اختار وين اللقى ياحلمي الأجمل على كفوف القمر والا على الغيمه

الجزء السادس

جراح
:بس البيت ماهو للبيع
فيحان:ادري انكم رجعتوا بكلمتكم بس انا ملزم
جراح بلع ريقه:هي السالفه ماهي بيدي بيد عمي
فيحان:وعمك شعليه! البيت لك انت واختك
جراح:عمي مازوجني بنته الا شرط ما ابيع البيت
فيحان عقد حواجبه:تزوجت؟
جراح هز راسه وفيحان ابتسم؛افا والله عريس ومادريت
جراح ابتسم وفيحان ناظره؛بكره معزوم عندي انت واهلك وعشاكم عندي
جراح:لا الله يكثر خيرك
فيحان:لا تردني بالعشاء على الاقل
جراح ناظره؛بطلت من البيت!
فيحان ضحك:الاثنين لا تردني فيها
جراح تنهد وسكت بتفكير ثواني:والله ما ادري شقول بس اتركني ادبرها
فيحان؛ولا تنسى عشاكم بكره عندي
جراح ابتسم:ابشر يالله كثر الله خيركم
فيحان وقف وسلم عليه:نشوفكم على خير
جراح طلع من البيت وركب سيارته
ولا يدري كيف يقول لامه البي بتفرح من الوناسه
وكوثر اللي ماظنته بتوافق تبيع البيت
-
ريحان
دخلت الصاله وجلست بعيد عن الهنوف ولا تكلمت
اخذت نفس الهنوف:بنسوي استقبال فيك
ناظرتها ريحان والهنوف كملت:شي يسوى وبعزم الكل
ريحان ما تحرأت تتكلم ابد
ودخل جراح على كلمتها:ابيك تشوفين لك شي زين تلبسينه روحي مع كوثر وخليها تنقي لك
ريحان رفعت نظرها لجراح وجراح عقد حواجبه
:شدعوه كوثر تروح معها تنقي لها؟
الهنوف ناظرته:ابي شي يشرف يكفي اني ماسويت زواج لك مابيها تروح بأي شي
ريحان نزلت عيونها وبلعت ريقها بربكه
وجراح تكى بظهره:تعرف تلبس هي ما يحتاج تروح مع كوثر
الهنوف باصرار:جراح لا تتدخل حنا حريم وادرى خذها مع كوثر
ريحان ناظرتهم وشدت على اسنانها بقهر
وجراح ناظرها ولف للهنوف:طيب
وقفت ريحان ومشت داخله الغرفه ولحقها جراح
لفت له وهمست بقهر:وش قصدها يعني؟
جراح قفل الباب:قصدها بوش؟
ريحان؛اني لحجيه ما اعرف البس؟ خايفه افشلهم!
جراح عقد حواجبه:شدخل هي تبيك تطلعين حلوه وتشرفين بس
ريحان؛على اساس الحين ما اشرف؟
جراح تنهد وجلس:على قولت امي سوالف حريم
ريحان مشت له وتقدمت له:جراح تقولي اني ما اعرف البس صح اني جايه من الديره بس ترا اعرف لو ابوي عطاني مجال اشتري اللي بخاطري بعرف البس
ابتسم جراح لها وتكى بيدينه على ورا وناظرها واقفه
:غلط الاصح انتي لو تلبسين اللي تلبسينه حلوه
ريحان صدت بحده؛مو وقتك ابد
جراح تنهد واعتدل بجلسته:طيب نروح انا واياك ونقي اللي يعجبك ماعليك من امي
ريحان ناظرته:على اساس كوثر حلو ذوقها تقولي روحي معاها؟
جراح فرك عيونه:براحتك سوي اللي يعجبك
ريحان زمت شفايفها بتفكير ولفت له:ابي اروح لسما اختي
رفع نظره وعقد حواجبه؛اليوم؟
ريحان هزت راسها وجراح اخذ نفس وهز راسه:ابشري
ريحان:متى توديني؟
جراح:متى مابغيت
ريحان:الحين
جراح هز راسه ومشت بتلبس وناداها باسمها:ريحان
اخذت نفس طويل كيف اسمها تحسه مختلف على لسانه
لفت له وابتسم بربكه:معزوم بكره عند واحد وابيك تجين معي
ريحان عقدت حواجبها:من؟
جراح:اللي بغى البيت عزمني وباخذك معي
ريحان تكتفت ورفعت حاجبها:اخاف افشلك مامعي شي زين
جراح ابتسم لها:كل شي يزين عليك
سكتت ريحان ومشت للحمام وتركته بالغرفه ينتظرها
-
سما
اول مارجعت من الجامعه
انسدحت بتعب ودخل ساري وهو يلبس بوته:جراح جاي
سما ناظرته:وين؟
ساري:جايب ريحان وجايين وانا بلحق على محاضرتي
سما:وين ساري تخليني فيني نوم تعبانه
ساري:عاد اختك وش اسوي انا؟
سما تاففت:يالليلك ياريحان
سارس:يالله مستعجل باي
مشى وخرج من الشقه بسرعه وسما وقفت بتعب وكسل
ودقايق دق الجرس وفتحت الباب وابتسمت:هلا
جراح؛شلونك سما؟
سما:تعبانه
جراح ابتسم:يالله ماعليه ريحان بامانتك انا طالع
ناظرته ريحان وصدت وسما هزت راسها ودخلت
قفلت الباب سما وناظرتها:احد يجي هالوقت؟
ريحان جلست بالصاله على الكنبه وتاففت:انا لحجيه؟
سما جلست وحطت يدها على خدها:وش صاير؟
ريحان:عمتي الهنوف تقول عني لحجيه
سما تثاوبت:ليه وش صاير؟
ريحان:تقول بتسوي استقبال وتبيني البس شي يشرف
سما هزت راسها:طيب؟
ريحان ناظرتها وناظرت بجامتها:سما انتي اكيد تعلمتي من الجامعه خليني اطلع حلوه تكفين مابي اكون اقل وحده بينهم
سما ابتسمت وتكت بيدها:انتي حلوه من غير
ريحان:جاني جراح الثاني
سما ضحكت:ياخي جراح مسكين الضحيه
ريحان:لا ياحبيبتي انا الضحيه الحين خلينا منه تجيني تلبسيني؟
سما ضحكت:اروح معك السوق وننقس سوا
ريحان:طيب بكره
سما تاففت:وشو بعد؟
ريحان؛بياخذني جراح معه لبيت صاحبه
سما ابتسمت:اوه بتكونين علاقات
ريحان:ساعديني وش البس
سما:روحي اليوم السوق مع جراح وصوري لي وانا اقولك
ريحان:مو تسحبين تكفين
سما:لا والله بسهر عشانك
ريحان تنهدت وسما ناظرتها:متى بتشترين جوال تتواصلين مع الناس
ريحان هزت كتفها وسما تكلمت بهدوء:اليوم كلميه
ريحان:فشله
سما:كيف بكره يدق عليك عند الناس؟
ريحان تنهدت وسما ناظرت عبايتها:وغيري عبايتك ذي محنا بالديره ترا
ريحان هزت راسها وسما ناظرت شعرها؛ليتك تشوفين شعور البنات والوانها بالجامعه
ريحان مسكت شعرها:عاد الا شعري شوفيه متغذي يلمع
سما:ادري يلمع بس ماودك تغيرين لونه؟
ريحان زمت شفايفها وسما ابتسمت:تكفين ريحان وربي اتخيلك حلوه زي بنات الجامعه
ريحان ابتسمت:تتوقعين اصير حلوه صدق؟
سما؛والله ما تحتاجين الا اهتمام والا الملامح ذبّاحه
ضحكت ريحان وسما ابتسمت لها
-
فارس
:امي ابي العرس بالمدينه
زهور عقدت حواجبها:نعم؟
فارس:انا ابيه بالمدينه مابيه هنا كني في العصر الجاهلي
زهور ابتسمت:فارس ترا منت اول واحد تتزوج؟
فارس ابتسم:بس اخذت اللي ابيها
زهور تنهدت:ماظنتي يوافق خالك
فارس:وليه؟ انتي اقنعيه والا مايحتاج فجر تكلمه
زهور:بيسمع كلام فجر يعني؟
ابتسم فارس:اي اكيد
زهور رفعت كتوفها وفارس وقف:بشوف فجر واجيك
زهور:لا تتاخر
قام فارس بسرعه ومشى للبيت ودق الباب وانتظر
والبسمه على ملامحه من سمع الخبر وموافقة خاله
فتحت الباب فجر وابتسمت له بحب:هلا
فارس تكى على الباب:ابي عرس كبيير
عقدت حواجبها فجر بابتسامه وهمست:وين؟
فارس:بالمدينه
فجر انصدمت واعتدلت بوقفتها:ليش؟
فارس:نستاهل نتزوج بمكان احسن من هنا
فجر رفعت كتوفها:مدري فارس
فارس:مو تقولين يمديك تقنعين خالي!
