ماذا لو عاد معت‍‍ذرا ؟

معتذر

رواية : ماذا لو عاد معت‍‍ذرا ؟
💔🙍‍♀️🚶‍♂️💔
_ بقلم : سوسن الأزهر _

.....
الحلقة الأولى .....

......
قبل خمسة سنين ...
...... *** ......
أمل : وتين .. يلا انزلي بدر يستنى فيك برا ف الجنان
وتين : مش نازلة .. خليه يمشي
امل : وتين مش وقت زعل توا .. بدر مسافر واحتمال ايطول .. يعني لعند امتى بتقعدي زعلانة منه .
وتين : امولة انا مش نازلة واعلى مافي خيله يركبه .. شن تحسابه ماعنديش كرامة
امل : يووووه يا وتين كنك مكبرة القصة .. باهي انزلي عاتبيه لوميه ديري اي ردت فعل
وتين : حتى هذي ردت فعل .. عقاب ليه مش ح يشوفني لعند ما يرجع من السفر
امل : براحتك .. بس بعدين ماتقعديش تتباكي عليا
وتين : اطمني مش ح نبكي ولا حتنزل مني دمعة
وفتحت امل الباب بتطلع .. لقت بدر في وجهها :
بدر شن ادير هنا 😳
بدر : خليني انشوفها دقيقتين بس ونطلع
امل : باهي بسرعة .. ماما راهو في دارها وممكن تطلع ف اي وقت
بدر : تمام مشكورة امولة
امل : تي غير خش توا عالسريع وبعدين اشكرني زي ماتبي
وطق ع الباب وخش وسكر الباب وراه
وتين : امولة قتلك مش نازلة وهي تسرح في شعرها ع المزينة والتفتت اتفاجئت ببدر واقف عند الباب ولف وجهه ع جنب : يلا البسي اي حاجة خلينا نتكلموا .. كانت لابس توتة شورتها قصير وشعرها منساب ع طوله .. ومشت للدولاب حطت عليها عباية ووشاح وهي متوترة من الخوف والخجل :
ممكن نعرف شن تبي وكيف تدخل ...؟
حط يده ع فمها وسكتها :
انا قبل ماندخل دارك دخلت قلبك وبدوز استاذن
بدر انا تعبانة ونبي نرتاح وقرب منها مسك يدها وضمها بين ايديه بحب :
اكيد معاي حترتاحي اكتر .. وتيني انا حبيبك مش حد غريب
وتين بخوف : باهي اطلع توا اتجي مرت عمي اتشوفك
بدر : اوك حبي طالع . وسحبت منه ايدها ولفت عنه وجهها وطلع بدر عالسريع وخشت امل ولما شافتها ارتمت في حضنها وقعدت تبكي :
امولة بدر بيسافر خلاص
امل : خلاص ياهمي مصيره ح يرجع .. وبعدين مش قلتي مش حتنزلي ولا دمعة
وتين : كله منك ليش خليته ايخش .. تحشمت منه كيف قاعدة بلبست الحوش وشعري مفتوح .
امل : وماتحشمتيش منه لما باسك
وتين : واللهي مادارها .. وعارف لو دارها حنزعل
امل : باهي يلا البسي وخلينا نمشوا ل ندى بنت جيرانا انكسدوا معاها اشوي .. بكرة قراية فاتحتها .
وتين : ايه ندى ماشاءالله عليها صبرت ونالت .. يلا دقايق ونلبس .
.
.
بعد مرور شهر :
وتين : امولة بدر من لما سافر انقطعت عني اخباره .. معادش اتصل ولا كلمني .. بلكي صاير معاه حاجة
امل : حاجة شنو ياهبلة .. مش كنا في حوشهم وسمعتي خالتي شن قالت امس كلمها وهو كويس .
وتين : باهي وانا ليش مايكلمني
امل : مش عارفة يمكن زعلان منك او واخد على خاطره
وتين : باهي يتصل او ايرد ع مكالماتي .. مش يخليني هكي وخلاص
امل : حتى خوي خيري مايتصلش لنا قريب شهر ماسمعناش صوته
وتين : خوك هكي طبعي بس بدر لا .. والله اشتقتله موووت .
امل : ايه كلنا اشتقناله بس الله غالب ظروفه هكي
اذكرت انها من كم يوم جتها رسالة ع تليفونها وماركزت فيه اكويس وخدت تليفونها وفتحت ع الرسايل وقعدت تتصفح فيهم لعند ما لقت رسالة من رقم غريب مكتوب بالخط العريض :
اسف وتين .. انسيني وعيشي حياتك .
