي يصير بحوش عبدالعزيز
تصاقعت اسنانه ببعض عبدالعزيز وهو يناظره يحفر
طلع اول دفعه تراب ونثرها وطار الغبار بوجيههم
واول ما اختفى الغبار ونفضوه عن عيونهم جمدت ملامحهم
وهم يناظرون ثاني دفعه اكياس شفافه بداخلها
حزم من الفلوس بققت عيونها ريحان بصدمه
والبتول ركضت لعبدالعزيز وصرخت وهي تحركه
محد يسمع لها من الصوت ومن الصدمه
رفعت يدها على فمها اماني بصدمه من الفلوس
ولجين حطت يدها على فمها وعضت شفتها
تناظر فيحان يأشر له يقفل الشيول وقفله
هدأ الصوت وسمعوا صوت البتول وصراخها
ركضت ريحان وناظرت ابوها بخوف ورجعت على ورا بسرعه
كانت ملامح الجلطه واضحه على ملامحه
يدينه وفمه وعيونه صرخت البتول اكثر
ودخل راشد وناظرهم وانصدم وهو يناظر ابوه
فيحان ناظرهم من بعيد وناظر الحزم اللي بالحوش
متناثره واخذه له وحده وهو يتصل:سيارة اسعاف لو سمحت