عشقاً من قنا || Love From Qina

الفصل الرابع

"واضح كدة يا امينة انك بتصطادي في المياه العكرة، و بتقولي كلام انتي مش فهماه" قال اغلب بعد ان تأكد بأن ليلي دخلت غرفتها، فهو لا يريد ان تسمع ما سيتفوه به بأي طريقة، لذا كان لابد ان يصرفها حتي و لو ذلك جعلها تبكي.

قلبه اعتصره عندما صرخ بوجهها، و لعن نفسه لجعلها تبكي، هذا لم يكن أبدا الانطباع الذي كان يريد ان تأخذه عنه إطلاقاً!

وقف اغلب بشموخ ليقف الجميع معه، لينظر الي امينة تلك بنظرة تحمل شرار النار، ليتحدث بهدوء

"ليلي خط احمر، اظن انتي فاهمة لية، لأنها تبعي و تخصني و كون انك تقولي كدة قدامي يبقي انتي بتتحديني... و ابنك الشملول لو عرفت انه فكر فيها بس..مجرد فكر"

ركعت امينة تقبل حذائه قاطعة حديثه لتتحدث بسرعة باكية "سامحني يا سيدي سامحني كانت ذلة لسان، ليلي فين و احنا فين! سامحني يا سي اغلب احنا مش قد زعلكوا ولا نقدر نتعدي علي حاجة تخصك، ابوس رجلك ميكونش الحصل دة سبب انكم متحضروش فرح بنتي! متغضبوش علينا ونبي، احنا ملناش بركة غير بيكوا!"

ابعد اغلب قدمه عنها ليعطيها ظهره ليفهم الجميع انه يريدهم ان يرحلوا و ان تنتهي تلك الزيارة، وقفت امينة لتخرج و معها الحشد الذي كان موجود.

ليحل الصمت المخيف في الدوار، لا احد يجرأ علي التكلم..

"اغلب، تعالي ورايا يا ولدي علي المكتب"
تحدث الجد أخيراً الي اغلب بعد ان اتجه للمكتب، دقيقتين و كان قد تبعه اغلب، دخل المكتب و اغلق الباب خلفه ليجلس امام جده علي المقعد بوجه متهجم ناظر للأمام، عاقدا حاجبيه.

"افتكرتك هتاخذ وقت علي بال ما تقول أخيراً انها بتاعتك، دايما كنت بشوفك بتنكر دة في عنيك" تكلم الحاج احمد فجأة لينظر اغلب للأرض بينما تابع الجد حديثه بعد ان ضحك ضحكة خفيفة قائلاً

"لكن واضح انه مع اول تهديد انها تروح منك اعلنت الحرب علي طول، و اعلنت دة بوضوح انها من ممتلكاتك و انها خط احمر زي ما قلت"
نظر اغلب لجده مدركاً ما يريد ايصاله له.

"هي ولا بتاعتي ولا حاجة، هي تقدر تعمل اللي هي عيزاه انا عمري ما هجبرها تعمل حاجة هي مش عايزها، حتي لو دة ممكن يدمرني، لو مجاش منها هي عن اقتناع فأنا مش عايز حاجة ولا هعملها حاجة، انا اصلا مش هقبل اني ابقي ضعيف حتي لو كان قصادها"

تكلم اغلب بحدة، و كأنه يدافع عن كرامته و يثبت لنفسه بأن هوسه بها ذلك لن يضعفه امامها، و ان حدث و رفضته لن يجعل حبه يجبرها علي شئ، لأن رغم كل شئ كبرياء اغلب جبار و نفسه عزيزة جداً عليه، تابع الجد حديثه قائلاً

" انا متأكد انك ميهونش عليك انك تزعلها او طبعاً تجبرها علي حاجة دي حقيقة كاملة، لكن موضوع انك مش ضعيف قصادها دة معتقدش انه صح"