واشوي نزلن دموعها .. وانهارت على ركبيها وتبكي بالعبرة :
ليش .. ليش يابدر درت فيا هكي ليش حرام عليك 😭 .. وقعدت تبكي بهستريا وداخت واغمى
عليها ..؟؟؟
***
.
.
.
***
وبعد خمس سنين ..
***
الحاج فرج : توا اتكلملي ولدي سليم .. قوله يروح بالبنت .. خلاص معاد عنده بيها لزمة .. واللي يبيها تفضل يتقدملها من حوش جدها 😤.
يزن باستغراب : غير شن صاير ياجدي وانت حارق بصلتك عالصبح 😳.
الحاج فرج بعصبية وطايرتله : حارق في عينك ياللي ماتتحشم على وجهك .. جيب التليفون واتصلي بيه خير من انكسره على راسك 😡
يزن مشى يجيب التليفون من على الطاولة وهو يتمتم :
هذا اكيد صاحبه الحاج محجوب .. ابصر بشنو معبيله راسه😁 .. واتصل يزن بخاله سليم ومدله التليفون :
اهو تليفونك وخالي على الخط
وخدا منه التليفون وعيونه ناااار :
سليم .. وين بنت خوك المرحوم 😠
سليم بتوتر : خير يابوي .. أهي قاعدة معانا وين بتمشي يعني 🧐
الحاج : توا اتولع سيارتك واتجيبها
سليم : ان شاءالله خير .. توا انا وجاي للعمل انجيبها معاي
الحاج فرج : يوم ازيادة ماتقعدش عندك .. وصكر .. ويزن متكي على جنب ويضحك في سره 🤭.. شافله جده فرج بطرف عينه مزال راقيلته :
وانت نوض دور ما ادير وانت قاعد ماد فيا خلقتك
يزن : مهو كملت شغل وقلت انجي انكسد بحداك .. ها خير شن فيه ياجدي
الحاج فرج تنهد وهو يحاولي ايهدي اعصابه :
برا ديرلي قهوة انهدي بيها اعصابي
يزن بفضول : حاضر ياجدي .. توا انديرلك القهوة بس قولي شن فيه 🤔
الحاج فرج : الناس بدت تتكلم بعد رجعت خيري ولد خالك سليم .. وبنت عمه اللي ساكنة معاهم .
يزن بضحكة : تي ياجدي خيري كبير فالعمر .. اللي يشوفها بحداه يقول بنته مش بنت عمه .. وبعدين خيري عنده حوشه فوق وانت تعرفه كويس من لما اتوفت مرته وهو عايش في عزلة لا يطلع ولايخش كان للعمل ولو انزل في الصبح صبح على اهله وبس .
الحاج فرج : ولو الناس بدت تتكلم وانا مش ناقص وجع راس وسمعتي تنزل الارض .. وصكر عالموضوع وبرا جيبلي قهوة
يزن وهو شاد ضحكته على تفكير جده :
حاضر توا انقول لامي لو قاعدة اديرها لك 🤭😁.
.
.
.
تعالوا نتعرفوا على شخصيات الرواية
عيلة الحاج فرج جدهم وكبير العيلة
عنده ولده سليم الكبير .. يسكن في منطقة تانية بحكم شغله عسكري .. ومرته عزيزة .. عندهم تلاتة متزوجين وواحد ارمل اسمه خيري 40 سنة مهندس معماري .. وبنت وحدة اسمها امل 27 تشتغل دكتورة اطفال في المستشفى .. وبنت عمهم الوحيدة اليتيمة اللي تربت معاهم من صغرهم وتين 28 سنة .. كملت قراية دكتورة صيدلانية ومكسدة فالحوش .
وغالية ام يزن متزوجة ولد عمها وساكنة جنب حوش بوها فرج .. عندها بنت وولد متزوجين .. وولدها الكبير اسامة يقرا برا البلاد وعايش حياته .. ويزن اخر العنقود 27 سنة متخرج من كلية الاقتصاد وحاليا يشتغل في مكتب عقاري .. وطبعه مرح وشقي وجدي وقت اللزوم والحياة حلوة معاه
وعيلة بدر عايش مع امه وبوه وعنده تلاتة اخوات بنات وخوه الاصغر منه يزيد .