هزت راسها فجر ورفع كتفه فارس:خلاص
فجر اخذت نفس:مالي خلق مشاكل
فارس:مافي مشاكل فجر يحقنا لنا نتزوج بمكان احسن
فجر سكتت وهي تناظره وفارس ابتسم:موافقه!
ابتسمت له فجر وهزت راسها:بشوف
-
جراح
اخذها من البيت وحرك
جراح:كيف انبسطتي؟
ريحان؛متى تشتري لي جوال؟
جراح عقد حواجبه ولف لها:جوال؟
ريحان هزت راسها؛اي كيف تتواصل معي لو بغيت؟
جراح ضحك:سما املت عليك صح؟
ريحان؛ابي جوال وابي السوق
جراح عقد حواجبه:وليه امس ريحان كنتي بالسوق خميتي الزين والشين
ريحان رفعت حواجبها:اها يعني ملابسي خايسه؟
تافف جراح وناظرها؛طيب بس مو اليوم
ريحان:اليوم بكره مو بنروح عند صاحبك؟ اليوم اجل
جراح شد على يده وهز راسه وريحان ابتسمت بانتصار
-
يوم جديد
ريحان
انتظرت سما وهي جالسه على اعصابها
لين سمعت صوت الجرس وطلع من غرفتها
سمعت صوت سما تسلم على الهنوف وانتظرتها
دخلت سما وناظرت ريحان معصبه وابتسمت:بسم الله
ريحان:لا بدري بدري شوي ويجيني جراح
سما:عندي كلاس طيب شسوي
ريحان عقدت حواجبها وسما مسكتها؛تعالي يمديك وريني وش شريتي؟
ريحان ابتسمت:شوفي جوالي
سما ابتسمت:واو مرره يجنن ريحان عليك بالعافيه
ريحان هزت راسها وهي تناظره
سما:وريني الملابس
ريحان طلعت الملابس ووراها سما وسما تنقي لها وتسولف
ريحان لبست وهي تناظر شكلها
سما:راشد بيجي قريب هو واماني
ريحان ناظرتها:وين؟
سما:المدينه فارس وفجر شكلهم بيتزوجون هنا
بققت عيونها ريحان ولفت عليها:فجر بتتزوج؟ احلفي !
سما رفعت كتوفها:انا زيك عرفت من ساري،غيري ماعجبني
تاففت ريحان وغيرت لبسها:راشد جاي هنا ليش؟
سما:مدري الله اعلم
ريحان ناظرتها؛تتوقعين عشان كوثر؟
سما عقدت حواجبها:ماظنتي ماشاءالله راشد تغير ماهو اولي
ريحان رفعت كتوفها؛مدري المهم كيف ذا؟
سما زمت شفايفها:حلو تعالي اسوي شعرك
-
راشد
هز راسه وهو يسمع عبدالعزيز:مابنطول هناك تسمع؟
هز راسه راشد:ابشر
عبدالعزيز:فجر بتركب راسها
راشد:توصي شي زود يبَه ؟
عبدالعزيز هز راسه بالنفي
راشد طلع وترك عبدالعزيز اللي مشى للبيت
دخل وناظر فجر تلم اغراضها ولا كنها تشوفه
وقف عندها وناظرته البتول:فجر
رفعت راسها فجر وبلعت ريقها بربكه
عبدالعزيز:اذا هذا حل انك تهددين ابوك! فهذا عقوق ومابتتوفقين بحياتك ابد انتي وخواتك ولا وحده قلبي راضي عليها
نزلت راسها فجر وهمست:وربي ماهو راضي يايبَه والله ماهو راضي
عبدالعزيز قرب منها:منتي ربي ترمين احكام
فجر ناظرت البتول اللي تناظرهم وسكتت بهدوء
عبدالعزيز ناظرها بحده وطلع من البيت
وفجر حز بخاطرها وكانت بتبكي هي الوحيده اللي صبرت بالنهايه هذا جزاها وهذي فرحتها
-
ريحان
لبست عبايتها بربكه وناظرت سما:والله ياسما لو تضحكين علي لاوريك
سما ابتسمت:وربي حلوه والله حلوه اطلعي خلصيني خل ارجع بيتي
ريحان اخذت شنطتها وجوالها وطلعت بالصاله
ناظرت جراح واقف وناسف شماغه:تعالي امي
الهنوف:لا وش ابي عند مرت فيحان روحوا انتوا
جراح لف لريحان وناظر عبايتها ونقابها وابتسم برضا
والهنوف هزت راسها براحه ورضا
جراح :يالله امي مع السلامه
الهنوف هزت راسها وطلع جراح وريحان وراه
ركب السياره وترك الباب مفتوح وشغل السياره
وريحان تناظر اللي قدامها وساكته
ناظرها جراح وتكلم بهدوء:تراها ماعندها بنات يعني بتقعدني انتي واياها لوحدكم
ريحان ناظرته وهزت راسها
جراح:اذا بغيتي تروحين كلميني
ريحان؛شفيك متوتر! تراني اعرف اسولف واتكلم
جراح ابتسم:كويس كنت بعلمك بس
ريحان؛مايحتاج
جراح هز راسه وهو مبتسم وقفل الباب وحرك
وقف عند البيت وناظرها وهي تلم اغراضها نازله
همس:ريحان
لفت وناظرته وجراح ابتسم وسكت
عقدت حواجبها ريحان ولفت له:شفيك جراح؟
جراح اخذ نفس وهز راسه بالنفي
وريحان ظلت تناظره ثواني ونزلت وقفل سيارته جراح ونزل
-
راشد
اماني:متى توديني السوق يعني؟
راشد ناظرها؛باقي على زواج فارس يمديك
اماني:لا زواج كوثر
راشد لف لها ورفع حواجبه:من قال بتروحين؟
اماني هزت كتوفها:مو بتروح! وانا بروح
راشد؛مايحتاج لا
اماني ناظرت نظراته اللي صدت عنها
راشد رفع راسه وناظرها؛شفيك؟
اماني هزت راسها وراشد وقف وهو يلبس شماغه
ويناظر جزمته ويلبسها فتح الباب وخرج
واماني نزلت راسها بهدوء وهي تفكر في راشد
باقي القليل على زواج كوثر كيف بتكون ردة فعله!