بدر شاب في 36 سنة يشتغل في شركة الطيران مع ولد خالته خيري .. وحسب شغله اغلب وقته خارج البلد في رحلات عمل .. واخر رحلة هو وخيري خدوها سياحة خمسة سنين برا البلد .. خيري كان هارب من الظروف والمشاكل والاحزان بعد وفاة مرته .. وبدر هارب من حب حياته في ظروف غامضة ودون اسباب تذكر ... ؟؟؟
وتعالوا نتعرفوا على بقية الشخصيات من خلال الرواية ؟؟؟
.
.
.
في حوش سليم ..
امل و وتين في دارهن .. كل وحدة بسريرها ودولاب ملابسهن مع بعض .. واسرارهن وكل شي يخصهن مع بعض .. زي التوأم .. وسليم ايعامل فيهن زي بناته لان وتين بنت خوه المرحوم وعايشة معاهم من لما عمرها 12 سنة .. امها اتوفت في حادت سيارة .. وبوها مرض بعد وفاة امها وتوفى بعدها بسنة .. وبعدين خداها عمها عشان تتربى مع بنته الوحيدة امل وتقرا معها في نفس المدرسة وفي نفس الكلية
وتخرجن امل دكتورة اطفال .. ووتين دكتورة صيدلانية بس اشتغلت اشوي وصارلها مشاكل في شغلها واضطرت اتسيب الشغل وتقعد فالحوش .. وكان بسبب قلب حياتها تعاسة وحزن .. وطبعا كانت امل ديمة تدعم فيها واتصبر فيها واتحاول اتطلعها من الحالة اللي فيها :
ياوتين خلاص انسي .. مر على موضوعك هذا قريب خمسة سنين .
وتين بحزن ودمعتها قريب اطيح على خدها :
انا لوعرفت السبب اكيد حنعذره .. بس ليش .. ليش دار فيا هكي .. انا شن درتله يا امل بس قوليلي 😥
امل : خلاص ياوتين .. ليش اتعذبي في روحك على واحد مايستاهل 🤨
وتين : المشكلة انه رجع وموجود وعايش حياته بالطول والعرض وكأني ماكنتش فيها
امل : هو صح ولد خالتي وماشاءالله عليه وانا اللي عرفتكم على بعض بس مش عارفة شن جاه
وخشت عليهن عزيزة ام امل :
يلا تعالوا يابنات تغدوا
وتين بكسرة خاطر : انا يامي مانبيش 😔
عزيزة : كيف يابنتي ماتبيش .. يلا تعالي كولي معانا حتى لقمتين
امل : يلا نوضي ياوتين .. راهو اكل ماما مايتعوضش
وتين من غير نية : باهي يلا 😔.
عزيزة وهي تشوف لبنتها امل : راهو العشية بنمشوا لحوش خالتك اتلبسولهم على ولدهم بدر
وتين قلبها دق بسرعة على ذكر اسمه بدر ونخلعت :
كنه بدر 😳
امل بهدوء عادي : داير حادت .. بس الحمدلله جاته سليمة .. كسر في دارعه اليمين .. وجرح بسيط في جبهته
وتين : امولة حبيبتي .. عادي نمشي معاكم
امل : عادي بس مش حتقدري اتشوفيه
وتين : نبي انشوفه ولو من بعيد
امل : باهي يلا نتغدوا وبعدين ساهل .
.
.
.
وفي العشية ناضت وتين فتحت الدولاب وتشوف شن بتلبس وتشوف لأمل اللي حطت عليها عبايتها ووشاحها :
ها .. شن نلبس امولة .
امل وكأنه مش عاجبها لهفة وتين عليه وكيف تتعامل وكأنه ماصار بينهم شي :
يوووه يا وتين .. البسي اي حاجة .. فالنهاية مش حتقدري اتشوفيه لا يشوفك .
وتين بتذمر : حرام عليك يا امولة ليش هكي اتقولي .
امل : حبيبتي انا مانبيش انعيشك في وهم .. وانتي حرة .. وسمعت بوها ينادي .. طلعت وخلتها حايرة في امرها .. كان سليم لابس وطالع :
ها بابا .
سليم : كلمي وتين اتوتي روحها بيش نرفعها حوش جدها
امل : بس يابوي ... ءءء ا
سليم بعجلة : يلا جدتها قاعدة بروحها وانا ماشي للعمل انحطها معاي
امل : باهي توا انكلمها .. ومشت خشت ل وتين .. لقتها كملت لبس .. كانت لابسة بنطلون امريكاني مع قميص وردي طويل ووشاح شيفون ابيض افضض
ابتسمت لما شافت امل :
ها .. شن رايك امولة :
امل : تي واللهي الا اتهبلي .. بسسسس يافرحة ماتمت
.
وتين : كنك هكي امولة .. انا بس نبي انشوفه لاخر مرة .. لاني انا خلاص .. مش حنلتفت وراي مرة تانية .
امل : بس بوي يبي يرفعك لحوش جدي .. قال جداي قاعدة بروحها
وتين : بتذمر .. يعني مابيصيرليش انشوفه ..
امل : الله غالب حبيبتي وانت عارفة الوضع
وتين : باهي خلاص توا انوتي دبشي ونطلع .
.
.
.
وطلعت عزيزة مرت سليم مع بنتها امل و وتين .. حطهم سليم في طريقه في حوش اخت عزيزة وكمل طريقه مع وتين .. وجاي يلف بالسيارة انتبه لتليفون امل ناسيته فالسيارة ولف ورجع طول :
تي الهم هذي ناسية تليفونها .. وين عقلها مش عارف .
وتين : عادي بابا نرفعه ليها ... طبعا وتين اتعودت اتقول لعمها بابا
سليم : باهي انزلي وماطولي .. اتمدي ليها وتطلعي .
ابتسمت وتين بفرح : حاضر بابا .
كان الباب البري مفتوح .. طقت الباب وخشت وقفت على جنب متلبكة وقلبها يدق بسرعة رهيبة .. جاه صوت حد من الشباب في المربوعة اتفضل :
هي بتوتر : معليش نبي امل .
خشي للعيلة داخل .. وصكر باب المربوعة .. وخشت وتين .. طقت على باب الصالة .. واشوي وانفتح الباب .. كانت هناء اخت بدر .. واول ماشافت وتين عرفتها ورحبت بيها :
مرحبتين بيك .. وسلمت عليها اتبوس فيها بالخد
هي اتفضلي
وتين : لا صحيتي بس امل نست تليفونها فالسيارة .. وبابا يستنى فيا برا مستعجل .. ممكن تعطيه ليها .
هناء : حاضر .. وفجأة انفتح باب المربوعة .. وشافت هناء خوها بدر طالع وايشرلها :
ها بدر خير شن تبي ؟
كانت وتين عطيته بالظهر واول ما سمعت صوته اتجمدت في مكانها وماقدرتش تتحرك او تلتفت :
بدر : ديريلي فنجان قهوة بناخد دخاني برا ونرجع .. وطلع .
وتين عيونها دمعوا ووجهها رح اصفر .. هناء تفاجئت من منظرها :
انتي كويس .. وتين ساكتة وشاردة .. هناء قعدت تنادي في امل .. وطلعت امل اتفاجئت بوتين واقفة عند الباب وفي حالة صدمة ..
هناء : تعالي شوفي بنت عمك .. عطتني تليفونك وبعدين مش عارفة شن صارلها .. انا ماشة اندير قهوة لبدر وخشت .. امل فهمت حالتها عطول :
وتين .. كنك .. انتي شفتيه .. تكلمي .
وتين بصوت يرجف :
لا بسسس .. سمعت صوته .. هو واقف برا .
امل بتوتر : باهي يلا .. اكيد بابا يستنى فيك في السيارة .. ومسكت بيها امل من يدها وطلعتها معاها وانتبهتله كان واقف يدخن ويتكلم في التليفون .. وفجأة التفت وجت عينه في عينها وانصدم وطاح التليفون من يده .. كان نظرة عابرة زي الحلم برمشة عين اختفت .. وخشت امل اتسلم عليه وتتحمدله بالسلامة .. وهو تايه بين الحلم والعلم .. وحست انه شافها بس تجاهلت الموقف :
كنك .. شايف عفريت ولا شنو ؟
بدر بتوتر : لا بس حاس بوجع في راسي .. يمكن من الضربة .
امل : ضربة الراس بسيطة مش زي ضربة القلب ربي يشفيك وخشت .. عرف انه اتلمح للماضي او اللي صار ماضي .
وخشت امل قعمزت جنب بنت خالتها هناء وهمستلها :
ها .. شن حال بنت عمك ؟
امل بإبتسامة مفتعلة :
كويسة .. روحت مع بابا لحوش جدي .
هناء : واللهي الا استاحشناك .. باهي اللي دار بدر حادت بيش شفناك
امل : خزي عليك .. عارفة شغلي في المستشفى مفيش وقت مع شغل البيت وانا بروحي فالحوش
وتين يومين هنا واسبوع ف حوش جدي .