-
كوثر
واقفه بالفستان تناظر شكلها بالمرايه
والخياطه تقيس لها من الجوانب
اخذت نفس ودق جوالها ومدت لها الخياطه وردت
:هلا عماد
عماد:طولتي كل ذا فستان؟
كوثر:في تعديلات شوي
عماد:طيب يالله انا انتظرك برا
كوثر قفلت وغيرت ملابسها وخرجت من المحل
ركبت واخذت نفس:مدري كيف بتحمله اكثر من ساعه
ابتسم عماد ومسك يدها:يالله هانت كم يوم ان شاء الله
كوثر صدت لقدام وابتسمت وعماد يراقبها
وصلت للبيت ونزلت وحرك عماد
دخلت البيت وهي تسمع الهنوف تكلم وجلست جنبها
فصخت طرحتها وهي تسمعها:ابشري ان شاء الله
انتظرتها وقفلت ولفت الهنوف وابتسمت:فارس بيتزوج
كوثر عقدت حواجبها:من بياخذ؟
الهنوف:فجر
كوثر ابتسمت:قولي والله؟
الهنوف ابتسمت:اي والله بيتزوجون بالمدينه
كوثر بفرحه:واي حمدلله ياعمري مره فرحت لهم
الهنوف:شدعوه عليك فرحانه اكثر من زواجك
كوثر:مافي مقارنه ابد فجر تستاهل واخذت اللي تحبه
سكتت كوثر شوي والهنوف تكت بيدها؛وعماد انتي بعد تحبينه
كوثر هزت راسها وصدت عن الهنوف
-
ريحان
ابتسمت واخذت من يدها؛ارتاحي
مهره زوجة فيحان:مافيها تعب
جلست جنبها وابتسمت مهره:ماشاء الله توك عروس مابتسافرون؟
ريحان هزت كتوفها:مادري والله ماقال لي شي
مهره:انتي طول عمرك عايشه بالديره؟
ريحان هزت راسها:اي
مهره:ودرستي؟
ريحان:للثانوي
ابتسمت مهره:فيحان من وداني اشوف البيت ماقدرت اتحمل قلت يكملكم مره ثانيه طوب عمري ابي لي بيت بجبل وجو زين ومكان زين
ابتسمت ريحان:حلوه بس مو دايم
مهره:والله انها تسوى حياتي كلها هنا منجدك انتي؟
ريحان هزت كتفها ومهره همست:تكفين اقنعي زوجك يبيع البيت والله بخاطري فيه
ريحان:لهالدرجه مصّره؟
مهره ابتسمت؛اي والله شوفي انا ماجبت الا عيال واغلبهم مشاغيل ولحالي ودي اطلع بجو حلو واخذ عقلي البيت
ريحان:بس اهلي هناك وصراحه جيرتهم ماهي حلوه
مهره:وش علي منهم ابي البيت وبس
ريحان ابتسمت ومهره ابتسمت لها:تكفين تعالي لي دايم
ريحان ابتسمت لها براحه؛ابشري
-
بعد مرور ثلاث ايام
ريحان
بققت عيونها ولفت لسما:يامجنونه
سما صرخت بفرحه:وربي تموتين
ريحان ناظرت شعرها وابتسمت الكوفيره:اول مره تصبغين؟
ريحان بخوف ناظرت شكلها وبلعت ريقها
سما ابتسمت وهي جالسه على الكرسي وتقص شعرها
ريحان لفت لها:سما احسه مو حلو
سما:والله حلو تجنين،انا اللي احسني تورطت
ريحان؛ليتني قصيت زيك
سما؛لا ياويلك حلو كذا
ريحان:سما بكره زواج فارس وفجر صاحيه؟
سما ضحكت:والله انك حلوه ومع فستانك اللي شريناه تطلعين اوف
ريحان ابتسمت بربكه وهي تناظر شكلها
سما:كلمتي جراح؟
هزت راسها ريحان؛مشغول توصليني معاك؟
سما هزت راسها:اي اكيد ماعليك
ريحان لفت تناظر شكلها وابتسمت برضا بالنهايه
-
فجر
مع لجين بالسوق تناظر الملابس والمول ومذهوله
لجين ابتسمت؛يالله خلصي عشان يمدينا نرجع
فجر ناظرت لجين وابتسمت بتوتر:لجين خايفه تصدقين لو بالديره تزوجت احسن
لجين:وع بالله اسكتي كلمي ريحان شوفي حجزت لك لبكره في الصالون؟
فجر هزت راسها وطلعت جوالها الجديد وابتسمت
عندها ارقام كل خواتها وفارس ودقت على ريحان
وردت ريحان وهي بالسياره:هلا ياعروس
ابتسم ساري وسما ناظرته ولفت لريحان
فجر؛حجزتي؟
ريحان:اي ماعليك حجزت لا تشيلين هم
فجر:كويس متى جايه؟
ريحان؛سما بتروح بيتها انا بجيك الشقه
فجر تنهدت:طيب لا تتاخرين
ريحان:ابشري
قفلت وابتسم ساري:يافرحتهم
ريحان ابتسمت وسما همست:حمدلله جد
صدت ريحان للشباك واخذت نفس براحه
جاها اشعار وابتسمت من قرت الاسم وفتحت الرساله
"عسى جميل الوجه مبسوط؟"
انتظرت ثواني تتغلى وارسلت"وعسى مشغول البال في جميل الوجه ولهان!"
ابتسم جراح وتكى بظهره على مكتبه"للآخر"
ابتسمت بضحكه وجراح اخذ نفس وكتب"متى امرك بكره؟"
ريحان"يمكن اروح معاهم لا تتعب نفسك"
جراح"على راحتك"
انتظر دقايق ويناظرها تكتب وفجأه مسحت كل شي
وتافف وارسل لها"تبين شي!"
ريحان"سلامتك"
قفلت جوالها وناظرت الطريق وابتسمت
-
جالسه مع فجر بالشقه وفجر تناظرها
ريحان ضحكت؛شفيك؟
فجر:متوتره مابقدر انام
ريحان ابتسمت وجلست قدامها:مبسوطه لكم مررره لو تدرين
فجر ابتسمت وريحان مسكت يدينها؛شفتي كيف ربي عوضك بأحسن الناس فاللي تحبينه
فجر اخذت نفس براحه:حمدلله
ريحان ابتسمت:تتوقعين فارس وش يسوي الحين؟
فجر نزلت راسها وابتسمت بخجل وهزت راسها
ريحان لفت وناظرت فستانها جنب فستان فجر
وابتسمت وهي تسمك خصله من شعرها
-
فارس
يبخر بشته من تحت وساري يناظره:والله انهبل
زهور ضحكت وناظرت سما؛ليه مارحتي لخواتك؟
سما ناظرت ساري وساري ضحك:انا منعتها
زهور:وليه! كان خليتها تروح مع خواتها
ساري:وش تبي خلاص بكره تشوفهم
زهور لفت لسما اللي ابتسمت:تجهزت فجر ناقصها شي؟
ابتسم فارس ومشى لهم بالمبخره:عسى ناقص العروس شي؟
ضحكت سما:لا مو ناقصها شي
فارس :اكيد؟
ساري:اجلس اجلس كتمتنا بالبخور
فارس جلس:امي هذا ريحته حلوه ابيك تبخيريني فيه بكره
زهور ابتسمت:ابشر
ساري ضحك وهو يناظر فارس وفارس يناظر الساعه
:اوه مطولين لبكره
ضحكت زهور وساري ضرب جبهته؛مو صاحي والله
فارس ابتسم:عريس والله عريس
ساري:درينا عريس حتى انا كنت عريس لا حول ولا قوة الا بالله
فارس:انا غير انا بتزوج بقاعه وحركات ومعازيم
ساري هز راسه بأسف وزهور ناظرته:خالك ما جا؟
فارس:بيجي بكره قبل الزواج مايحب ينام الا بالديره
زهور:ما ادري وش يبي بالديره
ساري ناظر فارس اللي سهى وعقد حواجبه
-
يوم جديد
تمشي بكعبها بالقاعه وتناظر الطاولات مزينه بالورد والشموع
والدرج تفوح منه ريحة الورد اللي على اطرافه
تشرف على البخور والقهوه وترحب باللي يحضرون
وكأن فجر بنتها ماهي اختها وبس
ابتسمت برضا وناظرت سما جنبها ومسكت يدها بقوه
ولجين يدها على بطنها ويدها الثانيه ماسكه يد ريحان
مبسوطين باختهم وباليوم اللي تخيلوه وحلموا فيه
ابتسمت ريحان وفلتت يدينها ومشت لمهره زوجة فيحان
تعدت امها البتول وسلمت عليها بحب :هلا والله
مهره:وش هالزين ماشاء الله
ريحان ابتسمت:عيونك الحلوه شرفتي والله حياك
مهره؛وين امك خل ابارك لها؟
ريحان مشت معاها ومهره تمشي وراها
ريحان:هذي امي وهذي عمتي ام العريس
مهره ناظرت البتول وصافحتها:مبروك عليك
البتول هزت راسها:الله يبارك فيك
مهره:مبروك على خلفتك لهالبنات زينة الدنيا
ابتسمت ريحان والبتول هزت راسها ومشت مهره
جلستها بطاوله ريحان وابتسمت:انبسطي
مهره ابتسمت وريحان مشت طالعه الدرج
رافعه طرف فستانها وطالعه لفجر
دخلت الغرفه وناظرتها جالسه وحطت يدها على قلبها
:وه ياربي ما ابكي اليوم
فجر:تكفين ماني ناقصه توتر بروحي مخترعه
ريحان:وش هالزين تكفين وش هالجمال؟
فجر؛جو ناس كثيير؟
ريحان؛اللي نعرفهم
فجر اخذت نفس:خايفه
ريحان:شدعوه عليك فجر كنك ماتعرفين فارس يعني؟
فجر:لا تطرين اسمه تكفين
ابتسمت ريحان وهمست:اذا تبغين شي كلميني
هزت راسها فجر وطلعت ريحان وهي ترسم على وجهها بسمه
-
عند الرجال
فارس واقف جنب ساري وعبدالعزيز
يسلم على الناس ومبسووط وكأنه بحلم
اخيراً بينزف لحبيبته ورفيقة طفولته
لف لجراح اللي واقف مبتسم وابتسم له
نزل راسه راشد وكل مايناظر جراح يناظرها
صد بعيونه وابتسم لفارس وهو جالس
فارس همس لساري:متى ادخل؟
ساري:ماظنتي خالي يوافق
فارس:مو بكيفه بنزف وابي الكل يشوفني انزف لها
ساري ابتسم؛شكلك واثق؟
فارس هز راسه وابتسم:اليوم يومنا ياساري ولا خالي ولا غيره بيخرب علينا شي
ساري ضرب كتفه:الله يوفقكم يارب ويسعدكم
ابتسم فارس وصد للضيوف مبتسم وقلبه يرجف من الفرحه
-
قفلوا الانوار وسلطوا فلاش على مدخلها وشغلوا اغنيتها
وريحان وخواتها واقفين نهاية الممر ينتظرون خروجها
ضمت يدينها في بعض فجر وانفتح الباب
ومن ناظرت خواتها ابتسمت ابتسامه واسسعه
فرحتها بهاليوم حول خواتها فرحه كبيره وكانت حلم لها
نزلت بخطوات هاديه وهي تناظر الضيوف والقاعه
تحس انها بحلم ماهو حقيقه هاليوم
يوم تكون عروسه بعيد عن الديره وبمكان تزينه الورود
وعروسه للي حبته طفوله ومراهقه وعمرها كله!