هناء : باهي ربي يعاونك اكيد ماشفتيش بدر توا معاه شباب وزحمة مش حتقدري اتشوفه
امل : لالا شفته وانا خاشة
هناء : باهي تعالي خشي انهدرزوا في داري بيش ناخدوا راحتنا فالقرمة وغمزتلها :
اطمني خوي يزيد مش قاعد عنده خدمة فالشركة على اساس اسبوع الجاي ايجي
امل برتياح : باهي خيرله .
هناء : مش عارفة ليش مش متقبلته
امل : خوك صايع وحركاته بايخة وانا مانحبش الحركات هذه
هناء : اطمني .. توه قريب تفتكي منه .. الاسبوع الجاي قال بيخطب
امل بفرح : بجد هناء .. باهي من بيخطب ؟
هناء : بنت جيرانا فرح الدلوعيه اكيد عرفتيها
امل : ايه عرفتها .. طنجرة ولقت غطاها ربي يهنيهم .
هناء : صح يزيد عنه حركات ماسخة بس واللهي طيب بس انتي مش عاطيته فرصة .
امل : فكينا من سيرته عاد وتعالي انهدرزوا على حالنا .
وامها كانت تهدرز مع اختها نجمة ام بدر في الصالة :
شن حالك ياعزيزة وشن حال بناتك
عزيزة : الحمدلله يانجمة سلم حالك ياحنة
نجمة : شن مزال امل ماتقدملها حد
عزيزة : واللهي قاعدة هي ونصيبها
نجمة : ان شاءالله يواتيها القسم .. حتى يزيد بنخطبوله الاسبوع الجاي .. فرح بنت جيرانا تعرفيها ماشاءالله عليه
عزيزة : ولو انه مش عاجبتني البنت .. بس ربي ايتممله على خير
نجمة : انشاءالله .. ومعزومين راهو .. بيش اتجوا تحضروا معانا الخطبة
عزيزة : انشاءالله .. وعقبال خيري ولدي متعبني معاه والله .. من لما توفت مرته عايش في حوشه اللي فوق ومسكر على موضوع الزواج بكل مايبي سيرته .. ومرة مرة يمشي لحوش جده ايكسد معاهم اسبوع ولا اسبوعين وايجي
نجمة : ولدك هذا ماتسكتيش عليه ياعزيزة .. بلكي دايرين خطين كتيبة
عزيزة : ربي يستر اوخيتي هذا اللي خايف منه
نجمة : الولد مش بلاش راهو .. حوسي عليه خيرلك
وخيري كبر فالعمر مش صغير .. اللي في عمره بصغارهم ماشاءالله .. وحتى بدر مش عاجبني وضعه .. عنده حوش ومايبيش ايكمله .
عزيزة : ربي يهديهم وخلاص .
.
.
.
ووصلت وتين حوش جدها فرج مع عمها سليم
وخش سليم سلم على بوه وقعمز جنبه .. وخشت وراه وتين اتسلم بوجه عابس وعقلها في بدر وكيف جت عينها في عينه .. وبإبتسامة باهتة :
شن حالك ياجدي
الحاج فرج : الحمدلله يابنتي .. بري حطي دبشك داخل وارتاحي اشوي
وتين : وين جدتي قاعدة ..
الحاج فرج : ماعندها وين تمشي .. اعيونها هاليومين ماتشوفش اكويس
وجى سليم بينوض يسلم عليها وقفه بوه :
استنى اشوي ياسليم نبيك في موضوع .. واتكى سليم ناحية بوه بعدما طلعت وتين :
ها .. خير يابوي .
الحاج فرج : بعدما رجع ولدك خيري بنت خوك ماليهاش لزمة تقعد عندك .. الناس توا بتبدأ تتكلم .. امخلين ولدهم خاش طالع في الحوش على بنت عمه
سليم : لاحول ولاقوة إلا بالله .. بس يابوي خيري مش صغير .. وصل الاربعين والبنت صغيرة عليه واجد .. يعني زي اخته الصغيرة .. وهي تقوله عمو وراضي بيها
الحاج فرج : خيري ارمل وعنده حوش والعيون عليه .. بس مشكلته عنيد ومايبيش يتزوج .. والبنت اتجوزله ولو اصغر منه بعشرة اسنين .. وانت عارف تفكير الناس كيف
سليم : باهي يابوي دير اللي يريحك .. وناض وخش ايسلم على امه اللي كانت مقعمزة في الصالة وكسد بحداها اشوي :
انا بكرة انجي نرفعك لعيادة العيون بلكي اتحصلي علاج اكويس
امه نجية : لا ماتعبش روحك ياولدي وانت ساكن بعيد .. اهو يزن ولد اختك قالي بعد المغرب انجيك نرفعك .
سليم : وشن حالها اختي غالية
نجية : اكويسة .. اتجي اتحوس على الحوش تغسل واطيب وتمشي .
سليم : توا انخش عليهم قبل مانروح وناكد على يزن ايشوفلك العيادة .
وجت وتين قدمتلهم قهوة وكعك وحليب :
تفضل بابا .
سليم : الله يبارك فيك يابنتي .. جدك يبيك تسكني معاهم هنا وتساعدي جدتك هاليومين اعيونها .١
كوتر : ان شاءالله .. تبوا حاجة تانية
سليم : سلامتك يابنتي .. وخشت
نجية : البنت يتيمة مش عارفة وين تقعد واللي يقولوه ليها تقول باهي وخلاص .
سليم : الله غالب هذا نصيبها وانشاءالله احنا مانقصروش معاها
وخشت وتين دارها واتلوحت على السرير وقعدت سارحة في حياتها وشن صايرة فيها .. يوم في جدها ويوم في حوش عمها .. وكيف واخدتها الحياة .. وقلبها اللي مكسور من خمسة سنين ومش قادرة تنسى ولا تتقبل انه طلع من حياتها هكي ومن دون سبب .. وخداها النوم ودمعتها على خدها .
.
.
.
ومع المغرب جا يزن .. وخش سلم على جده وجدته :
يلا ياحاجة وينك
جدته نجية : وهي تحوس في دارها .. استنى عليا ياولدي اشوي
يزن : انخش انساعدك ولا شنو .
نجية : لا هي امعاي بنتي وتين
يزن اطلق صافرة : اوووه بنت الخال هنا .. انتي هذي تعرف ادير حاجة .
وطلعت وتين وراء جدتها متنزفزة منه :
صكر فمك ومادخلكش فيا
ومسك بيد جدته نجية :
تي غير يلا اتأخرنا على العيادة
نجية : اهو طلعت... وتين ماتنسيش اديري لجدك طاسة قصب
وتين : حاضر .. بس عادي نمشي معاكم .
يزن : لالا لاتمشي ولا عندك حاجة .. اهو انا معاها انكفي ونوفي
وتين : وانت شورك ماتعرفش اتسلم
يزن : انا نعرف انسلم بالخد وانتي هذي ماتبيها يا متخلفة .
وتين : ايه خليني متخلفة .. الحركة هذي امشي ديرها لمرتك في المستقبل
يزن : تي غير اتجي .. اندللها ادلال عمرك ماشفتيه حتى مع امك وبوك
وتين سكتت بحزن بمجرد ماذكر امها وبوها اللي توفوا وهي صغيرة .. ويزن حس بغلطته وقرب منها وحضنها ومسح دمعتها اللي نزلت منها من غير ماتحس وباس راسها :
عارف روحي غبي احيانا .. بس حتى انتي مش مقصرة معاي في الهزايب
ودفته عنها :
تي حول عني وانت ماصدقت .
يزن : مش عارف ليش حارمتني من هاللحظات الحلوة
وتين : تي غير امشي اقلب عني وجهك البارد وتحشم اشوي على طولك
يزن : لا انتحشم على طولي لا عرضي .. نرجع نلقى العشا واتي .. والا يصير فيها كلام تاني .. وانتي تعرفي وغمزلها بعينه باستفزاز وطلع .
وخشت وتين دارت طاسة قصب لجدها وقعمزت اتهدرز معاه .
***
يزن شاب مرح ويحب الشقاوة وخاصة مع وتين يحب اينابشها ويستفزها .. وهي على قد ماتطيرلها منه بس مالهاش ملجأ الا هو .. صديق طفولتها وسند ليها في كل شي برغم من انه اصغر منها بسنة .. بس مايستغنوش عن بعض حتى في عز الازمات قلوبهم على بعض .. وبطبعه يحب يلبس ويتشيك وعلى اخر اناقة بحكم عمله موظف في مكتب عقاري 😎 .
.
.
.
وبعد كم يوم .
كان يوم جمعة وجا سليم وعيلته لحوش العيلة .. ورحب بيهم الحاج فرج وجدتهم نجية .. قعمزت عزيزة مرت سليم جنب عمتها نجية تطمن على صحتها :
شن اعويناتك توا
نجية : باهي الحمدلله مع الدوة اتحسنوا اشوي .