تسمع غطاريف خواتها وراها يمشون ومبتسمه
وقفت بالكوشه وهي تمسك يدين خواتها مبتسمين لها
ريحان لفت لسما:بيدخل فارس؟
سما تتكلم باذنها من الازعاج؛يقول لساري بس مدري عن ابوي يوافق او لا!
فجر ناظرتهم باستغراب وابتسموا لها
لجين ناظرتهم:في شي؟
ريحان ابتسمت:لا اجلسي فجر
جلست فجر وهي مبتسمه وتناظر زهور واقفه وتدق بجوالها
ارتبكت بخوف وناظرت سما:وش صاير؟
سما جلست جنبها؛ابوي مارضي يدخل فارس
فجر ناظرتهم وحست بالغصه بحلقها ماتبي شي يخرب فرحتها
انتظرت وقت طويل والاغاني ورا بعض تشتغل
عينها على الباب وتحس بالخنقه تذبحها
ريحان تدق بجوالها وسما جنبها ولجين واقفه جنب فجر بتوتر
وثواني مشت سما بسرعه من الكوشه وفجر تراقبهم وهاديه
انقطع صوت الاغاني ورفعت راسها فجر بخوف
انطفت الانوار وتسّلط الكشاف على الباب
ارتبكت ولا قدرت توقف وريحان ابتسمت ونزلت هي ولجين برا
رجف فكها فجر وهي تناظر دخوله ومتوتره
وماهي الا دقايق يدخل بابتسامته على وجهه وراشد وراه
ابتسمت بحب وملت عيونها الدموع هذا حلمها
حلمها تشوفه ببشته ينزف لها ماقدرت توقف ورجولها مي شايلتها
ابتسم لها من بعيد وكأنه يطمنها وزهور اعتلت الكوشه
من شافته بالبخور بيدها وتغطرف وفرحتها مي سايعتها
ابتسمت فجر من وقف قدامها ومد كفه لكفها
وقفت قدامه وابتسم لها وهو يحرك شفايفه بهمس:ليش تبكين؟
هزت راسها بالنفي بتوتر ورجفه وحس ببرودة اصابعها بكفه
ابتسم وباس جبينها وتنهد براحه بعد متاهات الدنيا
وتعدد طلباته لها من الواحد الا الخمس والخمسين مره
صارت حلاله ومطلبه اللي تحقق صارت زوجته رسمياً
لف للناس وهو جنبها وابتسم لراشد اللي وقف جنبهم
وقفت ريحان جنب راشد وناظرها:شصار؟
راشد يتكلم باذنها:ابوي سوا لنا سالفه عند الرجال ودخلت مع فارس عشان يسكت بس
ريحان كشرت؛ياشينه بس يبي يخّرب كل شي
راشد سكت وريحان ناظرته بضيق وهمست:شلونك؟
راشد ماسمعها وهو يناظر فارس وفجر وهادي
نزلت راسها ورفعته بسرعه من لف لها وتكلم:شلونك؟
ابتسمت له وابتسم:عساك بخير؟
ريحان ابتسمت بحب:اسأل عنك!
راشد:حمدلله انا بخير
ريحان ابتسمت براحه وراشد ابتسم لها ولف عنها
-
مهره
عند باب العشاء تكلم
:جالسه ادور عليها بسأل زوجة ولدها واشوفها
فيحان:لا تطلعين من العرس الا وانتي مكلمتها
مهره:ابشر ابشر ماعليك
قفلت ومشت لريحان واشرت لها ومشت لها
ابتسمت:هلا امريني
مهره ابتسمت:اجل وين حماتك ام زوجك؟
ريحان ابتسمت:الحين اناديها لك
مهره:لا لا حشى انا اروح لها وينها؟
مشت ريحان وناظرت الهنوف جالسه وكوثر جنبها
من جلست ريحان وقفت كوثر ومشت عنهم بعيد
الهنوف:هلا والله شلونك يامهره؟
مهره ابتسمت:زينه وانتوا شلونكم اخباركم؟
الهنوف:حمدلله ماشي حالنا زين شفناك
مهره:والله بغينا نكون اقارب اكثر ونشتري البيت اللي والله اني وفيحان نحلم فيه
الهنوف ناظرت ريحان وتنهدت:بيني وبينك بغيته ينباع بس الشكوى لله
مهره:اجل زين يمديك تقنعين عيالك باللي خلقك يالهنوف اذا عندك معزّه لي كلميهم
الهنوف باستغراب:ابشري ان شاء الله بيننا كلام اكيد
ابتسمت مهره وناظرت ريحان:زين ما اخترت لولدك والله
ابتسمت لها ريحان والهنوف هزت راسها ووقفت مهره
-
كوثر
دخلت الغرفه وناظرت اغراض اهل العروس والهدايا
جلست بضيق واخذت نفس وغمضت عيونها
من شافته يدخل القاعه اليوم وشكله المرتب
شماغه وثوبه وشنبه حسته ماهو لها ابد ولا بيصير لها
فتحت عيونها من سمعت صوت الباب وناظرت اماني
دخلت اماني وقفلت الباب وانحنت للاغراض
طلعت عبايتها وهي ترد على جوالها:هلا ياعمري
راشد عقد حواجبه؛بتطولين؟
اماني:لا عادي اذا تبي نجلس جلست ماعندي مشكله
طلعت جوالها كوثر وهي تناظرها وتناظر جوالها
راشد:براحتك انتي ابوي بيرجع الديره وانتي مستحيل ترجعين اليوم ادري فيك
ضحكت اماني:مستحيل ولا تفكر نجلس يومين هنا افضل
راشد هز راسه؛طيب على راحتك
اماني:خلنا نروح اجل الحين تأخر الوقت
راشد:يالله انتظرك اجل
قفلت اماني ووقفت وهي تلبس عبايتها وناظرت كوثر
وابتسمت:انتي عروس قريب صح؟
كوثر ناظرت ابتسامتها وهزت راسها:ان شاء الله
اماني:عاد اعزمينا
كوثر بهدوء:اكيد
اماني اخذت جوالها وخرجت من الغرفه وكوثر
اخذت نفس بضيق وخرجت من الغرفه كلها
-
ريحان
جالسه مع سما ولجين بالغرفه
تاكل لجين وسما على جوالها
وريحان لفت لهم:اروح البيت والا اجي الشقه؟
سما ناظرتها:اي شقه ياحلوه مافيها احد لجين بتروح بيتها وانا ساري رفض
ريحان ناظرت جوالها؛ماودي اروح البيت
سما ابتسمت وناظرت لجين:مستحيه تروح
لجين ضحكت:تكفين منتي عروس لين الحين
ريحان ناظرتهم:ماني مستحيه بس ليش وصل اهله وقال اخذك لحالك؟
لجين نزلت الصحن من يدها؛ريحان فكينا بس اليوم اقولها قومي ارقصي مصري عيت
سما:اي نفسيه صايره منتي الاوليه
ريحان:تبت وكرهت الرقص خلاص
سما؛مسكين هالجراح يوم صرتي حلاله اعتزلتي الفن
ضحكت لجين وريحان ابتسمت ودق جوالها
ردت بهدوء:الو
جراح وهو بالسياره:خلصتي؟
ريحان:ايوا انتظرك
جراح:يالله انا برا
ريحان:طيب
قفلت جوالها ووقفت وهي تلبس عبايتها:مطولين بعدي؟
لجين:لا انا بطلع بعد
سما؛وانا بعد
ريحان:انتبهي للي ببطنك انتي تسمعين!