عزيزة : ايه يبوا المحافظة بس راه .
نجية : ان شاءالله .. وين خيري ماجى امعاكم .
عزيزة : خيري وتعرفيه ديمه مشغول
نجية : ربي يعاونه .. كان زوجتيه وتهنيتي عليه .
عزيزة : تي غير ايوافق ياعمتي مستعدة من بكرة نخطبله .. بس مزال حياة المرحومة ايشوف فيها بين اعيونه .
نجية : الله يرحمها ويوسع عليها .. كانت مرا طيبة .
وخشت غالية ام يزن تسلم عليهم وقعمزت معاهن :
اقعدوا باتوا كان هذا انقول لولدي يزن ايديرنا سهرية شوايا فالجنان .
عزيزة : واللهي على اخوك سليم .. انا معنديش مشكلة
غالية : كان على خوي اسليم توا انا انكلمه .
نجية : وكلمي اختك سالمة اتجيب اصغارها واتجي .
غالية : سالمة قالت جاية على المغرب .
وفي المطبخ امل و وتين ايجهزوا في سفاري الغدا .
وخش يزن بشقاوته ودوشته :
اوووه .. بنت خالي العسل .. شن حالك .
امل بتوتر : اكويسة .. هذا غداء جدي كان بترفعه .
يزن : وكنك تتكلمي من نص خشمك .
امل : امالا تبيني نتكلم من من طرف عيني .
يزن : خسارة واللهي .. عندي بنات خال سمحات واسلوب بكل مفيش .
وتين : يزن .. الاكل صقع .. اشوي ويبقى بارد .
يزن : بارد كيفكن ياباردات .. هاتي عنك بس
وتين : يزن بديريلنا شوايا فالليل .. واللهي خاطري فيها .. انتبلك الدجاج عادي
يزن : انتن وجه شوايا .. امي وعماتي بس والباقي يندس .
وتين : خزي عليك .. انا قبل بنزبطلك الامور مع ...؟ وغمزت بطرف عينها اتشر على 👈 امل 😉.. يزن فرح وابتسم :
لو هكي .. حاضر من اعيوني .. وغمزلها 😉 وطلع .
امل ها احكيلي وتين .. كيف شفتيه ؟؟؟
وتين : ارتعبت ودق قلبها بقوة :
من ؟
امل بجدية : بدر ولد خالتي ..
وتين بتوتر وتلبك : عادي .. مش عارفة امولة .. بس وانتي طالعة معاي من حوشهم شفته بلمحة بصر .. تعرفي ماقدرتش حتى نبتسم في وجهه .. بدر تغير واجد .. حتى في ملامحه وتعابير وجهه .. حاسة روحي شفت انسان غريب مانعرفاش
امل بتنهيدة اسى : ايه صح تغير ودار لحية .. هم خمسة سنين يعني عمر بحاله .
وتين مسحت دمعة طاحت من عينها وغيرت الموضوع وابتسمت :
تعرفي اليوم عيد ميلاد جداي .. شن رايك انديرولها عيد ميلاد 😊
امل بضحكة : تي واللهي صحبتك مع ولد عمتك هالمجنون مادارت فيك خير 😄
وتين : تعرفي يزن يحب هالاجواء .. خلينا انكملوا شغل المطبخ وبعدين نتفق انا وياه .
امل : اتفقي ياحنة .. المهم اطلعوني برا برامجك الصامطة هذه .
وتين : اكيد حنحتاجوا مساعدتك ياقلبي ولو .
.
.
.
بدر في داره واقف قدام المرايا وسارح في عالم تاني .. طقت اخته الصغيرة نورة 17 سنة .. تقرا تانية تانوي .. كانت لامة شعرها فتولة فوق وخصلات نازلة من الجنب وتوتة بازيلي هادي وكتبها في يدها :
بدر .. اشرحلي هذه مافهمتاش .. التفتله بدر بضيق من الجبس اللي في يده اليمين :
جيتي في وقتك .. تعالي سكريلي ازرار القميص .
حطت اكتبها على جنب وقربت منه تسكر في الازرار :
باهي توا بتساعدني في الدرس والا شنو .
بدر ولع دخانه :
باهي ديريلي فنجان قهوة وتعالي .
نورة بتذمر : بس انا منعرفش اندير قهوة .
بدر : كلمي اخواتك .. جود او هناء .