لجين ابتسمت وسما ناظرتها:اي صدق نبي حفيد
لجين:ابشروا اي اوامر ثانيه!
ريحان:اي انتي بعد انتبهي لدراستك
سما ابتسمت وهزت راسها وريحان طلعت
مشت وطلعت من القاعه ناظرت سيارته وركبت
وحرك وبنص الطريق لف لها:شلون العرس؟
ريحان؛مرره يجنن الكل كان مبسوط حمدلله
جراح ابتسم:اي والله بس ليتك تدرين وش سوا ابوك
ريحان ناظرته؛قالي راشد
جراح؛يتعمد يرفع صوته عند الضيوف ويحلف على فارس مايدخل وهمس له فارس ولا عرفت شقال صراحه بس طخ وسكت
ريحان عقدت حواجبها:انا اصلاً مستغربه من فجر وفارس كيف رضي عليهم
جراح:علمي علمك وانا مادري بعد
سكتت ريحان وجراح يناظرها ويناظر الطريق بهدوء
وقف سيارته ونزلت ريحان وهو وراها
ناظر الهنوف واستغرب:امي مانمتي؟
ناظرتها ريحان ومشت للغرفه وجراح مشى للهنوف
جلس وناظرها:وش فيك!
الهنوف:قلت بكلمك قبل ما تنام
جراح:عساه خير
الهنوف:كلمتني زوجة فيحان وتبيه وزوجها يبيه وانا ودي ينباع هذاك البيت
جراح تنهد:ادري وفيحان كل يوم يطلبني وزايد السعر ويبيه
الهنوف:اجل بيع جراح بيعه
جراح:وشلون ابيعه وعمي شارط زواجي عالبيت ماينباع!
الهنوف:وش عليك تزوجت انت الحين بيع جراح فرصه ناخذ الفلوس ونشتري بيت اكبر من ذا بكره بيجيك عيال والبيت ذا صغير علينا
جراح اخذ نفس:لو وافقت انا كوثر ماتوافق
الهنوف:كوثر علي وعلى عماد المهم انت
جراح سكت ثوانس:ابشري بفكر بس انتي نامي الحين وبكره يصير خير
الهنوف هزت راسها وجراح مشى :تصبحين على خير
الهنوف همست:وانا من اهله
مشى وتركها تفكر في البيت وشايله همه وهم عيالها
-
ريحان
توترت وهي تناظر شكلها وتدعي
يطول اكثر بحديثه مع امه
طلعت لها ملابس من الدولاب وغمضت عيونها من سمعت
الباب ينفتح وبلعت ريقها بربكه وظلت مكانها ثابته
حست بالهدوء وبللت شفايفها ولفت له تناظره واقف
عند الباب ماسك يد الباب بعد ماقفله ويناظرها باستغراب
بلعت ريقها ووقفت قدامه وهي تناظر ملامحه
عقد حواجبه جراح ومشى لها بخطوات بطئيه
يتأملها ويشوف الاختلاف بشكلها وشعرها ولبسها
توترت من نظراته وهمست:شفيك؟
جراح يناظرها مصدوم رفع كتوفه وهمس:وش سويتي بنفسك؟
بلعت ريقها بخوف وتكلمت بنفعال:انا عاجبني شكلي مو لازم يعجبك
جراح ابتسم وناظر ملامحها؛عاجبك؟
ريحان هزت راسها بثقه؛ولاني طالبه اعجابك والا رضاك ابد
جراح سكت ثواني وناظر ملامحها واخذ نفس مسموع
:ومن قال انك منتي عاجبتني؟
ريحان سكتت وجراح كمل برضا:انا يابنت بشرشفك الابيض حابك كيف لا كنتي بالشكل ذا والاهتمام ذا!
ريحان ظلت تناطره وساكته وهاديه وجراح تقدم لها
نزل يدينه ليدينها وناظر عيونها:بعنادك وبشاعة اخلاقك وكبريائك راضي وابيك ومصر على قراري
كمل بهدوء:كيف لو كنتي جميله هالقد؟ كيف لو كنتي بيوم بتحنين علي! ومتأكد ان هاليوم بيجي
سكت ينتظر منها ردة فعل بس كانت ساكته وهاديه
اخذ نفس وصد بعيونه ورجع ناظرها؛وشلون يجيني النوم الحين؟ وادري ان نايم جنبي غزال الريم؟
ريحان ماردت عليه وكمل باستفهام:وشلون اشم ريحة الريحان جنبي ولا اقدر اقطفه واشمه؟
طال سكوتها وفلت يدينه منها واخذ نفس:على راحتك
رفعت راسها ريحان وهي تناظره يناظرها بهدوء
ابتسمت له ابتسامه هاديه ورفع حاجبينه وابتسم
تقدم لها مره ثانيه وميل راسه:لا بالله! منجدك؟
ريحان ضحكت وهزت راسها بالنفي ورجعت ناظرته
:تدري وين المشكله؟ المشكله اني بسيطه وجايه من بيئه بسيطه وما رضيت الا من كلامك عن الريحان وانت تدري غلات اسمي عندي
جراح ضحك:لا واضح انك بسيطه جداً بسيطه
ريحان:تطقطق؟
جراح:حشى والله زين شفنا ابتسامتك الحين ممكن تقعدين شوي
سحبها من يدينها وجلسها وجلس عند رجولها وهو يناظرها
اخذت نفس ريحان وجراح تكلم بجّديه:ادري صدمتك كان قويه وانا صدمتي فيك اقوى بس الغلط راح والحين احنا نبي نصحح الغلط
ريحان نزلت يدينها ليدينه وهي تناظره
وجراح كمل:اسف ريحان اني بيرم خذلتك ونزّلت دمعتك انا ماني اناني انا اناني فيك
ريحان تنهدت وهمست:هي كانت صدمه كبيره لي ما انصدمت هالقد جراح، يمكن لاني ماحبيت احد قدك ولا عطيت الثقه لاحد غيرك!
جراح شد على يدينها:وانا قد الثقه ريحان وصراحه لو ما ابيك ترضين كان ما اعتذرت والله ما انلام عاللي سويته ابد
ريحان رفعت حاجبها وجراح هز راسه؛اي والله انتي ما كنتي تشوفين نفسك وانتي ترقصين كانت حوالينك النجوم ترقص كنت اسمع صوت غير عن الاصوات الثانيه
ريحان ابتسمت بهدوء وجراح هز يدينها:انتي وانتي ترقصين ملاك والله شي فوق الخيال
ريحان:اي ذاك اول يوم كنت ارقص
جراح ابتسم؛ليه ماودك ترقصين لي اليوم؟
ريحان ضحكت ورفعت راسها لفوق وناظرته:مستحيل
جراح كشر ووقف وجلس جنبها:يالله ماعليه شوفي سبحان الله جاب الله اليوم اللي ترضين فيه وبيجيب اليوم اللي ترقصين فيه
ريحان ابتسمت بضحكه وجراح ناظرها بحب:ريحان
اخذت نفس وهي تناظره وابتسم لها؛والله اني احبك ومابتلقين احد يحبك قدي
ريحان ابتسمت له وتقدم لها وضمها لحظنه وابتسمت
ياما تمنت هالحظن منه وياما تمنت ترتمي في حظنه
ولا تخاف من احد ولا من الوقت ماتخاف حتى لو تغفى ولا هي حاسه
سمع تنهيدتها جراح وابتسم وهو يشد عليها
-
يوم جديد
فارس
من صحى من النوم ينتظرها تخرج من الحمام
طولت وتافف ومشى ووقف عند الباب وهو يدقه
سمع صوت المويه وتكلم:فجر تسمعيني؟
فجر ماردت عليه ورجع دق:فجر لا تخرعيني تسمعيني؟
انتظر ثواني وفتحت الباب عقد حواجبه:شفيك تبكين؟
فجر زمت شفايفها ولاردت عليه
وفارس عقد حواجبه اكثر:بنت تكلمي
فجر مشت من جنبه وجلست وهي تناظره
فارس تنهد وجلس قدامها:لا حول ولا قوة الا بالله شسالفه قولي يابنت الحلال
فجر بلعت ريقها وهمست:ابوي امس ما ودعني
فارس رفع حاجبينه؛نعم؟
فجر:اي لا تطالع كذا دوبي اركز انه لا هو ولا امي ودعوني ودعوا لي كيف ربي بيوفقني فارس؟
فارس:على اساس ذاك ابوك وامك يحبونك من اول بالله فجر اسكتي لا تجيبين طاري خالي يكفي اللي سواه
فجر ناظرته:وش سوى؟
فارس:فضحنا امس عند الرجال حلف اني ماني داخل ويرفع صوته عناد يبي يخرب العرس بس انا همست له وهددته
فجر انصدمت:هددته بوش؟
فارس:قلت والله لأصبح عليهم بالديره بشيول يجي ينفض الحوش كله يطلع المدفون
فجر؛فارس؟ انا اقولك عشان تسوي كذا!
فارس:مايجي الا بالتهديد والا لو ما هددناه كان ماتزوجنا للحين
فجر سكتت بهدوء وفارس ناظرها:وليش امس ما بكيت وقلتي هالكلام؟ مالقيتي الا اليوم؟
فجر بللت شفايفها وناظرته:كنت مستانسه
ضحك فارس وفجر ناظرته؛والله ماتذكرت احد امس اصلاً
فارس ابتسم:طيب قومي قومي اتركي الهموم وامشي نطلع
فجر هزت راسها ومشت تاركته وفارس تافف
-
راشد
حك جبهته وانتظر اماني:يالله
اماني:طيب بدور نقابي راشد شفيك
راشد تافف واماني لبست ومشت؛يالله
خرجوا وركبوا السياره ودق جوال راشد
اخذه وناظر الرقم ورد:هلا!
ريحان ابتسمت:راشد!
راشد:ريحان؟
ريحان:اي
راشد:هلا امري بغيتي شي؟
ريحان ناظرت جراح جنبها على جواله:فاضين تجوني؟
راشد عقد حواجبه.ليه؟
ريحان:نتقهوى ونتعشى سوا قبل ترجعون الديره
راشد ناظر اماني اللي تناظره؛الحين؟
ريحان:لا لا المغرب
راشد سكت ثواني بتفكير:طيب ان شاء الله
ابتسمت ريحان وقفلت وناظرت جراح:بيجي
جراح؛ماشاء الله عزمتي الكل؟
ريحان:اي جراح لجين بتروح الديره وسما فاضيه ليش مانتجمع سوا ؟
جراح لف لها وقفل جواله؛خلينا نطلع سوا ونتقهوى برا
ريحان كشرت:جراح وش جوك لاحقين بتجمع مع اخواني
جراح كشر في وجهها وصد وضحكت:خيير
جراح مارد عليه وريحان تقدمت له وانسدحت جنبه
شال الجوال عنها وضحكت وهي تسحب يده من الجوال وتمسكها
لف لها وناظرها :نعم؟
ابتسمت ريحان وهي تناظره ورفعت حاجبينها تناظره
هز راسه وهو جّدي:ما استهبل جد اتكلم شتبين؟
ريحان ابتسمت وتقدمت له وهي تبوس خده وترجع على ورا
هزت كتوفها:ولاشي، احبك بس
ناظرها جراح ومشت تاركته وضحك ولفت ناظرته يضحك
وكشرت في وجهه وضحكت وتركته لحاله
ابتسم ورجع على جواله وهو مبتسم
-
المغرب
رفعت شعرها وهي تحط المسكره بخوف
فاتحه فمها كله ومتوتره تبي تسوي زي اللي تشوفه بالفيديو
وقف وراها وهو يضحك بدون صوت على شكلها
غمضت عيونها وهي تناظر شكلها ووقفت الفيديو
وناظرته؛من متى واقف؟
جراح قفل فمها:من زمان
ريحان لفت للمرايه:طيب جراح تكفى ابي كل شي تمام لا تخّرب علي
جراح بعد عنها ووقف:طيب كملي
شغلت الفيديو وهي تناظره بدقه وتقلدها
عض شفته وحط اصبعه بجنبها وتدغدت وصرخت
ضحك بصوت عالي وريحان ناظرته:خرب شي؟
جراح وهو يضحك:لا
ناظرت شكلها بخوف وارتاحت ومشت له تبي تضربه
وجراح ضحك وبعد:اسف خلاص بطلع والله بطلع
رفعت يدها وهي ماسكه الفرشه بيدها؛بسرعه
جراح مر بخوف من جنبها وطلع بسرعه وقفلت الباب
رجعت للتسريحه وهي تكمل الفيديو وجراح ضحك
وطلع وناظر الهنوف وناظرته:ماشاء الله
جراح:وشو؟
الهنوف:الضحكه تشق الوجه
جراح ابتسم وجلس:اذكري الله
الهنوف:ماشاء الله ماقلنا شي
-
ابتسمت وهي تفتح الباب لهم
وتسلم على اماني:هلا كيفك؟
اماني؛حمدلله انت كيفك؟
ريحان؛حمدلله حياك راشد
راشد:مافي احد؟
ريحان:لا خواتي وعمتي تعال
مشى راشد واماني قبله ودخلت وهي تجلس بين البنات
جلس راشد وابتسم للهنوف:شلونك ياعمه؟
الهنوف:الله يسلمك انتوا كيفكم مافي بيبي بالطريق؟
اماني ناظرت راشد وراشد ناظرها:الله يجيب الخير
ريحان ناظرت سما اللي تأشر لها وناظرتها بحده
الهنوف:بروح شوي واجيكم عندي اتصال
ريحان:خذي راحتك
طلعت الهنوف وسما ناظرتها؛ريحان نبي نجلس زين وش هالقعده الرسميه
ريحان:اهجدي بس مو بيتي لحالي
اماني ابتسمت؛ريحان من العرس بغيت اقولك حلو عليك الصبغه
ابتسمت ريحان؛ياعمري انتي الحلوه والله
راشد ابتسم لها واماني ناظرت راشد:اقنعي اخوك بالله نصير حلوين وننقل المدينه
صد راشد وريحان ناظرته:ماودك راشد؟
راشد؛اكذب اذا قلت ماودي بس ابوي مستحيل يوافق ومالي خلق مشاكله يالله رضى اقعد يومين
لجين:مو معقول راشد خلاص انت استقريت بتقعد بالديره لين متى؟
راشد تنهد:ما ادري
اماني تنهدت وناظرت ريحان وريحان اشرت لها
:راشد وانا اختك اسمع مني ابوي اذا بنقعد على رضاه ماعشنا
راشد رفع راسه وريحان كملت:كلنا عشان عشنا هالعيشه طلعنا عن رضاه لين متى الواحيد يقعد يربي غنم وخرفان وكلاب شاب راسك وانت ماشفت الحياه الزينه
بلعت ريقها اماني وهي تناظر شكله كيف ضعيف
ريحان؛ابي لك الزين ياراشد شوف لقيت ماشاء الله اماني تحبك وتهتم فيك ومغيره من شكلك باقي بس تقوى شوي وتوقف بوجه ابوي
راشد سكت ونزل عيونه وناظر يدها اللي تنحط على يده
ناظرها وابتسمت له وابتسم بهدوء وصد بعيونه بتوتر
-
الهنوف
دخلت الغرفه ولا حصلت كوثر
عقدت حواجبها وهي تهمس:كوثر؟
ماردت عليها وقفلت الغرفه ومشت ودخلت المطبخ
توقعت انها برا بس كوثر واقفه عند الصاله
تنتظر الشيطان يبعد وساوسه عن راسها
وترجع لغرفتها تاركه الشر والمصيبه اللي ممكن تصير
بلعت ريقها ودخلت الصاله وهي تناظر وجيه البنات
جمدت ملامحهم ولف راشد باستغراب ومن شافها
وقف بجمود وفلت يد اماني ظل واقف يناظرها تناظره
بلعت ريقها كوثر وهي تحس بالهدوء ماقبل العاصفه
بس من شافت راشد وارتباكه المعتاد لاشافها نست كل شي
رفعت راسها اماني بصدمه وجمود والاستحاله اللي كانت تفكر
ان ممكن هذا يصير ان ممكن كوثر تدخل على راشد
ولا تهم لاحد لا عادات لا تقاليد ولا حلال وحرام
بلع ريقه راشد وهو يناظرها بحب وشوق ولهفه
مشى راشد بخطوات هاديه وسحبته اماني بقوه ووقفت جنبه
وهي تناظر كوثر بحده:رخيصه!
وقفت ريحان بخوف وهي تناظرهم
وراشد يناظر كوثر واماني ماسكته بقوه
ما كانت واثقه تتركه ما كانت واثقه بنفسها وبحبه لها
خافت يتركها قدامهم ويمشي لها
اماني:وش هالرخص اللي انتي فيه!