نورة : جود مشت مع امي ويزيد للسوق ايجيبوا حاجات الخطبة .. وهناء مشغولة بالغدا .
بدر : باهي قعمزي .. وافتحي عالصفحة وركزي معاي .
نورة : باهي تمام ..
بدر : فجأة خطر على باله سؤال :
ءءء خالتي لما جت هاديك المرة جى معاها حد .
نورة بعفوية : ايه جت معاها بنتها امل .. وطول الوقت فالدار هي وهناء راسين في شيشة .
بدر : نقصد حد من العيلة .. يعني عيلتهم .
نورة : انا ماشفت حد .. بس هناء قالت جت بنت عمها خشت عالسريع وطلعت .
بدر بلع ريقه بندم وحسرة وناض واقف بألم ووجع في قلبه :
باهي ليش ماقلتولي .
نورة باستغراب : كيف انقولك يعني ؟
بدر حس على روحه :
لا مفيش .. وقعد ماشي جاي فالدار وشاغل تفكيره .. وفجأة طلع مش شايف قدامه .. واتصل
بصاحبه وجاره في نفس الوقت :
معتز انت وين
مغتز : فالحوش .. توا طالع اتصلوا بيا الشباب وماشي انكسد معاهم
بدر : تمام جاي معاك انا برا .
معتز : بدر انت عارف جو الشباب
بدر : ايه عارف .. مضايق ومخنوق ونبي ننسى
معتز : تمام اهو جايك .
معتز كان جار بدر من جماعة السكير والحشيش .. بس من وقت للتاني مش ديمة .. وبدر اللي كان ينصح فيه ايبعد عن عالم الوسخ اللي هو فيه ويضطر احيانا ايهدده ..
.
.
.
وفالليل ..
قعمزوا العيلة مع بعض بعدما ماجت سالمة واصغارها عندها تلاتة اصغار اكبر واحد صف سادس ابتدائي .. وطلعت امل ووتين يرتبوا للاجواء الشوايا في الليل واتصلت وتين بيزن :
يزن
يزن : عيونه
وتين : نبي نطلب منك طلب
يزن : تفضلي ياقلبي
وتين : الله محلاك .. جوك حلو لما تكون رايق
يزن : مهو كنت انكلم فالعسل اللي عندي شي طبيعي بنروق
وتين : بارد وصامط
يزن : عارف روحي ومع هذا ماتقدريش تستغني عني وعن خدماتي ياقلبي . ها شنو طلبك
وتين : اليوم عيد ميلاد جداي ونبوا نديرولها حفلة بسيطة مع الشوايا .
يزن : وااااو عليك جو انتي .. وكنك ماقلتيلي مبدري
وتين : مهو كنت مشغولة في المطبخ .. المهم توا انت عارف شن بدير وكيف تتصرف .
يزن : اكيد ابعتيلي الطلبات والفلوس اهم حاجة وكل شي ايجيك لعندك .
وتين : تمام اني عندي مبلغ كويس وانت اتصرف في الباقي .
يزن : شوفي بنت عمك هالشحيحة بلكي اتساعدنا اشوي
وتين : خزي عليك .. واللهي امولة مفيش اكرم منها .
يزن : باهي عطيني انكلمها . شافت لامل وضحكت :
اهي معاك .. ومدت التليفون ل امل وضحكت :
امل بتنرفيز : ايوه .. شن تبي .
يزن : عليك منطق .. كيف شن تبي .. اعتبري روحك تكلمي في حبيبك هكي تقوليله شن تبي .
امل زادت عصبت : لا حبيبي ولا قريبي .. هات مالاخير .
يزن : اخ منك بس .. ايجي يوم وتحتاجيلي .. صدقيني مش ح تلقي غيري يقف معاك .
امل بكبرياء : اطمن مش ح نحتاجلك .
يزن : باهي ادفعي فلوس كان عندك .
امل : اهو انت اللي محتاجلي .. واطمن مش حتقصر معاكم .
يزن : والله فيك الخير .. يلا دقايق وانكون عندكم ياقلبي .
امل : قلبي في عينك .. مصح وجهك وصكرت .
ووتين ميتة عليا بالضحك :
والله يزون جو عليه لو توافقي امولة 🤭.
امل : تي بلاهي فكيني منه هالصامط .. يلا نوضي تبلي اللحم وانا خلي انوتي الحاجات ......

يتبع .....

تعليقاتكم وتفاعلكم على بداية الرواية لو عجبتكم حتى نستمر في تنزيل الحلقات ./ سوسن الأزهر /