كوثر ماردت وهي تناظر راشد وهاديه
عصبت اماني ومشت لها بقوه وهي تسحبها بقوه من يدها
ركضت ريحان وصرخوا البنات وراشد واقف يناظرهم
عقدت حواجبها كوثر من اظافرها بوجهها
واماني تناظرها بحده وصوتها مغصوص:يارخيصه والله انك ماتربيت والله ليوصل هالعلم لزوجك والله
ريحان مسكت اماني بخوف وهي تجرها واماني تناظر كوثر
دخلت الهنوف ومن ناظرت كوثر بينهم انصدمت
لفت كوثر لامها وناظرتها ورجعت ناظرت راشد
وكأنها تقول خاربه خاربه اشرت على اماني:انتي تدرين من ماخذه؟
اماني ساكته وتناظرها بحده وكأنها تاكلها بعيونها
كوثر كملت بغصه وهدوء:تدرين وش اخذتي مني؟ اخذتي عمري اللي كان معي
واقفين البنات يناظرون كوثر ومصدومين
والهنوف مي شايلتها رجولها من الفضيحه اللي تشوفها
كملت كوثر وهي تأشر على قلبها؛كنت مستعده ابيع اهلي وعماد والدنيا بس عشانه ويوم وصلت له جيتي انتي اخذتيه
راشد واقف بجمود جسد بلا روح يناظر ويسمع ولاقادر يتكلم
كوثر عضت شفتها عشان ماتبكي وكملت:وبسببك انتي
ناطرت لجين ولجين بلعت ريقها بخوف:خربتي حلمي وحلمه بنينا بيوت ما تحدها اسوار وبنينا طريق ما تمليه الا السعاده
نزلت راسها لجين وكوثر نزلت دموعها وكملت:وش بتقولين لولدك اللي ببطنك؟ تقولين تزوجت ابوك وخربت بيت خالك؟
رجفت اسنانها واماني تناظرها ويدينها ترجف من العصبيه
ناظرتهم كلهم وناظرت امها بالاخير:حاولت اضغط على نفسي كثييير عشانك وشعان تكونين مبسوطه فيني بس انا ماني قادره اتحمل
الهنوف مسكت راسها وقعدت على اقرب كنبه
وكوثر لفت لراشد وناظرته بعيون دامعه:اذا انت قويت تنسى انا والله ماقويت، اذا انت اعتبرت اللي صار ذكرى انا والله احسه ماضي وحاضر ومستقبل
راشد وباقصى قوه داخله نطق واخيراً:بيني وبينك حواجز كثيره
لفت اماني بسرعه لراشد من تكلم وريحان ماسكتها
راشد كمل بهدوء:اذا عديتي حاجز بتقابلك مليون حاجز انا صعب المنال وانتي بعيده طول البحار
كوثر تناظره وراشد يكمل:كل ماجمعّت الحروف بداخلي اوقف قدامك وتضيع البلاغه
غضمت عيونها اماني برجفه وكوثر تناظر راشد
كمل راشد بالاخير:اذا ربي ماعطاني كوثر الدنيا عساه يسقيني منه بالجنه
مشى من جنبها بسرعه وخرج ما ترك مجال
ترك البيت كله باللي فيه ماقوى يبقى اكثر ولا يقدر يتكلم
تارك وراه قضيه مستحيل تلقى لها حل ومستحيل ترضي جميع الاطراف
واقفه كوثر وتناظر الفراغ واماني فلتت يدها من ريحان
وجلست على الكنب وهي تبلع ريقها وتناظر الارض
ولجين عاضه شفتها وتناظرهم بارتباك
والهنوف حاطه يدينها على راسها ومستصيبه
الهنوف همست:وش سويت؟
ماردت كوثر والهنوف ناظرتها؛وش سويت؟
بلعت ريقها ريحان بارتباك وجلست وهي تتنهد
الهنوف:واحد مصور بنت الناس تترقص والثانيه داخله على واحد متزوج
غضمت عيونها ريحان وكوثر ماردت عليها
الهنوف:وش سويت عشان تجازوني كذا؟ تفضحوني كذا!
لجين اخذت شنطتها وعبايتها وخرجت بسرعه من البيت
وسما جلست جنب اماني وهي تحاول تهديها
مشت الهنوف وخرجت من المجلس بخطوات بطيئه وكأنها
تجر رجولها جر
اماني حطت يدها على خدها وهي تناظر الارض:وين اروح؟
ناظرتها كوثر واماني كملت:لمين اروح؟
ريحان صدت عنهم وحطت يدها على راسها بتعب
اماني:اهلي لو رحت لهم بتروح لجين لاهلها لو بغيت اخرب بيتي اللي اخترب من زمان! بخرب بيت اخوي
سما بلعت ريقها وهمست:هدي بالك اماني تكفين
اماني ناظرتها وهمست:اهدي بالي؟ لا هدا بالي انا من يهدي بال راشد؟
لفت لكوثر اللي تناظرها وتكلمت بحده؛مو بس انتي اللي ما اخذتي اللي تبينه مو بس انتي بالدنيا اللي حبيتي واحد
كوثر ماردت عليها واماني وقفت وهي تلبس عبايتها
ريحان؛وين رايحه؟
اماني:وخري عني بطلع
ريحان بخوف مشت لها:اماني وين بتروحين تستهبلين؟
اماني ناظرتهم بحده؛وخروا عني قلت
مشت بتروح وريحان مسكتها؛تكفين اماني اهدي امشي معاي تكفين
ناظرتها اماني وبلعت غصتها واخذتها لغرفتها ريحان
دخلت اماني وخرجت ريحان تاركتها وقفلت الباب
رمت نفسها اماني على الارض وبكت كل ماتتذكر
شكل راشد وكلامه واللي صار تنهار
كل ما تتذكر كرامتها وحبها له واهتمامها فيه تبكي
اللي صار مو شوي اللي صار فوق طاقتها
غير انها ماتقدر ترجع لاهلها ماتقدر اخوها بيصير اب
وين تروح؟ ولمين تروح؟ وكيف تحارب وتوقف بعد اللي صار؟
-
سما
ناظرت كوثر ومشت لها:الغلط راكبك انتي لا هو على راشد ولا على اهلك
كوثر ناظرتها بضيق
وسما كملت؛اللي صار بيوصل لجراح ويوصل لزوجك
دخلت ريحان وناظرتهم وناظرت كوثر:روحي غرفتك مابي اتهاوش معك انتي بعد
كوثر وقفت وناظرتهم:صح نسيت اقول ضحكاتك انتي وجراح امس كانت واصلتني، تدرين وش شجعني ادخل اليوم! ضحكاتك مع حبيبك
عقدت حواجبها ريحان وسما تناظر كوثر بصدمه
كوثر:انك تاخذين احد تحبينه هذي احمدي الله عليها الف مره لانك ماتحسين باللي احسه
مشت كوثر وتركتهم وريحان ناظرت سما بصدمه
وسما جلست وهزت راسها بقوه بين يدينها
-
راشد
واقف عند البيت يناظره
كيف يواجه اماني وكيف يقدر يحط عينه بعينها
نزل راسه بالسياره يناظر يدينه اللي ترجف
كيف يكذب! وهو للحين يحبها؟
كيف يمثل وينسى وهو يرتبك لاشافها
يحب شكلها بكل مره يشوفها
يحلم فيها كل يوم تنام على صدره اماني
يتخيل زولها وطيفها تتراكض مع الغنم بالحوش
رفع راسه على نور سيارة جراح بعيونه
غمض عيونه ونزل جراح وابتسم
نزل راشد بترنح ووقف قدامه بين السيارتين
جراح ابتسم:هلا عاش من شافك
راشد ساكت ويناظر جراح بجمود
عقد حواجبه جراح وتقدم له:صاير شي؟
راشد مارد عليه وجراح بخوف جمد:راشد وش صاير؟
لف وناظر البيت وركض بسرعه جراح ودخل
مالقى احد بالغرفه ومشى بيدخل غرفته وناظر امه
جالسه عند غرفة كوثر بالارض
بلع ريقه بخوف ومشى لها:يمه وش فيه؟
الهنوف هزت كتوفها وضربت فخوذها:وش فيه؟
جراح جلس عندها وعقد حواجبه؛يمه لا تخرعيني وش صاير؟
الهنوف رفعت راسها له؛جبتوا العار لاسم ابوكم
جراح استغرب وعقد حواجبه
والهنوف كملت:اختك خرّبت بيت الرجال وخرّبت بيتها اللي ما انبنى
جراح ناظر الغرفه ورجع ناظر امه:ليه وش صار؟
الهنوف:اختك طلعت للرجال بدون غطى وقالت بوجه الكل انها تبيه وانا بغته والادهى انه رد عليها وزوجته جنبه
جراح جمدت ملامحه ووقف وهو يناظر امه
الهنوف:وش تقول لام ولدها يصور بنات الناس وبنتها عار على نفسها
هز راسه جراح ومشى بسرعه لبرا البيت
وناظر راشد مكانه رفع راسه راشد وما حس الا بغشاش على عينه
ناظر الدم جراح على السياره من قوة الضرب
ولا حس بالوقت اللي ضرب راشد فيه لين شاف الدم
ناظر راشد وفلت يده وطاح راشد من يدينه
طاح بالارض وجهه مشوهه بالدم مغطى
ورجفت يدينه بخوف ومشى بسرعه للبيت تاركه
مشى لغرفة كوثر وناظر ريحان قدامه واقفه بخوف
والهنوف بنفس محلها مشى من جنب ريحان
ومسكته بقوه وخوف:تكفى جراح اسمعني تكفى
جراح بقوه انفلت من يدينها وريحان كلها خوف من شكله
والدم اللي يغطي اصابعه ويدينه
سحبته بقوه وهي تصرخ،جررراح اسمعني تكككفى ناظرني
جراح دفها بقوه بالجدار وناظرها بحده وصرخ بوجهها:وخري عني
دخل الغرفه وقفل الباب المفتاح وصرخت ريحان
دقت الباب بخوف وجراح واقف يناظر كوثر واقفه بثقه
تقدم لها وهو يناظرها جامده بلع ريقها وهمس:تبين تموتين؟
كوثر ماردت عليه وجراح تقدم لها اكثر؛عبالك ماوراك رجال؟
كوثر:ادري وراي رجال والنعم فيه جواله مليان بنات يترقصون
خنقها بيده وغمضت عيونها وصرخ بصوت عالي
:انا رجال شايل عيبي معي انتي اللي عار علينا
كوثر دفته بقوه وركضت لاخر الغرفه
شالت كاسه المويه بيدها وناظرته:قرب مني وشوف وش يجيك
جراح مشى بسرعه وضرب راسها بالجدار
وكوثر رمت الكاسه على راسه وانكسرت بجبينه
غمض عيونه وبعد عنها وهو يمسك عيونه
بلعت ريقها بخوف ان عيونه صابتها
جلس على الارض والدم بيدينه ماسك عيونه بألم
-
ريحان من سمعت الاصوات اختفت بلعت ريقها
من القاتل ومن المقتول ؟
دقت الباب بخوف وهمست؛جراح؟
سمعت صوت القفل وبعدت عنه وناظرت كوثر
جمدت ملامحها من شافت كوثر وركضت لداخل
جلست عند جراح بخوف وهي تناظره يتألم؛جراح جراح وش فيك !
جراح مايرد عليها وماسك عيونه بألم
خافت عليه وصرخت باعلى صوتها:جررراح
-
بالمستشفى
فتح عيونه وناظر ساري وعقد حواجبه
ساري همس:راشد
راشد عقد حواجبه بألم ورجع ناظر ساري
ساري:لا حول ولا قوة الا بالله وش سويت انت وجراح؟
راشد:وش صار؟
ساري تنهد :ارتاح انت وجهك محيوس حوس ارتاح
سند راسه راشد وناظر السقف
وهو يتذكر لين ما لف بصدمه لساري:كوثر؟
ساري:وش فيها؟
راشد:جراح وش سوى بكوثر؟
ساري:كوثر وش سوت بجراح!
عقد حواجبه راشد وساري وقف:ارتاح راشد لاحق على الكلام
خرج ساري وراشد بتعب غمض عيونه
مرهق وجهه وجسده وروحه مرهقه بعد
-
ريحان
تناظر الدكتور بخوف لين ماخلص كلامه:تقدرين تدخلين
ريحان مشت من جنبه ودخلت وهي تناظره بالسرير
مغطى بعيونه شاش ومنسدح
عضت شفتها بخوف ومسكت يده وهي تجلس جنبه
من حس فيها همس:ريحان؟
ريحان بلعت ريقها:عيوني؟
جراح اخذ نفس ومسك يدها بقوه؛وش صار؟
ريحان:ماصار شي كلنا بخير وانت بخير بعد
جراح:عيوني وش فيها؟
ريحان:وش تحس انتي؟
جراح:احسها حاره وتحرقني
ريحان شدت على يده:تعورك؟
جراح:بترديين سؤالي بسؤال؟
ريحان:جراح مافيك الا العافيه واذا في عيونك اذى عيوني فداك
جراح:يعني عيوني فيها شي؟
ريحان:مايدرون للحين
سكت جراح وريحان مسكت يدينه الاثنين:جراح انا متأكده مافيك شي
جراح؛وين امي؟
ريحان؛تعبانه شوي من اللي صار اكيد بكره تصير احسن وتجيك
جراح:بقعد هنا لبكره؟
ريحان؛لازم ياروحي يطمنون عليك
جراح مارد عليها وريحان بضيق وخوف انسدحت جنبه
وهي تحظن راسه وتسمي عليه
همس لها؛لا تخليني
ريحان؛انا جنبك لا تخاف
سكت جراح وريحان ضامه راسه وتمسح على شعره
تدعي من كل قلبها ان مايصير له شي من اذى او مرض
-
يوم جديد
فارس
واقف جنب ساري ويتكلم معه
وريحان جنب الهنوف جالسه وتدعي وهي مغمضه عيونها
رفعت راسها ريحان وهي تناظر الدكتور بيدخل الغرفه
توقف وتمشي وراه ويدخلون وراها
واقفين بالغرفه الصغيره ويناظرون جراح مغطي بعيونه شاش
الدكتور والجهاز جنبه اشر للممرضه وقفلت الاناره
ارتبكت ريحان ومسكت يده اللي من حس فيها مسكها بقوه
ثبتوا السرير بوضع الجلوس وفتحوا الشاش وهو ماسك يدها
الهنوف بخوف ماسكه رجولها اللي نملت بخوف
فتح الشاش وجراح يرمش بألم
ثبت الجهاز عند عيون جراح وشغل الليزر وهو يتكلم:تقدر تحط عيونك؟
جراح يرمش ويناظر الليزر ودموعه تنزل بألم
الدكتور عاقد حواجبه استغرق وقت طويل
والهدوء يعم الغرفه بين نظرات الخوف ونظرات التوتر
ريحان تناظر وجه جراح ودموعه على خده
تقدمت له وهي تضم راسه وتمسح دموعه وتناظر الدكتور
:طولت دكتور ممكن تستعجل؟
الدكتور ناظرها؛طيب شوية وقت
ريحان بخوف حاسه بيد جراح بتكسر اصابعها من خوفه
ثواني وشال الدكتور الجهاز ووقف وهو يغطي عيونه بشاش
بعدت ريحان وجراح تكلم بخوف:ليش تغطي عيوني؟
الدكتور؛شوية وقت ماتتعرض للضوء مو من صالحك
جراح؛ليش؟
الدكتور:انت تقدر تشوف وترجع بتشوف بس الاضواء ماتتعرض لها ابداً
ريحان ناظرت الدكتور وجراح رجع انسدح
ساري ناظر الدكتور؛لين متى؟
الدكتور:بكتب له خروج ان شاء الله بكره يرتاح في بيته اسبوع كامل وبعدها يراجعنا
فارس:اسبوع مغطي عيونه؟
الدكتور:ياليت
خرج الدكتور وريحان ناظرت جراح:سمعت جراح؟
جراح؛امي!
الهنوف رفعت راسها بضيق ولفوا لها ساري وفارس
ريحان فلتت يدها وبعدت وقامت الهنوف بتعب
مسكت يده وجراح من حس فيها همس:امي لا تزعلين مني تكفين
الهنوف:ماني زعلانه ارتاح انت
جراح؛ادري فيك زعلانه بس تكفين امي لا تتعبين عشاني
الهنوف:اذا صرت بخير انا بخير ياجراح
جراح سكت وريحان بتعب جلست وهي تناظرهم
-
اماني
سمعت صوت بابه ينفتح ولا خرجت من غرفتها
من يوم مارجعت الديره ولا سمعت صوته ابد ولا تكلمت
وراشد ماتكلم ولا حتى طالع فيها او برر
سمعت صوت البيت وعرفت انه خرج
وقفت وناظرته من الشباك يمشي لشبك الغنم
ملامحه متنفخه من الضرب ولا اهتمت فيه ابد
غمضت عيونها تعاتب قلبها اللي يحبه
كل اللي صار ماتقدر ما تحبه وتحزن عليه
انتظرته لين غاب ان عينها مع الغنم واعتلى الجبل
يرعى وراهم تنهدت وقفلت شباكها وجلست على فراشها